Di Fɔs Kiŋ we Rul na Izrɛl

LUK Samiɛl we i de tɔn ɔyl na di man in ed. Na so dɛn bin de du to pɔsin we fɔ bi kiŋ. Na Jiova tɛl Samiɛl fɔ tɔn di ɔyl na Sɔl in ed. Di ɔyl na wan spɛshal ɔyl we gɛt fayn smɛl.

Sɔl bin tink se i nɔ fit fɔ bi kiŋ. I tɛl Samiɛl se: ‘A kɔmɔt na di trayb we nem Bɛnjamin, na in smɔl pas ɔl di ɔda trayb dɛn na Izrɛl. So wetin mek yu se a go bi kiŋ?’ Jiova lɛk Sɔl bikɔs i nɔ de mek insɛf big ɛn i nɔ de mek lɛk se i impɔtant pas ɔda pipul dɛn. Na dat mek Jiova pik am fɔ bi kiŋ.

Bɔt Sɔl nɔto pɔsin we po. In na impɔtant pɔsin. I kɔmɔt na famili we jɛntri, ɛn i bin tɔl ɛn fayn. I gɛt ayt pas ɔlman na Izrɛl! Sɔl ebul rɔn, ɛn i gɛt trɛnk bad. Di pipul dɛn gladi we Jiova pik Sɔl fɔ bi kiŋ. Dɛn ɔl bigin ala se: ‘Lɛ di kiŋ gɛt lɔng layf!’

Di Izrɛlayt dɛn ɛnimi dɛn na pipul dɛn we ebul fɛt. Dɛn stil bin de du bad bad tin dɛn to di Izrɛlayt dɛn. We Sɔl dɔn bi kiŋ fɔ sɔm tɛm, di Amɔnayt dɛn kam fɛt di Izrɛlayt dɛn. Bɔt Sɔl gɛda bɔku fɛtman dɛn, ɛn i win di Amɔnayt dɛn. Dis mek di pipul dɛn gladi fɔ Sɔl.

Sɔl mek di Izrɛlayt dɛn win bɔku fɛt. Wan pan Sɔl in pikin dɛn gɛt maynd. Na in nem Jonɛtan. I ɛp di Izrɛlayt dɛn fɔ win bɔku fɛt. Di Filistin dɛn stil bad pas ɔl di ɔda ɛnimi dɛn we di Izrɛlayt dɛn gɛt. Wan de, bɔku bɔku Filistin dɛn kam fɔ fɛt di Izrɛlayt dɛn.

Samiɛl tɛl Sɔl fɔ wet fɔ am te i kam fɔ kam mek sakrifays to Jiova. Bɔt Samiɛl nɔ kam kwik. So Sɔl mek di sakrifays fɔ insɛf bikɔs i fred se di Filistin dɛn go kam bigin fɛt dɛn. We Samiɛl kam, i tɛl Sɔl se Sɔl dɔn du wetin Jiova nɔ want. Samiɛl tɛl am se: ‘Jiova go pik ɔda pɔsin fɔ bi kiŋ na Izrɛl.’

Leta, Sɔl du wan ɔda tin we Jiova nɔ want. So Samiɛl tɛl am se: ‘Fɔ du wetin Jiova want bɛtɛ pas fɔ mek sakrifays. Jiova nɔ go mek yu kɔntinyu fɔ bi kiŋ na Izrɛl bikɔs yu nɔ de du wetin i want.’

Wi lan fayn lɛsin na dis stori. I sho wi se i fayn fɔ du wetin Jiova want ɔltɛm. I sho wi bak se pɔsin we gud kin chenj ɛn bi bad pɔsin. Wi nɔ want fɔ bi bad pɔsin, nɔto so?