Wetin Fɔ Du if Pɔsin Sik na di Famili?

1, 2. Aw Setan bin yuz prɔblɛm ɛn sik fɔ mek Job pwɛl in padi biznɛs wit Gɔd?

DƐN go mɔs dɔn de tɔk bɔt Job as pɔsin we bin gɛt gladi at na in famili. Di Baybul se, “nɔbɔdi nɔ bin de na di ist, we jɛntri pas am.” I bin gɛt tɛn pikin dɛn, sɛvin bɔy pikin dɛn ɛn tri gyal pikin dɛn. I bin ebul fɔ kia fɔ ɔlman na in famili. Di tin we bin impɔtant pas ɔl na dat, na in kin de bifo we i kam pan Gɔd biznɛs ɛn i bin rili bisin bɔt in pikin dɛn padi biznɛs wit Jiova. Na ɔl dis mek dɛn bin gɛt wanwɔd ɛn gladi at na dɛn famili.—Job 1:​1-5.

² Setan we na Jiova in men ɛnimi, bin de si wetin Job bin de du. Ɔltɛm Setan kin de fɛn we fɔ pwɛl pipul dɛn padi biznɛs wit Gɔd, so i bin atak Job bay we i bin pwɛl in famili we bin gɛt gladi at. I mek “sofut kɔba in wanol bɔdi frɔm ed to fut.” Setan bin op se we i yuz prɔblɛm ɛn sik, dat go mek Job pwɛl in padi biznɛs wit Gɔd.—Job 2:​6, 7.

3. Wetin na sɔm tin dɛn we bin de sho aw Job in sik bin de?

³ Di Baybul nɔ sho us patikyula sik Job bin gɛt, bɔt i sho di tin dɛn we bin de apin to am. I bin gɛt tumbu dɛn na in bɔdi, ɛn we di sofut kin pil pil, di say we di kanda de kɔmɔt kin rɔtin. In mɔt ɛn in bɔdi bin de smɛl bad. I bin gɛt siriɔs pen. (Job 7:​5; 19:​17; 30:​17, 30) We di pen bin de mɔna am, i kin sidɔm insay ashis ɛn krach in bɔdi wit broko kɔntri pɔt. (Job 2:​8) I bin rili sɔri fɔ si!

4. Wan wan tɛm, wetin kin apin na famili?

⁴ Wetin yu go du if na yu bin gɛt dis kayn sik? Tide, Setan nɔ de mek Gɔd in savant dɛn sik lɛk wetin i bin du to Job. Bɔt stil, bikɔs wi nɔ pafɛkt, wi gɛt tin dɛn we de mek wi wɔri, ɛn di kayn we aw di wɔl dɔn bad, ɔl dɛn tin ya kin mek wan wan tɛm, pɔsin kin sik na di famili. Pan ɔl we wi kin tray fɔ kia fɔ wi wɛlbɔdi biznɛs, wi ɔl kin sik ɛn sɔm pan wi kin sɔfa lɛk aw Job bin sɔfa. I rili nɔ kin izi we pɔsin sik na wi famili. So lɛ wi tɔk bɔt aw di Baybul go ɛp wi fɔ bia wit dis kayn ɛnimi we mɔtalman gɛt.—Ɛkliziastis 9:​11; Sɛkɛn Lɛta To Timoti 3:​16.

AW YU KIN FIL WE PƆSIN SIK NA DI FAMILI?

5. If pɔsin sik fɔ shɔt tɛm wetin ɔda pipul dɛn na di famili kin du?

⁵ I nɔ kin izi we wi gɛt tin dɛn we de ambɔg aw wi dɔn yus fɔ du tin, mɔ if pɔsin sik fɔ lɔng tɛm na di famili. Ilɛksɛf na shɔt tɛm di pɔsin sik fɔ, wi kin nid fɔ ajɔst di tin dɛn we wi de du, du tin dɛn we de sho se wi de sɔri fɔ di pɔsin, ɛn du ɔltin fɔ ɛp di pɔsin. Di wan dɛn we nɔ sik na di famili nɔ fɔ mek nɔys so dat di wan we sik go ebul fɔ rɛst. Dɛn kin ivin lɛf fɔ du sɔm tin dɛn. Insay bɔku famili dɛn ivin smɔl pikin dɛn kin sɔri fɔ di pɔsin we sik pan ɔl we wan wan tɛm nid go de fɔ mɛmba dɛn se dɛn fɔ tek tɛm. (Lɛta Fɔ Kɔlɔse 3:​12) Bɔku tɛm we pɔsin nɔ kin sik fɔ lɔng tɛm, di ɔda pipul dɛn na di famili kin rɛdi fɔ du ɛnitin fɔ ɛp di pɔsin. Apat frɔm dat, ɛnibɔdi we sik na di famili go want fɔ mek dɛn trit am da sem kayn we de.—Matyu 7:​12.

6. Wetin ɔda pipul dɛn na di famili kin du if dɛn fambul sik siriɔs wan ɛn fɔ lɔng tɛm?

⁶ Wetin fɔ du if di sik jɔs kam wantɛm wantɛm, i rili siriɔs, ɛn di pɔsin sik fɔ lɔng tɛm? Fɔ ɛgzampul, wetin fɔ du if pɔsin na di famili gɛt strok ɔ i nɔ ebul du natin bikɔs i gɛt kansa, ɔ ɔda kayn bad sik? Ɔ wetin fɔ du if pɔsin na di famili gɛt prɔblɛm wit in ed? Di fɔs tin we wi kin du na fɔ sɔri fɔ di pɔsin, bikɔs wi de fil am we i de sɔfa. Di sɔri we wi de sɔri fɔ di pɔsin kin mek wi du ɔda tin dɛn. We di ɔda pipul dɛn na di famili si se di sik we di wan pɔsin sik de afɛkt dɛn ɛn mek dɛn nɔ ebul fɔ du wetin dɛn want fɔ du, dat kin mek dɛn fil bad. Dɛn kin tink se: “Wetin mek dis kayn tin fɔ apin to mi?”

7. Aw Job in wɛf bin fil bɔt di sik we in man bin sik? Wetin i bin fɔgɛt?

⁷ Na sɔntin lɛk dat go mɔs dɔn de na Job in wɛf in maynd. Mɛmba se in pikin dɛn bin dɔn day. As dɛn tin dɛn de bin de apin, i go mɔs dɔn de fil bad. As i de si aw in man we bin gɛt wɛlbɔdi de sɔfa wit pen ɛn wan bad bad sik, i tan lɛk se i fɔgɛt bɔt di impɔtant tin we pas ɔl di prɔblɛm dɛn we dɛn bin de gɛt, dat na di fayn padi biznɛs we in ɛn in man bin gɛt wit Gɔd. Di Baybul se, “In wɛf aks am se, wit ɔl wetin dɔn bi, i stil de waka tret wit PAPA GƆD?” I tɔk bak se: “If Job nɔ go kɔs PAPA GƆD wantɛm ɛn day.”—Job 2:​9.

8. If pɔsin sik na di famili, us skripchɔ go ɛp di ɔda wan dɛn na di famili fɔ tink di rayt we?

⁸ Bɔku pipul dɛn kin fil bad, dɛn kin ivin vɛks we dɛn kin chenj di tin dɛn we dɛn dɔn yus fɔ du bikɔs ɔda pɔsin sik. Bɔt stil, pɔsin we na Kristian we gɛt sɛns go tink se na chans i dɔn gɛt fɔ sho se i rili lɛk di pɔsin we sik. Di Baybul se: “If una lɛk una kɔmpin mɔtalman, una go de bia wit dɛn; una go gɛt gud at fɔ dɛn; . . . Una nɔ go want mek una yon biznɛs nɔmɔ go bifo . . . una go ebul bia ɔltin we pipul du una; una go biliv gud tin bɔt pipul ɔltɛm; . . . ɛn una nɔ go tap fɔ lɛk una kɔmpin mɔtalman wɛn tin traŋa.” (Fɔs Lɛta Fɔ Kɔrint 13:​4-7) Bifo yu alaw di bad we aw yu de fil fɔ bi di men tin we yu de tink bɔt, i go bɛtɛ fɔ mek yu tray tranga wan fɔ mek yu kɔntrol di we aw yu de tink.—Prɔvabs 3:​21.

9. Wetin go ɛp di ɔda pipul dɛn na di famili fɔ sav Jiova ɛn nɔ fɔ fil bad we wan pɔsin sik siriɔs wan?

⁹ Wetin fɔ du fɔ mek ɔlman nɔ fil bad ɛn kɔntinyu fɔ du wetin Gɔd want pan ɔl we wan pɔsin sik siriɔs wan na di famili? Na tru se difrɛn we dɛn de fɔ trit ɛn kia fɔ pɔsin we sik. Bɔt i nɔ go fayn fɔ sho us patikyula tritmɛnt fɔ gi pɔsin we sik ɔ aw fɔ kia fɔ di pɔsin na os. Bɔt na fɔ mɛmba se na Jiova “de es udat fɔdɔm.” (Sam 145:​14) Kiŋ Devid bin rayt se: “Pɔsin we de sɔri fɔ udat nɔ ebul insɛf go gɛt blɛsin. PAPA GƆD go pul in ed kɔmɔt pan trɔbul . . . If i sik sɛf, PAPA GƆD go put an pan am ɛn mek i grap nain sik bed.” (Sam 41:​1-3) Jiova de ɛp in savant dɛn fɔ kɔntinyu fɔ sav am, pan ɔl we dɛn go gɛt prɔblɛm dɛn we kin at fɔ bia. (Sɛkɛn Lɛta Fɔ Kɔrint 4:​7) Bɔku famili dɛn we dɔn gɛt pipul dɛn we sik siriɔs wan dɔn gri wit wetin wan pan di man dɛn we rayt di Sam buk bin tɔk, we i se: “A dɔn sɔfa bɔku; PAPA GƆD, duya nɔ mek a day yet lɛkɛ aw yu bin dɔn prɔmis.”—Sam 119:​107.

WETIN FƆ DU WE YU AT PWƐL?

10, 11. (a) Us impɔtant tin we go ɛp famili dɛn fɔ bia if pɔsin sik? (b) Aw wan uman bin ebul fɔ bia we in man bin sik?

¹⁰ Wan parebul na di Baybul se: “If yu bɔdi sik, yu kin manej bɔk ɔp.” (Prɔvabs 18:​14) Bɔt if pɔsin in at pwɛl, i nɔ kin izi fɔ bia. We pɔsin sik na di famili, dat kin ambɔg di pɔsin we sik ɛn di wan ol famili. Bɔt “udat gɛt kolat de gɛt wɛl bɔdi.” (Prɔvabs 14:​30) Di we aw di famili de fil ɔ tink, kin mek dɛn ebul bia ɔ dɛn nɔ ebul bia we wan pɔsin sik na di famili.—Luk Prɔvabs 17:​22.

¹¹ Wan uman we bin jɔs mared fɔ siks ia, bin gɛt fɔ bia we in man nɔ bin ebul fɔ du bɛtɛ tin fɔ insɛf igen bikɔs i bin gɛt strok. I bin tɔk se: “Mi man nɔ bin ebul fɔ tɔk fayn igen ɛn dat bin de mek i nɔ izi fɔ tɔk wit am. I kin rili mɔna fɔ mek a tray fɔ ebul ɔndastand wetin i kin tray fɔ se.” Tray fɔ imajin aw di man insɛf go dɔn de fil bad bikɔs i nɔ bin izi fɔ am. Wetin dɛn bin du? Pan ɔl we dɛn bin de fa we frɔm di kɔngrigeshɔn, di sista kin tray tranga wan fɔ no di nyu we dɛn aw wi de ɔndastand tin dɛn na di ɔganayzeshɔn, ɛn fɔ de rid di Wachtawa ɛn Awake! magazin dɛn. Dis bin ɛp am fɔ kɔntinyu fɔ gɛt padi biznɛs wit Gɔd ɛn fɔ kia fɔ in man te i day afta 4 ia.

12. Lɛk wetin bin apin to Job, aw di wan we sik kin ɛp dɛn fambul dɛn we de kia fɔ dɛn?

¹² Na Job insɛf bin gɛt di sik, bɔt i bin bia. Job bin aks in wɛf se, “if dɛn fɔ gladi we PAPA GƆD du gud fɔ dɛn bɔt kɔmplen we bad tin bi to dɛn.” (Job 2:​10) No wɔnda Jems bin tɔk bɔt Job as pɔsin we de peshɛnt ɛn ebul fɔ bia! Jems 5:​11 se: “Una no aw Job bin bia lɔŋ wɛn i bin de sɔfa, ɛn una si aw Gɔd kam blɛs am. Ɔl dat fɔ mek una no se fɔ tru, Gɔd de sɔri fɔ wi wɛn wi de sɔfa.” Semweso, di kayn we aw di wan we sik de bia wit in sik, dɔn ɛp di wan dɛn we de kia fɔ dɛn fɔ ebul bia wit dɛn.

13. Wetin mek di wan dɛn we sik nɔ fɔ kɔmpia dɛnsɛf wit di wan dɛn we nɔ sik na di famili?

¹³ Bɔku pan di wan dɛn we dɔn bia we wan pan dɛn fambul sik, dɔn gri se i rili nɔ kin izi fɔ biliv se dɛn fambul rili sik. Dɛn dɔn kam fɔ no se di we aw dɛn kin si di prɔblɛm rili impɔtant. Fɔ chenj ɛn ajɔst di we aw dɛn de du tin na di famili, nɔ kin rili izi. Bɔt if di pɔsin tray tranga wan, i go ebul fɔ yus to wetin de apin to am. We yu de du dis, i go fayn mek yu nɔ kɔmpia yusɛf wit ɔda pipul dɛn we nɔ sik na di famili bay we yu de tink se ɔltin fayn fɔ dɛn! Nɔbɔdi nɔ rili no us prɔblɛm di ɔda pɔsin de bia. Ɔl Kristian go gɛt kɔrej frɔm wetin Jizɔs bin tɔk we i se: “Una kam to mi, una ɔl we dɔn taya fɔ tot ebi lod, a go pul di lod kɔmɔt na una ed, mek una go blo.”—Matyu 11:​28.

UNA TƆK BƆT IMPƆTANT TIN DƐN

14. Wetin na sɔm impɔtant tin dɛn we di famili nid fɔ tɔk bɔt?

¹⁴ If pɔsin sik siriɔs wan na di famili, i go fayn fɔ mɛmba di advays we de na di Baybul we se: “If yu gɛt bɔku advays, bɛtɛ go fala yu.” (Prɔvabs 15:​22) I pɔsibul fɔ mek ɔlman na di famili gɛda ɛn tɔk bɔt wetin dɛn fɔ du fɔ kia fɔ di pɔsin we dɔn sik? I go rili fayn fɔ pre we una de du dat ɛn yuz Gɔd in Wɔd fɔ ɛp una. (Sam 25:​4) Wetin na sɔm tin dɛn we una go tɔk bɔt we una gɛda? Una go nid fɔ disayd bɔt mɔni biznɛs, di kayn tritmɛnt we fɔ gi di pɔsin, ɛn ɔda tin dɛn we di famili go nid fɔ du. Udat go bi di men pɔsin we go kia fɔ di wan we sik? Aw ɔlman na di famili go sɔpɔt di wan we de kia fɔ di pɔsin we sik? Aw di tin dɛn we una dɔn arenj go afɛkt ɔlman na di famili? Aw una go arenj fɔ mek di men pɔsin we de kia fɔ di wan we sik, kɔntinyu fɔ sav Gɔd? Aw una go ɛp am fɔ gɛt ɔda tin dɛn we i go nid?

15. Aw Jiova de ɛp famili dɛn we gɛt pɔsin we sik?

¹⁵ We yu de pre to Jiova ɔltɛm fɔ mek i gayd yu, tink gud wan bɔt wetin yu de rid insay di Baybul, ɛn fala di advays dɛn we de de, yu go gɛt bɔku blɛsin dɛn. Nɔto ɔltɛm pɔsin we sik na di famili kin wɛl. Bɔt we yu abop pan Jiova ɔltɛm, dat go ɛp fɔ mek yu ebul bia ilɛk wetin apin. (Sam 55:​22) Wan pan di man dɛn we rayt di Sam buk, bin rayt se: “PAPA GƆD na yu lɔv nɔmɔ kin gi mi kɔrej. Wɛn a kin ɛŋ-at na yu nɔmɔ ebul kɔrej mi dɔn a gladi.”—Sam 94:​18, 19; rid bak Sam 63:​6-8.

ƐP DI PIKIN DƐN

16, 17. If wan pan di pikin dɛn sik, wetin yu go tɛl di ɔda pikin dɛn bɔt di sik?

¹⁶ We pɔsin sik siriɔs wan na di famili, dat kin afɛkt di pikin dɛn. I impɔtant fɔ mek mama ɛn papa dɛn ɛp dɛn pikin dɛn fɔ ɔndastand wetin de apin na di famili, ɛn wetin di pikin dɛn kin du fɔ ɛp. If na wan pan di pikin dɛn sik, di ɔda pikin dɛn fɔ ɔndastand se di atɛnshɔn ɛn kia we una de gi to di wan we sik nɔ min se una lɛk am pas dɛn. Bifo mama ɛn papa dɛn alaw di ɔda pikin dɛn we nɔ sik fɔ gɛt dɛn kɔmpin na at ɔ bigin jɛlɔs di wan we sik, dɛn fɔ ɛnkɔrej di wan dɛn we nɔ sik fɔ gɛt wanwɔd as dɛn de tray fɔ kia fɔ di wan we sik.

¹⁷ Pikin dɛn kin ɔndastand mɔ if dɛn mama ɛn papa dɛn tray fɔ ɔndastand aw dɛn de fil bifo dɛn bigin ɛksplen bɔku tin dɛn we at fɔ ɔndastand. Dat go ɛp dɛn fɔ rili ɔndastand aw di wan we sik de fil. If di ɔda pikin dɛn we nɔ sik si se di sik we dɛn kɔmpin sik de mek i nɔ ebul du tin dɛn we dɛn nɔ kin tek mek ɛnitin, dat go ɛp dɛn mɔ fɔ “lɛk dɛnsɛf lɛkɛ brɔda ɛn sista” ɛn “fɔ gɛt sɔri at” fɔ dɛn kɔmpin.—Pita In Fɔs Lɛta 3:​8

18. Aw mama ɛn papa dɛn go ɛp dɛn pikin dɛn we dɔn big fɔ ɔndastand wetin de apin na di famili? Aw dat go bɛnifit dɛn?

¹⁸ If di pikin dɛn dɔn big, mama ɛn papa dɛn fɔ ɛp dɛn fɔ no se tin nɔ izi na di famili ɛn ɔlman nid fɔ ajɔst sɔm tin dɛn we dɛn bin dɔn yus fɔ du. Bikɔs mama ɛn papa dɛn de pe fɔ di tritmɛnt fɔ di wan we sik, dat kin mek dɛn nɔ ebul fɔ du ɔl tin we dɛn go want fɔ du fɔ di ɔda pikin dɛn. Yu tink se di ɔda pikin dɛn go fil bad bɔt dis ɛn tink se una nɔ want fɔ gi dɛn di tin dɛn we dɛn nid? Ɔ dɛn go ɔndastand wetin de apin ɛn rɛdi fɔ ajɔst? I lɛf to di we aw mama ɛn papa dɛn tɔk bɔt dis to dɛn pikin dɛn ɛn di kayn we aw di famili de. Fɔ tru, di sik we wan pɔsin sik na di famili dɔn ɛp fɔ tren di pikin dɛn fɔ du wetin Pɔl bin advays we i se: “Una nɔ fɔ jɛs de du dɛn tin we una want fɔ du nɔmɔ, una nɔ fɔ du ɛnitin bikɔs una want mek dɛn prez una; una nɔ fɔ prawd, una fɔ fil se ɔda pipul bɛtɛ pas una. Una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul.”—Lɛta Fɔ Filipay 2:​3, 4.

WETIN YU TINK BƆT ƆSPITUL TRITMƐNT?

19, 20. (a) Us wok di wan we de oba di famili gɛt we pɔsin sik na di famili? (b) Pan ɔl we di Baybul nɔto buk bɔt wɛlbɔdi biznɛs, aw i de ɛp wi fɔ kia fɔ pɔsin we sik na di famili?

¹⁹ Kristian dɛn we de tink di rayt we, kin gri fɔ tek tritmɛnt wans i nɔ pwɛl Gɔd in lɔ. We wan pɔsin na di famili sik, di ɔda wan dɛn kin tray tranga wan fɔ ɛp am so dat i nɔ go sɔfa. Ɛn di wan dɛn we sabi bɔt wɛlbɔdi biznɛs kin tɔk difrɛn tin dɛn bɔt di sik bɔt una go nid fɔ tink gud wan bɔt wetin fɔ du. Dis biɛn tɛm nyu sik dɛn jɔs de kam ɛn bɔku pan dɛn nɔ gɛt mɛrɛsin. Ɛn sɔntɛnde i kin ivin at fɔ no di rayt sik we pɔsin gɛt. If yu na Kristian, wetin yu fɔ du?

²⁰ Pan ɔl we wan pan di man dɛn we rayt di Baybul na bin dɔktɔ ɛn di apɔsul Pɔl bin advays in padi Timoti bɔt in wɛlbɔdi biznɛs, di Baybul nɔto buk we de fɔ wɛlbɔdi biznɛs, i jɔs de fɔ ɛp wi no aw fɔ liv wi layf ɛn gɛt fayn padi biznɛs wit Gɔd. (Lɛta Fɔ Kɔlɔse 4:​14; Fɔs Lɛta To Timoti 5:​23) So we i kam pan us tritmɛnt fɔ gi pɔsin we sik, di wan dɛn we de oba di famili fɔ tink di rayt we ɛn disayd wetin fɔ du. Sɔntɛm dɛn kin fil se dɛn nid fɔ gɛt mɔ advays bɔt us tritmɛnt fɔ tek. (Luk Prɔvabs 18:​17.) Dɛn go rili want di rayt tritmɛnt we go mek di pɔsin wɛl, so bɔku pipul dɛn kin go to dɔktɔ we go ebul fɔ ɛp dɛn. Sɔm dɛn kin tink se i bɛtɛ fɔ mek dɛn mɛn dɛn di kɔntri we. Dis bak na tin we pɔsin go disayd fɔ insɛf. Stil, we i kam pan wɛlbɔdi biznɛs, Kristian dɛn nɔ fɔ taya fɔ mek ‘Gɔd in wɔd tan lɛk lamp fɔ sho dɛn rod.’ (Sam 119:​105) Dɛn de kɔntinyu fɔ fala di advays dɛn we de insay di Baybul. (Ayzaya 55:​8, 9) Dɛn nɔ de go to mɛrɛsinman ɔ tek ɛni mɛrɛsin we go mek dɛn put an pan juju biznɛs ɔ ɛni tritmɛnt we go pwɛl Gɔd in lɔ.—Sam 36:​9; Di Apɔsul Dɛn Wok [Akt] 15:​28, 29; Rɛvɛleshɔn 21:​8.

21, 22. Aw wan Eshian uman bin yuz wan advays na di Baybul? Aw wetin i bin disayd fɔ du pruv se na di rayt tin i bin du?

²¹ Lɛ wi tɔk smɔl bɔt wetin apin to wan yɔŋ Eshian uman. Afta shɔt tɛm we i bigin stɔdi di Baybul wit Jiova Witnɛs dɛn, i bɔn wan gyal pikin we bin primachɔ. Di uman in at bin pwɛl bad bad wan we di dɔktɔ tɛl am se di pikin go bi aflaun ɛn i nɔ go ɛva ebul fɔ waka. Di dɔktɔ advays am se mek i go lɛf di pikin na say usay dɛn de kia fɔ dɛn aflaun dɛn. In man nɔ bin shɔ bɔt wetin fɔ du. Udat go ɛp di uman?

²² Di uman tɔk se: “A mɛmba sɔntin we a bin dɔn lan na di Baybul fɔ se ‘pikin na blɛsin we PAPA GƆD de gi ɛn mɔ so if na yu bɔn am.’” (Sam 127:​3) I disayd se, i go kɛr di “blɛsin” go na os ɛn kia fɔ am. Fɔs, tin nɔ bin izi fɔ am, bɔt di brɔda ɛn sista dɛn na di kɔngrigeshɔn usay i bin de bin de ɛp am ɛn i bin ebul mɛn in pikin pan ɔl we di pikin bin nid mɔ atɛnshɔn. Afta twɛlv ia, di pikin bin de go mitin ɛn ɛnjɔy fɔ kip kɔmpin wit di ɔda pikin dɛn na di kɔngrigeshɔn. Di uman tɔk se: “A gladi we di Baybul in advays ɛp mi fɔ du wetin rayt. Di Baybul ɛp mi fɔ gɛt gud kɔnshɛns bifo Jiova ɛn fɔ mek a nɔ du sɔntin we go mek a rigrɛt sote a day.”

23. Wetin di Baybul se we go kɔrej di wan dɛn we sik ɛn di wan dɛn we de kia fɔ dɛn?

²³ Wi nɔ go sik sote go. Di prɔfɛt Ayzaya bin se, “nɔbɔdi . . . nɔ go se, ‘A nɔ wɛl.’” (Ayzaya 33:​24) Da prɔmis de go kam tru insay di nyu wɔl we go kam jisnɔ. Te da tɛm de go kam, wi go nid fɔ bia wit sik ɛn day. Wi gladi bikɔs Gɔd in Wɔd de gayd wi. Di lɔ dɛn we de na di Baybul go bɛnifit wi sote go ɛn dɛn impɔtant pas mɔtalman lɔ dɛn we de chenj chenj. So pɔsin we gɛt sɛns go gri wit wetin wan pan di man dɛn we rayt di Sam buk bin rayt, we i se: “PAPA GƆD de tich wi wetin du fɔ wi nɔmɔ; dis na wetin rayt ɛn i de gi wi abop na layf . . . Yu kin abop pan PAPA GƆD fɔ kɔt kes bikɔs i nɔ gɛt wan bɛnbɛn . . . Wɛn a de du wetin i se, i de blɛs mi.”—Sam 19:​7, 9, 11.