Wetin Na di Bɛst Gift we Gɔd Dɔn Gi Wi?

1, 2. (a) Wetin go mek gift impɔtant to yu? (b) Wetin mek di day we Jizɔs day fɔ wi na di bɛst gift we dɛn go ɛva gi wi?

WETIN na di bɛst gift we dɛn dɔn ɛva gi yu? Fɔ lɛ gift impɔtant to pɔsin nɔ min se pas di gift dia pasmak. Fɔ tru, nɔto di mɔni we dɛn tek bay di gift go mek di gift impɔtant to yu. Bɔt na we dɛn gi yu di gift di tɛm we yu want am.

² Pan ɔl di gift dɛn we yu go want mek dɛn gi yu, wan gift de we bɛtɛ pas dɛn ɔl. Na Gɔd gi wi da gift de. Jiova dɔn gi wi bɔku gift dɛn, bɔt di wan we pas dɛn ɔl na we i mek in Pikin we na Jizɔs Krays, kam day fɔ wi. (Rid Matyu 20:​28.) Insay dis chapta, wi go si se di day we Jizɔs day na di bɛst gift we dɛn go ɛva gi wi bikɔs i de mek wi gɛt tru tru gladi at. Ɛn i de mek wi gɛt wetin wi nid na layf. We Jiova mek Jizɔs kam day fɔ wi, i sho se i rili lɛk wi.

WETIN JIOVA PUL WI PAN?

3. Wetin Jiova pul wi pan? Wetin go ɛp wi fɔ no aw Jizɔs in day impɔtant?

³ Jiova sɛn in Pikin fɔ kam day fɔ wi, so dat i go pul wi pan sin ɛn day. (Lɛta Fɔ Ɛfisɔs 1:​7) Fɔ lɛ wi no wetin dis min, wi fɔ tink bɔt wetin bin apin na di gadin we bin de na Idɛn. If wi want fɔ no aw di day we Jizɔs day fɔ wi impɔtant, wi fɔ no fɔs aw di gift we Adam lɔs bin impɔtant.

4. Aw Adam bin tan we i nɔ bin sin yet?

⁴ We Jiova bin mek Adam, i bin gi am layf we nɔ gɛt wan bɔt. Jɔs tink bɔt dat! Adam in bɔdi ɛn in maynd nɔ bin gɛt wan prɔblɛm; i nɔ bin fɔ ɛva sik, ol ɔ day. We Adam nɔ bin sin yet, in na bin spɛshal pɔsin to Jiova. Di Baybul se “Adam in papa na Gɔd.” (Lyuk 3:​38) So Adam na bin Gɔd in tayt padi, jɔs lɛk aw pikin kin de wit in papa we lɛk am. Jiova bin de tɔk to Adam. I bin de tɛl am wetin-ɛn-wetin i want am fɔ du.—Jɛnɛsis 1:​28-30; 2:​16, 17.

5. Wetin di Baybul min we i se Gɔd bin mek Adam “lɛk aw insɛf tan”?

⁵ Gɔd bin mek Adam “lɛk aw insɛf tan.” (Jɛnɛsis 1:​27, NW) Bɔt dat nɔ min se Adam ɛn Gɔd fiba pan ɔltin. Wi bin lan na Chapta 1 se Jiova na Spirit, wi nɔ de si am. (Jɔn 4:​24) So, Jiova nɔ gɛt mɔtalman bɔdi. We di Baybul tɔk se Gɔd mek Adam lɛk aw insɛf tan, min se Adam gɛt kwaliti dɛn we Gɔd gɛt. Sɔm pan dɛn kwaliti ya na lɔv, sɛns, pawa, ɛn fɔ du tin tret. Wan ɔda we aw Adam tan lɛk Gɔd na we i bin fri fɔ du ɛnitin we i want fɔ du. Adam nɔ bin tan lɛk mashin we na pas wetin dɛn mek am fɔ, na in i de du. Bɔt Adam bin ebul fɔ tink fɔ insɛf, ɛn disayd fɔ insɛf wetin i want fɔ du. If nɔmɔ i bin fɔ dɔn du wetin Jiova tɛl am fɔ du, i bin fɔ dɔn de sote go na dis wɔl.

6. Wetin Adam bin lɔs we i nɔ du wetin Gɔd tɛl am fɔ du? Wetin dat dɔn du to in pikin dɛn?

⁶ Gɔd bin tɛl Adam se i go day if i nɔ du wetin i want. Ɛn na dat bin apin. Di sin we Adam sin, mek i lɔs di pafɛkt layf we i bin gɛt ɛn ɔl di fayn fayn tin dɛn we i bin de ɛnjɔy. (Jɛnɛsis 3:​17-19) Apat frɔm dat, Adam bin mek di pikin dɛn we i go bɔn, dɛnsɛf lɔs ɔl dɛn fayn fayn tin ya. Gɔd in Wɔd se: “Na wan man mek sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.” (Lɛta Fɔ Rom 5:​12) Fɔ tru, na Adam mek wi ɔl de sin. Na dat mek di Baybul tɔk bak se Adam mek insɛf ɛn in pikin dɛn bi “sin in slev.” (Lɛta Fɔ Rom 7:​14) Nɔ op nɔ bin de fɔ Adam ɛn Iv bikɔs na bay wilful dɛn du wetin Gɔd tɛl dɛn nɔ fɔ du. Bɔt we wi, we na dɛn pikin dɛn, wisɛf nɔ gɛt op?

7, 8. Wetin na di tu tin dɛn we Jizɔs in day du fɔ wi?

⁷ Jiova pul wi pan sin ɛn day we i mek Jizɔs kam day fɔ wi. Di day we Jizɔs day, du tu tin. Fɔs, i bay mɔtalman bak. I tan lɛk di mɔni we dɛn kin pe fɔ fri pɔsin ɔ fɔ bay sɔntin bak. Di sɛkɔn tin we Jizɔs in day du na dat i pe fɔ Adam in sin. I jɔs tan lɛk di mɔni we dɛn kin pe we pɔsin pwɛl sɔntin we nɔto in yon. Fɔ ɛgzampul, if pɔsin gɛt animal, dɔn di animal go pwɛl ɔda pɔsin in prɔpati, di pɔsin we gɛt di animal fɔ pe di mɔni we ikwal to di tin we in animal pwɛl.

⁸ Udat go ebul fɔ pul wi pan di sin ɛn day we Adam put wi pan? Fɔ no di ansa, lɛ wi tɔk bɔt di day we Jiova mek Jizɔs kam day fɔ wi ɛn aw Jizɔs in day go bɛnifit wi.

WETIN JIOVA DU FƆ PUL WI PAN SIN ƐN DAY?

9. Wetin wi nid fɔ pe fɔ di kayn layf we Adam bin gɛt bifo i sin?

⁹ Di layf we Adam bin lɔs, na layf we nɔ bin gɛt wan bɔt. So, nɔ mɔtalman nɔ de we go ebul fɔ pe fɔ da kayn layf de bikɔs wi ɔl de sin. (Sam 49:​7, 8) So wi bin nid pɔsin we gɛt di sem kayn layf we Adam bin gɛt bifo i sin. Dis gri wit wetin de na di Baybul, we se: “Layf fɔ layf.” (Ditarɔnɔmi 19:​21, NW) So udat in layf go ikwal to di layf we Adam bin gɛt bifo i sin? Na pɔsin we in layf nɔ gɛt wan bɔt.—Fɔs Lɛta To Timoti 2:​6.

10. Wetin Jiova du fɔ pul wi pan sin ɛn day?

¹⁰ Wetin Jiova du fɔ pul wi pan sin ɛn day? I sɛn wan pan in enjɛl dɛn fɔ kam na di wɔl. Bɔt Jiova nɔ bin jɔs sɛn ɛniwan pan dɛn. Na di wan we i lɛk pas dɛn ɔl na in i sɛn; di wan we na in wangren Pikin. (Rid Jɔn In Fɔs Lɛta 4:​9, 10.) Dis Pikin bin rɛdi fɔ lɛf ɔltin na ɛvin ɛn kam na di wɔl. (Lɛta Fɔ Filipay 2:​7) Wi bin lan se Jiova tek di layf we dis Pikin bin gɛt na ɛvin, ɛn put am na Meri in bɛlɛ. Gɔd in oli spirit bin mek Jizɔs pafɛkt we Meri bɔn am ɛn sin nɔ bin gɛt natin fɔ du wit am.—Lyuk 1:​35.

11. Aw wangren pɔsin go ebul pul bɔku bɔku pipul dɛn pan sin ɛn day?

¹¹ Aw wangren pɔsin go ebul pul bɔku bɔku pipul dɛn pan sin ɛn day? Bifo wi ansa dis kwɛstyɔn, i go fayn mek wi no aw mɔtalman bigin sin. Mɛmba se, we Adam bin sin, i lɔs di pafɛkt layf we i bin gɛt. So, i nɔ bin ebul gi in pikin dɛn da kayn layf de. Bifo dat, na sin ɛn day i mek dɛn gɛt. Jizɔs, we di Baybul kɔl “di las Adam,” bin pafɛkt ɛn i nɔ bin ɛva sin. (Fɔs Lɛta Fɔ Kɔrint 15:​45) So Jizɔs tek Adam in ples fɔ sev wi frɔm sin ɛn day. Jizɔs du wetin Gɔd want we i kam day fɔ wi. Na in layf i yuz fɔ pe fɔ Adam in sin. Ɛn dis dɔn mek wi ɔl dɔn gɛt op.—Lɛta Fɔ Rom 5:​19; Fɔs Lɛta Fɔ Kɔrint 15:​21, 22.

12. Wetin Jizɔs sho Setan we i fetful to Gɔd te i day?

¹² Di Baybul bin tɔk bɔt ɔl di bad bad tin dɛn we dɛn du to Jizɔs bifo i day. Dɛn bit am, nel am pan stik ɛn dɛn kil am. (Jɔn 19:​1, 16-18, 30; rid mɔ bɔt dis na pej 204 to pej 206.) Wetin mek Jizɔs fɔ sɔfa so? Insay wan ɔda chapta, wi go lan se Setan bin se mɔtalman nɔ go fetful to Gɔd we bad tin mit am. Bɔt Jizɔs bin fetful to Gɔd pan ɔl we bad tin dɛn bin de mit am. So, i sho Setan se pɔsin we pafɛkt ɛn we fri fɔ du wetin i want, go ebul fetful to Gɔd ilɛksɛf bad tin mit am. Dis tin we Jizɔs du sho se na lay Setan bin de lay. Jiova go mɔs dɔn gladi we in Pikin bin fetful to am!—Prɔvabs 27:​11.

13. Aw Jiova pul wi pan sin ɛn day?

¹³ Aw Jiova pul wi pan sin ɛn day? Insay di de we mek 14 na di Ju pipul dɛn mɔnt we dɛn kɔl Naysan, insay di ia 33, Gɔd bin alaw pipul dɛn fɔ kil in Pikin. Na da we de Jizɔs bin gi in pafɛkt layf fɔ wi ɛn “na wan tɛm nɔmɔ i mek da sakrifays de ɛn di sakrifays gɛt pawa ɔltɛm.” (Di Ibru Pipul Dɛn 10:​10) Afta tri dez we Jizɔs day, Jiova gi am layf bak; bɔt na spirit layf Jiova bin gi am. We Jizɔs go na ɛvin, i gi Gɔd di pafɛkt layf we i bin sakrifays fɔ pe fɔ Adam in pikin dɛn sin. (Di Ibru Pipul Dɛn 9:​24) Jiova bin gladi fɔ di sakrifays we Jizɔs mek bikɔs na dat go mek i pul mɔtalman pan sin ɛn day.—Rid Lɛta Fɔ Rom 3:​23, 24.

AW JIZƆS IN DAY GO BƐNIFIT WI?

14, 15. Wetin wi fɔ du fɔ lɛ Gɔd fɔgiv wi fɔ wi sin dɛn?

¹⁴ Pan ɔl we wi kin du wetin nɔ fayn na Gɔd in yay, Jizɔs in day dɔn mek wi ɛnjɔy plɛnti blɛsin. Lɛ wi tɔk bɔt sɔm pan dɛn blɛsin ya.

¹⁵ I de mek Gɔd de fɔgiv wi fɔ wi sin dɛn. Bikɔs wi nɔ pafɛkt, i nɔ kin izi fɔ mek wi du wetin rayt. Wi ɔl kin tɔk sɔntin ɔ du sɔntin we nɔ fayn. Bɔt di day we Jizɔs day fɔ wi, de mek Gɔd “padin wi” fɔ wi sin dɛn. (Lɛta Fɔ Kɔlɔse 1:​13, 14) Bɔt fɔ lɛ Gɔd go fɔgiv wi fɔ wi sin dɛn, wi fɔ lɛf fɔ du bad. Dɔn wi fɔ pre to Jiova fɔ wi sin dɛn. Bɔt we wi de pre, wi fɔ biliv se Jizɔs bin dɔn kam day fɔ wi.—Rid Jɔn In Fɔs Lɛta 1:​8, 9.

16. Wetin go ɛp wi fɔ wɔship Gɔd wit klin at? Wetin mek i fayn fɔ gɛt da kayn at de?

¹⁶ I de mek wi at klin bifo Gɔd. If wi at nɔ klin bifo Gɔd, wi nɔ go gɛt wan op na layf, ɛn i go mek wi fil se wi na natin. Wi kin ebul fɔ wɔship Jiova wit klin at bikɔs Jizɔs in day de mek Jiova fɔgiv wi we wi sin. (Di Ibru Pipul Dɛn 9:​13, 14) Dis dɔn mek wi nɔ de fred fɔ tɔk to Jiova. Naw, wi ebul fɔ pre to am ɛnitɛm we wi want. (Di Ibru Pipul Dɛn 4:​14-16) We wi at klin bifo Gɔd, wi go fil gud bɔt wisɛf ɛn i go mek wi gɛt gladi at.

17. Wetin Jizɔs in day dɔn du fɔ wi?

¹⁷ I de mek wi gɛt op fɔ gɛt layf we go de sote go na Paradays. Insay di Lɛta Fɔ Rom 6:​23 di Baybul se: “Day na sin in pe, bɔt layf we go de sote go, nain Gɔd gi wi fri. Wi gɛt di layf we go de sote go bikɔs wi gɛt wanwɔd wit Jizɔs Krays we na wi Masta.” Insay Chapta 3 na dis buk, wi bin tɔk bɔt di fayn fayn tin dɛn we go de na Paradays. (Rɛvɛleshɔn 21:​3, 4) Na di day we Jizɔs day fɔ wi go mek wi ɛnjɔy ɔl dɛn fayn fayn tin dɛn de, lɛk wɛlbɔdi ɛn layf we go de sote go. Bɔt fɔ mek wi gɛt dɛn blɛsin ya, wi fɔ sho se wi gladi fɔ di gift we Gɔd dɔn gi wi.

AW WI GO SHO SE WI GLADI FƆ DI GIFT WE GƆD DƆN GI WI?

18. Wetin mek wi fɔ sho Jiova se wi rili gladi we i sɛn in Pikin fɔ kam day fɔ wi?

¹⁸ Wetin mek wi fɔ sho Jiova se wi rili gladi fɔ we i sɛn in Pikin fɔ kam day fɔ wi? We pɔsin yuz in tɛm ɛn in mɔni fɔ sɛn gift fɔ wi, dat kin mek wi fil fayn. Wi kin gladi fɔ no se di pɔsin we gi wi di gift, rili lɛk wi. Di day we Jizɔs kam day fɔ wi na di gift we pas ɔl di ɔda gift dɛn we Gɔd dɔn gi wi, bikɔs i nɔ bin rili izi fɔ Gɔd fɔ sɛn in wangren Pikin we i lɛk fɔ kam day fɔ wi. Insay Jɔn 3:​16 di Baybul se: “Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.” Di day we Jizɔs kam day fɔ wi sho se Jiova rili lɛk wi. I sho wi bak se Jizɔs insɛf lɛk wi, bikɔs i bin rɛdi fɔ kam day fɔ wi. (Rid Jɔn 15:​13.) Dis gift we Gɔd dɔn gi wi fɔ mek wi biliv tranga wan se Jiova ɛn in Pikin lɛk wi ɔl wan bay wan.—Lɛta Fɔ Galeshya 2:​20.

19, 20. Aw yu go sho se yu gladi we Jizɔs kam day fɔ wi?

¹⁹ Aw yu go sho se yu gladi we Jizɔs kam day fɔ wi? Di fɔs tin we yu fɔ du na fɔ tray fɔ no bɔt di Pɔsin we gi wi dis gift we na Jiova. (Jɔn 17:​3) We yu yuz dis buk fɔ stɔdi di Baybul, dat go ɛp yu fɔ no mɔ bɔt Jiova. As yu de no mɔ bɔt Jiova, na so yu go de lɛk am mɔ ɛn mɔ. Ɛn dat go mek yu want fɔ du wetin go mek Jiova gladi.—Jɔn In Fɔs Lɛta 5:​3.

²⁰ Sho se yu biliv pan Jizɔs in day. Di Baybul tɔk bɔt Jizɔs se: “Ɛnibɔdi we biliv pan Gɔd in Pikin go gɛt layf we go de sote go.” (Jɔn 3:​36) Aw wi go sho se wi biliv Jizɔs? Fɔ biliv Jizɔs nɔ min se na fɔ tɔk am nɔmɔ. Wetin mek wi se so? Na bikɔs insay Jems 2:​26 di Baybul se, “pɔsin we se in biliv Gɔd ɛn i nɔ de du dɛn tin we sho se i biliv am, nɔ biliv Gɔd at ɔl.” Dat na tru, na di tin dɛn we pɔsin de du de sho se i biliv Jizɔs. Wan we aw wi go sho se wi biliv Jizɔs na we wi tray tranga wan fɔ du wetin Jizɔs bin se ɛn wetin i bin du.—Jɔn 13:​15.

21, 22. (a) Wetin mek wi fɔ go di mitin we wi kin gɛt fɔ mɛmba di Masta? (b) Wetin wi go lan na Chapta 6 ɛn Chapta 7?

²¹ Na fɔ de go di mitin we wi kin gɛt fɔ mɛmba di Masta ɛvri ia. Insay di de we mek 14 na di Ju pipul dɛn mɔnt we dɛn kɔl Naysan, insay di ia 33, Jizɔs bin mek wan spɛshal it we di Baybul kɔl “di Ivintɛm It fɔ Mɛmba di Masta.” (Fɔs Lɛta Fɔ Kɔrint 11:​20, NW; Matyu 26:​26-28) Na in wi kin kɔl bak di Mɛmorial. Jizɔs bin du dis fɔ mek in apɔsul dɛn ɛn ɔlman we na tru Kristian, mɛmba se na di day we i day Gɔd yuz fɔ pul wi pan sin ɛn day. Jizɔs bin tɛl di wan dɛn we de fala am se: “Una fɔ de it am fɔ mɛmba mi.” (Lyuk 22:​19) Ɛnitɛm we wi kin du am, i kin mek wi mɛmba di kayn we aw Jiova ɛn Jizɔs lɛk wi. We wi kam na di Mɛmorial, de sho se wi gladi we Jiova bin sɛn in Pikin fɔ kam day fɔ wi.a

²² Na wɔndaful gift Jiova gi wi we i sɛn in wangren Pikin fɔ kam day fɔ wi. No ɔda gift nɔ de we pas dis. (Sɛkɛn Lɛta Fɔ Kɔrint 9:​14, 15) Dis fayn gift we Jiova gi wi de ivin bɛnifit di wan dɛn we dɔn day. Na dat wi go lan na Chapta 6 ɛn Chapta 7.