Lan bɔt di Wɔndaful Kwaliti dɛn we Gɔd Gɛt

DI OLI Skripchɔ dɛn tɔk bɔt bɔku pan Gɔd in kwaliti dɛn we de ɛp wi fɔ no am. Fɔ ɛgzampul, di Skripchɔ dɛn tɛl wi bɔt Gɔd in 4 men kwaliti dɛn. Dɛn kwaliti dɛn ya na pawa, sɛns, lɔv ɛn fɔ du tin stret. Lɛ wi tɔk bɔt dɛn wan bay wan.

Gɔd Gɛt Pawa fɔ Du Ɔltin

Jiova bin tɛl Ebraam se: “Mi na PAPA GƆD Ɔlmayti.” (Jɛnɛsis 17:1) Nɔbɔdi nɔ gɛt pawa lɛk am, i gɛt pawa fɔ du ɔltin, ɛn in pawa nɔ go ɛva dɔn. Gɔd yuz in pawa fɔ mek di wan ol wɔl, di san, di mun, di sta dɛn, ɛn ɔda tin dɛn we de ɔp di skay.

Gɔd nɔ de ɛva yuz in pawa di rɔng we. Gɔd ebul fɔ kɔntrol in pawa ɛn i de yuz am fɔ di rayt rizin. We Gɔd want fɔ yuz in pawa, i de yuz am fɔ du tin stret, i de yuz am wit sɛns, ɛn i de yuz am wit lɔv.

Jiova kin yuz in pawa fɔ ɛp in savant dɛn we de du wetin i want. Gɔd in Wɔd se: “PAPA GƆD in yay de . . . ɔlsay na di wan ol wɔl, fɔ sho in pawa fɔseka di wan dɛn we dɛn at klin fɔ am.” (Sɛkɛn Kronikul 16:​9) Yu nɔ go want fɔ go nia dis kayn Gɔd we gɛt pawa bɔt stil bisin bɔt pipul dɛn?

Gɔd De Du Tin Stret

Gɔd in Wɔd se: “PAPA GƆD lɛk udat de du wetin rayt.” (Sam 37:​28) Gɔd in lɔ ɛn avdays dɛn pafɛkt, so i de du tin fia wan ɛn i de du wetin rayt ɔltɛm.

Jiova nɔ lɛk pɔsin we nɔ de du tin stret. In Wɔd se: “I nɔ de tek sayd ɛn nɔbɔdi nɔ ebul brayb am.” (Ditarɔnɔmi 10:​17) Gɔd kin vɛks pan di wan dɛn we de mek ɔda pipul dɛn sɔfa, ɛn i kin fɛt fɔ pipul dɛn we dɛn de tek advantej pan. Gɔd kin fɛt fɔ pipul dɛn lɛk “uman we in man dɔn day, ɔ pikin we nɔ gɛt papa.” (Ɛksodɔs 22:​22) Gɔd nɔ de tek wan pɔsin bɛtɛ pas ɔda pɔsin. “Gɔd nɔ de luk ɛnibɔdi bɛtɛ pas in kɔmpin. Gɔd go mek ɛnibɔdi we rɛspɛkt am ɛn du wetin i want, bi in yon.”—Di Apɔsul Dɛn Wok [Akt] 10:​34, 35.

Bikɔs Jiova gɛt lɔv, pawa, ɛn sɛns, dat de ɛp am fɔ du tin stret ɔltɛm. Jiova nɔ kol ɛn i nɔ ash pasmak. I de pɔnish di wan dɛn we de du bad ɛn we nɔ want fɔ chenj, bɔt i de sɔri fɔ di wan dɛn we dɔn chenj ɛn lɛf fɔ du bad. Gɔd in Wɔd se: “PAPA GƆD gɛt sɔri-at bad, i nɔ de vɛks kwik bɔt i rɛdi fɔ sho wi aw i lɛk wi. PAPA GƆD nɔ de pɔnish pɔsin ɔltɛm, ɛn we i vɛks sɛf, i nɔ de vɛks sote go. I nɔ de pɔnish wi lɛk aw i fɔ pɔnish wi.” (Sam 103:​8-10) Gɔd kin mɛmba in savant dɛn bak we de du wetin i want ɛn blɛs dɛn. Yu nɔ tink se yu fɔ abop pan dis Gɔd we de du tin stret?

Gɔd Gɛt Sɛns

Na Jiova de gi sɛns. Na dat mek in Wɔd se: “Gɔd gɛt bɔku bɔku sɛns we nɔn mɔtalman nɔ gɛt ɛn i sabi ɔltin!” (Lɛta Fɔ Rom 11:​33) Nɔbɔdi nɔ gɛt sɛns lɛk Gɔd ɛn in sɛns nɔ de dɔn.

Di tin dɛn we Gɔd mek de sho klia wan se i gɛt sɛns. Gɔd in Wɔd se: “PAPA GƆD, yu de du bɔku tin! Bikɔs yu gɛt sɛns yu mek ɔltin.”—Sam 104:​24.

Di Oli Skripchɔ dɛn sho bak se Gɔd gɛt sɛns. Kiŋ Devid bin rayt se: “Wi kin trɔs am ɛn du wetin i se ɔdɔyɔ sɛf go mɔs gɛt sɛns.” (Sam 19:​7) Yu nɔ tink se yusɛf go ebul fɔ bɛnifit frɔm Gɔd in sɛns we nɔ de dɔn? Yu go want fɔ du dat?

“Gɔd Na di Wan We Nɔ De Tap fɔ Lɛk”

Jiova in men kwaliti na lɔv. Di Skripchɔ se: “Gɔd na di wan we nɔ de tap fɔ lɛk.” (Jɔn In Fɔs Lɛta 4:​8) Na lɔv de mek Gɔd du ɛnitin ɛn na lɔv de gayd am bak we i de du ɛnitin.

Gɔd de sho se i lɛk wi bɔku bɔku we dɛn. I de gi wi gud tin dɛn. Gɔd in Wɔd se: “Bɔt stil i bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.” (Di Apɔsul Dɛn Wok [Akt] 14:​17) Fɔ tru, “na Gɔd nɔmɔ de gi wi ɔl dɛn tin we gud ɛn we mek wi nɔ want ɛnitin mɔ. Na Gɔd mek di san, di mun ɛn di sta dɛn.” (Jems 1:​17) Di Skripchɔ dɛn na wɔndaful gift we Gɔd gi wi, ɛn na da gift de i de yuz fɔ sho wi di tru bɔt am ɛn mek wi no in lɔ ɛn advays dɛn. We Jizɔs bin de pre to Gɔd, i bin tɔk se: “Yu wɔd . . . na tru.”—Jɔn 17:​17.

Gɔd kin ɛp wi bak we wi gɛt prɔblɛm. Gɔd in Wɔd se: “Lɛf ɔltin gi PAPA GƆD, ɛn i nɔ go lɛf yu dɔŋ; i nɔ de ɛva disapɔynt udat abop pan am.” (Sam 55:​22) I de fɔgiv wi sin dɛn. Di Skripchɔ se: “Yu na gud PAPA GƆD ɛn yu de fɔgiv.” “Yu de sho yu lɔv we nɔ de chenj to ɔl udat lɛk fɔ pre to yu.” (Sam 86:​5) Ɛn i ivin prɔmis se i go gi wi layf we go de sote go. Gɔd in Wɔd se: “I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen.” (Rɛvɛleshɔn 21:​4) Wetin yu go du we yu dɔn no se Gɔd lɛk yu? Yu go lɛk am bak?

Kam Nia Gɔd

Gɔd want mek yu no am gud gud wan. Gɔd in Wɔd tɛl wi se: “Kam klos [“nia,” NW] Gɔd ɛn i go kam klos [“nia,” NW] una.” (Jems 4:​8) Gɔd bin kɔl in fetful prɔfɛt Ebraam “mi padi.” (Ayzaya 41:​8) Jiova want yusɛf fɔ bi in padi.

Di mɔ yu lan bɔt Gɔd, na di mɔ yu go kam nia am ɛn na di mɔ yu go gladi. Gɔd in Wɔd se: “I fayn fɔ di pɔsin” we de “ɛnjɔy fɔ rid PAPA GƆD in wɔd ɛn de tink bɔt PAPA GƆD in lɔ de ɛn nɛt.” (Sam 1:​1, 2) So na fɔ kɔntinyu fɔ stɔdi di Oli Skripchɔ dɛn. Go de tink gud wan bɔt Gɔd in kwaliti dɛn ɛn di tin dɛn we i de du. Sho se yu lɛk Gɔd bay we yu de du wetin yu de lan. Gɔd in Wɔd se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.” (Jɔn In Fɔs Lɛta 5:​3) Pre lɛk aw wan pan di man dɛn we rayt di Sam buk bin pre we i se: “PAPA GƆD, sho mi usay fɔ waka ɛn aw fɔ waka na layf; mek a du wetin yu want mi fɔ du.” (Sam 25:​4, 5) Yu go kam fɔ si se Gɔd “de klos wi ɔl.”—Di Apɔsul Dɛn Wok [Akt] 17:​27.