Jizɔs Bin De Obe Ɔltɛm

Yu tink se i kin izi fɔ obe yu mama ɛn papa?— Sɔntɛnde, i nɔ kin izi. Yu no se Jizɔs bin de obe Jiova ɛn in mama ɛn papa?— In ɛgzampul go ɛp yu fɔ obe yu mama ɛn papa ivin we i nɔ izi. Lɛ wi tɔk mɔ bɔt dis.

Bifo Jizɔs kam na di wɔl, i bin de wit in Papa, Jiova, na ɛvin. Bɔt Jizɔs bin gɛt mama ɛn papa na dis wɔl. Dɛn nem dɛn na Josɛf ɛn Meri. Yu no aw dɛn bi in mama ɛn papa?—

Jiova tek di layf we Jizɔs bin gɛt na ɛvin ɛn put am insay Meri in bɛlɛ so dat Meri go bɔn am na dis wɔl. Dis na mirekul! Jizɔs gro insay Meri in bɛlɛ lɛk aw ɔda pikin dɛn kin gro insay dɛn mama dɛn bɛlɛ. Afta nayn mɔnt, Meri bɔn Jizɔs. Na so Meri ɛn Josɛf bi Jizɔs in mama ɛn papa na dis wɔl.

We Jizɔs bin ol 12 ia, i bin du sɔntin we sho se i rili lɛk in Papa we na Jiova. Dis bin apin we Jizɔs ɛn in famili bin go na Jerusɛlɛm fɔ di Pasova. Jerusɛlɛm bin de fa frɔm usay dɛn bin de. We Josɛf ɛn Meri bin de tɔn bak, dɛn nɔ bin si Jizɔs. Yu no usay i bin de?—

Josɛf ɛn Meri bin go bak na Jerusɛlɛm wantɛm wantɛm fɔ go fɛn Jizɔs. Dɛn luk luk fɔ am ɔlsay bɔt dɛn nɔ si am. So dis mek dɛn wɔri bad bad wan. Bɔt afta tri dez, dɛn si am na Gɔd in Os! Yu no wetin mek Jizɔs bin de na Gɔd in Os?— Na bikɔs na de i go ebul lan mɔ bɔt in Papa, Jiova. I bin lɛk Jiova ɛn i bin want fɔ lan wetin i fɔ du we go mek Jiova gladi. Ivin we Jizɔs bin dɔn big, i bin stil de obe Jiova. Jizɔs bin de obe Gɔd pan ɔl we i nɔ bin izi fɔ am ɛn dat go mek i sɔfa. Yu tink se Jizɔs bin de obe Josɛf ɛn Meri?— Di Baybul se i bin de obe dɛn.

Us lɛsin yu lan frɔm Jizɔs in ɛgzampul?— Yu fɔ obe yu mama ɛn papa, ivin we i nɔ izi. Yu go du dat?—