Di Kiŋdɔm we Go Rul Ɔlsay na di Wɔl

Yu no us Kiŋdɔm wi de tɔk bɔt?— Na Gɔd in Kiŋdɔm. Dis Kiŋdɔm go mek ɔlsay na di wɔl bi Paradays. Yu go lɛk fɔ no mɔ bɔt dis Kiŋdɔm?—

Ɛni kiŋdɔm gɛt kiŋ. Na di kiŋ de rul oba di pipul dɛn we de na in kɔntri. Yu no udat na di Kiŋ fɔ Gɔd in Kiŋdɔm?— Na Jizɔs Krays. Jizɔs de na ɛvin. I nɔ go te igen, i go bi Kiŋ oba ɔlman na di wɔl! Yu tink se wi go gɛt gladi at we Jizɔs go bi Kiŋ oba ɔlman na di wɔl?—

Wi ɔl go rili gladi! Insay Paradays, pipul dɛn nɔ go de fɛt igen. Ɔlman go lɛk in kɔmpin. Nɔbɔdi nɔ go sik ɔ day. Di wan dɛn we blaynd go si, di wan dɛn we nɔ de yɛri go yɛri, ɛn ɔl di wan dɛn we nɔ ebul fɔ waka, go ebul fɔ rɔn ɛn jomp. Ɔlman go gɛt plɛnti tin fɔ it. Di animal dɛn go de ple wit dɛn kɔmpin animal dɛn, ɛn wit wi. Di pipul dɛn we bin dɔn day go gɛt layf bak. Bɔku man ɛn uman dɛn we yu dɔn lan bɔt na dis buk go gɛt layf bak, lɛk Ribɛka, Reab, Devid, ɛn Ilayja! Yu go lɛk fɔ si dɛn we dɛn go gɛt layf bak?—

Jiova lɛk yu ɛn i want mek yu gladi. If yu kɔntinyu fɔ lan bɔt Jiova ɛn du wetin i want, yu go ebul fɔ de na Paradays sote go! Na dat yu want?—