We Bad Tin Apin

Pan ɔl we una go de tray fɔ gɛt gladi at na una mared ɛn na una famili, tin dɛn we una nɔ tink se go apin kin mek i nɔ izi fɔ lɛ gladi at kɔntinyu fɔ de na di mared-os. (Ɛkliziastis 9:11, NW) Gɔd kin ɛp wi we wi gɛt prɔblɛm dɛn. If yu fala dɛn advays ya we de na di Baybul, yu ɛn yu famili go ebul fɔ bia, ilɛk uskayn bad tin apin to una.

1 ABOP PAN JIOVA

DI BAYBUL SE: “Una fɔ lɛf ɛnitin we de wɔri una na Gɔd in an, bikɔs i bisin bɔt una.” (Pita In Fɔs Lɛta 5:7, NW) Ɔltɛm, na fɔ mɛmba se nɔto Gɔd mek bad tin de apin to yu. (Jems 1:13) As yu de go nia Gɔd, i go ɛp yu di bɛst we. (Ayzaya 41:10) “Abop pan am ɔltɛm.”—Sam 62:8.

We yu rid ɛn stɔdi di Baybul ɛvride, yu go gɛt kɔrej. As yu de du dat, yu go si se Jiova de “kɔrej wi ɔltɛm we wi de pan trɔbul.” (Sɛkɛn Lɛta Fɔ Kɔrint 1:3, 4; Lɛta Fɔ Rom 15:4) I dɔn prɔmis fɔ ‘gi yu kol at, we mɔtalman nɔ ebul ɔndastand.’—Lɛta Fɔ Filipay 4:6, 7, 13.

DU DIS:

• Pre mek Jiova ɛp yu fɔ gɛt kol at ɛn fɔ ebul fɔ tink fayn

• Tink bɔt wetin-ɛn-wetin yu go du ɛn pik di bɛst wan we yu go ebul fɔ du

2 KIA FƆ YUSƐF ƐN YU FAMILI

DI BAYBUL SE: “Udat gɛt sɛns de tray fɔ lan mɔ, ɛn [udat] tik nɔ brok nain yes, insɛf de tray fɔ lan.” (Prɔvabs 18:15) Tray fɔ no ɔl wetin apin. Tray fɔ no wetin ɔlman na yu famili nid. Tɔk wit dɛn. Lisin to dɛn.—Prɔvabs 20:5.

If pɔsin we yu lɛk day, wetin fɔ du? Nɔ fred fɔ sho aw yu rili de fil. Mɛmba se ivin Jizɔs bin “kray.” (Jɔn 11:35; Ɛkliziastis 3:4) I fayn fɔ slip ɛn nɔ yagba tumɔs. (Ɛkliziastis 4:6) Dis go ɛp yu fɔ ebul bia wit wetin dɔn apin.

DU DIS:

• Ivin bifo bad tin apin, mek am yu abit fɔ de tɔk to yu famili. We prɔblɛm apin, dɛn go fil fri fɔ tɔk wit yu

• Tɔk to ɔda pipul dɛn we di sem tin dɔn apin to

3 TƆK TO PIPUL DƐN WE RƐDI FƆ SƆPƆT YU

DI BAYBUL SE: “If padi dɛn de sho lɔv ɔltɛm, wetin fɔ mek blɔd brɔda dɛn nɔ ɛp dɛn kɔmpin pan prɔblɛm?” (Prɔvabs 17:17) Yu padi dɛn go want fɔ ɛp yu, bɔt dɛn nɔ go no wetin fɔ du. Nɔ shem fɔ tɛl dɛn wetin yu rili nid. (Prɔvabs 12:25) I fayn bak fɔ tɔk to brɔda ɛn sista dɛn na di kɔngrigeshɔn we ɔndastand di Baybul. Di tin dɛn we dɛn go tɛl yu frɔm di Baybul go ɛp yu.—Jems 5:14.

Yu go gɛt di sɔpɔt we yu nid we yu kip kɔmpin ɔltɛm wit pipul dɛn we rili gɛt fet pan Gɔd ɛn we biliv wetin i dɔn prɔmis. Yu go gɛt mɔ kɔrej we yu ɛp ɔda pipul dɛn we nid pɔsin fɔ ɛnkɔrej dɛn. Tɛl dɛn bɔt di fet we yu gɛt pan Jiova ɛn pan di prɔmis dɛn we i dɔn mek. Na fɔ de ɛp ɔda pipul dɛn ɔltɛm ɛn nɔ avɔyd di wan dɛn we lɛk yu ɛn bisin bɔt yu.—Prɔvabs 18:1; Fɔs Lɛta Fɔ Kɔrint 15:58.

DU DIS:

• Tɔk to yu tayt padi ɛn alaw am fɔ ɛp yu

• Tɔk bɔt wetin yu rili nid