Gɔd Mek Ɛvin ɛn di Wɔl

Na Jiova Gɔd mek wi. Na in mek ɔltin, di tin dɛn we wi de si ɛn di tin dɛn we wi nɔ de si. Bifo i mek di tin dɛn we wi de si, i mek bɔku bɔku enjɛl dɛn. Yu sabi udat na enjɛl dɛn? Enjɛl dɛn na pipul dɛn we Jiova mek jɔs lɛk aw insɛf de. Wi nɔ de si dɛn jɔs lɛk aw wi nɔ de si Gɔd. Di fɔs enjɛl we Jiova mek bin de ɛp am fɔ mek tin dɛn. Da enjɛl de bin de ɛp Jiova fɔ mek di sta dɛn, planɛt dɛn, ɛn ɔl di ɔda tin dɛn we I mek. Wan pan di planɛt dɛn na di fayn wɔl usay wi de.

Dɔn Jiova mek di wɔl fayn fɔ mek animal ɛn mɔtalman dɛn de de. I mek di san de shayn na di wɔl. I mek di mawntin dɛn, di si, ɛn di riva dɛn.

Wetin apin afta dat? Jiova se: ‘A go mek gras, plant dɛn we de bia sid, ɛn tik dɛn we de bia frut we gɛt sid.’ I mek bɔku difrɛn kayn frut dɛn, vɛjitebul dɛn, ɛn flawa dɛn bigin fɔ gro. Dɔn Jiova mek ɔl di animal dɛn—animal dɛn we de flay, swim, ɛn di wan dɛn we de drɛg na grɔn. I mek smɔl animal dɛn, lɛk rabit ɛn big wan dɛn lɛk ɛlifant. Uswan pan di animal dɛn yu lɛk pas ɔl?

Dɔn Jiova tɛl di fɔs enjɛl we i mek se: “Lɛ wi mek mɔtalman.” Mɔtalman go difrɛn frɔm animal dɛn. Dɛn go ebul fɔ mek tin dɛn. Dɛn go ebul tɔk, laf, ɛn pre. Dɛn go tek kia ɔf di wɔl ɛn di animal dɛn. Yu sabi udat na di fɔs man we Gɔd mek? Lɛ wi si.