Na Et Pipul dɛn Bin Sev

Noa, in famili, ɛn di animal dɛn bin go insay di ak. Jiova lɔk di domɔt ɛn di ren bigin fɔ kam. Di ren kam te di ak bigin fɔ flot. Ɛn as tɛm de go, di wan ol wɔl ful-ɔp wit wata. Ɔl di bad pipul dɛn day. Bɔt Noa ɛn in famili bin sef insay di ak. Yu ebul fɔ tink bɔt aw dɛn bin gladi bikɔs dɛn obe Jiova?

Ren kam fɔ 40 dez ɛn 40 nɛt, dɔn i stɔp. Smɔl smɔl, di wata bigin fɔ go dɔŋ. Faynali, di wata kɛr di ak pantap di mawntin dɛn. Bɔt wata bin stil de ɔlsay, so Noa ɛn in famili nɔ bin ebul fɔ kɔmɔt insay di ak wantɛm wantɛm.

Smɔl smɔl, ɔl di wata dray. Noa ɛn in famili bin de insay di ak pas wan ia. Dɔn Jiova tɛl dɛn fɔ kɔmɔt insay di ak ɛn go na do. Di ples bin fiba wan nyu wɔl. Dɛn bin rili gladi we Jiova sev dɛn, ɛn dɛn sho dat bay we dɛn mek sakrifays to Jiova.

Jiova bin gladi wit di sakrifays. I bin prɔmis se i nɔ go ɛva yuz ebi ren igen fɔ dɔnawe wit ɔltin we de na di wɔl. Fɔ sho se i go de mɛmba da prɔmis de, i mek di fɔs renbo apia na di skay. Yu dɔn ɛva si renbo?

Afta dat, Jiova tɛl Noa ɛn in famili fɔ bɔn pikin dɛn ɛn ful-ɔp di wɔl.