Mɛmba Lɔt in Wɛf

Lɔt bin de na Kenan wit Ebraam we na in ɔnkul. As tɛm de go, Ebraam ɛn Lɔt kam gɛt bɔku animal dɛn, ɛn dɛn nɔ bin gɛt bɔku land fɔ dɛn ɔl. So Ebraam tɛl Lɔt se: ‘Wi nɔ go ebul fɔ de togɛda igen na wan ples. Duya pik usay yu go want fɔ go, ɛn mi go go di ɔdasay.’ Ebraam bin put wetin ɔda pɔsin want bifo wetin in want, nɔto so?

Lɔt bin si wan fayn ples na di land we de nia wan siti we dɛn kɔl Sɔdɔm. Bɔku wata ɛn grin gras bin de de. So i pik da ples de, ɛn i go de de wit in famili.

Di pipul dɛn na Sɔdɔm ɛn di siti we de nia am we na Gomɔra bin rili bad. Infakt, dɛn bin so bad dat Jiova disayd fɔ dɔnawe wit dɛn siti dɛn de. Bɔt Gɔd bin want fɔ sev Lɔt ɛn in famili, so i sɛn tu enjɛl dɛn fɔ wɔn dɛn se: ‘Una mekes! Una kɔmɔt na dis siti! Jiova de kam dɔnawe wit am.’

Lɔt nɔ bin kɔmɔt de wantɛm wantɛm. I kɔntinyu fɔ drɛg fut. So di enjɛl dɛn ol Lɔt, in wɛf, ɛn in tu galpikin dɛn an ɛn pul dɛn kɔmɔt na di siti. Di enjɛl dɛn tɛl dɛn se: ‘Una rɔn! Una rɔn fɔ una layf, una nɔ luk biɛn. If una luk biɛn, una go day!’

We dɛn rich na di siti we dɛn kɔl Zoa, Jiova mek faya ɛn sɔlfɔ kɔmɔt na ɛvin ɛn bɔn Sɔdɔm ɛn Gomɔra. Dɛn bin dɔnawe wit dɛn tu siti dɛn de kpatakpata. We Lɔt in wɛf nɔ obe Jiova ɛn luk biɛn, i tɔn sɔl! Bɔt Lɔt ɛn in galpikin dɛn bin sev, bikɔs dɛn bin obe Jiova. Dɛn go mɔs dɔn rili fil bad we Lɔt in wɛf nɔ obe. Bɔt dɛn bin gladi we dɛn lisin to wetin Jiova tɛl dɛn fɔ du.