Jekɔp ɛn Isɔ Mek Pis

Jiova bin prɔmis Jekɔp se i go protɛkt am jɔs lɛk aw i bin protɛkt Ebraam ɛn Ayzak. Jekɔp bin de na wan ples we dɛn kɔl Eran, na de i mared, gɛt wan big famili, ɛn i bin rili jɛntri.

Afta sɔm tɛm Jiova tɛl Jekɔp se: ‘Go bak na di tɔŋ we yu kɔmɔt.’ So Jekɔp ɛn in famili bigin travul fɔ go bak. We dɛn de na rod, sɔm pipul dɛn kam mit Jekɔp ɛn tɛl am se: ‘Yu brɔda Isɔ de kam, ɛn i gɛt 400 man dɛn wit am!’ Jekɔp bin fred se Isɔ want fɔ du bad to in ɛn in famili. So i pre to Jiova se: ‘Duya sev mi frɔm mi brɔda.’ Di nɛks de Jekɔp sɛn bɔku ship dɛn, got dɛn, kaw dɛn, kamɛl dɛn, ɛn dɔnki dɛn fɔ Isɔ as gift.

Da nɛt de, we Jekɔp bin de in wangren, i si wan enjɛl! Di enjɛl bigin fɔ fɛt am. Dɛn fɛt te mɔnin. Pan ɔl we Jekɔp bin de fil pen, i nɔ giv-ɔp. Di enjɛl tɛl am se: ‘Lɛf mi mek a go.’ Bɔt Jekɔp tɛl am se: ‘Nɔ, a nɔ go lɛf yu pas te yu blɛs mi.’

Faynali di enjɛl bin blɛs Jekɔp. Naw Jekɔp no se Jiova nɔ go gri fɔ mek Isɔ du am bad.

Da mɔnin tɛm de, Jekɔp luk fa ɛn si Isɔ ɛn in 400 man dɛn. Jekɔp lɛf in famili biɛn, go mit in brɔda ɛn butu bifo am sɛvin tɛm. Isɔ rɔn go mit Jekɔp ɛn ɔg am. Di tu brɔda dɛn kray ɛn mek pis. Aw yu tink se Jiova bin fil bɔt di we aw Jekɔp bin sɔlv dis prɔblɛm?

Leta Isɔ go bak na in os, ɛn Jekɔp insɛf go na in yon os. Jekɔp bin bɔn 12 bɔypikin dɛn. Dɛn nem dɛn na Rubɛn, Simyɔn, Livay, Juda, Dan, Naftali, Gad, Asha, Isaka, Zɛbyulɔm, Josɛf, ɛn Bɛnjamin. Jiova yuz Josɛf we na wan pan Jekɔp in bɔypikin dɛn fɔ sev In pipul dɛn. Yu no aw dat bin apin? Lɛ wi si.