Wan Tabanakul fɔ Wɔship Gɔd

We Mozis bin de ɔp Mawnt Saynay, Jiova bin tɛl am fɔ mek wan spɛshal tɛnt, we dɛn kɔl tabanakul, usay di Izrɛlayt dɛn fɔ wɔship Am. Dɛn go ebul kɛr di tabanakul ɛnisay we dɛn de go.

Jiova bin tɔk se: ‘Tɛl di pipul dɛn fɔ gi ɛnitin we dɛn ebul fɔ gi fɔ ɛp fɔ bil di tabanakul.’ Di Izrɛlayt dɛn bin gi gold, silva, kɔpa, ston dɛn we gɛt valyu, ɛn ɔlkayn chen ɛn yerin we gɛt valyu. Dɛn gi bak wul, linin, animal kanda dɛn, ɛn bɔku ɔda tin dɛn. Dɛn gi bɔku tin dɛn te Mozis se: ‘I du so, wi dɔn gɛt wetin wi nid! Una nɔ kam wit ɛnitin igen.’

Bɔku man ɛn uman dɛn we sabi wok fayn bin ɛp fɔ bil di tabanakul. Jiova bin gi dɛn sɛns fɔ du di wok. Sɔm bin de mek trɛd, wiv klos dɛn, ɔ mek fayn dizayn dɛn wit trɛd. Ɔda pipul dɛn bin de pak ston dɛn, wok wit gold, ɔ kav tin dɛn wit wud.

Di pipul dɛn bin bil di tabanakul jɔs lɛk aw Jiova bin tɛl dɛn. Dɛn mek wan fayn kɔtin we sheb di tabanakul to tu rum dɛn, dat na, di Oli ɛn di Ples we Oli Pas Ɔl. Insay di rum we Oli Pas Ɔl, na de di agrimɛnt bɔks we dɛn mek wit akeshia wud ɛn gold bin de. Insay di rum we Oli, na de di gold stand we gɛt lamp dɛn, wan tebul, ɛn wan ɔlta fɔ de bɔn insɛns bin de. Insay di kɔmpawnd, dɛn bin gɛt wan big bol we dɛn mek wit kɔpa ɛn wan big ɔlta. Di agrimɛnt bɔks de mɛmba di Izrɛlayt dɛn bɔt dɛn prɔmis fɔ obe Jiova. Yu no wetin i min fɔ mek agrimɛnt? Dis na we pɔsin mek spɛshal prɔmis.

Jiova bin pik Erɔn ɛn in bɔypikin dɛn fɔ wok na di tabanakul as prist dɛn. Dɛn bin gɛt di wok fɔ kia fɔ di tabanakul ɛn mek sakrifays dɛn to Jiova. Na Erɔn nɔmɔ we na di ay prist bin gɛt di rayt fɔ go na di rum we Oli Pas Ɔl. I bin de du dis wantɛm ɛni ia fɔ mek sakrifays dɛn fɔ in yon sin dɛn, in famili in sin dɛn, ɛn fɔ ɔl di Izrɛlayt dɛn sin dɛn.

Di Izrɛlayt dɛn bin dɔn fɔ mek di tabanakul wan ia afta we dɛn kɔmɔt na Ijipt. Naw, dɛn dɔn gɛt ples usay dɛn go wɔship Jiova.

Jiova bin ful-ɔp di tabanakul wit in glori ɛn mek klawd de oba am. Wans di klawd de oba di tabanakul, di Izrɛlayt dɛn nɔ de kɔmɔt usay dɛn de. Bɔt we di klawd kɔmɔt oba di tabanakul, dɛn kin no se na tɛm fɔ mek dɛn go. Dɛn go lus ɛn tek di tabanakul in pat dɛn ɛn fala di klawd.