Jiova Tɔk to Samiɛl

Ay prist Ilay bin gɛt tu bɔypikin dɛn we de sav na di tabanakul as prist dɛn. Dɛn nem na Ɔfnay ɛn Finias. Dɛn nɔ bin de obe Jiova in lɔ dɛn, ɛn dɛn bin de trit di pipul dɛn bad. We di Izrɛlayt dɛn bin de kam wit sakrifays dɛn fɔ Jiova, dɛn de tek di bɛst pat pan di bif fɔ dɛnsɛf. Ilay bin yɛri bɔt wetin in bɔypikin dɛn de du, bɔt i nɔ du natin bɔt dat. Fɔ se Jiova go kɔntinyu fɔ alaw dis fɔ apin?

Pan ɔl we Ɔfnay ɛn Finias bin big pas Samiɛl, i nɔ bin falamakata dɛn. Jiova bin gladi fɔ Samiɛl. Wan nɛt we Samiɛl bin de slip, i yɛri wan vɔys kɔl in nem. I grap ɛn rɔn go to Ilay ɛn tɛl am se: ‘Luk mi!’ Bɔt Ilay tɛl am se: ‘A nɔ kɔl yu, go slip bak.’ Samiɛl go bak fɔ slip. Dɔn di sem tin apin. We Samiɛl yɛri di vɔys di tɔd tɛm, Ilay kam fɔ no se na Jiova de kɔl am. I tɛl Samiɛl se if i yɛri di vɔys bak, i fɔ tɔk se: ‘Jiova, tɔk. Yu savant de lisin.’

Samiɛl go slip bak. Dɔn i yɛri: ‘Samiɛl! Samiɛl!’ I ansa se: ‘Tɔk, yu savant de lisin.’ Jiova tɛl am se: ‘Tɛl Ilay se a go pɔnish in ɛn in famili. I no se in bɔypikin dɛn de du bad bad tin dɛn na di tabanakul, bɔt i nɔ du natin bɔt dat.’ Di nɛks mɔnin, Samiɛl opin di domɔt dɛn na di tabanakul, jɔs lɛk aw i kin du ɛnide. I bin de fred fɔ tɛl Ay Prist Ilay wetin Jiova dɔn tɛl am. Bɔt Ilay sɛn fɔ mek dɛn kɔl Samiɛl ɛn aks am se: ‘Wetin Jiova tɛl yu, mi bɔypikin? Tɛl mi ɔltin.’ So Samiɛl tɛl Ilay ɔltin.

As Samiɛl de big, Jiova bin kɔntinyu fɔ de wit am. Ɔl di Izrɛlayt dɛn na di land bin no se Jiova dɔn pik Samiɛl fɔ bi prɔfɛt ɛn jɔj.