Josaya Bin Lɛk Gɔd in Lɔ

Josaya bin ol et ia we i bi kiŋ na Juda. Insay dɛn tɛm dɛn de, di pipul dɛn bin de wɔship lay lay gɔd dɛn, ɛn dɛn bin de ple wit majik. We Josaya bin ol 16 ia, i tray fɔ lan aw fɔ wɔship Jiova di rayt we. We i bin ol 20 ia, i bigin fɔ pwɛl pwɛl di lay lay gɔd dɛn ɛn di ɔlta dɛn we bin de ɔlsay na di land. Ɛn we Josaya bin ol 26 ia, i arenj fɔ lɛ dɛn mek Jiova in tɛmpul bak.

Na di tɛmpul, di ay prist we nem Ilkaya bin fɛn di skrol we gɛt Jiova in Lɔ dɛn, ɛn sɔntɛm na di skrol we Mozis bin rayt. Di kiŋ in sɛktri we nem Shefan kam wit di skrol to Josaya ɛn bigin fɔ rid di Lɔ lawd wan. As Josaya de lisin, i kam fɔ no se di pipul dɛn nɔ bin de du wetin Jiova want fɔ lɔng tɛm. Kiŋ Josaya tɛl Ilkaya se: ‘Jiova dɔn vɛks pan wi bad bad wan. Go tɔk to am. Jiova go tɛl wi wetin fɔ du.’ Jiova yuz wan uman prɔfɛt we nem Ɔlda fɔ tɛl dɛn se: ‘Di pipul dɛn na Juda dɔn tɔn dɛn bak pan mi. A go pɔnish dɛn bɔt nɔto di tɛm we Josaya na kiŋ, bikɔs i put insɛf dɔŋ.’

We Kiŋ Josaya yɛri dis mɛsej, i go na di tɛmpul ɛn kɔl di pipul dɛn na Juda. Dɔn i rid Jiova in Lɔ lawd wan to ɔl di pipul dɛn. Josaya ɛn di pipul dɛn prɔmis se dɛn go obe Jiova wit ɔl dɛn at.

Di pipul dɛn na Juda nɔ bin dɔn sɛlibret di Pasova fɔ lɔng tɛm. Bɔt we Josaya rid na di Lɔ se dɛn fɔ sɛlibret di Pasova ɛni ia, i tɛl di pipul dɛn se: ‘Wi go mek di Pasova fɔ Jiova.’ Dɔn Josaya pripia fɔ mek bɔku sakrifays dɛn, ɛn i bin arenj fɔ mek bɔku pipul dɛn siŋ na di tɛmpul. Dɔn di pipul dɛn bin gɛt di Pasova ɛn afta dat, dɛn bin gɛt di Bred we Nɔ Gɛt Yist Fɛstival. Dɛn bin du dis fɛstival fɔ sɛvin dez Frɔm di tɛm we Samiɛl bin de, dɛn nɔ bin dɔn ɛva gɛt dis kayn Pasova. Josaya bin rili lɛk Gɔd in Lɔ. Yu kin ɛnjɔy fɔ lan bɔt Jiova?