Yu Sabi Gɔd in Nem? Yu De Yuz Am?

Yu gɛt ɛni tayt padi we yu nɔ sabi in nem? Yu go mɔs sabi yu padi dɛn nem. Wan Bɔlgerian uman we nem Irina se, “I nɔ pɔsibul fɔ kam nia Gɔd if yu nɔ no in nem.” Lɛk aw wi bin tɔk na di fɔs atikul, Gɔd insɛf sɛf want mek wi kam nia am. So i de yuz di Baybul fɔ mek wi no am. I de tɛl wi se: “Mi na Jiova. Na dat na mi nem.”—Ayzaya 42:8.

Yu tink se Jiova bisin if wi no in nem ɛn de yuz am? Tink bɔt dis: Gɔd in nem de insay di Ibru Skripchɔ lɛk 7,000 tɛm so. Dɛn rayt am wit 4 Ibru lɛta dɛn we dɛn kɔl di Tɛtragrametin. Jiova in nem bɔku pas ɛni ɔda nem na di Baybul. So dis de sho wi klia wan se Jiova want mek wi no in nem ɛn yuz am.a

Sɔm pipul dɛn fil se bikɔs Gɔd oli ɛn in na di Ɔlmayti, na fityay fɔ yuz in nem. Na tru se i bad fɔ yuz Gɔd in nem ɔlkayn we, jɔs lɛk aw i bad fɔ yuz yu padi in nem ɔlkayn we. Bɔt Jiova want lɛ di wan dɛn we lɛk am, rɛspɛkt in nem ɛn mek ɔda pipul dɛn no bɔt in nem. (Sam 69:30, 31; 96:2, 8) Mɛmba se Jizɔs bin tich in disaypul dɛn fɔ pre se: “Wi Papa we de na ɛvin, mek ɔlman ɔnɔ yu nem.” Wisɛf go ɛp fɔ ɔnɔ Gɔd in nem we wi tɛl ɔda pipul dɛn bɔt am. Dis go mek wi kam nia Gɔd mɔ ɛn mɔ.—Matyu 6:9.

Di Baybul se Gɔd de pe atɛnshɔn mɔ to di wan dɛn we “de tink bɔt in nem.” Dat na di wan dɛn we valyu in nem. (Malakay 3:16; futnot) We Jiova de tɔk bɔt dɛn kayn pipul ya, i se ‘A go protɛkt dɛn bikɔs dɛn no mi nem. Dɛn go kɔl mi ɛn a go ansa dɛn. A go de wit dɛn we dɛn de pan trɔbul.’ (Sam 91:14, 15) If wi want fɔ bi Jiova in tayt padi, wi fɔ no in nem ɛn yuz am.