DI BAYBUL IN ANSA TO SƆM KWƐSTYƆN DƐN
Aw pikin dɛn go ebul fɔ lɛk Gɔd?
Ɛp yu pikin dɛn fɔ no di tin dɛn we Gɔd mek so dat dɛn go no Gɔd ɛn lɛk am
Ɛp yu pikin dɛn fɔ no di tin dɛn we Gɔd mek so dat dɛn go no Gɔd ɛn lɛk am
Yu pikin dɛn go ebul fɔ lɛk Gɔd if dɛn si tin dɛn we de sho se Gɔd de ɛn i lɛk dɛn. Ɛn dɛn go lɛk Gɔd if dɛn no am. (Jɔn In Fɔs Lɛta 4:8) Fɔ ɛgzampul, yu pikin dɛn fɔ no di ansa to dɛn kwɛstyɔn dɛn ya: Wetin mek Gɔd mek mɔtalman? Wetin mek Gɔd de alaw pipul dɛn fɔ sɔfa? Wetin Gɔd go du fɔ mɔtalman tumara bambay?—Rid Lɛta Fɔ Filipay 1:9.
Yu go ebul fɔ ɛp yu pikin dɛn fɔ lɛk Gɔd if dɛn si se yusɛf lɛk Gɔd. We yu pikin dɛn si se yu lɛk Gɔd, dɛnsɛf go mɔs fala yu.—Rid Dyutɔrɔnɔmi 6:5-7; Prɔvabs 22:6.
Aw yu go ebul fɔ tɔch yu pikin dɛn at?
Gɔd in Wɔd gɛt pawa. (Di Ibru Pipul Dɛn 4:12) So na fɔ ɛp yu pikin dɛn fɔ no di smɔl smɔl tin dɛn we de insay Gɔd in Wɔd. Fɔ lɛ Jizɔs go ebul tɔch pipul dɛn at, i bin de aks kwɛstyɔn, i bin de lisin, ɛn ɛksplen di Skripchɔ dɛn klia wan. Yu go ebul fɔ mek Gɔd in wɔd tɔch yu pikin in at we yu falamakata di we aw Jizɔs bin de tich.—Rid Lyuk 24:15-19, 27, 32.
Apat frɔm dat, if yu ɛp yu pikin fɔ lan Baybul stori dɛn we de sho aw Gɔd bin de dil wit pipul dɛn we bin de trade, i go ɛp am fɔ no Gɔd ɛn lɛk am. Buk, magazin, ɛn ɔda tin dɛn de na wi Wɛbsayt we na www.jw.org fɔ ɛp yu pikin dɛn fɔ lɛk Gɔd.—Rid Sɛkɔn Lɛta To Timoti 3:16.