DI TƆPIK NA DI FRƆNT PEJ | YU GO LƐK FƆ STƆDI DI BAYBUL?

Baybul Stɔdi Program We De Fɔ Ɔlman

Bɔku pipul dɛn na di wɔl no Jiova Witnɛs dɛn fɔ di prichin wok we dɛn de du. Bɔt yu bin no se wi de stɔdi pipul dɛn di Baybul ɔlsay na di wɔl??

Dɛn de stɔdi wan man di Baybul na in wokples

Insay 2014, na lɛk 8,000,000 Witnɛs dɛn we de na 240 kɔntri dɛn bin stɔdi di Baybul wit lɛk 9,500,000 pipul dɛn ɛni mɔnt.a Fɔ tru, di pipul dɛn we de stɔdi di Baybul wit wi dɔn pas di pipul dɛn we de na lɛk 140 kɔntri dɛn!

Fɔ lɛ Jiova Witnɛs dɛn ebul fɔ tich pipul dɛn di Baybul, dɛn dɔn mek lɛk wan ɛn af bilyɔn Baybul dɛn, buk dɛn, magazin dɛn, ɛn ɔda tin dɛn we wi kin yuz fɔ stɔdi pipul dɛn di Baybul. Ɛn dɛn buk ɛn magazin ya de insay lɛk 700 langwej dɛn so! Dɛn buk ɛn magazin ya we dɛn de print na difrɛn langwej dɛn dɔn mek pipul dɛn de stɔdi di Baybul insay dɛn yon langwej.

ANSA DƐN TO SƆM KWƐSTYƆN DƐN WE PIPUL DƐN KIN AKS BƆT WI BAYBUL STƆDI PROGRAM

Aw wi kin stɔdi pipul dɛn di Baybul?

Wi kin tek difrɛn Baybul tɔpik dɛn ɛn luk di Baybul vas dɛn we gɛt fɔ du wit di tɔpik we wi de tɔk bɔt. Fɔ ɛgzampul, di Baybul ansa kwɛstyɔn dɛn lɛk: Udat na Gɔd? Aw i tan lɛk? I gɛt nem? Usay i de? Wi go ebul kam nia am? Di tin we nɔ kin izi na fɔ no us pat na di Baybul di ansa de.

Fɔ ɛp pipul dɛn fɔ fɛn di ansa, wi kin yuz wan buk we nem Wetin Rili di Baybul De Tich?b Dis buk gɛt 224 pej dɛn. Dɛn mek dis buk fɔ ɛp pipul dɛn fɔ ɔndastand di smɔl smɔl tin dɛn we di Baybul de tich. I gɛt lɛsin dɛn bɔt Gɔd, Jizɔs Krays, wetin mek mɔtalman de sɔfa, aw di wan dɛn we dɔn day go gɛt layf bak, prea, ɛn bɔku ɔda tin dɛn.

Ustɛm ɛn usay wi kin stɔdi pipul dɛn di Baybul?

Wi kin du di stɔdi na ples ɛn tɛm we fayn fɔ yu.

Aw lɔng di stɔdi kin tek?

Bɔku pipul dɛn kin yuz wan awa ɛni wik fɔ lɛ wi stɔdi dɛn di Baybul. Bɔt aw lɔng di stɔdi kin tek, kin chenj. Wi kin ajɔst am fɔ fit di tɛm we yu want. Sɔm kin stɔdi fɔ jɔs 10 ɔ 15 minit ɛni wik.

Ɔmɔs yu go pe fɔ stɔdi?

Di stɔdi ɛn di buk dɛn we wi go yuz, na fri. Dis gri wit wetin Jizɔs bin tɛl in disaypul dɛn. I bin se: “Una gɛt dis fri, so una gi fri.”—Matyu 10:8.

Aw lɔng yu go stɔdi fɔ?

Wɛl, i lɛf to yu. Di buk we nem Wetin Rili di Baybul De Tich? gɛt 19 lɛsin dɛn. Yu kin stɔdi ɛni wan pan dɛn ɔ ɔl di lɛsin dɛn we de insay di buk di we we fayn fɔ yu.

A fɔ bi Jiova Witnɛs?

Nɔ. Wi no se ɔlman gɛt rayt fɔ chuz wetin i biliv. So pipul dɛn we dɔn no smɔl tin bɔt di Baybul kin disayd fɔ dɛnsɛf wetin dɛn want.

Usay a go ebul fɔ lan mɔ?

Di Wɛbsayt we na jw.org de sho bɔku tin dɛn bɔt wetin Jiova Witnɛs dɛn biliv ɛn wetin dɛn de du..

Aw a go ebul aks fɔ Baybul stɔdi?

Gi yu nem ɛn adrɛst na di say na www.pr2711.com we de fɔ aks fɔ Baybul stɔdi.
Yuz di adrɛs dɛn we de na pej tu, na dis magazin fɔ rayt to di adrɛs we de nia yu.
Tɔk to ɛni Jiova Witnɛs we de nia yu. Yu kin luk fɔ “Jiova Witnɛs dɛn” insay buk dɛn we gɛt tɛlifon nɔmba dɛn na yu eria ɔ kɔntri.

a Dɛn kin du Baybul stɔdi wit wan pɔsin ɔ mɔ pipul dɛn.

b Na Jiova Witnɛs dɛn mek am. I dɔn pas 230 milyɔn kɔpi we dɛn dɔn print ɛn dis buk de insay pas 260 langwej dɛn.

DI BAYBUL DƆN ƐP FAMILI DƐN

“We mi wɛf bigin fɔ stɔdi di Baybul, a notis se i bigin chenj di we aw i bin de liv in layf. Wi famili bigin go bifo. Bikɔs a bin rili want fɔ no wetin i de lan, misɛf bigin fɔ stɔdi di Baybul. Wetin a bin de lan mek a bi bɛtɛ pɔsin. Di stɔdi we wi stɔdi di Baybul dɔn ɛp fɔ mek wanwɔd de na wi famili.”—Izikɛl.

“Afta a bigin stɔdi di Baybul, a bin ebul lɛf fɔ tek drɔgs, lɛf fɔ drink ɛn chak, ɛn lan fɔ kɔntrol misɛf we a kin vɛks. Naw mi os klin ɛn nit. A lɛk mi famili mɔ ɛn a de ɛnjɔy fɔ du tin dɛn we go mek dɛn gladi. A gladi pasmak naw.”—Karɛn.

“Sɔm pipul dɛn bin de tray fɔ pwɛl mi at we a bin de stɔdi di Baybul. Bɔt mi man bin sɔpɔt mi we a disayd fɔ stɔdi di Baybul. I tɛl mi se: ‘A nɔ bisin bɔt wetin pipul dɛn de tɔk. Wetin a bisin bɔt, na di we aw yu layf dɔn chenj. Kɔntinyu fɔ du wetin yu de du.’ Wi famili nɔ bin ɛva de lɛk aw i de so naw!”—Vinina.