DI BAYBUL IN ANSA TO SƆM KWƐSTYƆN DƐN
Wetin na Jɔjmɛnt De?
Wetin mek jɔjmɛnt de na tɛm we pipul dɛn go gladi?
Di tɛm we dɛn bin de rayt di Baybul, Gɔd bin de yuz jɔj dɛn fɔ sev in pipul dɛn frɔm di wan dɛn we nɔ bin de trit dɛn fayn. (Di Jɔj Dɛn 2:18) Di Baybul tɛl wi aw Jɔjmɛnt De gɛt fɔ tan lɛk tumara bambay. I se na tɛm we ɔlman go gladi bikɔs Jiova we na di Jɔj fɔ di wan ol wɔl, go sev mɔtalman frɔm di wan dɛn we nɔ bin de trit dɛn fayn.—Rid Sam 96:12, 13; Ayzaya 26:9.
Gɔd dɔn pik Jizɔs fɔ jɔj di wan dɛn we gɛt layf ɛn di wan dɛn we dɔn day. (Di Apɔsul Dɛn Wok [Akt] 10:42; 17:31) Bɔku pipul dɛn nɔ bin no Gɔd bifo dɛn day. Insay Jɔjmɛnt De, Jizɔs go gi dɛn pipul ya layf bak so dat dɛn go no di tru Gɔd ɛn lɛk am.—Rid Di Apɔsul Dɛn Wok [Akt] 24:15.
Wetin mek Jɔjmɛnt De go tek wan tawzin ia?
Di wan dɛn we dɔn day go gɛt layf bak insay di wan tawzin ia. (Rɛvɛleshɔn 20:4, 12) Dɛn go nid tɛm fɔ lan bɔt wetin Gɔd want ɛn obe am. Di Baybul nɔ sɔpɔt wetin bɔku pipul dɛn kin tɔk bɔt Jɔjmɛnt De. Di Baybul se dɛn go jɔj pipul dɛn bay wetin dɛn du afta dɛn gɛt layf bak.—Rid Lɛta Fɔ Rom 6:7.
Di Baybul tɔk bak bɔt wan ɔda jɔjmɛnt de we go kam bifo di wan tawzin ia bigin. Dɛn kin kɔl am bak di ɛnd, ɛn dɛn tɔk bɔt am insay di fɔs atikul dɛn insay dis magazin. Da tɛm de, Gɔd go pul ɔl di wikɛd pipul dɛn. (Pita In Sɛkɔn Lɛta 3:7) So wi fɔ tray fɔ sho se wi lɛk Gɔd.—Rid Pita In Sɛkɔn Lɛta 3:9, 13.