Falamakata di Wan We Prɔmis Layf we Go De Sote Go

1. Us gift we go ɛp wi fɔ falamakata Gɔd in kwaliti dɛn?

WI KIN ebul fɔ ɔndastand aw ɔda pipul dɛn de fil. Dis na fayn gift we Jiova dɔn gi wi. Wi kin ebul fɔ imajin sɔntin we nɔ apin to wi yet. (Rid Lɛta Fɔ Ɛfisɔs 5:1, 2.) Aw wi go ebul fɔ yuz dis gift we Gɔd dɔn gi wi? Wetin wi go du fɔ lɛ di tin dɛn we wi de tink bɔt nɔ ambɔg wi?

2. Wetin Jiova kin du we wi de sɔfa?

² Wi gladi we Gɔd dɔn prɔmis fɔ gi layf we go de sote go na ɛvin fɔ di fetful anɔyntɛd Kristian dɛn ɛn layf we go de sote go na dis wɔl fɔ Jizɔs in “ɔda ship dɛn.” (Jɔn 10:16; 17:3; 1 Kɔr. 15:53) Fɔ tru, di wan dɛn we gɛt fɔ gɛt layf we go de sote go na ɛvin ɔ na dis wɔl nɔ go sɔfa igen igen. Jiova no di pen we wi kin fil we bad tin dɛn kin apin to wi, jɔs lɛk aw i bin no aw di Izrɛlayt dɛn bin de sɔfa as slev na Ijipt. Fɔ tru, “i bin de fil am ɔl di tɛm we dɛn kin de pan prɔblɛm.” (Ayz. 63:9) Ɛn leta, we di Ju dɛn bin de fred bikɔs dɛn ɛnimi dɛn nɔ bin want lɛ dɛn bil di tɛmpul bak, Gɔd bin tɛl dɛn se: “Ɛnibɔdi we tɔch una dɔn tɔch mi bɔlyay.” (Zak. 2:8) Jɔs lɛk aw mama lɛk in pikin, na so Jiova lɛk in pipul dɛn ɛn i kin du sɔntin fɔ sho se i lɛk dɛn. (Ayz. 49:15) So wi si se Jiova kin ebul fɔ ɔndastand aw ɔda pipul dɛn de fil, ɛn i dɔn mek wisɛf ebul fɔ du dis sem tin.—Sam 103:13, 14.

AW JIZƆS FALAMAKATA GƆD FƆ SHO LƆV?

3. Wetin bin ɛp Jizɔs fɔ sɔri fɔ pipul dɛn?

³ Jizɔs bin no di pen we ɔda pipul dɛn bin de fil, pan ɔl we i nɔ wande gɛt di prɔblɛm dɛn we dɛn gɛt. Fɔ ɛgzampul, di pipul dɛn bin de fred di edman dɛn pan Gɔd biznɛs, we bin de ful dɛn ɛn put bɔku bɔku lɔ pan dɛn. Dɛn lɔ ya we dɛn bin de put nɔ bin kɔmɔt frɔm Gɔd. (Mat. 23:4; Mak 7:1-5; Jɔn 7:13) Pan ɔl we Jizɔs nɔ bin de fred ɔ biliv di lay lay tin dɛn we dɛn de tich, i bin ɔndastand aw di pipul dɛn bin de fil. Na dis mek “we i si di krawd, i fil sɔri fɔ dɛn, bikɔs dɛn nɔ bin de trit dɛn fayn ɛn nɔbɔdi nɔ bin de fɔ ɛp dɛn, dɛn bin fiba ship we nɔ gɛt shɛpad.” (Mat. 9:36) Jizɔs bin lɛk pipul dɛn ɛn i bin de sɔri fɔ dɛn, jɔs lɛk in Papa.—Sam 103:8.

4. Wetin Jizɔs bin de du we i si pipul dɛn de sɔfa?

⁴ We Jizɔs bin de si pipul dɛn de sɔfa, i bin de du sɔntin fɔ ɛp dɛn bikɔs i lɛk dɛn. So dis bin de sho se Jizɔs bin de falamakata in Papa fɔ sho lɔv. Afta we Jizɔs ɛn in apɔsul dɛn dɔn travul fa say fɔ go prich, dɛn bin de fɛn wan kwayɛt ples fɔ blo. Bɔt we Jizɔs si di krawd we de wet fɔ am, i fil sɔri fɔ dɛn ɛn bigin “fɔ tich dɛn bɔku tin.”—Mak 6:30, 31, 34.

AW WI GO FALAMAKATA JIOVA FƆ SHO LƆV?

5, 6. If wi want fɔ falamakata Gɔd fɔ sho lɔv, aw wi fɔ trit ɔda pipul dɛn? Gi wan ɛgzampul. (Luk di pikchɔ nia dis atikul in taytul.)

⁵ Wi go falamakata Gɔd fɔ sho lɔv bay aw wi trit ɔda pipul dɛn. Fɔ ɛgzampul, lɛ wi se wan yɔŋ brɔda we nem Alan de tink bɔt wan ol brɔda we i nɔ izi fɔ am fɔ rid bikɔs in yay de ambɔg am. Ɛn i nɔ izi fɔ am fɔ waka fɔ go prich frɔm os to os. Alan mɛmba wetin Jizɔs bin tɔk, we i se: “Jɔs lɛk aw una want mek dɛn trit una, na so una fɔ trit ɔda pipul dɛn.” (Lyuk 6:31) So Alan aks insɛf se, ‘Aw a want lɛ ɔda pipul dɛn trit mi?’ I ansa se, ‘A want lɛ dɛn ple bɔl wit mi!’ Bɔt yu tink se di ol brɔda go ebul fɔ ple bɔl? Wetin Jizɔs tɔk de sho se wi fɔ de aks wisɛf dis kwɛstyɔn, ‘Aw a go want lɛ ɔda pɔsin trit mi if a bin gɛt di prɔblɛm we i gɛt?’

⁶ Alan nɔto brɔda we dɔn ol, bɔt i ebul fɔ imajin sɔntin we nɔ apin to am yet. I spɛn tɛm wit di ol brɔda ɛn tek tɛm fɔ lisin to am. As tɛm de go, Alan kam fɔ ɔndastand aw i rili tan lɛk fɔ bi pɔsin we ol ɛn aw i nɔ izi fɔ lɛ ol pɔsin rid di Baybul ɔ waka frɔm os to os. We Alan kam fɔ ɔndastand di prɔblɛm we di ol brɔda gɛt, i si se di brɔda nid pɔsin fɔ ɛp am, ɛn dis mek Alan want fɔ ɛp am. Yusɛf go ebul fɔ du dis sem tin. Fɔ falamakata Jiova fɔ sho lɔv, wi fɔ put wisɛf na wi brɔda dɛn shuz.—1 Kɔr. 12:26.

7. Aw wi go ebul fɔ ɔndastand di we aw wi brɔda dɛn de fil?

⁷ Nɔto ɔltɛm i kin izi fɔ ɔndastand di prɔblɛm dɛn we ɔda pipul dɛn gɛt. Bɔku pipul dɛn kin gɛt prɔblɛm dɛn we wi nɔ wande no bɔt. Sɔm dɛn skrap, sɔm dɛn sik, ɔ sɔm dɛn de we ol. Sɔm dɛn at pwɛl pasmak, sɔm de wɔri tumɔs, ɛn sɔm kin fil bad bikɔs pɔsin bin dɔn trit dɛn bad trade. Ɔda wan dɛn kin de na famili we na dɛn nɔmɔ de sav Jiova ɔ na dɛn wangren de mɛn dɛn pikin. Ɔlman gɛt in yon prɔblɛm, ɛn sɔntɛnde na prɔblɛm we nɔ wande mit wi. So aw wi go ebul fɔ falamakata Gɔd fɔ sho lɔv? Na we wi tek tɛm lisin to di pɔsin te wi ɔndastand aw i de fil. Di tin we yu go du fɔ ɛp wan pɔsin kin difrɛn frɔm wetin yu go du fɔ ɛp ɔda pɔsin. Bɔt sɔntɛm yu go ebul fɔ mɛmba di pɔsin aw Jiova de fil bɔt di prɔblɛm we i gɛt ɛn du sɔntin fɔ ɛp am. We wi du ɔl dis, i go ɛp wi fɔ falamakata Jiova fɔ sho lɔv ɛn du sɔntin fɔ ɛp di pɔsin.—Rid Lɛta Fɔ Rom 12:15; Pita In Fɔs Lɛta 3:8.

FALAMAKATA JIOVA FƆ TRIT ƆDA PIPUL DƐN FAYN

8. Wetin mek Jizɔs bin de trit pipul dɛn fayn?

⁸ Gɔd in Pikin bin tɔk se: “Gɔd we de pantap ɔlman, . . . gud to di wan dɛn we nɔ de tɛl tɛnki ɛn to di wikɛd wan.” (Lyuk 6:35) Infakt, Jizɔs bin falamakata Gɔd fɔ du gud to pipul dɛn ɛn trit dɛn fayn. Wetin bin ɛp Jizɔs fɔ du dat? I bin de tink bɔt aw di tin dɛn we i go tɔk ɛn du go afɛkt di we aw ɔda pɔsin go fil. Fɔ ɛgzampul, wan uman we pipul dɛn bin no se dɔn du bɔku bad tin bin go to Jizɔs, ɛn kray na in fut ɛn sok Jizɔs in fut wit in kray wata. Jizɔs si se di uman dɔn rili fil bad fɔ wetin i du, ɛn i no se di uman in at go pwɛl if i nɔ tɔk fayn to am ɛn tɛl am lɛ i go. So i prez di uman ɛn fɔgiv am. Wan Faresi we bin de de, nɔ bin lɛk wetin apin, bɔt Jizɔs bin tɔk fayn to insɛf.—Lyuk 7:36-48.

9. Wetin go ɛp wi fɔ falamakata Gɔd fɔ trit ɔda pipul dɛn fayn? Gi wan ɛgzampul.

⁹ Aw wi go falamakata Gɔd fɔ trit pipul dɛn fayn? Di apɔsul Pɔl bin rayt se: “Di Masta in slev nɔ nid fɔ fɛt, bɔt i fɔ tek tɛm we i de trit ɔlman.” (2 Tim. 2:24) Pipul dɛn we kin tink bifo dɛn tɔk ɔ du sɔntin nɔ kin mek ɔda pipul dɛn fil bad. Tink bɔt aw wi go trit ɔda pipul dɛn fayn insay dɛn ɛgzampul ya: Na yu wokples, yu bɔs nɔ de du in wok fayn. Wetin yu go du? I dɔn te we wan brɔda nɔ kam mitin, dɔn wande i kam mitin. Wetin yu go tɛl am? Yu go fil savis, dɔn sɔmbɔdi tɛl yu se, “A bizi rayt naw, a nɔ go ebul fɔ tɔk to yu.” Yu go tray fɔ ɔndastand am? Yu de na os, yu man ɔ wɛf aks yu se, “Wetin mek yu nɔ bin tɛl mi wetin yu plan fɔ du Satide?” Yu go tɔk fayn to yu man ɔ yu wɛf? We wi put wisɛf na ɔda pipul dɛn shuz ɛn tray fɔ tink aw di tin dɛn we wi go tɔk go afɛkt dɛn, wi go ebul fɔ tɔk ɛn du tin di we we go sho se wi de falamakata Jiova fɔ trit ɔda pipul dɛn fayn.—Rid Prɔvabs 15:28.

FALAMAKATA JIOVA FƆ DU TIN WIT SƐNS

10, 11. Wetin go ɛp wi fɔ falamakata Gɔd fɔ du tin wit sɛns? Gi wan ɛgzampul.

¹⁰ Di ebul we wi ebul fɔ tink bɔt sɔntin we nɔ mit wi yet kin ɛp wi bak fɔ falamakata Jiova fɔ du tin wit sɛns ɛn no wetin go apin we wi du sɔntin. Jiova gɛt sɛns pasmak, ɛn if i want, i kin si wetin gɛt fɔ apin bifo di tin apin. Wi nɔ go ebul fɔ no wetin gɛt fɔ apin lɛk Jiova, bɔt wi kin ebul fɔ tink bɔt wetin go apin we wi du sɔntin. Di Izrɛlayt dɛn nɔ bin de tink bɔt di bad tin dɛn we go apin to dɛn if dɛn nɔ du wetin Gɔd tɛl dɛn. Pan ɔl we Gɔd bin dɔn du bɔku gud tin fɔ dɛn, Mozis bin no se dɛn go du wetin bad na Jiova in yay. So i tɛl ɔl di Izrɛlayt dɛn se: “Dɛn na neshɔn we nɔ gɛt sɛns, ɛn dɛn nɔ de ɔndastand. If nɔmɔ dɛn bin gɛt sɛns! Dɛn go tink gud wan bɔt dis. Dɛn go tink bɔt wetin gɛt fɔ apin to dɛn.”—Dyut. 31:29, 30; 32:28, 29.

¹¹ Fɔ falamakata Gɔd fɔ du tin wit sɛns, i go fayn mek wi tink ɔ imajin di bad tin dɛn we go apin if wi du sɔntin. Fɔ ɛgzampul, if yu ɛn sɔmbɔdi de wach unasɛf fɔ mared, yu fɔ no se we yu lɛk pɔsin, i nɔ kin izi fɔ kɔntrol di we aw yu de fil ɛn i kin izi fɔ lɛ yu fil fɔ du mami ɛn dadi biznɛs. Wi nɔ want fɔ plan ɔ du ɛnitin we go ambɔg wi fayn padi biznɛs wit Jiova! Bifo dat, lɛ wi fala dis advays, we se: “Pɔsin we gɛt sɛns de si trɔbul fa ɛn ayd, bɔt di wan we nɔ gɛt sɛns go go de ɛn sɔfa fɔ dat.”—Prɔv. 22:3.

KƆNTROL DI WE AW YU DE TINK

12. Aw di tin dɛn we wi de tink bɔt go ambɔg wi?

¹² Pɔsin we gɛt sɛns kin no se di tin we i de tink bɔt kin tan lɛk faya. Faya go du gud tin fɔ wi if wi yuz am di rayt we. Fɔ ɛgzampul, wi kin yuz am fɔ kuk. Bɔt if wi nɔ kɔntrol am, i go bɔn wan ol os ɛn kil di wan dɛn we de insay. Semweso, i nɔ bad fɔ tink, if di tin we wi de tink bɔt go ɛp wi fɔ falamakata Jiova. Bɔt i nɔ fayn fɔ tink bɔt mami ɛn dadi biznɛs ɔ ɛni ɔda bad tin. Fɔ ɛgzampul, if wi mek am abit fɔ de tink bɔt bad tin, i go mek wi du wetin wi de tink bɔt. Ɛn if wi put an pan di bad tin we wi de tink bɔt, i go pwɛl wi padi biznɛs wit Jiova!—Rid Jems 1:14, 15.

13. Wetin Iv go dɔn de tink bɔt?

¹³ Tink bɔt di fɔs uman, we na Iv. Jiova bin dɔn tɛl Adam ɛn Iv se dɛn nɔ fɔ it di frut we de na “di sɛns tik we de sho gud ɛn bad.” (Jɛn. 2:16, 17) Bɔt di snek tɛl Iv se: “Una nɔ go day atɔl. Gɔd insɛf no se di de we una go it am, una yay dɛn go opin ɛn una go tan lɛk Gɔd. Una go bigin disayd fɔ unasɛf wetin gud ɛn wetin bad.” Iv “si se di frut dɛn we de na di tik bin fayn fɔ it ɛn as pɔsin si am so i go want am.” Wetin apin afta dat? “I bigin fɔ tek di frut ɛn it am. Afta dat, i gi sɔm to in man we i bin de wit am, ɛn in bak bigin fɔ it am.” (Jɛn. 3:1-6) Iv bin lɛk wetin Setan tɛl am. I bigin tink se nɔbɔdi nɔ go de tɛl am wetin gud ɛn wetin bad, na in go de disayd fɔ insɛf. Dis tin we i bin de tink bɔt kam wit siriɔs prɔblɛm. Di sin we in man, Adam, sin “briŋ sin na di wɔl ɛn sin briŋ day.”—Rom 5:12.

14. Aw di Baybul de ɛp wi fɔ avɔyd bad tin?

¹⁴ Di sin we Iv sin na di gadin we bin de na Idɛn nɔ gɛt natin fɔ du wit mami ɛn dadi biznɛs. Bɔt stil, Jizɔs bin wɔn wi nɔ fɔ de tink bɔt mami ɛn dadi biznɛs. I tɔk se: “Ɛnibɔdi we kɔntinyu fɔ luk uman te i gɛt filin fɔ am, dɔn du mami ɛn dadi biznɛs wit am na in at.” (Mat. 5:28) Pɔl insɛf bin wɔn wi se: “Lɛ wi nɔ de plan fɔ du di tin dɛn we wi at de tɛl wi fɔ du.”—Rom 13:14.

15. Uskayn jɛntri wi fɔ kip? Wetin mek wi fɔ kip dis kayn jɛntri?

¹⁵ Wan ɔda bad tin na we wi de imajin se wi jɛntri ɛn nɔ de pe tumɔs atɛnshɔn pan Gɔd biznɛs. “Di jɛntri we mɔniman gɛt na in strɔng siti; na in maynd, i tan lɛk wɔl we de protɛkt am.” (Prɔv. 18:11) Jizɔs bin pul wan stori we de sho di bad tin we kin apin to pɔsin “we de kip jɛntri fɔ insɛf bɔt i nɔ jɛntri na Gɔd in yay.” (Lyuk 12:16-21) Jiova kin gladi we wi du di tin dɛn we i want. (Prɔv. 27:11) Wi kin gladi we wi no se Jiova gladi fɔ wi bikɔs wi dɔn kip wi “jɛntri na ɛvin”! (Mat. 6:20) Di padi biznɛs we wi gɛt wit Jiova na di bɛst jɛntri we wi go ɛva gɛt.

NƆ GO DE WƆRI TUMƆS

16. Wetin go ɛp wi fɔ lɛ wi nɔ de wɔri tumɔs?

¹⁶ If wi want fɔ kip “jɛntri . . . na dis wɔl,” wi go de wɔri tumɔs. (Mat. 6:19) Jizɔs bin pul wan parebul fɔ sho se “di yagba we de na dis wɔl ɛn di pawa we jɛntri gɛt fɔ ful pɔsin” kin mek i nɔ izi fɔ put di Kiŋdɔm fɔs na wi layf. (Mat. 13:18, 19, 22) Ilɛksɛf sɔm pipul dɛn de wɔri bɔt mɔni ɔ dɛn nɔ de wɔri bɔt mɔni, dɛn kin tink ɔltɛm bɔt ɔl di bad tin dɛn we go apin. Bɔt if wi de wɔri tumɔs, wi go ambɔg wi wɛlbɔdi wan ɛn wi go ivin lɛf fɔ biliv pan Jiova. Lɛ wi abop pan Jiova ɛn mɛmba se “pɔsin we de wɔri tumɔs nɔ de gladi, bɔt na gud wɔd go mek in at gladi.” (Prɔv. 12:25) We sɔmbɔdi we ɔndastand wi ɛnkɔrej wi, i kin mek wi gladi. Wan ɔda tin we go mek wi nɔ de wɔri tumɔs na we wi tɔk to wi mama ɛn papa, wi man ɔ wɛf, ɔ padi we wi biliv, we de si tin di we aw Gɔd de si am.

17. Aw Jiova de ɛp wi we sɔntin de mek wi wɔri?

¹⁷ Jiova ɔndastand di tin dɛn we de mek wi wɔri pas aw ɛnibɔdi go ɔndastand. Pɔl bin rayt se: “Una nɔ wɔri fɔ ɛnitin, bɔt pan ɛnitin we una de du una fɔ de pre ɛn beg Gɔd ɛn tɛl am tɛnki; una fɔ mek Gɔd no di tin dɛn we una want; ɛn di pis we Gɔd de gi we pas di we aw una ɔndastand go gayd una at ɛn una maynd tru Krays Jizɔs.” (Fil. 4:6, 7) Tink bɔt di wan dɛn we de ɛp wi so dat wi padi biznɛs wit Jiova nɔ go pwɛl, wi kɔmpin Kristian dɛn, di ɛlda dɛn, di fetful slev, di enjɛl dɛn, Jizɔs, ɛn Jiova insɛf sɛf.

18. Aw di tink we wi de tink di rayt we go ɛp wi?

¹⁸ Wi dɔn si klia wan se we wi de tink di rayt we, i kin ɛp wi fɔ falamakata Gɔd fɔ sho lɔv. (1 Tim. 1:11; 1 Jɔn 4:8) Wi go gladi if wi de sho se wi rili lɛk ɔda pipul dɛn, if wi de tink bɔt di bad tin dɛn we go apin if wi du sɔntin, ɛn if wi lɛf fɔ wɔri tumɔs. So lɛ wi yuz di gift we Gɔd dɔn gi wi fɔ imajin di op we wi gɛt ɛn falamakata Jiova fɔ sho lɔv, fɔ trit ɔda pipul dɛn fayn, fɔ du tin wit sɛns, ɛn fɔ gɛt gladi at.—Rom 12:12.