DI TƆPIK NA DI FRƆNT PEJ
Udat Na Jiova Witnɛs Dɛn?
“A dɔn no Mayk fɔ lɔng tɛm naw. In na wan pan Jiova Witnɛs dɛn. Bɔt a nɔ ɔndastand natin bɔt in rilijɔn. Udat na Jiova? Wetin mek Jiova Witnɛs dɛn nɔ de sɛlibret ɔlide dɛn? Fɔ se Mayk dɔn jɔyn wan grup we de du wetin bad?”—Bɛki, Kalifonia, Amɛrika.
“We mi neba dɛn bigin fɔ stɔdi di Baybul wit Jiova Witnɛs dɛn, a bin de wɔnda: ‘Wetin di nem, Jiova Witnɛs, min? A nɔ wande yɛri se rilijɔn de we gɛt dis kayn nem!’”—Zinan, Ɔntirio, Kanada.
“Mi ɛn mi wɛf tink se Jiova Witnɛs dɛn kin kam tɔk to wi bɔt di bad bad tin dɛn we wi de du so dat wi go fil bad bikɔs wi nɔ de go chɔch. Ɛn wi fil se if di men rilijɔn dɛn nɔ gɛt wetin wi de luk fɔ, pipul dɛn lɛk Jiova Witnɛs dɛn nɔ go gɛt am.”—Kɛnt, Wɔshintin, Amɛrika.
“Fɔ tru, a nɔ bin no udat Jiova Witnɛs dɛn bi ɛn wetin dɛn de fɔ.”—Sisilia, Ɛsjɔg, Dɛnmak.
Yu go mɔs dɔn si dɛn de prich frɔm os to os ɔ na say dɛn usay pipul dɛn kin bɔku, dɛn kin gi dɛn buk ɛn magazin dɛn, ɛn dɛn kin ivin stɔdi di Baybul wit pipul dɛn fɔ fri. Sɔntɛm na wan pan dɛn go dɔn gi yu dis magazin. Bɔt stil, yu go mɔs de wɔnda udat Jiova Witnɛs dɛn rili bi. Sɔntɛm yu bin de tink lɛk di pipul dɛn we wi jɔs dɔn tɔk bɔt.
If yu gɛt dɛn kwɛstyɔn dɛn ya ɛn yu rili want fɔ no di ansa dɛn, usay yu go go fɔ gɛt di ansa dɛn? Aw yu go ebul fɔ no wetin Jiova Witnɛs dɛn rili biliv? Usay dɛn kin pul mɔni fɔ kɛr dɛn prichin wok go bifo ɛn fɔ kia fɔ di say dɛn we dɛn de wɔship? Wetin mek dɛn kin kam na yu os? Ɛn wetin mek dɛn kin mit yu na say dɛn usay pipul dɛn kin bɔku?
Sisilia tɔk se: “A dɔn rid bɔku tin dɛn bɔt Jiova Witnɛs dɛn na di Intanɛt. A dɔn yɛri bɔku tin dɛn, ɛn a dɔn lisin to bɔku tɔk dɛn we dɛn kin tɔk agens Jiova Witnɛs dɛn. Fɔseka dis, a bigin fɔ tink bad bɔt Jiova Witnɛs dɛn.” Bɔt, leta, i bin tɔk to wan pan Jiova Witnɛs dɛn ɛn di ansa dɛn we dɛn gi am bin mek i satisfay.
Yu go lɛk fɔ gɛt di rayt ansa to yu kwɛstyɔn dɛn bɔt Jiova Witnɛs dɛn? Wi de ɛnkɔrej yu fɔ tɔn to di bɛst pipul dɛn we yu fɔ aks; dat na Jiova Witnɛs dɛnsɛf, we de mek dis magazin. (Prɔvabs 14:15) Wi op se di ɔda atikul dɛn go ɛp yu fɔ no udat na wi, wetin wi biliv, ɛn di wok we wi de du.