Yuz Dis Mɛmorial Tɛm fɔ Gɛt Mɔ Gladi At!
1. Wetin na wan we aw wi go ebul gɛt mɔ gladi at insay di Mɛmorial tɛm?
1 Yu go want fɔ gɛt mɔ gladi at insay Mach, Epril, ɛn Me? Wan we yu go ebul du dat na we yu du mɔ na di ministri, ɔ if yu ebul yu kin ivin ɔgzilari payɔnia. Aw dis go mek yu gɛt mɔ gladi at?
2. Wetin mek we wi du mɔ na di ministri go mek wi gɛt gladi at?
2 Tray fɔ Gɛt Mɔ Gladi At: We Jiova mek wi, i mek wi fɔ ebul gɛt gladi at ɛn fɔ mek wi satisfay as wi de lan bɔt am ɛn wɔship am. (Mat. 5:3, NW) I mek wi bak fɔ ebul gɛt gladi at we wi de gi to ɔda pipul dɛn. (Akt 20:35) Di ministri go gi wi di chans fɔ mek wi ebul wɔship Gɔd ɛn ɛp ɔda pipul dɛn. Na tru bak se we wi de du mɔ na di ministri de mek wi gɛt gladi at. Pantap dat, di mɔ wi de prich, na di mɔ wi de sabi aw fɔ ɛp ɔda pipul dɛn. As wi de sabi aw fɔ ɛp dɛn, dat go mek wi nɔ go fred ɔ shem fɔ prich. Wi go gɛt bɔku chans fɔ prich to pipul dɛn, ɛn fɔ stat fɔ stɔdi di Baybul wit dɛn. Ɔl dis go mek wi gɛt mɔ gladi at.
3. Wetin mek Mach ɛn Epril na fayn mɔnt dɛn fɔ ɔgzilari payɔnia?
3 Mach ɛn Epril go bi fayn mɔnt dɛn fɔ ɔgzilari payɔnia bikɔs wi go gɛt di chans fɔ du 30 ɔ 50 awa na di ministri. Pantap dat, frɔm Satide Mach 22, te di de fɔ di Mɛmorial we na Mɔnde Epril 14, wi go ebul tek pat fɔ invayt pipul dɛn fɔ kam di Mɛmorial. Ɔlman na di kɔngrigeshɔn go rili gladi fɔ prich togɛda, so dat dɛn go ebul fɔ prich na ɔl di say dɛn we di kɔngrigeshɔn fɔ prich bifo di tɛm fɔ di Mɛmorial rich.—Zɛf. 3:9, NW.
4. If wi want fɔ ɔgzilari payɔnia, wetin wi fɔ du?
4 Rɛdi Naw: If yu nɔ du dat yet, na fɔ tray fɔ no di tin dɛn we yu gɛt fɔ du insay dɛn mɔnt ya. Tray bak fɔ arenj dɛn tin ya fayn fayn wan so dat yu go ebul du mɔ insay dɛn mɔnt ya. Dɔn, pre to Jiova mek i ɛp yu. (Jems 1:5) Tɛl yu famili ɛn ɔda brɔda dɛn na di kɔngrigeshɔn bɔt dis. (Prɔv. 15:22) Yu go kam fɔ no se pan ɔl we yu nɔ gɛt bɛtɛ wɛlbɔdi ɔ yu gɛt bɔku ɔda tin dɛn fɔ du, yu kin stil ebul fɔ gɛt gladi at bay we yu ɔgzilari payɔnia.
5. Wetin go apin if wi tray fɔ du mɔ na di ministri insay dis Mɛmorial tɛm?
5 Jiova want lɛ in savant dɛn gɛt gladi at ɔltɛm. (Sam 32:11) If wi tray fɔ du mɔ na di ministri insay dis Mɛmorial tɛm, dat go mek wi gɛt plɛnti gladi at. Bɔt nɔto dat nɔmɔ, wi Papa we de na ɛvin insɛf go gladi.—Prɔv. 23:24; 27:11.