Wetin Wi Kin Lan Frɔm Prɔfɛt Zɛfinaya?
1. Uskayn tin dɛn bin de apin di tɛm we Zɛfinaya na bin prɔfɛt? Aw i bi gud ɛgzampul fɔ wi?
1 Lɛk 700 ia bifo dɛn bɔn Krays, di pipul dɛn na Juda nɔ bin de fred fɔ wɔship Beal. Dɛn bin jɔs dɔn kil bad Kiŋ Emɔn ɛn na yɔŋ Kiŋ Josaya bin de rul da tɛm de. (2 Kro. 33:21–34:1) Na insay da tɛm de Jiova bin yuz Zɛfinaya fɔ tɛl di pipul dɛn bɔt in jɔjmɛnt mɛsej. Zɛfinaya bin kɔmɔt na Juda in famili layn. Na da famili layn de di kiŋ dɛn bin de kɔmɔt. Bɔt pan ɔl dat, Zɛfinaya nɔ bin pul natin pan wetin Jiova bin tɛl am fɔ tɛl di lida dɛn na Juda. Jiova bin tɛl am fɔ tɛl dɛn se i nɔ lɛk di bad tin we dɛn bin de du. (Zɛf. 1:1; 3:1-4) Semweso, wi fɔ tray fɔ falamakata di kayn kɔrej we Zɛfinaya bin gɛt ɛn nɔ alaw wi fambul dɛn fɔ ambɔg di we aw wi de wɔship Jiova. (Mat. 10:34-37) Us mɛsej Zɛfinaya bin de prich, ɛn wetin bin apin?
2. Wetin wi fɔ du fɔ mek Jiova sɔri fɔ wi insay in big de?
2 Du Wetin Jiova Want: Na Jiova nɔmɔ ebul sev pɔsin we in big de go kam. Dat bin mek Zɛfinaya tɛl di pipul dɛn na Juda fɔ se dɛn fɔ kɔntinyu fɔ du wetin Jiova want, waka tret wan wit am, ɛn ɔmbul dɛnsɛf fɔ du wetin i want we dɛn stil gɛt tɛm. (Zɛf. 2:2, 3) Na dat wisɛf fɔ du tide. Lɛk Zɛfinaya, wi nɔ fɔ jɔs ɛnkɔrej ɔda pipul dɛn fɔ du wetin Jiova want, bɔt wisɛf fɔ mekɔp wi maynd nɔ fɔ “lɛf fɔ fala [Jiova.]” (Zɛf. 1:6) Bifo dat, wi fɔ sho se wi de du wetin Jiova want bay we wi de tek tɛm stɔdi in Wɔd ɛn pre fɔ mek i gayd wi, wi fɔ sho se wi de waka tret wan wit am bay we wi de liv klin layf. Ɛn fɔ sho se wi ɔmbul bay we wi de lisin ɔltɛm to di advays dɛn we Jiova in ɔganayzeshɔn de gi wi.
3. Wetin mek wi fɔ kɔntinyu fɔ gladi pan ɔl we nɔto ɔlman de lisin to di gud nyus?
3 Gud Tin Go Apin: Zɛfinaya in mɛsej we i bin de prich bin mek sɔm pipul dɛn na Juda bigin du wetin fayn. Wan pan dɛn pipul ya na bin Josaya we bigin fɔ lan bɔt Jiova frɔm we i smɔl. Josaya bin mek dɛn pul dɛn aydɔl we bin de na di land. (2 Kro. 34:2-5) Tide, pan ɔl we sɔm sid dɛn bɔt di Kiŋdɔm mɛsej kin fɔdɔm na rod, na ston ston, ɔ insay chuk chuk bush, sɔm dɛn stil de we de fɔdɔm na gud grɔn ɛn de bia frut. (Mat. 13:18-23) Wi shɔ se Jiova go blɛs wi we wi de tray tranga wan fɔ prich to pipul dɛn bɔt di Kiŋdɔm.—Sam 126:6.
4. Wetin mek wi fɔ ‘wet fɔ Jiova in de’?
4 Sɔm pipul dɛn na Juda bin fil se Jiova nɔ go du natin. Bɔt Jiova bin tɛl dɛn se in big de go mɔs kam ɛn i nɔ de fa. (Zɛf. 1:12, 14) I go sev di wan dɛn nɔmɔ we de go to am fɔ ɛp. (Zɛf. 3:12, 17) As wi de ‘wet fɔ Jiova in de,’ lɛ wi gladi fɔ jɔyn wi brɔda ɛn sista dɛn fɔ sav wi gret Gɔd wit wanwɔd!—Zɛf. 3:8, 9.