Yuz Yu Tɛm Fayn we Yu De Prich
Insay di 2014 savis ia, na 1,945,487,604 awa Jiova Witnɛs dɛn prich fɔ! Dis sho klia wan se dɛn bizi de du wetin Jiova want. (Sam 110:3; 1 Kɔr. 15:58) Bikɔs “plɛnti tɛm nɔ lɛf igen,” i pɔsibul fɔ mek yu yuz di tɛm we yu de prich fɔ ebul tɔk to bɔku pipul dɛn?—1 Kɔr. 7:29.
Fɔ yuz yu tɛm fayn we yu de prich min se yu fɔ rɛdi fɔ chenj di we aw yu de prich. Fɔ ɛgzampul, if yu de spɛn pas wan awa fɔ prich wan patikyula we, bɔt yu nɔ kin ebul fɔ prich to ɛnibɔdi, yu go ebul fɔ ajɔst di we aw yu de prich so dat yu go ebul fɔ tɔk to mɔ pipul dɛn? Difrɛn tin dɛn kin apin na difrɛn ples dɛn. Di advays dɛn we wi de kam tɔk bɔt go ɛp yu fɔ yuz yu tɛm fayn so dat i nɔ go tan lɛk se yu de prich fɔ natin.—1 Kɔr. 9:26.
We Yu De Prich Frɔm Os to Os: Fɔ lɔng tɛm naw, pɔblisha dɛn dɔn yus fɔ prich frɔm os to os na mɔnin. Bɔt bikɔs bɔku pipul dɛn de go wok, yu nɔ tink se i go fayn fɔ prich frɔm os to os ivintɛm we bɔku pipul dɛn go de blo na dɛn os? If yu de prich na strit ɔ na say usay pipul dɛn de du biznɛs, yu go ebul fɔ prich to bɔku pipul dɛn.
Pɔblik Prichin: Kat ɛn tebul dɛn we wi de yuz fɔ put buk ɛn magazin dɛn fɔ prich, fɔ de na say usay bɔku pipul dɛn de pas na di eria usay di kɔngrigeshɔn fɔ prich. (Rid di Julay 2013 Wi Kiŋdɔm Ministri (Inglish), pej 5.) If bɔku pipul dɛn nɔ de pas igen na di say usay una de du pɔblik prichin, di Kɔngrigeshɔn Savis Kɔmiti kin disayd fɔ mek una put di tebul ɔ kat na ɔda eria usay bɔku pipul dɛn kin pas.
We Yu De Du Ritɔn Visit ɛn Baybul Stɔdi: I pɔsibul fɔ mek yu push di tɛm we yu de du yu ritɔn visit ɛn Baybul stɔdi to tɛm dɛn we yu nɔ kin mit bɔku pipul dɛn fɔ prich to? Fɔ ɛgzampul, if yu ebul fɔ prich to mɔ pipul dɛn we yu de prich frɔm os to os Satide mɔnin, yu nɔ tink se i go bɛtɛ fɔ mek yu du yu Baybul stɔdi dɛn santɛm ɔ ivintɛm? We una de du ritɔn visit, una go ebul fɔ go to di wan dɛn we de na di sem eria so dat una go ebul fɔ du mɔ na di prichin wok?
Pan ɔl we na tru se wi kin kɔnt ɔmɔs tɛm wi de spɛn we wi de na fil savis, wi go gladi mɔ we wi ebul fɔ prich to pipul dɛn. If yu kam fɔ si se fɔ prich wan kayn we, wan patikyula tɛm de mek yu nɔ de ebul fɔ prich to bɔku pipul dɛn, tray ɔda kayn we. Pre to Jiova we na di “Masta” fɔ di prichin wok so dat i go ɛp yu fɔ yuz yu tɛm fayn we yu de prich!—Mat. 9:38.