Aw fɔ Yuz di Gud Nyus Buk fɔ Tich
1. Aw dɛn mek di Gud Nyus buk?
1 As wi bin dɔn tɔk insay wan atikul we de insay di Julay Wi Kiŋdɔm Ministri, wan impɔtant tin we wi kin yuz fɔ tich na di buk we nem, Gɔd Gɛt Gud Nyus fɔ Wi! Dɛn nɔ kot ɔl di skripchɔ dɛn we de de so dat di pɔsin we de stɔdi insɛf go ebul fɔ lan frɔm di Baybul. Pan ɔl we dɛn kin mek bɔku pan wi buk dɛn di kayn we we pɔsin kin ebul fɔ rid ɛn ɔndastand am fɔ insɛf, dɛn mek dis buk so dat pɔsin we de rid am go nid pɔsin fɔ stɔdi am. So ɛnitɛm wi gi pɔsin, wi fɔ tray fɔ sho di pɔsin aw wi kin du Baybul stɔdi so dat di pɔsin we wi de prich to go si se i fayn fɔ lan bɔt di gud nyus we de insay di Baybul.—Mat. 13:44.
2. Aw fɔ yuz di Gud Nyus buk di fɔs tɛm we yu prich to pɔsin?
2 Di Fɔs Tɛm we Yu Prich to Pɔsin: Yu kin se: “A kam to yu bikɔs pipul dɛn rili want no aw tumara bambay go tan lɛk. Yu tink se tin go ɛva bɛtɛ? [Alaw di pɔsin fɔ tɔk wetin i tink.] Di Baybul gɛt gud nyus we de gi wi op. Luk sɔm kwɛstyɔn dɛn we di Baybul ansa.” Gi di buk to di pɔsin we yu de prich to, ɛn tɛl am fɔ pik wan pan di kwɛstyɔn dɛn frɔm di bak pej. Dɔn, yuz di fɔs paregraf na di lɛsin we i pik fɔ sho am aw wi kin du Baybul stɔdi. Wan ɔda tin we yu kin du na fɔ aks di pɔsin kwɛstyɔn we yu tink se i go want fɔ no bɔt frɔm di lɛsin we yu pik ɛn sho am aw di buk go ɛp am fɔ fɛn di Baybul in ansa. If fim de na jw.org we tɔk mɔ bɔt da lɛsin de, sɔm pɔblisha dɛn kin ple am we dɛn de prich to di pɔsin.
3. Ɛksplen aw fɔ yuz di Gud Nyus buk fɔ kɔndɔkt Baybul stɔdi wit pɔsin.
3 Aw fɔ Kɔndɔkt di Stɔdi: (1) Rid di kwɛstyɔn we gɛt nɔmba nia am fɔ mek di pɔsin we yu de prich to pe atɛnshɔn to di men pɔynt. (2) Rid di paregraf we de ɔnda de. (3) Rid di skripchɔ we dɛn rayt wit italiks, ɛn tek tɛm aks kwɛstyɔn dɛn we go mek di pɔsin we yu de prich to ɔndastand aw di Baybul de ansa di kwɛstyɔn we gɛt nɔmba nia am. (4) If ɔda paregraf de ɔnda di kwɛstyɔn, du wetin wi bin dɔn tɔk bɔt na nɔmba 2 ɛn 3. If fim de we de ansa da kwɛstyɔn ɛn yu nɔ bin dɔn ple am yet fɔ di pɔsin we yu de prich to, mek shɔ se yu ple am fɔ di pɔsin. (5) Afta ɔl dat, aks di pɔsin di kwɛstyɔn we gɛt nɔmba nia am fɔ mek shɔ se i ɔndastand.
4. Wetin go ɛp wi fɔ sabi aw fɔ yuz dis fayn buk?
4 Tray fɔ sabi wetin de insay dis fayn buk. Yuz am ɛnitɛm we nid de. Bifo yu go kɔndɔkt di stɔdi, tink bɔt di pɔsin we yu de stɔdi ɛn tink bɔt di bɛst we fɔ yuz di skripchɔ dɛn we de insay di lɛsin fɔ mek i ɔndastand wetin una de stɔdi. (Prɔv. 15:28; Akt 17:2, 3) Di mɔ we yu de sabi aw fɔ yuz di buk, yu go kam fɔ si am as wan pan yu bɛst buk dɛn fɔ tich pipul dɛn bɔt di tru!