“Wɛn Pɔl Si Dɛn, Dat Kɔrej Am, I Tɛl Gɔd Tɛnki”

We di kɔngrigeshɔn na Rom bin yɛri se Pɔl de kam, sɔm brɔda dɛn bin travul fɔ 40 mayl (64 km) fɔ go mit am na rod. Aw di tin we dɛn brɔda dɛn ya du bin afɛkt Pɔl? “Wɛn Pɔl si dɛn, dat kɔrej am, i tɛl Gɔd tɛnki.” (Akt 28:​15) Na Pɔl bin de ɛnkɔrej di brɔda dɛn na di kɔngrigeshɔn dɛn we i bin de go waka, bɔt dis tɛm we i bin de na jel na in di brɔda dɛn bin de ɛnkɔrej.—2Kɔ 13:​10.

Tide sakit ovasia dɛn kin travul go difrɛn kɔngrigeshɔn dɛn fɔ ɛnkɔrej di brɔda ɛn sista dɛn. Lɛk ɔl Gɔd in pipul dɛn, sɔm tɛm dɛn de dɛn kin taya, wɔri, ɛn dɛn at kin pwɛl. Di nɛks tɛm we di sakit ovasia ɛn i wɛf kam fɛn una na una kɔngrigeshɔn, wetin yu go du fɔ ɛnkɔrej dɛn so dat yu go “ɛp [dɛn] fɔ waka klos Gɔd mɔ” ɛn dɛnsɛf “go ɛp” yu?—Rom 1:​11, 12.

• 

  Sɔpɔt di mitin fɔ fil savis. Di sakit ovasia kin gladi we pɔblisha dɛn kin sakrifays ɔda tin fɔ mek dɛn go ebul fɔ bɛnifit frɔm di spɛshal wik. (1Tɛ 1:​2, 3; 2:​20) Bigin plen fɔ bi ɔgzilari payɔnia insay di mɔnt we i de kam fɛn una. Yu go gi yu nem fɔ prich wit in ɔ in wɛf ɔ kɛr wan pan dɛn go fɔ du yu Baybul stɔdi? Dɛn kin lɛk fɔ wok wit difrɛn pɔblisha dɛn, ivin di wan dɛn we nyu ɔ di wan dɛn de fil se dɛn nɔ sabi prich bɛtɛ.

• 

  Gɛt fri-an. Yu go lɛk fɔ gi dɛn ples fɔ slip ɔ tin fɔ it? Dis de mek di sakit ovasia ɛn in wɛf no se yu lɛk dɛn. Dɛn nɔ de ɛkspɛkt se yu fɔ du big tin fɔ dɛn.—Lyu 10:​38-42.

• 

  Lisin to am ɛn du wetin i de tɛl yu fɔ du. Di sakit ovasia kin gladi fɔ ɛp wi fɔ du mɔ fɔ sav Jiova. Sɔntɛnde, i kin gi advays we go mɔna wi. (1Kɔ 5:​1-5, NW) I kin gladi we wi obe ɛn put wisɛf dɔŋ.—Ibr 13:​17.

• 

  Sho se yu gɛt tɛnki. Tɛl di sakit ovasia ɛn in wɛf aw dɛn ɛgzampul dɔn bɛnifit yu. Yu kin mit dɛn ɛn tɛl dɛn ɔ yu kin rayt smɔl not ɔ yuz kad.—Kɔl 3:​15, NW.