Aw fɔ Yuz Wetin De na di Say we Se, Wetin Wi Go Se?

Frɔm Janwari 2018, wi dɔn de gɛt di say we se, wetin wi go se na di frɔnt pej na Wi Kristian Layf ɛn Prichin Wok—Mitin Buk. Aw wi fɔ yuz dɛn?

We Yu Gɛt Tɔk na Mitin: Yu fɔ yuz di kwɛstyɔn, di skripchɔ, ɛn di kwɛstyɔn fɔ nɛks tɛm we de na di say we se, wetin wi go se. Bɔt dis nɔ min se wi fɔ tɔk ɔltin we de na di fim we de sho wi aw fɔ prich. Yu kin yuz difrɛn sɛtin, difrɛn we fɔ stat yu tɔk, tɔk difrɛn tin fɔ ɛp di pɔsin fɔ ɔndastand, ɛn bɔku ɔda we dɛn. Yu kin gi buk ɔ magazin frɔm wi Tichin Tulbɔks, ilɛksɛf di pat we yu de du nɔ tɛl yu fɔ du so.

We Yu De Prich: Di say we se, wetin wi go se de fɔ ɛp wi fɔ no wetin wi fɔ tɔk we wi de prich. If pɔsin sho se i gɛt intrɛst ɛn i want fɔ no mɔ, yu kin kɔntinyu fɔ tɔk to am ɛn sɔntɛm yu kin yuz wetin de na di ritɔn visit say. We yu de prich, yu kin ajɔst wetin de na di say we se, wetin wi go se ɔ yu kin tɔk bɔt ɔda tin. Fɔ se di tɔpik ɔ di skripchɔ we una yuz las mɔnt na in pipul dɛn lɛk mɔ na una tɛritri? Di pipul dɛn na yu tɛritri lɛk fɔ no mɔ bɔt tin dɛn we de apin ɔ fɔ tɔk bɔt lokal nyuz? Ilɛk aw yu disayd fɔ yuz wetin de na di say we se, wetin wi go se, yu gol fɔ bi fɔ du ‘ɔltin fɔ mek di Gud Nyuz go prɛd ɔlɔbɔt.’—1Kɔ 9:​22, 23.