Yu Mɛmba?

Yu dɔn tek tɛm rid Di Wachtawa dɛn fɔ dis ia? Wɛl, si if yu go ebul ansa dɛn kwɛstyɔn dɛn ya:

Aw wi fɔ trit anɔyntɛd Kristian dɛn?

Wi gladi fɔ di kayn fet we dɛn gɛt; bɔt wi nɔ de gi dɛn tumɔs atɛnshɔn. Wi de avɔyd fɔ kɔle dɛn tumɔs. (Jud 16) Wi nɔ de aks dɛn kwɛstyɔn dɛn bɔt di op we dɛn gɛt.—w20.01, pej 29.

Wetin fɔ mek yu biliv tranga wan se Jiova de notis yu?

Di Baybul sho wi se i bin dɔn notis yu bifo dɛn bɔn yu. Ɛn i de yɛri yu prea dɛn. I no wetin yu de tink bɔt ɛn wetin de na yu at. Dɔn bak, di tin dɛn we yu de du kin afɛkt am. (1 Kro. 28:​9; Prɔv.27:​11) I dɔn mek yu kam nia am.—w20.02, pej 12.

Ustɛm wi fɔ tɔk ɛn ustɛm wi nɔ fɔ tɔk?

Wi kin gladi fɔ tɔk bɔt Jiova. Wi de tɔk we wi si se sɔmbɔdi want fɔ du sɔntin we go mek i gɛt prɔblɛm. Ɛlda dɛn de tɔk if dɛn si se nid de fɔ advays wan brɔda ɔ sista. Wi nɔ de aks (ɔ tɔk bɔt) aw wi brɔda ɛn sista dɛn de wɔship Jiova na kɔntri dɛn we dɔn ban wi wok. Wi nɔ de tɛl pipul dɛn sɔntin we dɛn nɔ gɛt di rayt fɔ no bɔt.—w20.03, pej 20 ɛn pej 21.

Aw di lokɔs dɛn we Joɛl chapta 2 tɔk bɔt difrɛn frɔm di wan dɛn we Rɛvɛleshɔn chapta 9 tɔk bɔt?

Joɛl 2:​20-29 tɔk se Gɔd go drɛb di lokɔs dɛn, ɛn i prɔmis se i go mek ɔl di tin dɛn we di lokɔs dɛn dɔn pwɛl bi wetin dɛn bin bi bak. Afta dat, Gɔd put in spirit. Dɛn tin dɛn de bin apin we di Babilonian dɛn bin ɛnta Izrɛl ɛn we Gɔd bin put in spirit pan in pipul dɛn leta. Rɛvɛleshɔn 9:​1-11 tɔk bɔt di anɔyntɛd Kristian dɛn insay wi tɛm we tan lɛk lokɔs bikɔs dɛn de tɔk bɔt Gɔd in jɔjmɛnt mɛsej agens dis wikɛd wɔl, ɛn dat de mek di wan dɛn we de sɔpɔt am nɔ gladi.—w20.04, pej 3 to pej 6.

Udat na di kiŋ na di nɔt insay wi tɛm?

Na Rɔshia ɛn di kɔntri dɛn we de sɔpɔt am. Dɛn dɔn atak Gɔd in pipul dɛn bay we dɛn ban di prichin wok, ɛn dɛn dɔn sho se dɛn et Jiova Witnɛs dɛn. Di kiŋ na di nɔt dɔn de fɛt wit di kiŋ na di sawt.—w20.05, pej 13.

Fɔ se di nayn kwaliti dɛn we Galeshians 5:​22, 23, tɔk bɔt na ɔl di “kwaliti dɛn we di spirit de mek pɔsin gɛt”?

Nɔ. Di oli spirit de ɛp wi fɔ gɛt ɔda fayn kwaliti dɛn, lɛk fɔ du wetin rayt. (Ɛfi. 5:​8, 9)—w20.06, pej 17.

Wetin na wan pan di denja dɛn we de fɔ post tin dɛn bɔt wisɛf na soshal midia?

Sɔntɛm di tin dɛn we yu de post kin mek ɔda pipul dɛn fil se yu de sho-ɔf, i nɔ de sho se yu na pɔsin we de put insɛf dɔŋ.—w20.07, pej 6 ɛn pej 7.

Wetin Kristian dɛn we de du di prichin wok kin lan frɔm fishaman dɛn we sabi du dɛn wok?

Dɛn kin go fishin na ples we fish dɛn go de ɛn di tɛm we dɛn go de de. Dɛn tren fɔ yuz di rayt tul dɛn. Ɛn dɛn gɛt maynd fɔ wok ilɛksɛf di wɛda bad ɛn di si rɔf. Wi kin falamakata dɛn we wi de du di prichin wok.—w20.09, pej 5.

Aw wi go ɛp wi Baybul studɛnt dɛn fɔ lɛk Jiova mɔ ɛn mɔ?

Wi kin ɛnkɔrej dɛn fɔ rid di Baybul ɛvride, ɛn fɔ tink gud gud wan bɔt wetin dɛn de rid. Ɛn wi kin tich dɛn fɔ pre.—w20.11, pej 4.

Udat dɛn de pat ɔf di “ɔlman” we “di Krays go mek . . . gɛt layf”?—1 Kɔr. 15:​22.

Apɔsul Pɔl nɔ bin de se ɔl di mɔtalman dɛn we dɔn day go gɛt layf bak. Bɔt i bin de tɔk bɔt di anɔyntɛd Kristian dɛn “we Gɔd dɔn put wansay ɛn we gɛt wanwɔd wit Krays Jizɔs.” (1 Kɔr. 1:​2; 15:​18)​—w20.12, pej 5 ɛn pej 6.

Wetin di anɔyntɛd dɛn go du afta we dɛn ‘go dɔn chenj ivin bifo pɔsin wink in yay, di tɛm we dɛn de blo di las trɔmpɛt’?—1 Kɔr. 15:​51-53.

Dɛn go jɔyn Krays fɔ bi shɛpad fɔ di pipul dɛn, ɛn na rɔd we dɛn mek wit ayɛn go de na dɛn an. (Rɛv. 2:​26, 27)​—w20.12, pej 12 ɛn pej 13.