Ustɛm di Wɔl Go Dɔn? Wetin Jizɔs Bin Se?

TINK BƆT TU TIN DƐN WE JIZƆS BIN TƆK BƆT DI WƆL IN DƆN WAN:

“Una go de wach, bikɔs una nɔ no di de ɔ di awa.”—MATYU 25:​13.

“Una go de luk, una nɔ slip, bikɔs una nɔ no di tɛm we Gɔd dɔn pik.”—MAK 13:​33.

So nɔbɔdi na di wɔl nɔ no ustɛm di bad tin dɛn we de apin naw go dɔn. Bɔt Gɔd gɛt di tɛm we i dɔn pik, “di de ɛn di awa” we di wɔl go dɔn. (Matyu 24:​36) Fɔ se dis min se no we nɔ de atɔl fɔ no we di ɛnd dɔn nia? Nɔ, nɔto so i bi. Jizɔs bin tɛl in disaypul dɛn fɔ luk fɔ sɔm tin dɛn we go apin we go sho se i nɔ go te igen di wɔl go dɔn.

DI SAYN

Dɛn tin dɛn ya we go apin go bi di sayn we go sho se “di tɛm want fɔ dɔn.” Jizɔs bin se: “Wan neshɔn go fɛt ɔda neshɔn ɛn wan kiŋdɔm go fɛt ɔda kiŋdɔm, tin fɔ it go shɔtin ɛn atkwek go apin na difrɛn ples dɛn.” (Matyu 24:​3, 7) I bin tɔk bak se “sik dɛn we de prɛd” go de. (Lyuk 21:​11) Yu de si di tin dɛn we Jizɔs bin se go apin?

Tide, pipul dɛn de sɔfa bikɔs ɔf wɔ, angri, atkwek, ɛn difrɛn difrɛn sik dɛn. Fɔ ɛgzampul, insay 2004 wan bad bad atkwek we apin na di Indian Ocean mek bɔku bɔku wata kil lɛk 225,000 pipul dɛn so. Insay tri ia, Korona bin kil lɛk 6.9 milyɔn pipul dɛn na di wɔl. Jizɔs bin se dɛn tin ya we de apin de sho se i nɔ go te igen di bad tin dɛn we de apin naw go dɔn.

“DI LAS DEZ”

Di Baybul kɔl di tɛm jɔs bifo di wɔl dɔn, “di las dez.” (2 Pita 3:​3, 4) Sɛkɔn Timoti 3:​1-5 tɔk se insay di las dez pipul dɛn nɔ go de biev di rayt we. (Rid di bɔks we gɛt di taytul, “Jɔs Bifo di Wɔl Dɔn.”) Yu de si pipul dɛn we jɔs bisin bɔt dɛnsɛf, we want ɔltin, we wayl, ɛn we nɔ de sho lɔv to dɛn kɔmpin, nɔto so? Dis bak de sho se wi rili de nia di tɛm we dis wɔl go dɔn.

Aw lɔng di las dez go de fɔ? Akɔdin to di Baybul na fɔ “smɔl tɛm” nɔmɔ. Afta dat, Gɔd go dɔnawe wit di wan dɛn we de pwɛl di wɔl.—Rɛvɛleshɔn 11:​15-18; 12:​12.

DI TƐM WE DI WƆL GO BI PARADAYS DƆN NIA

Gɔd dɔn ɔlrɛdi pik di de ɛn di awa we i go mek di bad tin dɛn we de apin naw dɔn. (Matyu 24:​36) Bɔt mɔ gud nyuz de, Gɔd “nɔ want fɔ dɔnawe wit ɛnibɔdi.” (2 Pita 3:​9) I de gi mɔtalman di chans fɔ lan bɔt wetin i want ɛn obe am. Wetin mek? Bikɔs i want mek wi sev di tɛm we dis wɔl de dɔn ɛn liv na in nyu wɔl, we i go dɔn bi Paradays.

Gɔd dɔn ɔganayz fɔ lɛ dɛn tich pipul dɛn ɔlsay na di wɔl bɔt wetin dɛn go du fɔ de na di nyu wɔl we in Kiŋdɔm go rul. Jizɔs bin se dɛn go prich di gud nyuz bɔt Gɔd in Kiŋdɔm “na di wan ol wɔl.” (Matyu 24:​14) Jiova Witnɛs dɛn yuz bɔku bɔku tɛm ɔlsay na di wɔl fɔ prich ɛn tich pipul dɛn bɔt di mɛsej na di Baybul we de gi op. Jizɔs bin se dɛn go du dis prichin wok ɔlsay na di wɔl bifo di wɔl dɔn.

I dɔn lɛf smɔl tɛm fɔ lɛ mɔtalman gɔvmɛnt kɔmɔt na pawa. Bɔt di gud nyuz na dat yu go ebul fɔ sev we dis wɔl de dɔn ɛn de na di Paradays we Gɔd bin dɔn prɔmis se go de na dis wɔl. Di nɛks atikul go tɔk bɔt aw yu go de na di nyu wɔl.