Di Gladi-At we A Gɛt na Jiova in Savis

Di nɛks ia, dɛn bin anawns to di Bɛtɛl famili se dɛn nid vɔlɔntia dɛn fɔ go wok na di Sawt Afrika branch bikɔs dɛn go gɛt wan nyu printin mashin. A bin vɔlɔntia fɔ go, ɛn a bin rili gladi we dɛn pik mi. Dɛn bin pik bak ɔda tri Bɛtɛlayt dɛn frɔm Kanada, we na Dɛnis Lich, Bil MakLilan, ɛn Kɛn Nɔdin. Dɛn bin tɛl wi se wi go de na Sawt Afrika fɔ lɔng tɛm.

A bin kɔl mi mama ɛn tɛl am se: “Mama, a gɛt nyuz fɔ yu. A de go na Sawt Afrika.” Mi mama na bin kwayɛt uman, bɔt na uman we bin gɛt fet ɛn we bin gɛt tayt padi biznɛs wit Jiova. I nɔ bin tɔk tumɔs, bɔt a bin no se i de sɔpɔt mi. Pan ɔl we mi mama ɛn papa nɔ bin gladi bikɔs a go de fa frɔm dɛn, dɛn nɔ bin ɛva kɔmplen bɔt wetin a disayd fɔ du.

A GO NA SAWT AFRIKA

Wi bin go fɔs na Bruklin Bɛtɛl usay wi bin gɛt tri mɔnt trenin bɔt aw fɔ du wan patikyula printin wok. Dɔn wi tek ship we de go na Kep Tawn, Sawt Afrika. Da tɛm de, a bin jɔs 20 ia. Wi bin yuz tren fɔ travul frɔm Kep Tawn to Joanɛsbɔg. Wi bin bigin fɔ travul ivintɛm. We do klin, wi stɔp fɔs na wan smɔl tɔŋ insay Karu, we na wan eria we fiba dɛzat. Di ples bin wam ɛn i bin gɛt bɔku dɔst. Wi bin luk na di winda ɛn bigin fɔ wɔnda uskayn ples dis. Wi bin de wɔri bɔt aw wi nyu asaynmɛnt go bi lɛk. Leta, we wi go waka bak na dis eria, wi bin kam fɔ si se dɛn smɔl tɔŋ dɛn de na fayn ples fɔ de ɛn dɛn bin pisful.

Mi asaynmɛnt fɔ sɔm tɛm na fɔ wok wit di Linotayp mashin, ɛn a bin de pripia di lɛta dɛn we wi bin de yuz fɔ print di Wachtawa ɛn Awake! magazin dɛn. Na di branch ɔfis bin de print di magazin dɛn insay bɔku Afrika langwej dɛn we dɛn bin de tɔk na Sawt Afrika ɛn ɔda Afrika kɔntri dɛn. Wi gladi bikɔs wi bin ebul fɔ du bɔku wok wit di nyu printin mashin we mek wi kɔmɔt na Kanada.

Leta, a bin wok na di Faktri Ɔfis we bin de kia fɔ di difrɛn wok dɛn we gɛt fɔ du wit printin, shipin, ɛn transleshɔn. A bin bizi, bɔt a gladi fɔ liv mi layf da we de.

A BIN MARED ƐN GƐT NYU ASAYNMƐNT

Insay 1968, a bin mared wan payɔnia sista we nem Lɔra Boɛn, we bin de nia Bɛtɛl. I bin de wok bak na Bɛtɛl; na in bin de tayp fɔ di Transleshɔn Dipatmɛnt. Dɛn tɛm dɛn de, arenjmɛnt nɔ bin de fɔ pipul dɛn we jɔs mared fɔ kɔntinyu fɔ de na Bɛtɛl, so dɛn bin sɛn wi as spɛshal payɔnia. A bin wɔri smɔl. Afta a dɔn wok fɔ tɛn ia na Bɛtɛl, usay a nɔ bin de pe fɔ it ɛn ples fɔ de, aw a go ebul pe fɔ ɔltin we a nid wit di smɔl mɔni we dɛn de gi wi as spɛshal payɔnia? Ɛni mɔnt, dɛn bin de gi wi 70 dɔla. Bɔt wi fɔ ebul fɔ gi pipul dɛn wi pɔblikeshɔn dɛn, du ritɔn visit, ɛn gɛt di awa we di ɔganayzeshɔn se wi fɔ gɛt ɛni mɔnt. Na da mɔni de wi bin de yuz fɔ transpɔt, fɔ pe wi rɛnt, bay tin fɔ it, go ɔspitul, ɛn ɔda tin dɛn we wi nid.

Dɛn bin sɛn wi fɔ go prich nia di Dɔban siti, we de na di Indian Oshon. Bɔku Indian pipul dɛn bin de de. Na di Indian dɛn we bin go na Sawt Afrika fɔ go wok na wan shuga faktri arawnd di ia 1875 bin bɔn bɔku pan dɛn. Naw, dɛn de du ɔda wok dɛn, bɔt dɛn stil de fala dɛn kɔlchɔ ɛn it dɛn yon fud dɛn, lɛk kɔri. Ɛn dɛn de tɔk Inglish, so wi nɔ bin nid fɔ lan ɔda langwej fɔ prich to dɛn.

Spɛshal payɔnia dɛn bin fɔ yuz 150 awa ɛni mɔnt fɔ du di prichin wok, so mi ɛn Lɔra bin disayd fɔ prich fɔ siks awa di fɔs de. Di ples bin rili wam. Wi nɔ bin gɛt ritɔn visit ɛn Baybul stɔdi dɛn, so wi gɛt fɔ prich os to os fɔ siks awa. Afta we wi dɔn prich fɔ sɔm tɛm, a luk mi wɔch ɛn si se na jɔs 40 minit wi dɔn prich fɔ. So a bin de wɔnda aw wi go ebul fɔ prich as spɛshal payɔnia.

I nɔ te, wi ɔganayz wisɛf. Ɛnide, wi bin de mek smɔl tin fɔ it ɛn put sup ɔ kɔfi insay flaks. We tɛm rich fɔ blo, wi kin pak wi smɔl motoka ɔnda tik. Sɔntɛnde, fayn Indian pikin dɛn bin de de arawnd wi, ɛn dɛn bin de luk wi piŋ bikɔs dɛn si se wi difrɛn. Afta sɔm dez, wi bin kam fɔ si se afta wi prich fɔ tu ɔ tri awa, di balans tɛm kin dɔn kwik kwik wan.

Wi bin rili gladi fɔ prich di tru tin dɛn we de na di Baybul to dɛn kayn pipul dɛn de we bin lɛk strenja dɛn. Wi bin kam fɔ si se di Indian pipul dɛn gɛt rɛspɛkt, dɛn gud, ɛn dɛn lɛk Gɔd. Bɔku pan dɛn we bin de na di Indu rilijɔn bin gladi fɔ lisin to di mɛsej we wi bin de prich to dɛn. Dɛn bin lɛk fɔ lan bɔt Jiova, Jizɔs, di Baybul, di nyu wɔl tumara bambay usay pis go de, ɛn di op fɔ di wan dɛn we dɔn day. Afta wan ia, wi bin gɛt 20 Baybul stɔdi dɛn. Ɛvri aftanun, wi bin de ɛnjɔy fɔ it wit wan pan di famili dɛn we wi bin de stɔdi. Wi bin rili gladi.

Bɔt i nɔ te, dɛn gi wi ɔda asaynmɛnt. Dɛn sɛn wi fɔ du di sakit wok bay di bich pat na di Indian Oshɔn. Ɛni wik, wi bin de go de wit wan famili dyurin di tɛm we wi bin de wok wit di pɔblisha dɛn na di kɔngrigeshɔn fɔ ɛnkɔrej dɛn. Dɛn bin de trit wi as famili, ɛn wi bin de ɛnjɔy fɔ spɛn tɛm wit dɛn, dɛn pikin dɛn, ɛn di animal dɛn we dɛn de mɛn. Wi bin ɛnjɔy fɔ du di sakit wok fɔ tu ia. Dɔn, wantɛm wantɛm, dɛn kɔl wi frɔm di branch ɔfis. Dɛn se, “Wi go want mek una kam bak na Bɛtɛl.” A bin ansa dɛn se, “Wi oke wit usay wi de.” Bɔt wi bin rɛdi fɔ go ɛnisay we dɛn sɛn wi.

WI GO BAK NA BƐTƐL INSAY SAWT AFRIKA

A bin de wok wit di Savis Dipatmɛnt, usay a bin gɛt di ɔnɔ fɔ wok wit bɔku ɛkspiriɛns brɔda dɛn. Insay dɛn tɛm dɛn de, afta di sakit ovasia dɔn go visit wan kɔngrigeshɔn, i de sɛn ripɔt to di branch. Dɔn di Savis Dipatmɛnt de sɛn lɛta to di kɔngrigeshɔn we gɛt fɔ du wit di sakit ovasia in ripɔt. Dɛn bin de sɛn dɛn lɛta dɛn de fɔ ɛnkɔrej di brɔda dɛn, ɛn fɔ dayrɛkt dɛn bɔt wetin dɛn nid fɔ du. Di sɛktri dɛn bin de wok tranga wan fɔ translet di sakit ovasia dɛn ripɔt frɔm Kosa, Zulu, ɛn ɔda langwej dɛn to Inglish. Dɔn dɛn bin de translet di lɛta dɛn frɔm di branch ɔfis frɔm Inglish to di Afrika langwej dɛn. A bin rili gladi fɔ dɛn transletɔ dɛn de we bin de wok tranga wan, ɛn we bin ɛp mi bak fɔ ɔndastand di prɔblɛm dɛn we wi blak brɔda ɛn sista dɛn bin de gɛt.

Da tɛm de, di pipul dɛn na Sawt Afrika bin de ɔnda di gɔvmɛnt sistɛm we dɛn kɔl apatayd. Na gɔvmɛnt sistɛm we bin de mek pipul dɛn we gɛt difrɛn kɔlɔ nɔ bin de liv na di sem say. So pipul dɛn we gɛt difrɛn kɔlɔ nɔ bin de spɛn tɛm togɛda. Wi blak Afrika brɔda dɛn bin de tɔk dɛn yon langwej, prich insay dɛn yon langwej, ɛn atɛnd mitin na kɔngrigeshɔn we de tɔk dɛn yon langwej.

Bikɔs mi kɔngrigeshɔn tɛritri dɛn we dɛn bin de sɛn mi na say dɛn usay dɛn de tɔk Inglish, a nɔ bin no bɔku Afrika pipul dɛn we na blak. Bɔt naw, a gɛt di chans fɔ lan bɔt Afrika pipul dɛn we na blak, ɛn dɛn kɔlchɔ ɛn kɔstɔm dɛn. A bin lan bɔt di prɔblɛm dɛn we wi brɔda ɛn sista dɛn bin de gɛt we i kam to lokal tradishɔn ɛn tin dɛn we pipul dɛn na ɔda rilijɔn biliv. Dɛn bin rili gɛt maynd fɔ lɛf fɔ fala tradishɔn dɛn we di Baybul nɔ gri wit, ɛn fɔ tinap tranga wan we dɛn fambul ɛn vilej pipul dɛn bin de mek dɛn rili sɔfa fɔ we dɛn nɔ gri fɔ fala tin dɛn we gɛt fɔ du wit di dɛbul dɛn. Bɔku pipul dɛn we bin de na di vilej dɛn bin rili po. Bɔku nɔ lan bɛtɛ buk, bɔt dɛn rɛspɛkt di Baybul.

A bin gɛt di ɔnɔ fɔ wok wit sɔm ligal kes dɛn we gɛt fɔ du wit fridɔm fɔ wɔship ɛn nɔ fɔ put an pan wɔ ɛn pɔlitiks. A bin kam fɔ gɛt mɔ fet we a si aw Jiova Witnɛs pikin dɛn bin kɔntinyu fɔ de biɛn Jiova ɛn gɛt maynd fɔ tinap tranga wan pan ɔl we dɛn bin drɛb dɛn na skul bikɔs dɛn nɔ gri fɔ jɔyn divoshɔn.

Di brɔda ɛn sista dɛn na wan smɔl Afrika kɔntri we dɛn bin de kɔl Swaziland bin gɛt ɔda prɔblɛm dɛn bak. We Kiŋ Sobuza II day, dɛn bin se ɔl di sitizin dɛn fɔ tek pat pan sɔm kɔstɔm dɛn we dɛn kin gɛt we pɔsin day. Di man dɛn fɔ krep ɔl dɛn ia na dɛn ed, ɛn di uman dɛn fɔ kɔt dɛn ia shɔt. Dɛn bin mek bɔku pan wi brɔda ɛn sista dɛn sɔfa bikɔs dɛn nɔ gri fɔ tek pat pan dis kɔstɔm we gɛt fɔ du wit fɔ wɔship pɔsin we dɔn day. We dɛn kɔntinyu fɔ de biɛn Jiova, dat bin mek wi rili gladi. Wi bin lan bɔku tin frɔm wi brɔda dɛn na Afrika bɔt aw fɔ fetful, aw fɔ kɔntinyu fɔ de biɛn Jiova, ɛn aw fɔ peshɛnt, ɛn dat bin ɛp wi fɔ gɛt strɔng fet.

A GO WOK BAK NA DI PRINTRI NA SAWT AFRIKA

Insay 1981, a go bak fɔ wok na di printri, ɛn a bin de ɛp fɔ yuz kɔmpyuta fɔ du di printin wok. A bin rili gladi da tɛm de. Bɔku we dɛn we dɛn bin de yuz fɔ print bin dɔn rili chenj. Wan man we bin de sɛl mashin bin gi di branch wan nyu mashin fɔ tɛst fɔ fri. Dis bin mek dɛn chenj di nayn Linotayp mashin dɛn wit fayv pan dɛn nyu mashin dɛn de. Wi bin fiks bak wan nyu printin mashin. Wi bin de print bɔku tin dɛn pas aw wi bin dɔn de du.

Kɔmpyuta dɛn ɛp wi fɔ mek nyu we dɛn fɔ ɔganayz di wɔd dɛn na di pej bay we wi bin de yuz MEPS, we min Multilanguage Electronic Publishing System. Tɛknɔlɔji bin dɔn rili go bifo frɔm we mi ɛn tri ɔda brɔda dɛn bin lɛf Kanada fɔ go wok na di Sawt Afrika branch. (Ayz. 60:​17) Bay da tɛm dɛn, wi ɔl 4 bin dɔn mared gud payɔnia sista dɛn we rili lɛk Jiova. Mi ɛn Bil bin stil de wok na Bɛtɛl. Kɛn ɛn Dɛnis we nɔ bin de fa frɔm wi, bin dɔn bɔn pikin dɛn.

Di wok na di branch bin de ad mɔ ɛn mɔ. Dɛn bin de translet ɛn print Baybul pɔblikeshɔn dɛn insay bɔku langwej dɛn, ɛn dɛn bin de ship dɛn to ɔda branch dɛn. So dat bin mek dɛn bin nid fɔ bil nyu Bɛtɛl. Di brɔda dɛn bil wan na wan fayn eria na di wɛst pat na Joanɛsbɔg, ɛn dɛn bin dɛdiket am insay 1987. A bin rili gladi fɔ de pat pan ɔl dɛn wok dɛn de, ɛn fɔ wok as Branch Kɔmiti mɛmba na di Sawt Afrika branch fɔ lɔng tɛm.

WI GƐT WAN ƆDA NYU ASAYNMƐNT

Insay 2001, wi bin rili sɔprayz we dɛn invayt mi fɔ sav na di Amɛrika Branch Kɔmiti we dɛn bin jɔs dɔn mek. Pan ɔl we wi nɔ bin gladi fɔ lɛf wi wok ɛn wi padi dɛn na Sawt Afrika, wi bin gladi fɔ bigin nyu layf wit di Bɛtɛl famili na Amɛrika.

Bɔt wi bin de wɔri bikɔs wi go de fa frɔm Lɔra in mama we bin dɔn ol. Wi nɔ go ebul fɔ du bɔku tin fɔ am we wi de na Nyu Yɔk, bɔt Lɔra in tri sista dɛn bin se dɛn go kia fɔ ɔl wetin i nid. Dɛn se, “Wi nɔ go ebul de na ful-taym savis, bɔt if wi kia fɔ mama, i go ɛp una fɔ kɔntinyu una asaynmɛnt.” Wi rili gladi fɔ wetin dɛn du.

Semweso, mi big brɔda ɛn in wɛf, we bin de na Toronto, insay Kanada, bin de kia fɔ mi mama, bikɔs da tɛm de wi papa bin dɔn day. Da tɛm de, i bin dɔn pas 20 ia we mi mama bin de wit mi brɔda ɛn in wɛf. Wi rili gladi fɔ we dɛn bin sho se dɛn lɛk am ɛn kia fɔ am te i day jɔs afta wi go na Nyu Yɔk. Na big big blɛsin fɔ gɛt fambul dɛn we rɛdi fɔ ajɔst dɛn layf fɔ kia fɔ dɛn mama ɛn papa we dɔn ol, we sɔntɛnde, i nɔ kin izi.

Fɔ sɔm tɛm, mi wok na Amɛrika na bin fɔ mek pɔblikeshɔn dɛn, we naw dɔn izi ɛn simpul fɔ du. Dis biɛn tɛm, a de wok na di Pɔchesin Dipatmɛnt. A rili gladi fɔ de na dis big branch fɔ di pas 20 ia, we naw na lɛk 5,000 brɔda ɛn sista dɛn de na di Bɛtɛl famili, ɛn lɛk 2,000 brɔda ɛn sista dɛn de kɔmyut.

Siksti ia bifo naw, a nɔ bin fɔ tink se a go de ya. Ɔl dɛn tɛm ya, Lɔra dɔn du in bɛst fɔ sɔpɔt mi wit ɔl in at. A dɔn rili ɛnjɔy mi layf. Wi valyu di difrɛn asaynmɛnt dɛn we wi dɔn gɛt, ɛn ɔl di wɔndaful pipul dɛn we wi dɔn wok wit, lɛk di brɔda ɛn sista dɛn na di difrɛn branch dɛn we wi dɔn go waka na bɔku pat dɛn na di wɔl. Bikɔs a dɔn pas 80 ia, a nɔ de du bɛtɛ wok igen bikɔs bɔku yɔŋ brɔda dɛn de we dɛn dɔn tren fɔ du dɛn wok dɛn de.

Wan pan di man dɛn we rayt di sam buk bin rayt se: “Dɛn pipul we PAPA GƆD [“Jiova,” NWT] dɔn pik fɔ bi in yon gɛt in blɛsin.” (Sam 33:​12) Dɛn wɔd dɛn de na tru. A rili gladi we a dɔn ebul fɔ sav Jiova wit in pipul dɛn we gladi.