Wetin Yu Go Du if Yu Man ɔ Wɛf Gɛt di Abit fɔ De Wach Rud Rud Pikchɔ ɔ Fim Dɛn?
“I bin mek a fil lɛk se mi man dɔn de du mami ɛn dadi biznɛs wit ɔda uman bɔku tɛm.”
“I bin mek a shem, a bin fil lɛk se a nɔ fayn ɛn a nɔ gɛt wan valyu.”
“A nɔ ebul tɔk to ɛnibɔdi bɔt dat, a bin de sɔfa ɛn a nɔ bin gɛt ɛnibɔdi fɔ kɔrej mi.”
“A bin fil lɛk se Jiova nɔ kia bɔt mi.”
Di wɔd dɛn we de ɔp de sho aw wɛf dɛn kin sɔfa we dɛn man gɛt di abit fɔ de wach rud rud pikchɔ ɔ fim dɛn. Ɛn if i dɔn de du am sikrit wan lɛk fɔ sɔm mɔnt ɔ ia, sɔntɛm i go fil se i nɔ go ebul fɔ biliv am igen. Wan mareduman bin tɔk se, “A bin de wɔnda: ‘Udat na dis man we de nia mi? Fɔ se ɔda tin dɛn de we i de ayd pan mi?’”
Dɛn mek dis atikul fɔ mareduman we in man gɛt di abit fɔ de wach rud rud pikchɔ ɔ fim dɛn.a Dis atikul go tɔk bɔt Baybul prinsipul dɛn we go kɔrej ɛn ɛp am fɔ no se Jiova lɛk am, i want fɔ ɛp am, i go ɛp am fɔ gɛt pis ɛn kolat, ɛn kɔntinyu fɔ gɛt tayt padi biznɛs wit Jiova.b
WETIN DI INOSƐNT PƆSIN KIN DU?
Pan ɔl we yu nɔ go ebul fɔ kɔntrol ɔl di tin dɛn we yu man de du, sɔm tin dɛn de we yu kin du fɔ mek yu go gɛt pis. Tink bɔt dɛn tin dɛn ya.
Nɔ blem yusɛf. Sɔntɛm mareduman go tink se in man de wach rud rud pikchɔ ɔ fim dɛn bikɔs i dɔn du sɔntin we rɔng. Alisc bin fil se i nɔ fayn igen na in man in yay. I bin de wɔnda se, ‘Wetin mek mi man want fɔ luk ɔda uman dɛn bifo i wach mi?’ Sɔm mareduman dɛn kin blem dɛnsɛf bikɔs ɔf wetin dɛn kin du, ɛn dɛn kin tink se na dɛn kin mek di prɔblɛm wɔs. Daniɛla tɔk se, “A si misɛf as bad uman we de ambɔg wi mared bikɔs a de vɛks pasmak.”
If yu de fil da sem kayn we de, no se Jiova nɔ de blem yu bikɔs ɔf wetin yu man de du. Jems 1:14 tɔk se: “Na di tin we pɔsin want, na in de tɛst am ɛn tɛmt am.” (Rom. 14:12; Fil. 2:12) Jiova nɔ de blem yu, bifo dat, i valyu we yu nɔ de kɔmɔt biɛn am.—2 Kro. 16:9.
Sɔntɛm di wɛf go tink se in man de wach rud rud pikchɔ ɔ fim dɛn bikɔs i nɔ tu fayn fɔ in man, bɔt dat nɔto tru. Masta sabi bukman dɛn tɔk se, we man de wach rud rud pikchɔ dɛn, dat de mek i want fɔ du mami ɛn dadi biznɛs di kayn we we no uman nɔ go ebul fɔ du am.
Avɔyd fɔ de wɔri pasmak. Katrin tɔk se di tin we i kin tink bɔt nɔmɔ na we in man de wach rud rud pikchɔ ɔ fim dɛn. Fransɛs bin tɔk se: “A kin wɔri ɛnitɛm we a nɔ no usay mi man de, a kin wɔri pasmak di wan ol de.” Ɔda mareduman dɛn tɔk se dɛn kin rili shem we dɛn de wit brɔda ɛn sista dɛn we sɔntɛm no se dɛn man gɛt da prɔblɛm de. Stil, ɔda wan dɛn tɔk se dɛn kin fil se na dɛn wangren de bikɔs dɛn fil se nɔbɔdi nɔ ɔndastand dɛn prɔblɛm.
I nɔmal fɔ fil dɛn we dɛn ya. Bɔt, if yu de spɛn ɔl yu tɛm fɔ de tink bɔt dɛn tin dɛn ya, yu go wɔri mɔ ɛn mɔ. Bifo dat, tray fɔ pe atɛnshɔn pan yu padi biznɛs wit Jiova. We yu du dat, i go ɛp yu fɔ bia.—Sam 62:2; Ɛfi. 6:10.
We yu rid ɛn tink bɔt Baybul akawnt dɛn we de tɔk bɔt uman dɛn we dɛn at bin pwɛl, we bin tɔn to Jiova fɔ kɔrej dɛn bay we dɛn bin de pre to am, dat go ɛp yu. I nɔ bin de pul dɛn prɔblɛm dɛn ɔltɛm, bɔt i bin de gi dɛn kolat. Fɔ ɛgzampul, Ana bin gɛt prɔblɛm we bin mek in “at pwɛl pasmak.” Bɔt afta i “pre to PAPA GƆD [“Jiova,” NWT],” i bin gɛt kolat pan ɔl we i nɔ bin no if di prɔblɛm go sɔlv.—1 Sam. 1:10, 12, 18; 2 Kɔr. 1:3, 4.
Sɔntɛm di man ɛn di wɛf nid fɔ aks di ɛlda dɛn fɔ ɛp
Aks di ɛlda dɛn fɔ ɛp yu. Dɛn kin bi “ples fɔ ayd [we] briz de blo, ples fɔ ayd we ebi [ren] de kam.” (Ayz. 32:2) Sɔntɛm dɛn go ivin sho yu wan sista we yu go ebul fɔ tɔk to prayvet wan ɛn we go kɔrej yu.—Prɔv. 17:17.
YU GO EBUL ƐP AM?
Yu tink se yu go ebul ɛp yu man fɔ lɛf in abit fɔ de wach rud rud pikchɔ ɔ fim dɛn? Sɔntɛm. We di Baybul de tɔk bɔt fɔ fɛt agens pawaful ɛnimi ɔ prɔblɛm, i tɔk se, “Tu pipul dɛn bɛtɛ pas wan pɔsin.” (Ɛkli. 4:9-12, NWT) Masta sabi bukman dɛn dɔn kam fɔ no se we maredman ɛn in wɛf de wok togɛda bɔku tɛm, di man kin ebul lɛf di abit fɔ de wach rud rud pikchɔ ɔ fim dɛn ɛn in wɛf go ebul fɔ biliv am bak.
As wi no, na di man mɔ fɔ rɛdi fɔ wok tranga wan ɛn mekɔp in maynd fɔ lɛf fɔ de wach rud rud pikchɔ ɔ fim dɛn. I dɔn beg Jiova fɔ mek i go gi am trɛnk, ɛn i dɔn tɔk to di ɛlda dɛn fɔ ɛp am? (2 Kɔr. 4:7; Jems 5:14, 15) I dɔn tink bɔt tin dɛn we i go du we go ɛp am fɔ avɔyd fɔ de wach rud rud pikchɔ ɔ fim dɛn? Lɛk fɔ ɛgzampul, yu tink se i dɔn disayd fɔ du sɔntin we go ɛp am fɔ avɔyd fɔ wach rud rud pikchɔ ɔ fim dɛn? I dɔn ajɔst aw lɔng i fɔ de yuz ilɛktronik divays dɛn, ɛn i de tray fɔ avɔyd say dɛn we go tɛmt am? (Prɔv. 27:12) I rɛdi fɔ gri fɔ mek yu ɛp am ɛn fɔ sho se i ɔnɛs? If na so i bi, sɔntɛm yu go ebul ɛp am.
Aw? Tink bɔt dis ɛgzampul. Filishia mared Itan we bin dɔn gɛt di abit fɔ de wach rud rud pikchɔ ɔ fim dɛn frɔm we i smɔl. Filishia de mek am izi fɔ lɛ in man tɔk to am ɛnitɛm we i want fɔ wach rud rud pikchɔ ɔ fim dɛn. Itan ɛksplen se: “A nɔ de ayd natin frɔm mi wɛf. I de rili ɛp mi fɔ avɔyd tɛmteshɔn dɛn, ɛn i de aks mi ɔltɛm aw a de du. Ɛn i de ɛp mi fɔ mek a nɔ de spɛn bɔku tɛm fɔ yuz di Intanɛt.” Fɔ tru, Filishia in at kin pwɛl bikɔs Itan bin lɛk fɔ wach rud rud pikchɔ ɔ fim dɛn. I tɔk se, “Bɔt mi wamat ɛn pen nɔ go ɛp am fɔ kɔntinyu fɔ avɔyd dis bad abit. Afta wi tɔk bɔt in prɔblɛm dɛn, i bin rɛdi fɔ ɛp mi fɔ bia mi yon pen.”
We maredman ɛn in wɛf tɔk dɛn kayn we dɛn ya, dat go ɛp di man fɔ mek i avɔyd fɔ de wach rud rud pikchɔ ɔ fim dɛn, ɛn i go ɛp in wɛf fɔ biliv am bak. Afta ɔl, we maredman rɛdi fɔ tɛl in wɛf bɔt di tin we i de fil fɔ du, usay i de go, ɛn wetin i de du, dat go mek i izi fɔ lɛ di wɛf biliv am bikɔs i nɔ de ayd natin pan am igen.
Yu biliv se yu go ebul fɔ ɛp yu man da sem we de? If na so i bi, sɔntɛm una kin rid ɛn tɔk bɔt dis atikul togɛda. In gol fɔ bi fɔ lɛf fɔ wach dɛn rud rud pikchɔ ɔ fim dɛn ɛn fɔ gi yu rizin fɔ biliv am bak. Bifo i vɛks bikɔs una ɔl tu want fɔ tɔk bɔt dis prɔblɛm, i fɔ tray fɔ ɔndastand aw di prɔblɛm de mek yu fil. Yu nid fɔ sɔpɔt di tray we i de tray fɔ lɛf di abit ɛn gi am di chans fɔ mek i go du tin dɛn we go mek yu biliv am bak. Una ɔl tu go nid fɔ lan bɔt wetin kin mek pipul dɛn wach rud rud pikchɔ ɔ fim dɛn ɛn aw una go ebul sɔlv di prɔblɛm.d
If yu de fred se yu ɛn yu man go mek plaba we una de tɔk bɔt dis tɔpik, na fɔ aks wan ɛlda we una ɔl tu go lɛk fɔ lɛ i sidɔm wit una ɛn tɔk bɔt di prɔblɛm. Mɛmba se ivin we yu man dɔn ebul fɔ lɛf di abit fɔ de wach rud rud pikchɔ ɔ fim dɛn, i go tek tɛm fɔ mek yu biliv am bak. Nɔ giv-ɔp. Luk fɔ smɔl smɔl tin dɛn we i de du fɔ mek una mared strɔng mɔ ɛn mɔ. Gɛt op se as tɛm de go, if una ɔl tu de peshɛnt, una mared go strɔng bak.—Ɛkli. 7:8; 1 Kɔr. 13:4.
WETIN YU GO DU IF I KƆNTINYU FƆ DE WACH RUD RUD PIKCHƆ Ɔ FIM DƐN?
If yu man kɔntinyu fɔ de wach rud rud pikchɔ ɔ fim dɛn afta i dɔn lɛf fɔ du dat fɔ sɔm tɛm, fɔ se dis min se i nɔ go ɛva ebul fɔ lɛf da abit de? Nɔto so i bi. If i dɔn yus fɔ de wach rud rud pikchɔ ɔ fim dɛn, sɔntɛm i nɔ go izi fɔ am fɔ avɔyd dis abit te i day. I go bi se i go wach rud rud pikchɔ ɔ fim dɛn bak afta i dɔn avɔyd fɔ du am fɔ lɔng tɛm. Fɔ mek dat nɔ apin igen, i go nid fɔ tray tranga wan fɔ avɔyd tin dɛn we go mek i wach rud rud pikchɔ ɔ fim dɛn, pan ɔl we i go bi se i bin dɔn stɔp da abit de. (Prɔv. 28:14; Mat. 5:29; 1 Kɔr. 10:12) I go nid fɔ “chenj di we aw [i] de tink” ɛn lan fɔ “et wetin [bad],” we na tin dɛn lɛk fɔ wach rud rud pikchɔ ɔ fim dɛn ɛn ɛni ɔda tin dɛn we i go du we nɔ klin lɛk fɔ ple ple wit insɛf. (Ɛfi. 4:23; Sam 97:10; Rom. 12:9) Yu tink se i rɛdi fɔ du dɛn tin dɛn ya? If na so i bi, sɔntɛm as tɛm de go, i go ebul fɔ lɛf da bad abit de.e
Pe atɛnshɔn pan yu padi biznɛs wit Jiova
Bɔt wetin yu go du if yu man nɔ want fɔ lɛf fɔ wach rud rud pikchɔ ɔ fim dɛn? I nɔmal fɔ mek yu fil bad, vɛks, ɛn fil se i dɔn kɔmɔt biɛn yu. Yu go ebul gɛt kolat bay we yu pre to Jiova bɔt yu prɔblɛm. (1 Pit. 5:7) Kɔntinyu fɔ kam nia Jiova bay we yu de stɔdi, pre, ɛn tink gud gud wan. As yu de du dat, wan dawt nɔ de se Jiova go kam nia yu bak. Jɔs lɛk wetin Ayzaya 57:15 se, i de wit di wan dɛn we dɛn ‘at rili pwɛl ɛn ɔmbul,’ fɔ ɛp dɛn fɔ gɛt gladi-at bak. Tray fɔ bi di bɛst Kristian we yu go ebul fɔ bi. Aks di ɛlda dɛn fɔ ɛp ɛn kɔntinyu fɔ gɛt op se as tɛm de go, sɔntɛm yu man go chenj.—Rom. 2:4; 2 Pit. 3:9.
a Insay dis atikul, wi go tɔk bɔt di man as di wan we de wach rud rud pikchɔ ɔ fim dɛn. Bɔt, bɔku pan di prinsipul dɛn we de insay dis atikul go bɛnifit maredman bak we in wɛf de wach rud rud pikchɔ ɔ fim dɛn.
b Di Baybul nɔ tɔk se mared pipul dɛn fɔ dayvɔs if wan pan dɛn gɛt di abit fɔ de wach rud rud pikchɔ ɔ fim dɛn.—Mat. 19:9.
c Dɛn dɔn chenj sɔm nem dɛn na dis atikul.
d Infɔmeshɔn dɛn we go ɛp yu de na jw.org ɛn na wi pɔblikeshɔn dɛn. Fɔ ɛgzampul, rid “Pornography Can Shatter Your Marriage” na jw.org; “You Can Resist Temptation!” insay di Epril 1, 2014 Wachtawa, pej 10 to 12; ɛn “Pornography—Harmless or Toxic?” na di Ɔgɔst 1, 2013 Wachtawa, pej 3 to 7.
e Bikɔs fɔ wach rud rud pikchɔ ɔ fim dɛn na abit we pɔsin kin yus to ɛn i kin at fɔ lɛf, sɔm maredman ɛn dɛn wɛf dɛn dɔn disayd fɔ go bak to pɔsin we dɔn stɔdi bɔt dat fɔ ɛp dɛn fɔ ad to di ɛp we di ɛlda dɛn kin ɛp.