Biliv se Jiova Dɔn Fɔgiv Yu

1-2. Wetin Jiova kin du we pɔsin we dɔn sin ripɛnt? (Luk bak na di frɔnt pej.)

KIŊ Devid bin no aw i tan lɛk fɔ mek pɔsin fil bad bikɔs ɔf di sin dɛn we i bin dɔn kɔmit. (Sam 40:12; 51:​3, di ɛdin) I bin mek siriɔs mistek dɛn. Bɔt i bin sho se i dɔn ripɛnt wit ɔl in at, ɛn Jiova bin fɔgiv am. (2 Sam. 12:13) Bikɔs ɔf dat, Devid bin ɔndastand bak di gladi-at we pɔsin kin gɛt we Jiova fɔgiv am.—Sam 32:1.

² Jɔs lɛk Devid, wisɛf go gɛt di gladi-at we pɔsin kin gɛt we Jiova fɔgiv am. Wi rili gladi fɔ no se Jiova rɛdi fɔ fɔgiv wi sin dɛn, ilɛk na siriɔs sin dɛn. If wi ripɛnt wit ɔl wi at, pre to am fɔ mek i fɔgiv wi, tɔk to di ɛlda dɛn, ɛn du ɔl wetin wi ebul nɔ fɔ mek di sem mistek, i rɛdi fɔ fɔgiv wi. (Prɔv. 28:13; Akt 26:20; 1 Jɔn 1:9) Ɛn wi rili gladi fɔ no se we Jiova fɔgiv wi sin dɛn, i de fɔgiv wit ɔl in at ɛn i kin tan lɛk se wi nɔ ɛva sin.—Izi. 33:16.

3-4. Aw wan sista bin fil afta i baptayz? Wetin wi go tɔk bɔt insay dis atikul?

³ Sɔntɛnde, i nɔ kin izi fɔ mek sɔm pipul dɛn biliv se Jiova dɔn fɔgiv dɛn. Lɛ wi tɔk bɔt wan sista we nem Jɛnifa in ɛkspiriɛns. I bin mɛn na di trut. Bɔt we in na bin tineja, i bin put an pan bad tin dɛn, ɛn i bin de liv dɔbul layf. Afta sɔm tɛm, i chenj di we aw i bin de liv in layf, ɛn as tɛm de go i kwalifay fɔ baptayz. I tɔk se: “Trade a bin de pe atɛnshɔn fɔ gɛda bɔku mɔni ɛn prɔpati, du mami ɛn dadi biznɛs di we aw Gɔd nɔ want, drink bɔku rɔm, ɛn a bin de vɛks bad bad wan. A bin no se afta a beg Jiova fɔ fɔgiv mi ɛn ripɛnt, Krays in sakrifays go mek a klin. Bɔt a nɔ bin rili biliv se Jiova dɔn fɔgiv mi.”

⁴ Fɔ se sɔntɛnde i nɔ kin izi fɔ mek yu biliv se Jiova dɔn fɔgiv di sin dɛn we yu bin dɔn kɔmit? If na so i bi, mɛmba se Jiova rili gɛt sɔri-at. Devid bin gɛt kɔnfidɛns se Jiova dɔn fɔgiv am, ɛn Jiova want mek wi gladi jɔs lɛk aw Devid bin gladi we i fɔgiv am. Insay dis atikul, wi go tɔk bɔt wetin mek wi nid fɔ biliv se Jiova dɔn fɔgiv wi ɛn wetin go ɛp wi fɔ biliv dat.

WETIN MEK WI NID FƆ BILIV SE JIOVA DƆN FƆGIV WI?

5. Wetin Setan want mek wi biliv? Gi wan ɛgzampul.

⁵ We wi biliv se Jiova dɔn fɔgiv wi, dat go mek wi nɔ fɔdɔm insay wan pan Setan in trap dɛn. Mɛmba se Setan go du ɔl wetin i ebul fɔ mek wi stɔp fɔ sav Jiova. Fɔ mek Setan ebul du dat, i kin tray fɔ mek wi biliv se Jiova nɔ go ɛva fɔgiv wi sin dɛn. Tink bɔt wetin bin apin to wan man we bin de na Kɔrint we bin du mami ɛn dadi biznɛs di we aw Gɔd nɔ want, ɛn we dɛn bin pul kɔmɔt na di kɔngrigeshɔn. (1 Kɔr. 5:​1, 5, 13) We i ripɛnt, Setan nɔ bin want mek di brɔda ɛn sista dɛn na di kɔngrigeshɔn fɔgiv am. I bin want mek dɛn trit am bad ɛn nɔ wɛlkɔm am bak na di kɔngrigeshɔn. Dɔn bak, Setan bin want mek di man we dɔn ripɛnt fil se Jiova nɔ go ɛva fɔgiv am. I bin want mek “in at . . . pwɛl pasmak te i giv-ɔp” ɛn stɔp fɔ sav Jiova. Na di sem tatiks dɛn Setan de yuz tide. Bɔt “wi no in tatiks dɛn.”—2 Kɔr. 2:​5-11.

6. Wetin go ɛp wi if wi de fil se Jiova nɔ fɔgiv wi sin dɛn yet?

⁶ We wi biliv se Jiova dɔn fɔgiv wi, dat go ɛp wi fɔ lɛf fɔ fil bad. We wi sin, i nɔmal fɔ mek wi fil bad bikɔs ɔf wetin wi du. (Sam 51:17) Ɛn dat na fayn tin, bikɔs wi kɔnshɛns go mek wi du tin dɛn fɔ kɔrɛkt wi mistek dɛn. (2 Kɔr. 7:​10, 11) Bɔt if wi kɔntinyu fɔ fil bad fɔ lɔng tɛm afta wi dɔn ripɛnt, sɔntɛm wi go want fɔ giv-ɔp. We wi biliv se Jiova dɔn fɔgiv wi, dat go mek wi lɛf fɔ fil bad. Da tɛm de, wi go ebul sav Jiova di we aw i want wi fɔ sav am, dat na wit klin kɔnshɛns ɛn tru tru gladi-at. (Kol. 1:​10, 11; 2 Tim. 1:3) Bɔt wetin go ɛp wi fɔ biliv tranga wan se Gɔd dɔn fɔgiv wi?

WETIN GO ƐP WI FƆ BILIV SE JIOVA DƆN FƆGIV WI?

7-8. Wetin Jiova bin tɛl Mozis bɔt insɛf? Wetin dis mek wi biliv? (Ɛksodɔs 34:​6, 7)

⁷ Tink bɔt wetin Jiova tɔk bɔt insɛf. Fɔ ɛgzampul, notis wetin Jiova bin tɛl Mozis na Mawnt Saynay.a (Rid Ɛksodɔs 34:​6, 7.) Pan ɔl we Jiova gɛt bɔku fayn fayn kwaliti dɛn, i disayd fɔ tɛl Mozis se in na “Gɔd we de sho masi ɛn sɔri-at.” Yu tink se dis kayn Gɔd nɔ go fɔgiv in savant we dɔn ripɛnt wit ɔl in at? Wan dawt nɔ de se i go fɔgiv am. If Jiova nɔ fɔgiv am, dat min se i gɛt strɔng-at, ɛn wi no se Jiova nɔ go ɛva bi da kayn pɔsin de.

⁸ Wi fɔ biliv se we Jiova se in na Gɔd we de sho masi, na tru i de tɔk. I nɔ go ɛva lay. (Sam 31:5) So wi fɔ biliv wetin i se. If i nɔ izi fɔ mek yu lɛf fɔ fil bad fɔ di sin dɛn we yu bin dɔn kɔmit, na fɔ aks yusɛf dis kwɛstyɔn: ‘A biliv se Jiova de rili sho masi ɛn sɔri-at, ɛn i go fɔgiv ɛnibɔdi we ripɛnt?’ If na so i bi, dat min se yu fɔ biliv se i dɔn fɔgiv yu.

9. Wetin i min fɔ mek Gɔd fɔgiv wi sin dɛn? (Sam 32:5)

⁹ Tink gud gud wan bɔt wetin Jiova de tich wi na di Baybul bɔt aw i de fɔgiv wi. Fɔ ɛgzampul, tink bɔt wetin Devid bin rayt bɔt aw Jiova de fɔgiv. (Rid Sam 32:5.) Devid bin tɔk se, “Yu fɔgiv mi sin dɛn.” Di Ibru wɔd we dɛn translet as “fɔgiv” kin min “fɔ es,” “kɛr go,” ɔ “go wit.” So we Jiova fɔgiv Devid, i bin tan lɛk se i es Devid in sin dɛn ɛn go wit dɛn. Devid bin gladi we i no se Jiova dɔn pul di lod we i bin tot, dat na di sin we i bin dɔn kɔmit. (Sam 32:​2-4) Wisɛf go ebul gɛt dis sem kayn gladi-at. We wi ripɛnt wit ɔl wi at, wi nɔ nid fɔ kɔntinyu fɔ fil bad fɔ wi sin dɛn we Jiova dɔn fɔgiv. Bifo dat, wi fɔ gladi bikɔs Jiova dɔn pul da ɛvi lod de kɔmɔt na wi ed.

10-11. Wetin di wɔd dɛn we se “rɛdi fɔ fɔgiv” de tɛl wi bɔt Jiova? (Sam 86:5)

¹⁰ Rid Sam 86:5. Devid tɔk na dis vas se Jiova “rɛdi fɔ fɔgiv.” Wan buk bin tɔk sɔntin bɔt dɛn wɔd dɛn ya. I se Jiova na pɔsin we nɔ de vɛks kwik. I rɛdi ɔltɛm fɔ fɔgiv ɛnibɔdi we dɔn ripɛnt. Wetin mek? Di nɛks pat na di vas sho wi di ansa. I se: “Yu de rili sho lɔv we nɔ de chenj to ɔl di wan dɛn we de kɔl yu.” Lɛk aw wi bin dɔn lan na di atikul bifo dis wan, Jiova in lɔv we nɔ de chenj de mek i nɔ lɛf di wan dɛn we de sav am fetful wan. Dis in lɔv de mek i “fɔgiv” ɔl di wan dɛn we dɔn ripɛnt “fɔ fri.” (Ayz. 55:​7, futnot) If i nɔ izi fɔ mek yu biliv se Jiova dɔn fɔgiv yu, yu kin aks yusɛf dɛn kwɛstyɔn dɛn ya: ‘A biliv se Jiova na Pɔsin we de fɔgiv ɛn i rɛdi fɔ fɔgiv ɔl di wan dɛn we dɔn ripɛnt ɛn we de beg am fɔ mek i sɔri fɔ dɛn? If na so i bi, wetin mek a nɔ fɔ biliv se i bin fɔgiv mi we a bin beg am fɔ mek i sɔri fɔ mi?’

¹¹ Di Baybul tɛl wi bak se Jiova rili ɔndastand se wi nɔ pafɛkt, ɛn dat de kɔrej wi. (Sam 139:​1, 2) Devid tɔk dis klia wan na wan ɔda sam we de ɛp wi fɔ biliv se Jiova dɔn fɔgiv wi.

NƆ FƆGƐT WETIN JIOVA DE MƐMBA

12-13. Akɔdin to Sam 103:​14, wetin Jiova de mɛmba bɔt wi? Wetin dat de mek i du?

¹² Rid Sam 103:14. Devid tɔk se Jiova “de mɛmba se wi na dɔst.” Devid yuz dɛn wɔd dɛn ya fɔ ɛksplen wan pan di rizin dɛn we mek Jiova rɛdi fɔ fɔgiv in savant dɛn we ripɛnt: I de mɛmba ɔltɛm se wi na sina dɛn. Fɔ mek wi ɔndastand dis gud gud wan, lɛ wi tɔk mɔ bɔt di wɔd dɛn we Devid bin tɔk.

¹³ Devid tɔk se Jiova “rili sabi aw i mek wi.” Jiova bin “yuz di dɔst na grɔn fɔ mek” Adam. I no se pan ɔl we Adam bin pafɛkt, i bin nid tin dɛn we go ɛp am fɔ kɔntinyu fɔ liv, lɛk briz fɔ blo, tin fɔ it, ɛn fɔ slip. (Jɛn. 2:7) Bɔt we Adam ɛn Iv bin sin, dat mek di wɔd “dɔst” gɛt ɔda minin. Bikɔs wi na Adam ɛn Iv dɛn pikin dɛn, di wɔd “dɔst” min bak se wi bɔn wit sin ɛn wi kin fil fɔ du bad tin dɛn. Jiova no dat gud gud wan. Bɔt we Devid tɔk se Jiova “de mɛmba” se wi na dɔst, i min bak se Jiova de sɔri fɔ wi ɔltɛm bikɔs i no se wi nɔ pafɛkt. Wi go se Devid bin de tray fɔ tɔk se: Jiova ɔndastand se sɔntɛnde wi kin mek mistek, ɛn we wi mek mistek, i de sɔri fɔ wi ɛn fɔgiv wi we wi ripɛnt.—Sam 78:​38, 39.

14. (a) Wetin bak Devid tɔk bɔt di we aw Jiova de fɔgiv wi? (Sam 103:12) (b) Aw Devid in ɛgzampul sho se Jiova de fɔgiv wit ɔl in at? (Luk di bɔks we gɛt di taytul “Aw Jiova De Fɔgiv ɛn Fɔgɛt?”)

¹⁴ Wetin bak Devid tɔk bɔt di we aw Jiova de fɔgiv? (Rid Sam 103:12.) Devid tɔk se we Jiova de fɔgiv wi, I de go wit wi sin dɛn fa fa say, “jɔs lɛk aw di say we di san de kɔmɔt [we na di ist] de fa frɔm di say we di san de go dɔŋ [we na di wɛst].” Wi no se ist de fa frɔm wɛst; di tu say dɛn nɔ go ɛva mit. Wetin dis de tɛl wi bɔt di sin dɛn we Jiova de fɔgiv? I min se we Jiova fɔgiv wi sin dɛn, i tan lɛk se i de pul dɛn kɔmɔt nia wi ɛn go wit dɛn fa fa say. Bikɔs ɔf dis, natin nɔ go ɛva mek i tink bɔt dɛn ɔ mɛmba wi bɔt dɛn ɔ pɔnish wi fɔ dɛn.—Izi. 18:​21, 22; Akt 3:19.

15. Wetin wi go du if wi stil de fil bad bikɔs ɔf di sin dɛn we wi dɔn kɔmit?

¹⁵ Aw di wɔd dɛn we Devid tɔk na Sam 103 de ɛp wi fɔ biliv se Jiova dɔn fɔgiv wi? If wi stil de fil bad bikɔs ɔf di sin dɛn we wi bin dɔn kɔmit, i go fayn fɔ mek wi aks wisɛf dɛn kwɛstyɔn dɛn ya: ‘Fɔ se a dɔn fɔgɛt se Jiova kin mɛmba se a nɔ pafɛkt, ɛn i go fɔgiv mi wans a ripɛnt? Fɔ se a de mɛmba mi sin dɛn we Jiova dɔn disayd fɔ fɔgiv ɛn fɔgɛt, ɛn we i nɔ go ɛva pɔnish mi fɔ igen?’ Jiova nɔ de kɔntinyu fɔ tink bɔt di sin dɛn we wi bin dɔn kɔmit. Wisɛf nɔ fɔ kɔntinyu fɔ tink bɔt dɛn. (Sam 130:3) We wi biliv se Jiova dɔn fɔgiv wi, dat go ɛp wi fɔ fɔgiv wisɛf ɛn kɔntinyu fɔ sav Jiova wit gladi-at.

16. Gi wan ɛgzampul we de sho se i nɔ fayn fɔ kɔntinyu fɔ fil bad bikɔs ɔf di sin dɛn we wi bin dɔn kɔmit. (Luk bak di pikchɔ.)

¹⁶ Lɛ wi tɔk bɔt wan ɛgzampul. We yu de kɔntinyu fɔ fil bad bikɔs ɔf di sin dɛn we yu bin dɔn kɔmit, i tan lɛk we yu de drayv motoka go bifo ɛn yu de luk di glas we de sho wetin de apin biɛn. I nɔ bad fɔ de wach di glas wan wan tɛm, bikɔs if ɛni bad tin go want fɔ apin biɛn yu, yu go ebul du sɔntin. Bɔt fɔ mek yu go drayv sef wan, yu fɔ pe atɛnshɔn fɔ si wetin de apin bifo yu. Semweso, we wi de tink wan wan tɛm bɔt di mistek dɛn we wi bin dɔn mek, dat go ɛp wi. Wi kin lan frɔm dɛn mistek dɛn de ɛn mek-ɔp wi maynd nɔ fɔ ripit dɛn igen. Bɔt if wi kɔntinyu fɔ pe atɛnshɔn pan di mistek dɛn we wi bin dɔn mek, dat go mek wi nɔ ebul du wetin wi fɔ du fɔ sav Gɔd naw. So, wi fɔ pe atɛnshɔn fɔ si wetin de apin bifo wi. Wi de na di rod we go mek wi gɛt layf na Gɔd in nyu wɔl, usay wi nɔ go de mɛmba di bad tin dɛn “we bin dɔn apin.”—Ayz. 65:17; Prɔv. 4:25.

KƆNTINYU FƆ DU TIN DƐN WE GO MEK YU BILIV SE JIOVA DƆN FƆGIV YU

17. Wetin mek wi nid fɔ kɔntinyu fɔ du tin dɛn we go mek wi biliv se Jiova lɛk wi ɛn i dɔn fɔgiv wi?

¹⁷ Wi nid fɔ kɔntinyu fɔ du tin dɛn we go mek wi biliv se Jiova lɛk wi ɛn i dɔn fɔgiv wi. (1 Jɔn 3:​19, futnot) Wetin mek? Na bikɔs Setan go kɔntinyu fɔ tray fɔ mek wi biliv se Jiova nɔ lɛk wi ɛn i nɔ de fɔgiv wi. Ilɛk us tatiks i yuz, in gol na fɔ mek wi stɔp fɔ sav Jiova. Wi fɔ ɛkspɛkt se Setan go kɔntinyu fɔ du ɔl wetin i ebul fɔ pwɛl wi padi biznɛs wit Jiova bikɔs i no se i nɔ gɛt bɛtɛ tɛm igen. (Rɛv. 12:12) Wi nɔ fɔ alaw am fɔ win!

18. Wetin yu go du fɔ biliv se Jiova lɛk yu ɛn i rɛdi fɔ fɔgiv yu ɔltɛm?

¹⁸ Fɔ mek yu go biliv mɔ ɛn mɔ se Jiova lɛk yu, na fɔ du di tin dɛn we wi bin dɔn tɔk bɔt na di atikul bifo dis wan. Fɔ mek yu go biliv tranga wan se Jiova dɔn fɔgiv yu, na fɔ tink bɔt wetin Jiova tɔk bɔt insɛf. Tink gud gud wan bɔt wetin di Baybul se bɔt di we aw Jiova de fɔgiv. Nɔ fɔgɛt se i kin mɛmba ɔltɛm se yu nɔ pafɛkt ɛn i go sɔri fɔ yu. Ɛn mɛmba se we i fɔgiv yu, i de du am wit ɔl in at. We yu mɛmba ɔl dɛn tin dɛn ya, yu go gladi bikɔs yu no se Jiova go sɔri fɔ yu. Ɛn jɔs lɛk Devid, yusɛf go ebul fɔ tɔk se, “Jiova tɛnki fɔ we yu fɔgiv ‘mi sin dɛn’!”—Sam 32:5.