Kwɛstyɔn dɛn we Pipul dɛn Kin Aks

Di pɔsin we rayt Prɔvabs 30:18, 19 bin tɔk se “di we aw man de biev we i de wit uman we yɔŋ” na tin ‘we pɔsin nɔ ebul ɔndastand.’ Wetin i bin min?

Bɔku pipul dɛn, ivin sɔm masta sabi bukman dɛn kin wɔnda wetin di wɔd dɛn we de na dɛn vas dɛn ya min. Di kɔmplit vas dɛn na di Nyu Wɔl Transleshɔn se: “Tri tin dɛn de we tu wɔndaful fɔ mi, ɛn 4 tin dɛn de we a nɔ ebul ɔndastand: Igul we de flay na di skay, snek we de muv pantap rɔk, ship we de muv na di si, ɛn di we aw man de biev we i de wit uman we yɔŋ.”—Prɔv. 30:18, 19.

Trade, wi bin ɔndastand se di wɔd dɛn we se “di we aw man de biev we i de wit uman we yɔŋ” de tɔk bɔt bad tin. Wetin mek? Na bikɔs di ɔda vas dɛn we de na da chapta de tɔk bɔt bad tin dɛn we nɔ de ɛva tɔk se, “i du.” (Prɔv. 30:15, 16) Ɛn vas 20 tɔk bɔt “mareduman we bambot” we de tɔk se i nɔ du ɛnitin bad. So, wi bin tink se jɔs lɛk aw igul de flay na di skay, snek de muv pantap rɔk, ɔ lɛk aw ship dɛn trade trade bin de muv midul di si, na so di man de du sɔntin ɛn nɔbɔdi nɔ go ebul no wetin i du. Bikɔs wi bin de tink da we de, wi bin ɔndastand se di wɔd dɛn we se “di we aw man de biev we i de wit uman we yɔŋ” de tɔk bɔt sɔntin we bad, dat na yɔŋman we de yuz kɔni kɔni we fɔ mek yɔŋuman gri fɔ du mami ɛn dadi biznɛs wit am.

Bɔt wi gɛt gud rizin fɔ biliv se dɛn vas dɛn ya de tɔk bɔt gud tin. Di pɔsin we rayt dis chapta bin jɔs de kɔle di tin dɛn we i tɔk bɔt.

Di orijinal Ibru manyuskript dɛn sho bak se dis vas de tɔk bɔt gud tin. Wan dikshɔnari we de ɛksplen wetin de na di Ibru Skripchɔ tɔk se, di Ibru wɔd we dɛn translet as “a nɔ ebul ɔndastand” na Prɔvabs 30:18 “de sho se i de tɔk bɔt sɔntin we apin we pɔsin tink se i tu wɔndaful, ɔ we nɔ ivin pɔsibul.”

Profɛsɔ Krɔfɔd H. Tɔy we de na Avad Yunivasiti na Amɛrika insɛf tɔk se dɛn vas dɛn de nɔ de tɔk bɔt bad tin. I tɔk se: “Di pɔsin we rayt dɛn vas dɛn de, de tɔk bɔt aw di tin dɛn we i tɔk bɔt wɔndaful.”

So i mek sɛns fɔ biliv se di wɔd dɛn we de na Prɔvabs 30:18, 19 de tɔk bɔt tin dɛn we rili wɔndaful, ɛn we wi nɔ ivin ebul ɔndastand. Jɔs lɛk di pɔsin we rayt dis chapta, wisɛf kin kɔle we wi de si di we aw igul de flay ɔp di skay, aw snek we nɔ gɛt fut dɛn de muv pantap rɔk, aw ɛvi ship de muv pantap si, ɛn aw yɔŋman ɛn yɔŋuman de lɛk dɛnsɛf ɛn gladi fɔ de togɛda.