Tu Nyu Mɛmba dɛn na di Gɔvnin Bɔdi
INSAY Ɔktoba 5, 2024, dɛn bin mek wan spɛshal anawnsmɛnt na di anwal mitin fɔ se dɛn dɔn apɔynt Brɔda Jodi Jedli ɛn Jekɔp Rɔmf as mɛmba dɛn na di Gɔvnin Bɔdi fɔ Jiova Witnɛs dɛn. Dɛn tu brɔda dɛn ya dɔn sav Jiova fetful wan fɔ lɔng tɛm.
Jodi Jedli ɛn in wɛf, Damaris
Dɛn bɔn Brɔda Jedli na Mizori, insay Amɛrika ɛn dɛn mɛn am na di trut. In famili bin de nia wan ples usay pɔblisha dɛn nɔ bin de prich so nɔmɔ. So bikɔs ɔf dat, i bin sabi bɔku brɔda ɛn sista dɛn we bin de kɔmɔt difrɛn say dɛn fɔ go ɛp fɔ prich de. Di lɔv ɛn wanwɔd we dɛn gɛt bin rili tɔch in at. I baptayz insay Ɔktoba 15, 1983 we in na bin tineja. I bin lɛk fɔ prich, so we i dɔn skul, i bigin fɔ payɔnia insay Sɛptɛmba 1989.
We Brɔda Jedli bin yɔŋ, in mama ɛn papa bin de kɛr in ɛn in smɔl sista go na Bɛtɛl fɔ go waka. Bikɔs dɛn mama ɛn papa bin de go waka wit dɛn na Bɛtɛl, dat bin mek dɛn sɛt gol fɔ wok na Bɛtɛl, ɛn dɛn bin ebul fɔ wok de leta. Brɔda Jedli bin go na Wɔlkil Bɛtɛl insay Sɛptɛmba 1990. Di fɔs say we i bin de wok na di Klinin Dipatmɛnt ɛn leta i wok na Mɛdikal Savisis.
Arawnd dɛn tɛm dɛn de, di Spanish-langwej kɔngrigeshɔn dɛn we bin de nia dɛn bin de gro ɛn dɛn bin nid brɔda dɛn. So Brɔda Jedli bin jɔyn wan pan di kɔngrigeshɔn dɛn ɛn bigin fɔ lan Spanish. I nɔ te, i kam fɔ sabi wan sista we nem Damaris we na bin payɔnia na di sem sakit. Afta sɔm tɛm, dɛn mared, ɛn di sista jɔyn am na Bɛtɛl.
Insay 2005, dɛn stɔp fɔ wok na Bɛtɛl fɔ kia fɔ dɛn mama ɛn papa dɛn we dɔn ol. Insay da tɛm de, dɛn bin de rɛgyula payɔnia. Brɔda Jedli bin de ɛp fɔ tich na di Payɔnia Savis Skul, ɛn i bin de na di lokal Hospital Liaison Committee ɛn Regional Building Committee.
Insay 2013, dɛn bin invayt Brɔda ɛn Sista Jedli bak na Bɛtɛl fɔ go ɛp wit di bildin projɛkt na Wɔwik. Frɔm da tɛm de, dɛn bin wok bak na Patasin ɛn Wɔlkil. Brɔda Jedli dɔn wok na di Local Design/Construction Department ɛn Hospital Information Services. Insay Mach 2023, dɛn bin pik am fɔ bi pɔsin we de ɛp na di Savis Kɔmiti. We i tink bɔt di difrɛn asaynmɛnt dɛn we i dɔn gɛt, i tɔk se: “We yu gɛt nyu asaynmɛnt dɛn, sɔntɛm yu go fred. Bɔt na da tɛm de yu nid fɔ abop pan Jiova bikɔs nain de mek wi ebul du ɛnitin we i tɛl wi fɔ du.”
Jekɔp Rɔmf ɛn in wɛf, Inga
Dɛn bɔn Brɔda Rɔmf na Kalifonia, insay Amɛrika. We i bin smɔl, in mama bin inaktiv, bɔt in mama bin de du in bɛst fɔ tich am di tru tin dɛn na di Baybul. Dɔn bak, ɛni ia i bin de go waka to in grani we bin de sav Jiova fetful wan. In grani bin ɛp am fɔ lɛk di tru tin dɛn we de na di Baybul, ɛn we i ol 13 ia, i bin aks fɔ mek dɛn stɔdi di Baybul wit am. I bin baptayz insay Sɛptɛmba 27, 1992 we in na bin tineja. In mama bin bigin fɔ prich ɛn atɛnd di mitin dɛn bak, ɛn in papa wit in brɔda ɛn sista bin bigin fɔ go bifo pan dɛn padi biznɛs wit Jiova ɛn leta baptayz.
We Brɔda Rɔmf bin yɔŋ, i bin si se di wan dɛn we bin de payɔnia bin gladi. So we i dɔn sɛkɔndari skul, i bigin fɔ payɔnia insay Sɛptɛmba 1995. Insay di ia 2000, i bin go na Ɛkwedɔ fɔ go ɛp usay dɛn nid mɔ pipul dɛn fɔ prich. Na de i kam sabi wan sista we na payɔnia we kɔmɔt na Kanada we nem Inga, ɛn leta dɛn mared. We dɛn mared, dɛn bin de na wan smɔl tɔŋ na Ɛkwedɔ we nɔ bin gɛt bɔku pɔblisha dɛn. Bɔt naw, dɛn dɔn gɛt bɔku pɔblisha dɛn.
As tɛm de go, dɛn bin pik Brɔda ɛn Sista Rɔmf fɔ bi spɛshal payɔnia dɛn ɛn leta fɔ du di sakit wok. Insay 2011, dɛn bin invayt dɛn fɔ atɛnd di 132 klas na Giliad. Afta dɛn gradyuet, dɛn bin sɛn dɛn na difrɛn difrɛn ples dɛn arawnd di wɔl ɛn dɛn bin ɛnjɔy fɔ du difrɛn wok dɛn, lɛk fɔ wok na Bɛtɛl, fɔ du mishɔnari wok, ɛn di sakit wok. Brɔda Rɔmf bin gɛt di ɔnɔ bak fɔ ɛp fɔ tich na di Skul fɔ Pipul dɛn We De Prich bɔt Gɔd in Kiŋdɔm.
Di COVID-19 pandɛmik bin mek Brɔda ɛn Sista Rɔmf go bak na Amɛrika. Dɛn bin invayt dɛn fɔ wok na Wɔlkil Bɛtɛl ɛn na de Brɔda Rɔmf bin gɛt trenin fɔ wok na di Savis Dipatmɛnt. Leta, dɛn bin sɛn dɛn bak na di branch na Ɛkwedɔ ɛn Brɔda Rɔmf bin de na di Branch Kɔmiti. Insay 2023, dɛn sɛn dɛn na Wɔwik. Insay Janwari 2024, dɛn pik Brɔda Rɔmf fɔ bi pɔsin we de ɛp na di Savis Kɔmiti. We i tink bɔt ɔl di say dɛn we i dɔn wok, i tɔk se, “Wetin de mek pɔsin in asaynmɛnt spɛshal nɔto di say we i de wok, bɔt na di pipul dɛn we i de wok wit.”
Wi gladi fɔ di tranga wok we dɛn man dɛn ya de du ɛn wi de “kɔntinyu fɔ rili valyu dɛn kayn man dɛn” ya.—Fil. 2:29.