Yu De Bɛnifit Frɔm Ɔl di Tin dɛn we Jiova De Gi Wi?

1, 2. (a) Aw Jiova Witnɛs dɛn de fil bɔt di Baybul? (b) Uspat na di Baybul we yu lɛk mɔ?

WI LƐK di Baybul bikɔs wi na Jiova Witnɛs dɛn. I de gi wi kɔrej, op, ɛn wi de lan tin dɛn we wi kin abop pan. (Lɛta Fɔ Rom 15:​4) Nɔto mɔtalman sɛns de de bɔt na “Gɔd in wɔd.”—Fɔs Lɛta Fɔ Tɛsalonayka 2:​13.

² I go bi se wi ɔl gɛt di say dɛn na di Baybul we wi lɛk mɔ. Sɔm dɛn lɛk Matyu, Mak, Lyuk, ɛn Jɔn bikɔs insay dɛn buk dɛn de, Jizɔs bin sho di fayn fayn kwaliti dɛn we Jiova gɛt. (Jɔn 14:​9) Ɔda pipul dɛn lɛk Baybul buk dɛn we tɔk bɔt tin dɛn we dɛn bin dɔn tɔk lɔng tɛm bifo dɛn apin ɛn tin dɛn we gɛt fɔ apin, lɛk Rɛvɛleshɔn we de tɔk bɔt “dɛn tin we mɔs bi.” (Rɛvɛleshɔn 1:​1) Di Sam buk dɛn kin kɔrej sɔm pipul dɛn we dɛn rid am, ɛn ɔda wan dɛn kin ɛnjɔy we dɛn de rid di fayn fayn advays dɛn we de insay Prɔvabs. Ɛn dis kin rili ɛp dɛn. Dis dɔn sho klia wan se di Baybul na buk fɔ ɔlman.

3, 4. (a) Aw wi fil bɔt wi buk ɛn magazin dɛn? (b) Us buk ɛn magazin dɛn wi kin gɛt fɔ sɔm pipul dɛn?

³ Wi lɛk di Baybul, so wi lɛk wi buk ɛn magazin dɛn bak bikɔs ɔl wetin de insay de na frɔm Gɔd in Wɔd. Ɔl di buk, magazin, ɛn ɔda tin dɛn we wi de gɛt na Jiova de gi wi. Dɛn tin dɛn ya de ɛp wi fɔ kɔntinyu fɔ de nia Jiova ɛn fɔ gɛt fet mɔ ɛn mɔ.—Taytɔs 2:​2.

⁴ Dɛn kin rayt bɔku pan wi buk ɛn magazin dɛn fɔ ɔlman we na Jiova Witnɛs. Bɔt sɔm buk ɛn magazin dɛn de we dɛn kin rayt mɔ fɔ yɔŋ wan dɛn ɔ fɔ mama ɛn papa dɛn. Bɔku pan di atikul ɛn fim dɛn we de na wi Wɛbsayt na fɔ pipul dɛn mɔ we nɔto Jiova Witnɛs. Dɛn difrɛn difrɛn tin ya de sho se Jiova de kip to di prɔmis we i bin mek se i go gi ɔlman plɛnti tin dɛn fɔ lan.—Ayzaya 25:​6.

5. Wetin wi biliv se Jiova go gladi fɔ?

⁵ Bɔku pan wi go lɛk fɔ gɛt mɔ tɛm fɔ rid di Baybul ɛn wi buk ɛn magazin dɛn. So nɔto ɔltɛm wi go spɛn di sem tɛm fɔ stɔdi ɔl di buk ɔ magazin dɛn we wi gɛt. Wi biliv se Jiova kin gladi fɔ wi we wi de yuz wi tɛm di rayt we fɔ rid ɛn stɔdi di Baybul ɛn wi buk ɛn magazin dɛn. (Lɛta Fɔ Ɛfisɔs 5:​15, 16) Bɔt sɔntin de we wi fɔ rili avɔyd. Wetin na dis tin?

6. Wetin go mek wi nɔ bɛnifit frɔm di tin dɛn we Jiova de gi wi?

⁶ If wi nɔ tek tɛm, wi kin bigin tink se sɔm pat dɛn de na di Baybul ɔ sɔm buk ɛn magazin dɛn de we nɔto fɔ wi. Fɔ ɛgzampul, wetin wi go du if i tan lɛk se wan pat na di Baybul nɔ gɛt ɛnitin fɔ du wit wi? Ɔ wetin wi go du if wi nɔto di men pipul dɛn we dɛn rayt wan patikyula buk ɔ magazin fɔ? Yu tink se wi fɔ jɔs rid am kwik kwik wan ɔ nɔ ivin rid am atɔl? If wi du dat, wi nɔ go no di impɔtant tin we de insay de we go bɛnifit wi. Aw wi go avɔyd dis prɔblɛm? Wi fɔ mɛmba se na frɔm Jiova ɔl di tin dɛn we wi gɛt, kɔmɔt. Ɛn insay di Baybul, Jiova tɛl wi se: “Na mi na PAPA GƆD we na yu Gɔd, we de tich yu aw fɔ prɔfit,” ɔ aw fɔ bɛnifit yusɛf. (Ayzaya 48:​17) Insay dis atikul, wi go tɔk bɔt tri tin dɛn we go ɛp wi fɔ bɛnifit frɔm ɔl di tin dɛn we Jiova de gi wi.

TIN DƐN WE GO ƐP WI FƆ BƐNIFIT WE WI DE RID DI BAYBUL

7. Wetin mek wi fɔ luk fɔ tin dɛn we de bɛnifit wi we wi de rid di Baybul?

⁷ We yu de rid di Baybul, tray fɔ si aw yu go bɛnifit frɔm wetin yu de rid. Na tru se dɛn rayt sɔm pat dɛn na di Baybul fɔ wan patikyula pɔsin ɔ fɔ sɔm pipul dɛn. Bɔt di Baybul tɛl wi klia wan se “na Gɔd tɛl pipul ɔltin we rayt nain Buk, ɛn ɔl dɛn tin de gud.” (Sɛkɛn Lɛta To Timoti 3:​16) Na dat mek wi fɔ rɛdi fɔ bɛnifit frɔm di tin dɛn we de na di Baybul ɛnitɛm we wi de rid am. Wan brɔda kin tray fɔ mɛmba se i kin ebul fɔ lan bɔku bɔku lɛsin frɔm jɔs wan stori na di Baybul. Dis kin ɛp am fɔ si lɛsin dɛn we nɔ tu izi fɔ si. So bifo wi rid di Baybul, i go fayn mek wi beg Jiova mek i ɛp wi fɔ si lɛsin dɛn we wi kin lan ɛn mek i gi wi sɛns so dat wi go ɔndastand di lɛsin dɛn we i want mek wi lan.—Ɛzra 7:​10; rid Jems 1:​5.

8, 9. (a) We wi de rid di Baybul, us kwɛstyɔn dɛn wi fɔ aks wisɛf? (b) Wetin di tin dɛn we brɔda dɛn fɔ du bifo dɛn bi ɛlda de tɛl wi bɔt Jiova?

⁸ Aks yusɛf kwɛstyɔn dɛn. We yu de rid di Baybul, i go fayn fɔ lɛ yu stɔp ɛn aks yusɛf dɛn kwɛstyɔn dɛn ya: ‘Wetin dis de tɛl mi bɔt Jiova? Aw a go yuz wetin a dɔn lan na mi layf? Aw a go yuz wetin a dɔn lan fɔ ɛp ɔda pipul dɛn?’ We wi tink gud wan bɔt dɛn kwɛstyɔn dɛn ya, wi go bɛnifit mɔ we wi de du wi Baybul ridin. Lɛ wi si wan ɛgzampul. Di Baybul tɔk bɔt sɔm tin dɛn we brɔda dɛn fɔ du bifo dɛn bi ɛlda. (Rid Fɔs Lɛta To Timoti 3:​2-7.) Na tru se bɔku pan wi nɔto ɛlda, so wi go tink se dɛn tin dɛn ya nɔ gɛt no we we i go ɛp wi. Bɔt lɛ wi yuz di tri kwɛstyɔn dɛn we wi jɔs tɔk bɔt fɔ si aw di tin dɛn we brɔda dɛn fɔ du bifo dɛn bi ɛlda kin ɛp wi ɔl.

⁹ “Wetin dis de tɛl mi bɔt Jiova?” Jiova dɔn sho wi di tin dɛn we brɔda dɛn fɔ du bifo dɛn bi ɛlda. Jiova gɛt siriɔs ɛn impɔtant tin dɛn we i want lɛ di man dɛn we de kia fɔ di kɔngrigeshɔn du. Dis de sho se di pipul dɛn na di kɔngrigeshɔn valyu na Jiova in yay. Di Baybul se: “Gɔd in Pikin day fɔ mek dɛn bi Gɔd yon pipul.” (Di Apɔsul Dɛn Wok [Akt] 20:​28) So Jiova want lɛ di ɛlda dɛn sɛt gud ɛgzampul, ɛn na dɛn gɛt fɔ ansa to am fɔ di we aw dɛn de trit di pipul dɛn na di kɔngrigeshɔn. I want lɛ wi fil sef na dɛn an. (Ayzaya 32:​1, 2) We wi de rid di tin dɛn we pɔsin fɔ du bifo i bi ɛlda, wi go si aw Jiova rili bisin bɔt wi.

10, 11. (a) We wi de rid di tin dɛn we brɔda dɛn fɔ du bifo dɛn bi ɛlda, aw wi go yuz wetin wi dɔn lan na wi layf? (b) Aw a go yuz wetin a dɔn lan fɔ ɛp ɔda pipul dɛn?

¹⁰ “Aw a go yuz wetin a dɔn lan na mi layf?” If yu na ɛlda, i go fayn fɔ lɛ yu de rid di tin dɛn we brɔda dɛn fɔ du bifo dɛn bi ɛlda ɛn tray fɔ du mɔ. If yu “want bi ovasia,” yu fɔ tray tranga wan fɔ du ɔl wetin brɔda dɛn fɔ du bifo dɛn bi ɛlda. (Fɔs Lɛta To Timoti 3:​1) Bɔt ɔlman we na Kristian kin lan frɔm di tin dɛn we brɔda dɛn fɔ du bifo dɛn bi ɛlda. Fɔ ɛgzampul, Jiova want lɛ wi ɔl lɛk strenja dɛn, bɔt i nɔ want lɛ wi lɛk mɔni. (Lɛta Fɔ Rom 12:​13; Fɔs Lɛta To Timoti 6:​9, 10) We di ɛlda dɛn de du tin di we we go mek wi “want fɔ tan lɛkɛ” dɛn, wi kin lan frɔm dɛn ɛn “biliv Gɔd lɛkɛ aw dɛn . . . biliv am.”—Pita In Fɔs Lɛta 5:​3; Di Ibru Pipul Dɛn 13:​7.

¹¹ “Aw a go yuz wetin a dɔn lan fɔ ɛp ɔda pipul dɛn?” Wi kin yuz di tin dɛn we di Baybul se brɔda dɛn fɔ du bifo dɛn bi ɛlda fɔ ɛp wi Baybul stɔdi dɛn ɛn ɔda pipul dɛn we want fɔ no mɔ fɔ ɔndastand aw di ɛlda dɛn difrɛn frɔm di bigman dɛn we de na dɛn ɔda rilijɔn dɛn. Dɛn tin ya kin ɛp wi bak fɔ mɛmba di big big wok we di ɛlda dɛn de du na wi kɔngrigeshɔn. Ɛn dis go ɛp wi fɔ lɛ wi rɛspɛkt wi ɛlda dɛn. (Fɔs Lɛta Fɔ Tɛsalonayka 5:​12) Di mɔ we wi rɛspɛkt dɛn, na di mɔ dɛn go gladi fɔ du dɛn wok.—Di Ibru Pipul Dɛn 13:​17.

12, 13. (a) Wetin wi fɔ tray fɔ no we wi de du wi Baybul ridin? (b) Gi wan ɛgzampul we de sho se we wi tray fɔ no mɔ bɔt wetin wi dɔn rid, dat go ɛp wi fɔ lan lɛsin dɛn we nɔ izi fɔ si so nɔmɔ.

¹² Tray fɔ no mɔ. We wi de stɔdi di Baybul, i go fayn mek wi luk fɔ di ansa to dɛn kwɛstyɔn dɛn ya:

• Udat rayt dis pat na di Baybul?

• Usay ɛn ustɛm i rayt am?

• Us impɔtant tin dɛn bin de apin di tɛm we i bin de rayt dis buk?

Di ansa we wi go gɛt to dɛn kwɛstyɔn dɛn ya go ɛp wi fɔ lan lɛsin dɛn we nɔ izi fɔ si so nɔmɔ.

¹³ Fɔ ɛgzampul, Izikɛl 14:​13, 14 se: “Wɛn wan kɔntri kɔmit sin to mi, bay we dɛn . . . nɔ biliv mi, ɛn a dil wit dɛn ɛn mek dɛn nɔ gɛt natin fɔ it, ɛn a . . . sɛn bad bad aŋri pan am; ɛn a . . . mek nɔn mɔtalman ɔ animal nɔ tap de, i lɛk dɛn tri man ya, Noa, Daniɛl ɛn Job bin de de, na dɛn yon layf nɔmɔ dɛn go ebul sev, fɔseka we dɛn de waka tret wit PAPA GƆD, na so Papa Gɔd we na Gɔd se.” If wi tray fɔ no mɔ bɔt dɛn vas ya, wi go kam fɔ no se Izikɛl bin rayt dɛn wɔd ya lɛk 612 ia bifo Krays. Noa ɛn Job bin dɔn day lɔng lɔng tɛm, bɔt Jiova bin stil de mɛmba dɛn bikɔs dɛn bin dɔn du wetin rayt na in yay. Bɔt Daniɛl in bin stil de liv dɛn tɛm dɛn de. I go mɔs bi se i bin ol lɛk 20 ia so we Jiova se i de du wetin rayt na in yay lɛk Noa ɛn Job. Wetin wi lan frɔm dis? Wi lan se Jiova de si ɛn i valyu ɔl in savant dɛn, ivin di yɔŋ wan dɛn.—Sam 148:​12-14.

BƐNIFIT FRƆM ƆL DI DIFRƐN BUK ƐN MAGAZIN DƐN

14. Aw di buk ɛn magazin dɛn we dɛn de mek fɔ yɔŋ pipul dɛn kin ɛp dɛn? Aw i kin bɛnifit ɔda pipul dɛn bak? (Luk di pikchɔ nia dis atikul in taytul.)

¹⁴ Buk ɛn magazin dɛn fɔ yɔŋ pipul dɛn. Wi dɔn lan se wi kin bɛnifit frɔm ɔltin we de na di Baybul. Semweso, wi kin bɛnifit frɔm ɔl wi buk ɛn magazin dɛn. Lɛ wi tɔk bɔt sɔm ɛgzampul dɛn. Dɛn biɛn tɛm ya, Jiova dɔn tich yɔŋ pipul dɛn bɔku tin dɛn.^[1] (Rid di ɛndnot ɔnda di las paregraf.) Dɛn tin ya kin ɛp dɛn fɔ bia wit di prɔblɛm dɛn we kin mit dɛn na skul ɛn di prɔblɛm dɛn we kin mit dɛn we dɛn de gro. Bɔt aw wi ɔl go bɛnifit frɔm dɛn atikul ɛn buk dɛn ya? We wi rid dɛn, wi de no di prɔblɛm dɛn we de mit yɔŋ pipul dɛn ɛn dis go mek wi ebul fɔ ɛp ɛn ɛnkɔrej dɛn mɔ.

15. Wetin mek big pipul dɛn we na Kristian fɔ rid di buk dɛn we dɛn rayt fɔ yɔŋ wan dɛn?

¹⁵ Big pipul dɛn we na Kristian nɔ fɔ fil tu big fɔ rid tin dɛn we de tɔk bɔt yɔŋ pipul dɛn. Bɔku pan di prɔblɛm dɛn we dɛn kin tɔk bɔt insay di atikul dɛn fɔ yɔŋ wan dɛn kin mit ɔlman we na Kristian. Fɔ ɛgzampul, wi ɔl gɛt fɔ de tɔk bɔt wetin wi biliv, kɔntrol di we aw wi de fil, nɔ du wetin wi kɔmpin dɛn de fos wi fɔ du, ɛn avɔyd bad padi dɛn ɛn ɛnjɔymɛnt. Pan ɔl we na fɔ yɔŋ wan dɛn, dɛn rayt dɛn buk ya, di tin dɛn we de insay de kɔmɔt frɔm di Baybul, so ɔlman we na Kristian kin bɛnifit frɔm am.

16. Wetin bak wi buk dɛn kin ɛp yɔŋ wan dɛn fɔ du?

¹⁶ Di buk dɛn we dɛn rayt fɔ yɔŋ wan dɛn kin ɛp dɛn bak fɔ gɛt tayt padi biznɛs wit Jiova. (Rid Ɛkliziastis 12:​1, 13.) Ɛn big pipul dɛnsɛf kin bɛnifit frɔm am. Fɔ ɛgzampul, di Epril 2009 Awake! gɛt di atikul “Young People Ask . . . How Can I Make Bible Reading Enjoyable?” Da atikul de gɛt bɔku tin dɛn we kin ɛp wi, ɛn i gɛt wan bɔks we yu kin kɔt ɛn kip am fɔ yuz di tɛm we yu de stɔdi. Yu tink se big pipul dɛn bin bɛnifit frɔm dis atikul? Wan mareduman we na mama bin tɔk se i nɔ bin izi fɔ am we i de rid di Baybul. Bɔt i bin yuz di tin dɛn we de na di atikul ɛn naw i de bɛt-bɛt fɔ rid di Baybul. I se i de ɛnjɔy we i de si aw wan buk na di Baybul gɛt sɔntin fɔ du wit di ɔda buk dɛn na di Baybul ɛn i ebul fɔ imajin aw ɔltin bin apin. I bin tɔk bak se: “A nɔ wande gladi lɛk dis fɔ rid di Baybul.”

17, 18. Aw wi go bɛnifit we wi rid buk ɛn magazin dɛn we dɛn rayt fɔ pipul dɛn we nɔto Jiova Witnɛs? Gi wan ɛgzampul.

¹⁷ Buk ɛn magazin dɛn fɔ pipul dɛn we nɔto Jiova Witnɛs. Frɔm 2008, wi dɔn de ɛnjɔy Di Wachtawa we wi de yuz fɔ stɔdi. Dɛn rayt dis Wachtawa mɔ fɔ Jiova Witnɛs dɛn, bɔt wi gɛt wi buk ɛn magazin dɛn we na fɔ pipul dɛn mɔ we nɔto Jiova Witnɛs. Aw wi go bɛnifit frɔm dɛn buk dɛn ya bak? Lɛ wi si wan ɛgzampul. We yu invayt pɔsin fɔ kam na Kiŋdɔm Ɔl ɛn di pɔsin kam, yu kin gladi. We di brɔda de gi di tɔk, yu de tink bɔt di pɔsin we yu invayt. Yu de wɔnda aw di pɔsin de fil bɔt di tin dɛn we i de yɛri ɛn aw di tin dɛn we i de yɛri go chenj in layf. Dis mek yu rili gladi fɔ di tɔk we di brɔda gi da de de.

¹⁸ Sɔntin lɛk dis kin apin to wi we wi de rid di buk ɛn magazin dɛn we dɛn rayt fɔ pipul dɛn we nɔto Jiova Witnɛs. Fɔ ɛgzampul, Di Wachtawa we de fɔ pipul dɛn we nɔto Jiova Witnɛs ɛn ɔda atikul dɛn na jw.org kin yuz simpul wɔd dɛn fɔ ɛksplen di Baybul, we kin mek am izi fɔ lɛ wi ɔndastand. We wi rid dɛn tin ya, wi kin ɔndastand ɛn lɛk di tru tin dɛn we de insay di Baybul mɔ pan ɔl we wi kin dɔn ɔlrɛdi no dɛn gud gud wan. Wi kin lan bak nyu we dɛn fɔ ɛksplen wetin wi biliv we wi de prich. Semweso, di Awake! magazin kin mek wi biliv mɔ se Pɔsin de we mek ɔltin. I kin ɛp wi bak fɔ no aw fɔ ɛksplen wetin wi biliv.—Rid Pita In Fɔs Lɛta 3:​15, 16.

19. Aw wi go sho se wi gladi fɔ ɔl di tin dɛn we Jiova de gi wi?

¹⁹ Wi dɔn si klia wan se Jiova de tich wi ɛn gi wi plɛnti advays dɛn we de bɛnifit wi. (Matyu 5:​3) So lɛ wi kɔntinyu fɔ rid ɛn du ɔl di tin dɛn we i de tɛl wi. If wi du dis, wi go bɛnifit ɛn wi go sho Jiova se wi gladi fɔ ɔl di tin dɛn we i de gi wi.—Ayzaya 48:​17.