Aw Gɔd De Kia fɔ di Wan dɛn We Dɛf?

Tide, i pas 70 million pipul dɛn we de ɔlsay na di wɔl we dɛf; i pas 200 sayn langwej dɛn we de, ɛn bɔku pan dɛn kin yuz wan pan dɛn fɔ tɔk to ɔda pipul dɛn. Bɔt i sɔri fɔ no se, dɛn nɔ kin trit dɛf pipul dɛn fayn, lɛk aw dɛn ripɔt dɛn ya sho:

• “Ɔlsay na di wɔl, dɛn nɔ kin gi di wan dɛn we dɛf ɛn di wan dɛn we nɔ de yɛri fayn di rayt we dɛn fɔ gɛt.”—National Association of the Deaf (U.S.).

• “Di dɛf pipul dɛn we de na dɛn po kɔntri dɛn kin po pasmak, ɛn i kin at fɔ lɛ dɛn lan buk di we aw dɛn fɔ du am, ɛn dɛn nɔ kin gɛt di wok ɛn di infɔmeshɔn we dɛn fɔ gɛt.”—World Federation of the Deaf.

Aw Gɔd de fil bɔt di pipul dɛn we dɛf? Wetin di Baybul tɔk bɔt di wan dɛn we dɛf? Ɛn aw Jiova Witnɛs dɛn de ɛp dɛn tide?

Aw Gɔd De Si di Wan dɛn We Dɛf?

Di Baybul tɔk se Jiovaa Gɔd bisin bɔt di wan dɛn we dɛf. I want fɔ mek dɛn trit dɛn fia wan ɛn fɔ mek dɛn bɛnifit frɔm di tich we i de tich wi.

Skripchɔ: “Yu nɔ fɔ kɔs dɛfyes man.”—Lɛvitikɔs 19:14.

Skripchɔ: “Gɔd nɔ de tek wan pɔsin bɛtɛ pas ɔda pɔsin.”—Akt 10:34.

Skripchɔ: “Jizɔs bin de go . . . ɛn prich di gud nyuz bɔt di Kiŋdɔm.”—Matyu 9:35.

Skripchɔ: Jizɔs bin ivin mek “pipul dɛn we dɛf yɛri ɛn di mumu dɛn . . . tɔk.”—Mak 7:37.

Skripchɔ: “Di wan dɛn we dɛf go yɛri.”—Ayzaya 35:5.

Minin: Jiova bin dɔn tɔk se di wan dɛn we dɛf go yɛri.—Ayzaya 29:18.

Aw Jiova Witnɛs dɛn De Ɛp di Wan dɛn we Dɛf Tide?

Jiova Witnɛs dɛn de tɔk bɔt Gɔd in mɛsej we de gi wi op to di dɛf pipul dɛn we de ɔlsay na di wɔl. Aw wi de ebul fɔ du dis? Wi de mek Baybul ɛn Baybul stɔdi vidio dɛn insay pas 100 sayn langwej dɛn. Dɔn bak, wi de tich pipul dɛn bɔt di Baybul ɛn ɔganayz Kristian mitin dɛn insay sayn langwej. If ɛnibɔdi want fɔ mek Gɔd ɛp am, wi de ɛp am wit dɛn tin dɛn ya fɔ fri. Wetin mek? Na bikɔs Jizɔs bin kɔmand wi se: “Una gɛt am fri, so una gi fri.”—Matyu 10:8.

Yu go ebul fɔ gɛt dɛn tin dɛn ya ɔnlayn ɔ dawnlod dɛn na yu fon, tablɛt, ɔ kɔmpyuta frɔm:

JW.ORG. Go ɔp say na di wɛbsayt pej ɛn klik di say we de fɔ pik langwej so dat yu go fɛn tin dɛn na di patikyula sayn langwej we yu want.

JW Laybri Sayn Langwej ap. Instɔl dis ap fɔ fri na yu fon, tablɛt, ɔ kɔmpyuta, ɛn yu go ebul fɔ dawnlod sayn-langwej vidio dɛn ɔ wach dɛn we yu gɛt Intanɛt.

Wetin Wi De Mek fɔ Tich Dɛf Pipul dɛn bɔt di Baybul?

Di Baybul insay sayn langwej. Di Nyu Wɔl Transleshɔn fɔ di Oli Skripchɔ Dɛn insay Amɛrikan Sayn Langwej na di fɔs kɔmplit sayn langwej Baybul we dɛn ɛva mek. Di Nyu Wɔl Transleshɔn de naw wan ol wan ɔ af pat pan am insay bɔku sayn langwej dɛn, ɛn dɛn de ad mɔ langwej dɛn ɛni ia. (Fɔ si di langwej dɛn ɔ fɔ wach di Baybul ɔnlayn, luk di bɔks we gɛt di taytul “Di Nyu Wɔl Transleshɔn Baybul Insay Sayn Langwej.”)

• Wach di vidio we gɛt di taytul The Complete New World Translation Is Available in ASL fɔ lan bɔt di wok we wi de du fɔ mek Baybul insay sayn langwej.

• Fɔ mek yu go ɛnjɔy fɔ rid di Baybul mɔ, na fɔ instɔl di JW Laybri Sayn Langwej ap. Insay dis ap, yu go ebul fɔ pik patikyula vas dɛn insay di sayn-langwej Baybul.

• Dimitro ɛn Vita na papa ɛn mama we dɛf, ɛn dɛn pikin dɛn de yɛri. Si aw dɛn famili de bɛnifit we dɛn de wach di Baybul insay sayn langwej ɛvride.

Vidio dɛn we de tich pipul dɛn bɔt di Baybul. Jiova Witnɛs dɛn dɔn mek sayn-langwej vidio dɛn we de ɛp pipul dɛn fɔ ɔndastand ɛn aplay di fayn advays dɛn we di Baybul gɛt fɔ . . .

• Mared pipul dɛn ɛn famili dɛn

• Tineja dɛn ɛn yɔŋ pipul dɛn

• Pikin dɛn

Baybul stɔdi wit pɔsin we in ɛn in ticha go gɛt chans fɔ tɔk. Lan di Baybul in mɛsej insay sayn langwej we yu gɛt taym, ɛn yu go gɛt ticha we go ɛp yu. Aks fɔ mek dɛn sho yu aw dis fri Baybul stɔdi go de apin.

Jesin Sɛnaunɔn de na Filipin. Si aw wi Baybul stɔdi bin ɛp am fɔ gɛt tayt padi biznɛs wit Gɔd.

Mario Antunɛz na bin pastɔ na Ɔnduras. Lan bɔt aw i bin fɛn ansa dɛn to in Baybul kwɛstyɔn dɛn insay in layf stori we nem “I Had More Questions Than Answers.”

Mitin ɛn program dɛn. Wi gɛt sayn-langwej kɔngrigeshɔn ɛn grup dɛn ɔlsay na di wɔl, usay dɛf pipul dɛn kin mit-ɔp fɔ wɔship Gɔd ɛn lan bɔt am ɛni wik. Dɔn bak ɛni ia, wi kin ɔganayz big sayn-langwej program dɛn fɔ lɛ pipul dɛn lan bɔt di Baybul. Na wi mitin ɛn program dɛn, wi kin sayn fɔ pɔsin we dɛf ɛn blayn. Dɔn bak, wi kin gɛt buk dɛn insay brel fɔ fri.

• Fɛn kɔngrigeshɔn we de nia yu.

• Lan bɔt wi kɔnvɛnshɔn ɛn asɛmbli dɛn we wi kin gɛt ɛni ia.

• Atɛnd di Mɛmorial fɔ Jizɔs in day, we na di program we impɔtant pas ɔl di ɔda wan dɛn we wi kin gɛt insay di ia.

Ose Luis Ayala de na Mɛksiko. I bin dɛf we dɛn bɔn am, ɛn i leta blayn. Lan aw dɛn ɛp am fɔ bi gud Baybul ticha.