Jizɔs Go Mek Wɔ Dɔn

We Jizɔs bin de na dis wɔl, i bin sho se i rili lɛk pipul dɛn; i sho dat bay we i ivin gi in layf fɔ dɛn. (Matyu 20:​28; Jɔn 15:​13) I nɔ go te igen, i go sho bak se i lɛk pipul dɛn bay we i go yuz in pawa as Kiŋ na Gɔd in Kiŋdɔm fɔ mek “wɔ dɔn ɔlsay na di wɔl.”—Sam 46:​9.

Notis aw di Baybul tɔk bɔt wetin Jizɔs go du:

• “I go sev pɔsin we po we de kray fɔ lɛ dɛn ɛp am, i go sev pɔsin we dɛn nɔ tek mek natin ɛn ɛnibɔdi we nɔ gɛt pɔsin fɔ ɛp am. I go sɔri fɔ di wan dɛn we dɛn nɔ tek mek natin ɛn di wan dɛn we po, ɛn i go sev po pipul dɛn layf. I go sev dɛn frɔm di wan dɛn we de sɔprɛs dɛn ɛn di wan dɛn we de mek dɛn sɔfa.”—Sam 72:​12-14.

Aw wi go sho se wi gladi fɔ ɔl wetin Jizɔs dɔn du fɔ wi ɛn wetin i go du jisnɔ? Wan we aw wi go du dat na we wi lan mɔ bɔt di mɛsej we i bin de prich bɔt we na “di gud nyuz bɔt Gɔd in Kiŋdɔm.” (Lyuk 4:​43) Rid di atikul we gɛt di taytul “Wetin na Gɔd in Kiŋdɔm?”