Wetin i Min fɔ Bi Kristian?​—Wetin di Baybul Se?

Tide, bɔku pipul dɛn ɔlsay na di wɔl kin gladi fɔ tɔk se dɛn na Kristian, bɔt dɛn kin trit ɔda pipul dɛn bad. Sɔm pan dɛn jɔs bisin bɔt dɛnsɛf, dɛn nɔ ɔnɛs, ɔ dɛn nɔ kin du gud. Ɔda wan dɛn nɔ kin fetful to di pɔsin we dɛn mared to. Di we aw dɛn de biev kin mek sɔm pipul dɛn aks se: ‘Wetin i rili min fɔ bi Kristian?’

Wetin i rili min fɔ bi Kristian?

I kin izi fɔ mek pɔsin tɔk se in na Kristian. Bɔt nɔto dat nɔmɔ i min fɔ bi Kristian. Akɔdin to di Baybul, Kristian na pɔsin we na Jizɔs Krays in disaypul. (Akt 11:​26) Jizɔs insɛf sɛf tɔk se: “If una de du wetin a tɛl una fɔ du, una na mi tru tru disaypul dɛn.” (Jɔn 8:​31) Na tru se nɔbɔdi nɔ go ebul fɔ obe wetin Jizɔs tɛl wi fɔ du pafɛkt wan. Bɔt pɔsin we na Kristian kin tray tranga wan fɔ du wetin Jizɔs tich, ɛn i kin sho dis bay di we aw i de liv in layf ɛvride. Lɛ wi tɔk bɔt sɔm ɛgzampul dɛn.

Kristian dɛn gɛt lɔv ɛn dɛn nɔ jɔs bisin bɔt dɛnsɛf nɔmɔ

Jizɔs bin se: “A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una. If una lɛk una kɔmpin dɛn, ɔlman go no se una na mi disaypul dɛn.”—Jɔn 13:​34, 35.

Di tin we Jizɔs bin du: Jizɔs nɔ bin jɔs bisin bɔt insɛf nɔmɔ, bɔt i bin de sho se i lɛk ɔlman ilɛk dɛn gɛt mɔni ɔ dɛn nɔ gɛt ɔ ilɛk usay dɛn kɔmɔt. I bin de mɛn di wan dɛn we sik, fid di wan dɛn we angri, ɛn i bin ivin day fɔ ɔda pipul dɛn.—Matyu 14:​14-21; 20:​28.

Di we aw Kristian dɛn fɔ biev: Kristian dɛn go sho se dɛn gɛt lɔv ɛn dɛn nɔ jɔs bisin bɔt dɛnsɛf nɔmɔ bay we dɛn de du gud, nɔ tek wan pɔsin bɛtɛ pas di ɔda pɔsin, ɛn fɔgiv. Dɛn de ɛp pipul dɛn we nid ɛp, ɛn dɛn kin rɛdi fɔ mek sakrifays dɛn fɔ ɔda pipul dɛn.—1 Jɔn 3:​16.

Kristian dɛn fɔ ɔnɛs

Jizɔs bin se: “Na mi na di . . . trut.”—Jɔn 14:​6.

Di tin we Jizɔs bin du: Jizɔs bin de tɔk tru, ɛn i bin ɔnɛs pan ɔl wetin i bin du. I nɔ bin ɛva ful pipul dɛn fɔ du wetin i want ɔ mek dɛn biliv sɔntin we nɔto tru. Pipul dɛn bin sabi am as pɔsin we ɔnɛs, pan ɔl we dat bin mek dɛn de agens am.—Matyu 22:​16; 26:​63-67.

Di we aw Kristian dɛn fɔ biev: Kristian dɛn nɔ fɔ lay. Dɛn de pe taks, dɛn nɔ de tif, ɛn dɛn de wok tranga wan fɔ di mɔni we dɛn de pe dɛn. (Romans 13:​5-7; Ɛfishians 4:​28) Dɛn nɔ de kruk ɔda pipul dɛn, spay we dɛn de sit ɛgzam, ɔ rayt lay lay tin dɛn bɔt dɛnsɛf na dɛn CV we dɛn kin yuz fɔ fɛn wok ɔ ɔda dɔkyumɛnt dɛn.—Ibruz 13:​18.

Kristian dɛn de du gud

Jizɔs bin se: “Una kam to mi, una ɔl we dɔn taya ɛn we gɛt ɛvi lod, ɛn a go mek una blo. Una tek mi yok ɛn lan frɔm mi, bikɔs a de tek tɛm du tin ɛn a ɔmbul, ɛn una go fil fayn. Mi yok izi fɔ tot, ɛn mi lod layt.”—Matyu 11:​28-30.

Di tin we Jizɔs bin du: Jizɔs na pɔsin we bin izi fɔ tɔk to, ɛn i bin de trit pipul dɛn fayn. I bin de gladi fɔ tɔk wit pikin dɛn, kɔrej di wan dɛn we dɛn at pwɛl, ɛn trit ɔda pipul dɛn wit rɛspɛkt.—Mak 10:​13-15; Lyuk 9:​11.

Di we aw Kristian dɛn fɔ biev: Kristian dɛn kin tɔk fayn to ɔda pipul dɛn; dɛn gɛt trenin ɛn dɛn nɔ de kɔs. (Ɛfishians 4:​29, 31, 32) Dɛn bisin bɔt ɔda pipul dɛn, ɛn dɛn kin luk fɔ we dɛn fɔ ɛp dɛn.—Galeshians 6:​10.

Kristian dɛn kin kɔntinyu fɔ fetful to di pɔsin we dɛn mared to

Jizɔs bin se: “Lɛ nɔbɔdi nɔ skata wetin Gɔd dɔn jɔyn togɛda.”—Mak 10:​9.

Di tin we Jizɔs bin du: Pan ɔl we Jizɔs nɔ ɛva mared, i bin ɛnkɔrej pipul dɛn we mared fɔ kɔntinyu fɔ fetful to dɛnsɛf. (Matyu 19:​9) I bin wɔn dɛn bɔt tin dɛn we dɛn go du we go skata dɛn mared.—Matyu 5:​28.

Di we aw Kristian dɛn fɔ biev: Kristian dɛn kin avɔyd fɔ du ɛnitin we de sho se dɛn nɔ rɛspɛkt di pɔsin we dɛn mared to. (Ibruz 13:​4) Mared pipul dɛn fɔ trit dɛnsɛf wit lɔv ɛn rɛspɛkt.—Ɛfishians 5:​28, 33.