Di Tin dɛn we Gɔd Sho Jɔn

We apɔsul Jɔn bin de na di ayland na Patmɔs as prizina, Jizɔs sho am 16 vishɔn dɛn ɔ pikchɔ dɛn bɔt wetin go apin tumara bambay. Dɛn vishɔn dɛn de, de sho aw Jiova go mek in nem oli, in Kiŋdɔm go kam, ɛn wetin i want go apin na di wɔl lɛk aw i de apin na ɛvin.

Insay wan vishɔn, Jɔn si Jiova de na in pawaful tron na ɛvin. I si 24 ɛlda dɛn we wɛr wayt klos de rawnd di tron, ɛn dɛn gɛt gold krawn na dɛn ed. Laytin ɛn tɛnda kɔmɔt na di tron. Di 24 ɛlda dɛn butu bifo Jiova ɛn wɔship am. Insay wan ɔda vishɔn, Jɔn si bɔku bɔku pipul dɛn we kɔmɔt na ɔl di neshɔn dɛn, pipul dɛn we de tɔk difrɛn difrɛn langwej dɛn de wɔship Jiova. Di Yɔŋ Ship we na Jizɔs, de kia fɔ dɛn ɛn tek dɛn to wata we de gi layf. Leta, insay wan ɔda vishɔn, Jizɔs bigin fɔ rul as Kiŋ na ɛvin wit di 24 ɛlda dɛn. Insay di vishɔn afta dis, Jɔn si Jizɔs de fɛt di dragɔn we na Setan, ɛn in dimɔn dɛn. Jizɔs trowe dɛn kɔmɔt na ɛvin ɛn sɛn dɛn kam dɔŋ na dis wɔl.

Dɔn Jɔn si wan fayn pikchɔ usay di Yɔŋ Ship ɛn di 144,000 tinap na Mawnt Zayɔn. I si bak wan enjɛl de flay rawnd di wɔl, ɛn i de tɛl pipul dɛn fɔ fred Gɔd ɛn gi Am glori.

Insay di nɛks vishɔn, i si dɛn de fɛt wan wɔ we dɛn kɔl Amagɛdɔn. Insay da wɔ de, Jizɔs ɛn in sojaman dɛn win Setan. Insay di las vishɔn, Jɔn si tru tru pis ɛn wanwɔd de na ɛvin ɛn na di wɔl. Jizɔs dɔnawe wit Setan ɛn di wan dɛn we de fala am kpatakpata. Ɔlman na ɛvin ɛn na di wɔl go trit Jiova in nem as sɔntin we oli ɛn wɔship Jiova in wangren.