Yu dɔn ɛva tink fɔ rid di Baybul bɔt yu fil lɛk dɛn pipul dɛn ya we yu dɔn rid bɔt? Bɔku pipul dɛn fil se fɔ rid di Baybul na sɔntin we nɔ rili izi. Bɔt wetin yu go du if yu lan se di Baybul go ɛp yu fɔ liv gud layf ɛn gɛt gladi-at? Ɛn wetin yu go du if yu kam no se we dɛn de fɔ rid am we go mek yu rili ɛnjɔy am? Yu go rɛdi fɔ rid di Baybul fɔ si aw i go bɛnifit yu?

Rid bɔt wetin sɔm pipul dɛn dɔn se bɔt aw dɛn dɔn bɛnifit we dɛn bigin fɔ rid di Baybul.

Izikɛl we dɔn pas 20 ia tɔk se: “Trade, a bin tan lɛk sɔmbɔdi we de drayv motoka bɔt nɔ no usay i de go. Bɔt we a de rid di Baybul, dat dɔn mek mi layf gɛt minin. I gɛt fayn advays dɛn we a kin yuz ɛvride.”

Frida, we insɛf jɔs pas 20 ia tɔk se: “A bin de vɛks kwik. Bɔt bikɔs a kin rid di Baybul, a dɔn lan fɔ kɔntrol misɛf. Dat dɔn mek am izi fɔ mek a de wit ɔda pipul dɛn ɛn naw a gɛt mɔ padi dɛn.”

Wan uman we nem Yunis we ol arawnd 50 ia, tɔk bɔt di Baybul se: “I de ɛp mi fɔ bi bɛtɛ pɔsin, ɛn fɔ chenj mi abit dɛn we nɔ fayn.”

Dɛn pipul dɛn ya ɛn bɔku bɔku ɔda pipul dɛn we de rid di Baybul, dɔn kam fɔ lan se we yu de rid di Baybul, dat go ɛp yu fɔ rili ɛnjɔy yu layf. (Ayzaya 48:​17, 18) Ɔda we dɛn we di Baybul de ɛp wi na (1) i de ɛp wi fɔ disayd fɔ du di rayt tin, (2) i de mek wi gɛt tru tru padi dɛn, (3) i de ɛp wi fɔ bia wit strɛs, ɛn (4) we pas ɔl, i de mek wi lan di tru bɔt Gɔd. Bikɔs di advays dɛn we de na di Baybul kɔmɔt frɔm Gɔd, yu go du wetin rayt ɔltɛm we yu fala am. Gɔd nɔ de ɛva gi bad advays.

Di tin we impɔtant na fɔ bigin rid di Baybul. Wetin ɛn wetin yu go du so dat we yu bigin fɔ rid am i go izi ɛn yu go ɛnjɔy am mɔ?

Wetin yu go du we go ɛp yu fɔ ɛnjɔy yu Baybul ridin ɛn fɔ bɛnifit frɔm am mɔ? Notis dɛn fayv tin dɛn ya we dɔn ɛp bɔku pipul dɛn.

Fɛn di rayt ples. Tray fɔ fɛn ples we kwayɛt. Ridyus pan di tin dɛn we go pul yu atɛnshɔn pan wetin yu de rid. If yu de na say we layt de ɛn fayn briz de blo, i go ɛp yu fɔ bɛnifit frɔm yu Baybul ridin.

Tink di rayt we. Bikɔs di Baybul kɔmɔt frɔm wi Papa we de na ɛvin, yu go bɛnifit mɔ if yu tan lɛk pikin we rɛdi fɔ lan frɔm in mama ɛn papa we lɛk am. If yu de tink ɛni we bɔt di Baybul we nɔ kɔrɛkt, lɛf fɔ tink da we de so dat Gɔd go tich yu.​—Sam 25:​4.

Pre bifo yu bigin fɔ rid. Bikɔs na Gɔd in sɛns de insay di Baybul, na dat mek wi nid am fɔ ɛp wi fɔ ɔndastand wetin de insay de. Gɔd prɔmis fɔ gi “oli spirit to di wan dɛn we de aks am.” (Lyuk 11:​13) Di oli spirit kin ɛp yu fɔ ɔndastand aw Gɔd de tink. As tɛm de go, Gɔd in spirit go ɛp yu fɔ rili ɔndastand “ivin di dip tin dɛn bɔt Gɔd.”​—1 Kɔrintians 2:​10.

Rid fɔ lɛ yu ɔndastand. Nɔ jɔs rid fɔ dɔn wetin yu de rid. Tray fɔ rili tink bɔt wetin yu de rid. Aks yusɛf kwɛstyɔn dɛn lɛk: ‘ Us kwaliti dɛn a de si pan di pɔsin we a de rid bɔt? Aw a go falamakata dɛn kwaliti dɛn ya?’

Disayd fɔ du patikyula tin dɛn. Fɔ lɛ yu go bɛnifit frɔm yu Baybul ridin, disayd fɔ lan sɔntin we go rili mek yu layf bɛtɛ. Yu kin disayd fɔ du tin dɛn lɛk: ‘Fɔ lan mɔ bɔt Gɔd insɛf sɛf.’ ‘Fɔ bi bɛtɛ pɔsin, bɛtɛ maredman ɔ wɛf.’ Dɔn pik say dɛn na di Baybul we go ɛp yu fɔ du dɛn tin dɛn de.a

Dɛn fayv tin dɛn ya go ɛp yu fɔ bigin stɔdi di Baybul. Bɔt wetin yu go du fɔ mek yu ɛnjɔy yu ridin mɔ ɛn mɔ? Di nɛks atikul go tɛl wi sɔm tin dɛn we go ɛp.

Wetin yu tink bɔt yu Baybul ridin? Yu nɔ kin ɛnjɔy am? Yu nɔ kin fil fayn we yu du am? I lɛf to aw yu si yu Baybul ridin. Lɛ wi si wetin yu go du we go mek yu lɛk fɔ du yu Baybul ridin ɛn ɛnjɔy am mɔ ɛn mɔ.

Pik Baybul we dɛn translet fayn ɛn we gɛt wɔd dɛn we pipul dɛn de tɔk tide. If yu rid buk we gɛt bɔku wɔd dɛn we at fɔ ɔndastand, ɔ wɔd dɛn we dɔn kɔmɔt na stayl, yu nɔ go ɛnjɔy fɔ rid am. So luk fɔ Baybul we gɛt wɔd dɛn we izi fɔ ɔndastand ɛn we go tɔch yu at. Dɔn bak, i fɔ bi Baybul we dɛn tek tɛm translet kɔrɛkt wan.a

Yuz tɛknɔlɔji. Tide, dɛn nɔ jɔs de print di Baybul nɔmɔ bɔt i de insay ilɛktronik fɔmat bak. Yu kin rid sɔm Baybul dɛn ɔnlayn ɔ dawnlod dɛn fɔ rid na yu kɔmpyuta, tablɛt, ɔ fon. Sɔm Baybul transleshɔn dɛn gɛt tin dɛn we go mek yu ebul fɔ chɛk Baybul vas dɛn we de tɔk bɔt di sem tɔpik ɔ luk ɔda Baybul transleshɔn dɛn kwik kwik wan. If na lisin yu want fɔ lisin yu nɔ want fɔ rid am, dɛn dɔn rɛkɔd am bak. Bɔku pipul dɛn de ɛnjɔy fɔ lisin to di Baybul we dɛn de na pɔblik transpɔt, ɔ we dɛn de du ɔda tin dɛn we kin alaw dɛn fɔ lisin. Yu nɔ tink se i go fayn fɔ mek yu tray wan we go izi fɔ yu?

Yuz tin dɛn we go ɛp yu fɔ stɔdi di Baybul. Di tin dɛn we yu go yuz fɔ stɔdi di Baybul go ɛp yu mɔ fɔ bɛnifit we yu de rid di Baybul. Map dɛn de we de sho ples dɛn na di Baybul, ɛn i go ɛp yu fɔ no usay di ples dɛn we yu de rid bɔt de ɛn ɛp yu fɔ ɔndastand aw tin dɛn bin apin. Atikul dɛn lɛk dis insay dis magazin ɔ na di “Baybul Tichin” sɛkshɔn na jw.org wɛbsayt, go ɛp yu fɔ no bɔku pat dɛn na di Baybul.

Yuz difrɛn we dɛn. If i nɔ izi fɔ mek yu rid di Baybul frɔm di biginin to di ɛndin, yu nɔ tink se i go fayn fɔ mek yu fɛn pat na di Baybul we yu rili lɛk ɛn bigin fɔ rid am? If yu want fɔ no bɔt femɔs pipul dɛn na di Baybul, yu kin tray fɔ rid bɔt difrɛn pipul dɛn na di Baybul. Wan ɛgzampul bɔt aw dat tan lɛk de insay wan bɔks insay dis atikul we gɛt di taytul, “Luk Gud Wan Insay di Baybul fɔ No di Pipul dɛn we I Tɔk Bɔt.” Ɔ sɔntɛm yu want fɔ rid di Baybul bay tɔpik ɔ bay aw tin dɛn apin. Yu nɔ tink se i go fayn fɔ tray wan pan dɛn we ya?

Di Baybul na spɛshal buk. Di advays dɛn we de de na frɔm di Pɔsin we mek wi. (2 Timoti 3:​16) Di mɛsej we de insay de kin rili mek wi chenj. Infakt di Baybul se: “Gɔd in wɔd de alayv ɛn i gɛt pawa.” (Ibruz 4:​12) I gɛt pawa fɔ mek wi layf bɛtɛ tu impɔtant we dɛn; bay we i de advays wi aw fɔ liv wi layf ɛvride, ɛn bay we i de ɛp wi fɔ no Gɔd ɛn di tin dɛn we i dɔn prɔmis.​—1 Timoti 4:​8; Jems 4:​8.

I kin mek yu layf bɛtɛ naw. Di Baybul kin ɛp wi wit tin dɛn we de apin to wi. I de gi wi fayn advays bɔt dɛn tin ya.

• Wi padi biznɛs wit wi famili ɛn ɔda pipul dɛn.​—Ɛfishians 4:​31, 32; 5:​22, 25, 28, 33.

• Wɛlbɔdi biznɛs ɛn aw wi de fil.​—Sam 37:​8; Prɔvabs 17:​22.

• Aw wi nɔ fɔ biev.​—1 Kɔrintians 6:​9, 10.

• Mɔni biznɛs.​—Prɔvabs 10:​4; 28:​19; Ɛfishians 4:​28.a

Wan yɔŋ maredman ɛn in wɛf na Eshia bin rili gladi fɔ di advays dɛn we di Baybul de gi. Jɔs lɛk bɔku pipul dɛn we kin jɔs mared, i nɔ kin izi fɔ dɛn fɔ yus to di we aw dɛn de biev ɛn fɔ tɔk bɔt aw dɛn de fil. Bɔt dɛn bigin fɔ fala wetin dɛn de rid na di Baybul. Wetin bin apin we dɛn du dis? Di man we nem Visɛnt se: “Di tin dɛn we a rid na di Baybul ɛp mi fɔ sho lɔv we a de dil wit di prɔblɛm dɛn we wi gɛt na wi mared. We wi de fala di tin dɛn we de na di Baybul, dat dɔn mek wi gɛt gladi-at.” In wɛf we nem Analu, gri wit am ɛn se: “Di ɛgzampul dɛn we wi bin de rid na di Baybul ɛp wi. Naw a gladi ɛn a satisfay wit wi mared ɛn wit di gol dɛn we wi gɛt na layf.”

I de ɛp wi fɔ no Gɔd. Apat frɔm wetin Visɛnt bin tɔk bɔt mared, i bin tɔk bak se: “We a de rid di Baybul, a dɔn kam nia Jiova mɔ ɛn mɔ pas trade.” Visɛnt bin bring wan impɔtant pɔynt fɔ se di Baybul kin ɛp yu fɔ no bɔt Gɔd. We yu du dat, yu nɔ go jɔs bɛnifit frɔm di advays we i de gi, bɔt yu go kam fɔ no am as yu padi. Ɛn yu go si se i go mek yu no bɔku tin bɔt aw tumara bambay go fayn, dat na di tɛm we yu go ɛnjɔy di “rial layf” we go de sote go. (1 Timoti 6:​19) Dis na sɔntin we nɔ de na ɛni ɔda buk.

If yu bigin fɔ rid di Baybul ɛn kɔntinyu fɔ du am, yusɛf go gɛt dɛn bɛnifit dɛn de we min se yu layf go bɛtɛ naw ɛn yu go no Gɔd. Bɔt as yu de rid di Baybul, sɔntɛm yu go tink bɔt bɔku bɔku kwɛstyɔn dɛn. If na so i bi, mɛmba di fayn ɛgzampul ɔf wan Itiopian bigman we bin de trade trade lɛk 2,000 ia so. I bin gɛt bɔku kwɛstyɔn dɛn bɔt di Baybul. We dɛn aks am if i ɔndastand wetin i de rid, i bin se: “Aw a go no if pɔsin nɔ tich mi?”b I bin gri wantɛm wantɛm fɔ mek Filip ɛp am. Filip na bin wan pan Jizɔs in fɔs fɔs disaypul dɛn, ɛn i bin sabi tich di Baybul. (Akt 8:​30, 31, 34) Semweso, if yu go want fɔ no mɔ bɔt di Baybul, wi de ɛnkɔrej yu fɔ fil wan fɔm ɔnlayn na www.pr2711.com ɔ rayt to wan pan di adrɛs dɛn we de nia yu, we de na dis magazin. Dɔn yu kin tɔk to Jiova Witnɛs dɛn bak we de nia yu ɔ go na di Kiŋdɔm Ɔl we de na yu eria. Wetin mek yu nɔ go stat fɔ rid di Baybul tide ɛn alaw am lɛ i ɛp yu fɔ mek yu layf bɛtɛ?