KWƐSTYƆN DƐN WE YƆŊ PIPUL DƐN KIN AKS
Aw di Baybul Kin Ɛp Mi?—Pat 2: Ɛnjɔy fɔ Rid di Baybul
Wan yɔŋbɔy we nem Wil se: “I kin luk lɛk wi nɔ de ɛnjɔy di Baybul if wi nɔ no di rayt we fɔ rid am.”
Yu go lɛk fɔ no di sikrit bɔt aw fɔ ɛnjɔy fɔ rid di Baybul? Dis atikul go ɛp yu.
Mek di Skripchɔ dɛn gɛt layf
Yu go ɛnjɔy fɔ du yu Baybul ridin. Yuz wetin de na dɛn atikul dɛn ya fɔ tek pat pan wetin yu de rid
Pik wan Baybul akawnt we yu go lɛk fɔ stɔdi. Yu kin pik wan stori frɔm di Baybul ɔ wan skripchɔ frɔm di Gɔspɛl dɛn, ɔ yu kin pik wan akawnt frɔm di difrɛn Odio Baybul ridin drama dɛn we de na jw.org.
Rid di akawnt. Yu wan kin rid am, ɔ yu kin rid am lawd wan wit yu padi dɛn ɔ fambul dɛn. Wan pɔsin kin rid di stori, dɔn di ɔda wan dɛn kin akt as di pipul dɛn na di stori.
Tray wan ɔ sɔm pan dɛn pɔynt dɛn ya:
Drɔ pikchɔ dɛn fɔ sho wetin apin na di akawnt. Ɔ drɔ difrɛn difrɛn simpul pikchɔ dɛn we de sho aw tin dɛn bin apin na di stori. Rayt smɔl tin fɔ sho wetin de apin pan ɔl di pikchɔ dɛn.
Mek drɔin dɛn. Fɔ ɛgzampul, as yu de rid bɔt sɔmbɔdi we bin fetful, tray fɔ si aw di pɔsin in kwaliti dɛn ɛn di tin dɛn we i bin du bin mek i gɛt blɛsin dɛn.
Mek di akawnt tan lɛk nyuz. Yuz difrɛn we dɛn fɔ tɔk bɔt wetin bin apin, ɛn “intayvu” di men pipul dɛn na di stori ɛn di wan dɛn we si wetin bin apin.
If wan pan di pipul dɛn we de pan di stori bin disayd fɔ du tin we nɔ fayn, imajin se di stori bin ɛnd difrɛn we. Fɔ ɛgzampul, tink bɔt di tɛm we Pita bin dinay Jizɔs. (Mak 14:66-72) Aw Pita bin fɔ dɔn ansa fayn wan we dɛn bin de mɔna am?
If yu de fil fɔ rili rayt yu yon stori, yu kin disayd fɔ mek am frɔm wan Baybul akawnt. Rayt lɛsin dɛn we yu kin lan frɔm di akawnt.—Romans 15:4.
Yu kin mek di Baybul rial to yu
Tek tɛm faynd awt!
If yu tek tɛm tink bɔt di tin dɛn we bin apin, yu go fɛn valyu tin dɛn insay di alawnt. Infakt, sɔntɛnde na jɔs wan ɔ tu wɔd kin impɔtant insay di Baybul akawnt.
Fɔ ɛgzampul kɔmpia Matyu 28:7 wit Mak 16:7.
Wetin mek Mak bin rayt se i nɔ go te, Jizɔs go apia to in disaypul dɛn “ɛn Pita”?
Tin we de ɛp: Mak nɔ bin de de we dɛn tin dɛn ya bin apin; i go mɔs bi se na Pita bin tɛl am.
Di valyu tin: Wetin mek Pita bin fil fayn we i yɛri se Jizɔs bin want fɔ si am bak? (Mak 14:66-72) Aw Jizɔs bin sho se in na tru tru padi to Pita? Aw yu go falamakata Jizɔs ɛn bi tru tru padi to ɔda pipul dɛn?
We yu mek di Skripchɔ dɛn gɛt layf ɛn tek tɛm faynd awt bɔt wetin apin, yu go kam fɔ rili ɛnjɔy yu Baybul ridin!