Wetin Mek Wi Fɔ Fred Jiova?

1-2. Akɔdin to Sam 25:​14 (NWT), wetin wi fɔ du if wi want fɔ gɛt tayt padi biznɛs wit Jiova?

US KWALITI dɛn yu tink se rili impɔtant if yu want fɔ kɔntinyu fɔ gɛt tayt padi biznɛs wit pɔsin? Yu go mɔs ansa se gud padi dɛn fɔ lɛk ɛn sɔpɔt dɛnsɛf. Sɔntɛm yu nɔ tink se fred na wan impɔtant kwaliti fɔ gud padi biznɛs. Bɔt as di tim skripchɔ fɔ dis atikul put am, di wan dɛn we want fɔ gɛt tayt padi biznɛs wit Jiova fɔ ‘fred am.’—Rid Sam 25:​14, NWT.

² Ilɛksɛf i dɔn te we wi de sav Jiova, wi ɔl nid fɔ kɔntinyu fɔ fred am di rayt we. Bɔt wetin i min fɔ fred Gɔd? Aw wi go lan fɔ fred Jiova? Ɛn wetin wi go lan frɔm Obadaya we na bin Eab in savant, Ay Prist Jɛoayda, ɛn Kiŋ Jɛoash bɔt aw fɔ fred Gɔd?

WETIN I MIN FƆ FRED GƆD?

3. Ɛksplen aw fred go protɛkt wi.

³ Sɔntɛm wi go fred if wi biliv se bad tin go apin to wi. I fayn fɔ fred dis kayn we bikɔs i go ɛp wi fɔ disayd fɔ du gud tin dɛn. We wi fred se wi go fɔdɔm, wi go avɔyd fɔ waka nia mawntin in ɛj. We wi fred se wi go wund, dat go mek wi avɔyd usay denja de. We wi fred se wi go ambɔg wi padi biznɛs wit pɔsin we wi lɛk, dat go mek wi nɔ se ɔ du sɔntin we nɔ fayn.

4. Uskayn fred Setan want mek wi gɛt fɔ Jiova?

⁴ Setan want pipul dɛn fɔ fred Jiova di rɔng we. Setan want wi fɔ biliv se Jiova de vɛks ɔltɛm, i want fɔ pɔnish wi, ɛn wi nɔ go ɛva ebul mek i gladi. (Job 4:​18, 19) Setan want wi fɔ fred Jiova te wi stɔp fɔ sav Am. Fɔ avɔyd da trap de, wi nid fɔ fred Gɔd di rayt we.

5. Wetin i min fɔ fred Gɔd?

⁵ Pɔsin we de fred Gɔd di rayt we go lɛk Am, ɛn i nɔ go want fɔ du ɛnitin we go ambɔg in padi biznɛs wit Am. Na da kayn we de Jizɔs bin de “fred Gɔd.” (Ibru. 5:​7) I nɔ bin de fred se Jiova go pɔnish am. (Ayz. 11:​2, 3) Bifo dat, i bin lɛk Jiova wit ɔl in at ɛn want fɔ obe am. (Jɔn 14:​21, 31) Jɔs lɛk Jizɔs, wi gɛt dip rɛspɛkt fɔ Jiova bikɔs I gɛt lɔv, sɛns, I de du tin tret, ɛn I pawaful. Wi no bak se Jiova rili lɛk wi ɛn di we aw wi de biev we i de tich wi de afɛkt am. If wi nɔ obe Jiova, wi go mek in at pwɛl, bɔt if wi obe am, wi go mek i gladi.—Sam 78:​41; Prɔv. 27:​11.

LAN FƆ FRED GƆD

6. Wetin na wan we we wi go ebul lan fɔ fred Gɔd? (Sam 34:​11)

⁶ Wi nɔ bɔn as pipul dɛn we de fred Jiova; wi fɔ tray fɔ gɛt da kwaliti de. (Rid Sam 34:​11.) Wan we aw wi go ebul fɔ du dat na we wi stɔdi di tin dɛn we i mek. We wi ɔndastand aw ‘di tin dɛn we Gɔd mek’ de sho se i gɛt sɛns, pawa, ɛn i rili lɛk wi, dat de mek wi gɛt dip rɛspɛkt ɛn lɔv fɔ am. (Rom. 1:​20) Wan sista we nem Edrian tɔk se, “We a luk ɔl di tin dɛn we Jiova mek ɛn si aw Jiova gɛt sɛns, i kin mek a kɔle ɛn no se i no wetin na di bɛst tin fɔ mi.” Bikɔs i bin de tink gud wan bɔt dis ɔltɛm, i tɔk se: “A nɔ want fɔ du ɛnitin we go pwɛl mi padi biznɛs wit Jiova we gi mi layf.” Yu go ebul spɛn sɔm tɛm dis wik fɔ tink bɔt sɔntin we Jiova mek? We yu du dat, i go mek yu gɛt rɛspɛkt ɛn lɔv fɔ Jiova mɔ ɛn mɔ.—Sam 111:​2, 3.

7. Aw prea go ɛp wi fɔ fred Jiova di rayt we?

⁷ Wan ɔda we aw wi go ebul lan fɔ fred Gɔd na we wi de pre ɔltɛm. Wi de no Jiova mɔ ɛn mɔ ɛnitɛm we wi pre to am. Ɛnitɛm we wi pre to Jiova fɔ mek i gi wi trɛnk fɔ ebul bia wi prɔblɛm, wi de mɛmba aw i pawaful. We wi de tɛl am tɛnki fɔ we i mek in Pikin kam day fɔ wi, wi de mɛmba aw Jiova rili lɛk wi. Ɛn we wi de beg Jiova fɔ ɛp wi wit wi prɔblɛm, wi de mɛmba aw i rili gɛt sɛns. Dɛn kayn prea dɛn ya de mek wi gɛt rɛspɛkt fɔ Jiova mɔ ɛn mɔ. Ɛn dɛn de ɛp wi fɔ mekɔp wi maynd mɔ ɛn mɔ fɔ avɔyd fɔ du ɛnitin we go pwɛl wi padi biznɛs wit am.

8. Wetin wi go du fɔ mek wi kɔntinyu fɔ fred Gɔd?

⁸ Wi go ebul fɔ kɔntinyu fɔ fred Gɔd bay we wi de stɔdi di Baybul ɛn lan frɔm di gud ɛn bad ɛgzampul dɛn we de de. Lɛ wi tɔk bɔt tu pan Jiova in fetful savant dɛn: Obadaya, we bin de in chaj ɔf Kiŋ Eab in pales ɛn Ay Prist Jɛoayda. Dɔn wi go si wetin wi go ebul fɔ lan frɔm Kiŋ Jɛoash na Juda, we bin stat fayn bɔt leta i stɔp fɔ sav Jiova.

SHO SE YU GƐT MAYND LƐK OBADAYA

9. Aw di fred we Obadaya bin de fred Jiova bin ɛp am? (1 Kiŋ 18:​3, 12)

⁹ Di fɔstɛm we di Baybul tɔk bɔt Obadaya,b i se: ‘Obadaya na man we bin de rili fred Jiova.’ (Rid 1 Kiŋ 18:​3, 12.) Aw dis kayn fred bin ɛp Obadaya? Wan we aw i bin ɛp am, na we i bin mek Obadaya bi pɔsin we ɔnɛs ɛn we ɔda pipul dɛn kin abop pan; so di kiŋ bin put am in chaj ɔf in os. (Luk bak Nɛimaya 7:​2.) Bikɔs Obadaya bin de fred Gɔd, dat bin ɛp am bak fɔ rili gɛt maynd, ɛn dat na kwaliti we i bin nid. I bin de di tɛm we wikɛd Kiŋ Eab bin de rul, ɛn Kiŋ Eab bin “wɔs pas di [kiŋ] dɛn we bin de bifo am pan . . . bad.” (1 Kiŋ 16:​30) Dɔn bak, Eab in wɛf, Jezibɛl, we bin de wɔship Beal bin rili et Jiova, ɛn i bin tray fɔ pul tru wɔship na di nɔt pat na di kiŋdɔm. I bin ivin kil bɔku pan Gɔd in prɔfɛt dɛn. (1 Kiŋ 18:​4) Wan dawt nɔ de se Obadaya bin de wɔship Jiova insay tɛm we tin nɔ bin rili izi.

10. Aw Obadaya bin sho se i rili gɛt maynd?

¹⁰ Aw Obadaya bin sho se i rili gɛt maynd? We Jezibɛl bin de luk fɔ Gɔd in prɔfɛt dɛn fɔ kil dɛn, Obadaya bin “ayd wan ɔndrɛd na tu kev; fifti, fifti, ɛn in bin de sɔplay dɛn it ɛn wata.” (1 Kiŋ 18:​13, 14) If Jezibɛl bin no wetin Obadaya du, i bin fɔ dɔn kil am. Fɔ tru, i go mɔs bi se Obadaya bin de fred, ɛn i nɔ bin want fɔ day. Bɔt Obadaya bin lɛk Jiova ɛn di wan dɛn we bin de sav Am pas aw i bin lɛk in yon layf.

11. Aw Jiova in savant dɛn insay wi tɛm tan lɛk Obadaya? (Luk bak di pikchɔ.)

¹¹ Tide, bɔku pan Jiova in savant dɛn de na kɔntri dɛn usay dɛn dɔn ban wi wok. Pan ɔl we dɛn brɔda ɛn sista dɛn ya de kɔntinyu fɔ sho rɛspɛkt fɔ di gɔvmɛnt, dɛn stil nɔ gri fɔ stɔp fɔ wɔship Jiova, jɔs lɛk Obadaya. (Mat. 22:​21) Dɛn de sho se dɛn de fred Gɔd bay we dɛn de obe am pas mɔtalman. (Akt 5:​29) Dɛn de du dis bay we dɛn de kɔntinyu fɔ prich di gud nyuz ɛn mit togɛda sikrit wan. (Mat. 10:​16, 28) Dɛn de tray fɔ mek shɔ se dɛn brɔda ɛn sista dɛn gɛt di tin dɛn we dɛn nid fɔ kɔntinyu fɔ de nia Jiova. Tink bɔt Ɛnri in ɛgzampul, we de na wan Afrika kɔntri usay dɛn bin ban wi wok. Insay di tɛm we dɛn bin ban wi wok, Ɛnri bin vɔlɔntia fɔ kɛr go spirichwal it fɔ in kɔmpin Witnɛs dɛn. I rayt se: “Mi na pɔsin we de shem. So a bin biliv tranga wan se na bikɔs ɔf di dip rɛspɛkt we a gɛt fɔ Jiova na dat gi mi di maynd we a bin nid.” Yu ebul si yusɛf as pɔsin we gɛt maynd lɛk Ɛnri? Yu go ebul if yu lan fɔ fred Gɔd di rayt we.

SHO SE YU DE BIƐN JIOVA LƐK AY PRIST JƐOAYDA

12. Aw Ay Prist Jɛoayda ɛn in wɛf bin sho se dɛn rili de biɛn Jiova?

¹² Ay Prist Jɛoayda bin de fred Jiova, ɛn dat bin muv am fɔ de biɛn Jiova ɛn ɛnkɔrej ɔda pipul dɛn fɔ wɔship Am. Wi si dis klia wan di tɛm we Jezibɛl in galpikin, we na Atalaya, bin siz di tron na Juda. Di pipul dɛn bin gɛt gud rizin fɔ fred Atalaya. I bin rili wikɛd ɛn i bin want fɔ bi kwin, dat bin mek i tray fɔ kil ɔl in granpikin dɛn so dat i go rul. (2 Kro. 22:​10, 11) Bɔt i nɔ bin ebul kil wan pan in granpikin dɛn we na Jɛoash bikɔs Jɛoayda in wɛf, we na Jɛoshabiat bin sev am. In ɛn in man bin ayd di pikin ɛn kia fɔ am. Dis tin we Jɛoayda ɛn Jɛoshabiat bin du bin ɛp fɔ mek pɔsin frɔm Devid in famili layn kɔntinyu fɔ bi kiŋ. Jɛoayda bin de biɛn Jiova ɛn i nɔ bin fred Atalaya.—Prɔv. 29:​25.

13. We Jɛoash bin ol sɛvin ia, aw Jɛoayda bin sho bak se i de biɛn Jiova?

¹³ We Jɛoash bin ol sɛvin ia, Jɛoayda sho bak se i de biɛn Jiova. I bin mek plan. If ɔltin kɔmɔt fayn, Jɛoash go bi kiŋ, bikɔs in na pikin na Devid in famili layn we gɛt rayt fɔ rul. Bɔt if di plan fel, sɔntɛm Jɛoayda go lɔs in layf. Jiova bin mek di plan wok. Jɛoayda bin gɛt sɔpɔt frɔm di chif ɛn Livayt dɛn, so dɛn bin mek Jɛoash kiŋ ɛn dɛn kil Atalaya. (2 Kro. 23:​1-5, 11, 12, 15; 24:​1) Jɛoayda “mek Kɔvinant bitwin di kiŋ ɛn PAPA GƆD [“Jiova,” NWT], ɛn di pipul dɛn; dɛn se dɛn go bi PAPA GƆD [“Jiova,” NWT] in pipul dɛn.” (2 Kiŋ 11:​17) Dɔn bak, Jɛoayda “put di getman dɛm na di get dɛm na PAPA GƆD [“Jiova,” NWT] in os so dat ɛnibɔdi we nɔ klin na PAPA GƆD in yay nɔ go kam insay.”—2 Kro. 23:​19.

14. Bikɔs Jɛoayda bin ɔnɔ Jiova, aw dɛn bin ɔnɔ am?

¹⁴ Jiova bin dɔn tɔk se: “Di wan dɛn we de ɔnɔ mi, a go ɔnɔ dɛn.” Fɔ tru, i bin blɛs Jɛoayda. (1 Sam. 2:​30, NWT) Fɔ ɛgzampul, i mek dɛn rayt bɔt Jɛoayda in stori na di Baybul so dat wi go lan frɔm am. (Rom. 15:​4) Dɔn we Jɛoayda day, dɛn bin gi am spɛshal ɔnɔ bay we dɛn bɛr am “na Devid in siti wit di kiŋ dɛm, bikɔs i bin du gud na Izrɛl, ɛn to PAPA GƆD ɛn in os.”—2 Kro. 24:​15, 16.

15. Wetin wi kin lan frɔm Jɛoayda in stori? (Luk bak di pikchɔ.)

¹⁵ Jɛoayda in stori go ɛp wi ɔl fɔ fred Gɔd. Ɛlda dɛn go ebul falamakata Jɛoayda bay we dɛn de luk fɔ we dɛn ɔltɛm fɔ protɛkt Gɔd in ship dɛn. (Akt 20:​28) Ol wan dɛn go ebul lan frɔm Jɛoayda se we dɛn fred Jiova ɛn kɔntinyu fɔ de biɛn Am, I go ebul yuz dɛn fɔ du wetin I want. I nɔ de tɔn in bak pan dɛn. Yɔŋ wan dɛn go ebul lan frɔm aw Jiova bin trit Jɛoayda ɛn falamakata Am bay we dɛn de sho ɔnɔ to brɔda ɛn sista dɛn we dɔn ol, mɔ di wan dɛn we dɔn sav Jiova fetful wan fɔ lɔng tɛm. (Prɔv. 16:​31) Faynali, wi ɔl go ebul lan frɔm di chif ɛn Livayt dɛn we bin sɔpɔt Jɛoayda. Lɛ wi sɔpɔt “di wan dɛn we de bifo” bay we wi de obe dɛn.—Ibru. 13:​17.

NƆ TAN LƐK KIŊ JƐOASH

16. Wetin sho se Kiŋ Jɛoash bin wik?

¹⁶ Jɛoayda bin ɛp Kiŋ Jɛoash fɔ bi gud pɔsin. (2 Kiŋ 12:​2) Dat bin mek we di kiŋ bin yɔŋ, i bin want fɔ mek Jiova gladi. Bɔt afta Jɛoayda day, Jɛoash bin de lisin to prins dɛn we bin de tɔk lay lay tin dɛn bɔt Jiova. Wetin bin apin bikɔs ɔf dat? In ɛn in pipul dɛn bigin fɔ sav “lay lay gɔd dɛm.” (2 Kro. 24:​4, 17, 18) Pan ɔl we Jiova in at bin rili pwɛl bikɔs ɔf dat, i kɔntinyu fɔ “sɛn prɔfɛt dɛm to dɛm fɔ briŋ dɛn kam bak . . . , bɔt dɛn nɔ bin stil [lisin].” Dɛn nɔ bin ivin lisin to Jɛoayda in bɔypikin Zɛkaraya, we nɔto bin jɔs Jiova in prɔfɛt ɛn prist bɔt na bin Jɛoash in kɔzin bak. Infakt, Kiŋ Jɛoash bin ivin mek dɛn kil Zɛkaraya pan ɔl we Zɛkaraya in famili bin dɔn sev Jɛoash in layf.—2 Kro. 22:​11; 24:​19-22.

17. Wetin bin apin to Jɛoash?

¹⁷ Jɛoash nɔ bin kɔntinyu fɔ fred Jiova di rayt we, ɛn tin nɔ bin kɔmɔt fayn fɔ am. Jiova bin dɔn tɔk se: “Di wan dɛn we de fityay mi, dɛn go fityay dɛn.” (1 Sam. 2:​30, NWT) Leta, Sirian sojaman dɛn we nɔ bin bɔku bin win Jɛoash in “big big ami” pan fɛt ɛn “wund [Jɛoash] bad bad wan.” Afta di Sirian dɛn go, Jɛoash in yon savant dɛn bin kil am fɔ we i kil Zɛkaraya. Pipul dɛn bin tink se bikɔs dis kiŋ bin rili wikɛd, i nɔ bin ivin fit fɔ mek dɛn bɛr am na “di kiŋ dɛn grev yad.”—2 Kro. 24:​23-25; rid “son of Barachiah” stɔdi not fɔ Matyu 23:​35.

18. Akɔdin to Jɛrimaya 17:​7, 8, aw wi go avɔyd fɔ bi lɛk Jɛoash?

¹⁸ Wetin wi kin lan frɔm Jɛoash in ɛgzampul? I bin tan lɛk tik we nɔ gɛt strɔng rut dɛn, ɛn we abop pan pol fɔ sɔpɔt am. Afta Jɛoayda we bin de sɔpɔt am day ɛn Jɛoash bigin lisin to pipul dɛn we bin de tɔk lay lay tin dɛn bɔt Jiova, i nɔ bin kɔntinyu fɔ fetful to Jiova. Dis ɛgzampul de sho se wi nɔ fɔ obe Gɔd jɔs bikɔs wi famili ɛn ɔda pipul dɛn na di kɔngrigeshɔn de sɛt fayn ɛgzampul fɔ wi. Fɔ mek wi kɔntinyu fɔ de nia Jiova, wi fɔ lɛk ɛn rɛspɛkt am mɔ ɛn mɔ bay we wi de stɔdi ɔltɛm, tink gud wan bɔt wetin wi de lan, ɛn pre.—Rid Jɛrimaya 17:​7, 8; Kol. 2:​6, 7.

19. Wetin Jiova want wi fɔ du?

¹⁹ Jiova nɔ de tɛl wi fɔ du bɔku bɔku tin dɛn. Wetin i want wi fɔ du de na Ɛkliziastis 12:​13, we se: “Fred PAPA GƆD ɛn du wetin i se fɔ du; bikɔs na dat nɔmɔ mɔtalman gɛt fɔ de du.” We wi de fred Gɔd, wi go ebul fɔ kɔntinyu fɔ de biɛn Jiova jɔs lɛk Obadaya ɛn Jɛoayda ilɛk wetin go apin tumara bambay. Natin nɔ go ebul pwɛl wi padi biznɛs wit Jiova.