Jiova Dɔn Gi Wi Garanti fɔ Mek Wi Biliv se I Go Mek Di Wɔl Bi Paradays

1. Us mɛsej prɔfɛt Ayzaya bin tɛl in kɔmpin Izrɛlayt dɛn?

WE PRƆFƐT Ayzaya bin de tɔk bɔt Jiova, i tɔk se in na “di Gɔd we de tɔk tru.” Di wɔd we dɛn translet “tru” min “emɛn.” (Ayz. 65:​16, ftn. NWT.) “Emɛn” min “lɛ i bi so,” ɔ “fɔ tru.” We dɛn yuz di wɔd “emɛn” na di Baybul fɔ tɔk bɔt Jiova ɔ Jizɔs, na garanti fɔ se sɔntin na tru. So Ayzaya in mɛsej to in kɔmpin Izrɛlayt dɛn bin klia: Ɛnitɛm Jiova tɔk se sɔntin go apin, i kin apin ɔltɛm. Infakt, Jiova dɔn de du wetin in prɔmis ɔltɛm.

2. Wetin mek wi biliv Jiova in prɔmis dɛn bɔt tumara bambay? Us kwɛstyɔn dɛn wi go tɔk bɔt?

² Fɔ se wi fɔ biliv bak se di tin dɛn we Jiova dɔn prɔmis fɔ du fɔ wi tumara bambay go kam tru? Lɛk 800 ia afta Ayzaya in tɛm, apɔsul Pɔl bin ɛksplen wetin mek wi fɔ biliv se Jiova in prɔmis dɛn go kam tru ɔltɛm. Pɔl bin se: “I nɔ pɔsibul fɔ mek Gɔd lay.” (Ibru. 6:18) Jɔs lɛk aw i nɔ pɔsibul fɔ lɛ mango tik bia ɔrinch, na so i nɔ pɔsibul fɔ mek Jiova we na di Wan we de tɔk tru lay. So wi kin biliv tranga wan se ɔltin we Jiova tɔk ɛn ivin in prɔmis dɛn fɔ tumara bambay go mɔs kam tru. Insay dis atikul, wi go tɔk bɔt dɛn kwɛstyɔn dɛn ya: Wetin Jiova dɔn prɔmis fɔ gi wi tumara bambay? Ɛn wetin Jiova dɔn du fɔ mek wi biliv se in prɔmis go kam tru?

WETIN JIOVA DƆN PRƆMIS?

3. (a) Us prɔmis ɔl Gɔd in savant dɛn rili valyu? (Rɛvɛleshɔn 21:​3, 4) (b) Wetin sɔm pipul dɛn kin se we wi tɛl dɛn bɔt dis prɔmis?

³ Di prɔmis we wi de kam tɔk bɔt na prɔmis we Gɔd in savant dɛn ɔlsay na di wɔl rili valyu. (Rid Rɛvɛleshɔn 21:​3, 4.) Jiova dɔn prɔmis se tɛm go kam we “day nɔ go de igen, pwɛlat ɛn pen nɔ go de igen.” Bɔku pan wi kin yuz dɛn vas dɛn ya na di Baybul fɔ kɔrej pipul dɛn we wi kin prich to ɛn fɔ sho dɛn aw layf go tan lɛk na Paradays. Wetin sɔm pipul dɛn kin se we wi sho dɛn dis prɔmis? Dɛn kin se, “I rili wɔndaful, bɔt a nɔ tink se i go kam tru.”

4. (a) We Jiova bin mek dis prɔmis, wetin i bin no se go apin insay wi yon tɛm? (b) Apat frɔm di prɔmis we Jiova bin mek, wetin bak i bin du?

⁴ We Jiova bin mek Jɔn rayt dis prɔmis bɔt Paradays, i bin no se wi go tɛl pipul dɛn bɔt dis prɔmis we wi de prich di Kiŋdɔm mɛsej. Jiova bin no bak se i nɔ go izi fɔ bɔku pipul dɛn fɔ biliv se dɛn tin dɛn ya go apin tumara bambay. (Ayz. 42:9; 60:2; 2 Kɔr. 4:​3, 4) So aw wi go ɛp ɔda pipul dɛn fɔ biliv se di blɛsin dɛn we Rɛvɛleshɔn 21:​3, 4 tɔk bɔt go kam tru? Ɛn wetin wi go du fɔ mek wi biliv Jiova ɛn di tin dɛn we i dɔn prɔmis mɔ ɛn mɔ? Jiova dɔn gi wi pawaful rizin dɛn fɔ mek wi biliv se i go du wetin i dɔn prɔmis. Us rizin dɛn i dɔn gi wi?

JIOVA DƆN GI WI GARANTI SE IN PRƆMIS GO KAM TRU

5. Us vas dɛn mek wi biliv Gɔd in prɔmis bɔt Paradays? Wetin dɛn vas dɛn de se?

⁵ Wi gɛt rizin dɛn fɔ biliv Jiova in prɔmis bɔt Paraday insay vas 5 ɛn 6. Dɛn vas dɛn de se: “Di Wan we sidɔm na di tron se: “Luk! A de mek ɔltin nyu.” Ɛn i tɔk bak se: “Rayt, bikɔs dɛn wɔd ya na tru ɛn pɔsin kin abop pan dɛn.’ Ɛn i tɛl mi se: “Dɛn dɔn apin! Na mi na di Alfa ɛn di Omɛga, di biginin ɛn di ɛnd.’”​—Rɛv. 21:​5, 6a.

6. Wetin mek di wɔd dɛn na Rɛvɛleshɔn 21:​5, 6 mek wi rili biliv Gɔd in prɔmis?

⁶ Wetin mek dɛn wɔd dɛn ya mek wi biliv Gɔd in prɔmis dɛn mɔ ɛn mɔ? Di Revelation Climax buk tɔk bɔt dɛn vas dɛn de se: “I tan lɛk Jiova insɛf sɛf de sayn dɔkyumɛnt fɔ mɔtalman dɛn we fetful fɔ se tumara bambay dɛn go gɛt blɛsin dɛn.”b So, na Rɛvɛleshɔn 21:​3, 4 wi bin rid bɔt di tin dɛn we Gɔd fɔ du. Ɛn na vas 5 ɛn 6, i gi wi garanti fɔ mek wi biliv se wetin i dɔn prɔmis go mɔs kam tru. Lɛ wi tek tɛm wach di wɔd dɛn we Jiova yuz as garanti.

7. Udat bigin tɔk na vas 5? Wetin mek dis rili spɛshal?

⁷ Vas 5 bigin wit dɛn wɔd dɛn ya: “Di Wan we sidɔm na di tron se.” (Rɛv. 21:5a) Dɛn wɔd dɛn ya rili spɛshal bikɔs dis na wan pan di 3 tɛm dɛn insay di Baybul buk we nem Rɛvɛleshɔn we Jiova insɛf sɛf tɔk. So nɔto enjɛl, ɔ ivin Jizɔs bin gi wi dis garanti, bɔt na Jiova insɛf sɛf! Dɛn wɔd dɛn ya sho se wi kin biliv wit ɔl wi at di tin dɛn we i tɔk afta dat. Wetin mek? Na bikɔs Jiova “nɔ de lay.” (Tay. 1:2) Wan dawt nɔ de se di wɔd dɛn we wi rid na Rɛvɛleshɔn 21:​5, 6 go mɔs kam tru.

“LUK! A DE MEK ƆLTIN NYU”

8. Wetin Jiova tɔk fɔ mek wi biliv se in prɔmis go mɔs kam tru? (Ayzaya 46:10)

⁸ Afta dat, Jiova tɔk se “Luk!” (Rɛv. 21:5) Dɛn yuz di Grik wɔd we dɛn translet “luk” bɔku tɛm insay di Baybul buk we nem Rɛvɛleshɔn. Wan buk bin tɔk se dɛn bin yuz dis wɔd fɔ “tɛl di pɔsin we de rid fɔ rili pe atɛnshɔn to di nɛks tin we dɛn tɔk.” Wetin na di nɛks tin we Gɔd tɔk? Gɔd tɔk se: “A de mek ɔltin nyu.” Jiova go mek dɛn chenj dɛn ya tumara bambay. Bɔt bikɔs i rili biliv se i go mek in prɔmis kam tru, i tɔk lɛk se i dɔn ɔlrɛdi du dɛn tin dɛn de.—Rid Ayzaya 46:10.

9. (a) Wetin di wɔd dɛn “a de mek ɔltin nyu” de tɔk bɔt? (b) Wetin go apin to di “ɛvin” ɛn “wɔl” we de naw?

⁹ Lɛ wi tɔk bɔt di nɛks wɔd dɛn we de na Rɛvɛleshɔn 21:5. Jiova bin tɔk se: “A de mek ɔltin nyu.” Insay dis chapta na di Baybul, dɛn wɔd dɛn de tɔk bɔt tu tin dɛn we Jiova gɛt fɔ du, dat na, fɔ pul sɔntin ɛn put ɔda tin, ɛn fɔ mek sɔntin lɛk aw i bin de. Fɔs, wetin Jiova go pul fɔ put ɔda tin? Insay Rɛvɛleshɔn 21:​1, wi bin rid se: “Di fɔs ɛvin ɛn di fɔs wɔl dɔn lɔs.” “Di fɔs ɛvin” de tɔk bɔt gɔvmɛnt dɛn tide we Setan ɛn in dimɔn dɛn de kɔntrol. (Mat. 4:​8, 9; 1 Jɔn 5:19) Insay di Baybul, “wɔl” gɛt fɔ du wit di mɔtalman dɛn we de na dis wɔl. (Jɛn. 11:1; Sam. 96:1) So, “di fɔs wɔl” na di wikɛd pipul dɛn we de tide. Jiova nɔ go jɔs mek di “ɛvin” ɛn di “wɔl” we de naw fayn; bɔt i go dɔnawe wit dɛn kpatakpata. I go pul di ɛvin ɛn di wɔl we de naw ɛn mek “nyu ɛvin ɛn nyu wɔl,” we min se na nyu gɔvmɛnt go rul oba pipul dɛn we de du wetin rayt.

10. Wetin Jiova go mek nyu?

¹⁰ Na Rɛvɛleshɔn 21:​5, wi bin rid bɔt di nɛks tin dɛn we Jiova tɔk se i go mek nyu. Notis se Jiova nɔ bin tɔk se, “A de mek nyu tin dɛn.” Bifo dat, i tɔk se: “A de mek ɔltin nyu.” So, Jiova go mek di wɔl ɛn mɔtalman nyu bay we i go mek dɛn pafɛkt. Ayzaya bin tɔk se Jiova go mek di wan ol wɔl bi fayn ples jɔs lɛk di gadin we bin de na Idɛn. Ɛn i go mek wi nyu bay we i go pul ɔl siknɛs. Di wan dɛn we nɔ de waka, di wan dɛn we blayn, ɛn di wan dɛn we dɛf go wɛl ɛn ivin di wan dɛn we dɔn day go gɛt layf bak.—Ayz. 25:8; 35:​1-7.

“DƐN WƆD YA NA TRU ƐN PƆSIN KIN ABOP PAN DƐN. . . . DƐN DƆN APIN!”

11. Wetin Jiova bin kɔmand Jɔn fɔ du? Wetin mek?

¹¹ Us ɔda garanti Gɔd gi wi? Jiova bin tɛl Jɔn se: “Rayt, bikɔs dɛn wɔd ya na tru ɛn pɔsin kin abop pan dɛn.” (Rɛv. 21:5) Jiova nɔ bin jɔs kɔmand Jɔn fɔ “rayt.” I bin gi am rizin bak. I bin se: “Bikɔs dɛn wɔd ya na tru ɛn pɔsin kin abop pan dɛn,” dat min se wi kin biliv di wɔd dɛn we Gɔd tɔk. Wi gladi fɔ no se Jɔn bin obe di kɔmand fɔ “rayt.” Dis dɔn mek wi ebul rid bɔt Gɔd in prɔmis bɔt Paradays ɛn tink gud gud wan bɔt di wɔndaful blɛsin dɛn we wi go gɛt.

12. Wetin mek Jiova gɛt di rayt fɔ tɔk se: “Dɛn dɔn apin!”

¹² Wetin na di nɛks tin we Gɔd tɔk? I se “Dɛn dɔn apin!” (Rɛv. 21:6) Jiova tɔk lɛk se di tin dɛn we i dɔn prɔmis bɔt Paradays dɔn ɔlrɛdi apin. Dis na bikɔs natin nɔ go stɔp am fɔ du wetin i want. Jiova tɔk sɔntin bak we mek wi biliv se in prɔmis go mɔs kam tru. Wetin i tɔk?

“MI NA DI ALFA ƐN DI OMƐGA”

13. Wetin mek Jiova tɔk se: “Mi na di Alfa ɛn di Omɛga”?

¹³ As wi bin dɔn tɔk, na tri tɛm Jiova insɛf sɛf tɔk na di vishɔn we Jɔn bin si. (Rɛv. 1:8; 21:​5, 6; 22:13) Ɔl tri dɛn tɛm dɛn de, Jiova bin tɔk se: “Mi na di Alfa ɛn di Omɛga.” Alfa na di fɔs lɛta na di Grik alfabɛt ɛn omɛga na di las wan. We Jiova yuz di wɔd dɛn “di Alfa ɛn di Omɛga,” i ɛp wi fɔ ɔndastand se we i bigin sɔntin, i go mɔs dɔn am.

14. (a) Gi wan ɛgzampul bɔt ustɛm i tan lɛk Jiova bin se “Alfa” ɛn di tɛm we i tan lɛk i go se “Omɛga.” (b) Wetin di wɔd dɛn na Jɛnɛsis 2:​1-3 mek wi biliv?

¹⁴ Afta we Jiova mek Adam ɛn Iv, I tɛl dɛn wetin i want fɔ mɔtalman ɛn di wɔl. Di Baybul tɔk se: “Gɔd blɛs dɛn, ɛn Gɔd tɛl dɛn se: “Una bɔn pikin dɛn te una bɔku ɛn ful-ɔp di wɔl ɛn mek am fayn.’” (Jɛn. 1:28) Da tɛm de, Jiova bin tɔk wetin i want fɔ di wɔl ɛn mɔtalman. Dat na bin di bigin, ɔ “Alfa.” We ɔltin we i want go dɔn bi ɛn Adam ɛn Iv dɛn pikin we de obe am go dɔn ful-ɔp di wɔl ɛn mek am Paradays, dat go bi di “Omɛga.” Afta Jiova dɔn fɔ mek di ‘ɛvin ɛn di wɔl ɛn ɔl wetin de insay de,’ i tɔk sɔntin we sho se wetin i want go mɔs apin ɛn natin nɔ go pwɛl am. Di tin we i tɔk de na Jɛnɛsis 2:​1-3. (Rid.) Jiova bin se di de we mek sɛvin na de we oli. Dis sho se Jiova go du ɔl wetin i want fɔ mɔtalman ɛn di wɔl we di de we mek sɛvin go dɔn.

15. Wetin bin apin we mek i luk lɛk se Setan dɔn mek Jiova nɔ go ebul du wetin i want fɔ mɔtalman?

¹⁵ Afta we Adam ɛn Iv tɔn dɛn bak pan Gɔd, dɛn bi sina dɛn ɛn mek dɛn pikin dɛnsɛf de sin ɛn day. (Rom. 5:12) Dis tin we dɛn bin du bin mek i luk lɛk se i nɔ pɔsibul fɔ mek pafɛkt pipul dɛn we de obe Jiova ful-ɔp di wɔl. I tan lɛk Setan dɔn mek i nɔ go ɛva pɔsibul fɔ mek Jiova se “Omɛga.” Setan go dɔn tink se Jiova nɔ go ebul du wetin i dɔn prɔmis. Sɔntɛm i bin tink se Jiova go kil Adam ɛn Iv ɛn mek ɔda pafɛkt mɔtalman dɛn we go mek wetin I want fɔ mɔtalman bi. Bɔt if Gɔd bin fɔ dɔn du dat, Setan fɔ dɔn tɔk se In na layman. Wetin mek? Bikɔs lɛk aw wi si na Jɛnɛsis 1:​28, Jiova bin tɛl Adam ɛn Iv se dɛn pikin dɛn go ful-ɔp di wɔl.

16. Wetin mek Setan go dɔn tink se Jiova nɔ go ebul du wetin i want?

¹⁶ Us ɔda tin Setan bin tink se Gɔd go disayd fɔ du? Sɔntɛm, i bin de tink bak se Jiova go alaw Adam ɛn Iv fɔ bɔn pikin dɛn we nɔ go ɛva ebul fɔ bi pafɛkt pipul dɛn. (Ɛkli. 7:20; Rom. 3:23) If dat bin fɔ dɔn apin, wan dawt nɔ de se Setan fɔ dɔn se Jiova nɔ ebul du wetin i want. Wetin mek? If Gɔd fɔ dɔn disayd fɔ du dat, i nɔ go ebul fɔ du wetin i want we na fɔ mek dis wɔl Paradays ɛn fu-lɔp am wit Adam ɛn Iv dɛn pikin dɛn we pafɛkt ɛn we de obe.

17. Wetin Jiova bin du we Setan ɛn Adam ɛn Iv tɔn dɛn bak pan am? Wetin bin apin bikɔs ɔf dat?

¹⁷ Di tin we Jiova bin disayd fɔ du na sɔntin we bin mek Setan rili sɔprayz. Jiova bin sɔlv dis prɔblɛm di bɛst we fɔ mek wetin i want bi pan ɔl we Setan ɛn Adam ɛn Iv tɔn dɛn bak pan am. (Sam. 92:5) Jiova bin alaw Adam ɛn Iv fɔ bɔn pikin dɛn ɛn dis bin mek Jiova in wɔd dɛn kam tru. In nɔto layman. Ɛn Jiova bin sho se if i tɔk sɔntin, natin nɔ go mek i nɔ du am. I bin mek shɔ se wetin i want kam tru. (Jɛn. 3:15; 22:18) Setan go mɔs dɔn sɔprayz we Jiova mek Jizɔs kam day fɔ wi sin dɛn. Wetin mek? Na bikɔs dis tin we Jiova bin du sho se i rili gɛt lɔv (Mat. 20:28; Jɔn 3:16) Setan nɔ gɛt dis kwaliti. So wetin go apin bikɔs ɔf Jizɔs in sakrifays? Bay di tɛm di Wan Tawzin Ai go dɔn, Adam ɛn Iv dɛn pikin dɛn we go dɔn pafɛkt ɛn we de obe go de na paradays na dis wɔl jɔs lɛk aw Jiova bin want am fɔ de. Da tɛm de, i tan lɛk Jiova go se, “Omɛga.”

WETIN GO ƐP WI FƆ BILIV JIOVA IN PRƆMIS DƐN MƆ ƐN MƆ?

18. Us tri tin dɛn Gɔd tɔk fɔ mek wi biliv am? (Luk di bɔks we gɛt di taytul “Tri Rizin dɛn We fɔ Mek Wi Biliv Jiova in Prɔmis.”)

¹⁸ Insay dis atikul, wi dɔn tɔk bɔt rizin dɛn we mek wi fɔ biliv se di wɔl go bi Paradays. Bɔt wetin wi fɔ tɛl ɔda pipul dɛn fɔ mek dɛn biliv se dis prɔmis ya go kam tru? Fɔs, na Jiova insɛf sɛf mek di prɔmis. Di Baybul buk we nem Rɛvɛleshɔn tɔk se: “Di Wan we sidɔm na di tron se: “Luk! A de mek ɔltin nyu.’” In gɛt sɛns, pawa, ɛn i rili want fɔ mek in prɔmis kam tru. Sɛkɔn, Jiova no se wetin i tɔk go mɔs apin, na dat mek i tɔk se: “Dɛn wɔd ya na tru ɛn pɔsin kin abop pan dɛn. . . . Dɛn dɔn apin!” Tɔd, natin nɔ de we ebul mek Jiova nɔ dɔn wetin i bigin fɔ du, na dat mek i tɔk se: “Mi na di Alfa ɛn di Omɛga.” Jiova go pruv se Setan na layman we nɔ ebul stɔp am fɔ du wetin i want.

19. Wetin yu kin du if i nɔ izi fɔ pipul dɛn fɔ biliv Gɔd in prɔmis bɔt Paradays?

¹⁹ Mɛmba se we yu tɛl pipul dɛn bɔt wetin Jiova dɔn tɔk fɔ mek wi biliv in prɔmis dɛn, yu de mek yu yon fet strɔng mɔ ɛn mɔ. So di nɛks tɛm we yu rid di fayn wɔd dɛn na Rɛvɛleshɔn 21:4 bɔt di Paradays we gɛt fɔ kam ɛn pɔsin tɔk se, “I rili wɔndaful bɔt a nɔ tink se i go kam tru,” wetin yu kin du? Yu nɔ tink se i go fayn fɔ mek yu rid ɛn ɛksplen vas 5 ɛn 6? Sho am di garanti we Jiova dɔn gi wi fɔ mek wi biliv se wetin i prɔmis go mɔs kam tru.​—Ayz. 65:16.