Aw Wi Go Kɔntinyu fɔ Rili Lɛk Wi Kɔmpin Dɛn?

1-2. (a) Wetin mek apɔsul Pɔl bin se lɔv na di kwaliti we “pas” ɔl di ɔda wan dɛn? (b) Us kwɛstyɔn dɛn wi go tɔk bɔt?

WE APƆSUL Pɔl bin de tɔk bɔt fet, op, ɛn lɔv, i bin se “di [kwaliti] we pas dɛn ɔl na lɔv.” (1 Kɔr. 13:13) Wetin mek Pɔl tɔk dat? Na bikɔs we wi go dɔn de na di nyu wɔl tumara bambay, wi nɔ go nid fɔ gɛt fet pan Gɔd in prɔmis dɛn igen, bikɔs dɛn ɔl go dɔn ɔlrɛdi apin. Bɔt wi go nid fɔ lɛk Jiova ɛn ɔda pipul dɛn ɔltɛm. Infakt, di lɔv we wi gɛt fɔ dɛn go kɔntinyu fɔ gro sote go.

² Bikɔs wi go nid fɔ sho lɔv ɔltɛm, wi go tɔk bɔt tri kwɛstyɔn dɛn. Fɔs, wetin mek wi nid fɔ lɛk wi kɔmpin dɛn? Sɛkɔn, aw wi go sho se wi lɛk wi kɔmpin dɛn? Tɔd, aw wi go kɔntinyu fɔ rili lɛk wi kɔmpin dɛn?

WETIN MEK WI NID FƆ LƐK WI KƆMPIN DƐN?

3. Wetin na di rizin dɛn we mek wi fɔ lɛk wi kɔmpin dɛn?

³ Wetin mek i impɔtant fɔ lɛ wi lɛk wi kɔmpin dɛn? Wan rizin na bikɔs lɔv de sho se wi na tru Kristian dɛn. Jizɔs bin tɛl in apɔsul dɛn se: “If una lɛk una kɔmpin dɛn, ɔlman go no se una na mi disaypul dɛn.” (Jɔn 13:35) Dɔn bak, we wi lɛk wi kɔmpin dɛn, dat de ɛp wi fɔ gɛt wanwɔd. Pɔl bin se lɔv “de mek pipul dɛn rili gɛt wanwɔd.” (Kol. 3:14) Bɔt ɔda impɔtant rizin de we mek wi fɔ lɛk wi kɔmpin dɛn. Apɔsul Jɔn bin rayt to in kɔmpin Kristian dɛn se: “Ɛnibɔdi we lɛk Gɔd fɔ lɛk in brɔda bak.” (1 Jɔn 4:21) We wi sho se wi lɛk wi kɔmpin dɛn, wi de sho se wi lɛk Gɔd.

4-5. Gi wan ɛgzampul bɔt aw di lɛk we wi lɛk Gɔd gɛt sɔntin fɔ du wit di lɛk we wi lɛk wi kɔmpin dɛn.

⁴ Aw di lɛk we wi lɛk Gɔd gɛt sɔntin fɔ du wit di lɛk we wi lɛk wi brɔda ɛn sista dɛn? Lɛ wi tɔk bɔt wan ɛgzampul. Tink bɔt aw wi at kɔnɛkt to ɔda pat dɛn na wi bɔdi. We dɔktɔ kin prɛs wi an, i kin ebul fɔ no if wi at de bit fayn. Us lɛsin wi kin lan frɔm dis prinsipul?

⁵ Jɔs lɛk aw dɔktɔ ebul fɔ no bɔt wi at we i prɛs wi an, na so wisɛf go ebul no if wi rili lɛk Gɔd we wi chɛk di lɔv we wi gɛt fɔ wi brɔda ɛn sista dɛn. If wi notis se wi lɔv fɔ wi brɔda ɛn sista dɛn dɔn de ridyus, dat de sho se wi nɔ lɛk Gɔd bɛtɛ igen. Bɔt we wi de sho se wi lɛk wi kɔmpin Kristian dɛn ɔltɛm, dat de sho se wi rili lɛk Gɔd.

6. If di lɛk we wi lɛk wi brɔda ɛn sista dɛn dɔn ridyus, wetin mek dat na siriɔs prɔblɛm? (1 Jɔn 4:​7-9, 11)

⁶ If wi notis se wi lɔv fɔ wi brɔda ɛn sista dɛn dɔn de ridyus, dat na siriɔs prɔblɛm. Wetin mek? Bikɔs i go min se wi padi biznɛs wit Jiova nɔ tayt igen. Apɔsul Jɔn bin tɔk dat klia wan we i mɛmba wi se: “Di wan we nɔ lɛk in brɔda, we i dɔn si, nɔ go ebul fɔ lɛk Gɔd, we i nɔ wande si.” (1 Jɔn 4:20) Wetin na di lɛsin fɔ wi? Di wangren tin we go mek Jiova gladi fɔ wi na we wi “lɛk wi kɔmpin dɛn.”​—Rid 1 Jɔn 4:​7-9, 11.

AW WI GO SHO SE WI LƐK WI KƆMPIN DƐN?

7-8. Wetin na sɔm we dɛn we wi go sho se wi lɛk wi kɔmpin dɛn?

⁷ Di lɔ we se wi fɔ “lɛk [wi] kɔmpin dɛn” de bɔku say na Gɔd in Wɔd. (Jɔn 15:​12, 17; Rom. 13:8; 1 Tɛs. 4:9; 1 Pit. 1:22; 1 Jɔn 4:11) Bɔt lɔv na kwaliti we de insay wi at, ɛn no mɔtalman nɔ ebul fɔ si wi at. So aw wi go ebul mek ɔda pipul dɛn no se wi lɛk dɛn? Na bay wetin wi de tɔk ɛn di tin dɛn we wi de du.

⁸ Bɔku we dɛn de we wi go sho wi brɔda ɛn sista dɛn se wi lɛk dɛn. Lɛ wi tɔk bɔt sɔm ɛgzampul dɛn: “Una fɔ tɔk tru to una kɔmpin dɛn.” (Zɛk. 8:16) “Una . . . [fɔ] gɛt wanwɔd.” (Mak 9:50) “Na una fɔs fɔ sho ɔnɔ to una kɔmpin dɛn.” (Rom. 12:10) “Una wɛlkɔm una kɔmpin dɛn.” (Rom. 15:7) “Una kɔntinyu fɔ . . . fɔgiv” una kɔmpin dɛn. (Kol. 3:13) “Una kɔntinyu fɔ ɛp una kɔmpin dɛn wit dɛn ɛvi lod dɛn.” (Gal. 6:2) “Una go de kɔrej una kɔmpin dɛn.” (1 Tɛs. 4:18) “Una kɔntinyu fɔ . . . ɛp una kɔmpin dɛn fɔ tinap tranga wan.” (1 Tɛs. 5:11) “Una pre fɔ una kɔmpin dɛn.”—Jems 5:16.

9. Wetin mek fɔ kɔrej ɔda pipul dɛn na impɔtant we fɔ sho se wi lɛk dɛn? (Luk bak di pikchɔ.)

⁹ Lɛ wi tɔk bɔt wan pan di we dɛn we wi go sho se wi lɛk ɔda pipul dɛn. Pɔl bin se: “Una go de kɔrej una kɔmpin dɛn.” Wetin mek fɔ kɔrej pɔsin na impɔtant we fɔ sho se wi lɛk am? Wan buk we de tɔk bɔt di Baybul bin se di wɔd we Pɔl yuz fɔ “kɔrej” min “fɔ tinap nia pɔsin fɔ ɛnkɔrej am we i gɛt siriɔs prɔblɛm.” So we wi de kɔrej wi kɔmpin Kristian we gɛt prɔblɛm, wi de ɛp am fɔ kɔntinyu fɔ sav Jiova fetful wan. Ɛnitɛm wi kɔrej wi brɔda ɔ sista, wi de sho am se wi lɛk am.—2 Kɔr. 7:​6, 7, 13.

10. Wetin sɔri-at gɛt fɔ du wit fɔ kɔrej pɔsin?

¹⁰ Fɔ gɛt sɔri-at gɛt sɔntin fɔ du wit fɔ kɔrej pipul dɛn. Aw? We pɔsin gɛt sɔri-at fɔ ɔda pipul dɛn, i de kɔrej dɛn ɛn tray fɔ ɛp dɛn wit dɛn prɔblɛm. So we wi de sɔri fɔ pipul dɛn, dat de ɛp wi fɔ kɔrej dɛn. Notis aw Pɔl ɛksplen se Jiova in sɔri-at de mek I kɔrej pipul dɛn. Pɔl kɔl Jiova “di Papa we rili gɛt sɔri-at ɛn di Gɔd we de kɔrej pɔsin pan ɔltin.” (2 Kɔr. 1:3) Wan stɔdi not fɔ dis vas tɔk se Pɔl bin yuz di wɔd “sɔri-at” fɔ tɔk bɔt di kayn we aw wi kin fil bɔt ɔda pipul dɛn. So we Pɔl se Gɔd na “di Papa we rili gɛt sɔri-at,” i min se na frɔm Gɔd sɔri-at kɔmɔt, ɛn da sɔri-at de de mek i kɔrej wi “ɔltɛm we wi gɛt prɔblɛm.” (2 Kɔr. 1:4) Jɔs lɛk aw klin wata we de kɔmɔt ɔnda grɔn de mek pɔsin we tɔsti fil fayn we i drink am, na so Jiova de kɔrej di wan dɛn we gɛt prɔblɛm ɛn ɛp dɛn fɔ fil fayn. Aw wi go falamakata Jiova fɔ sho sɔri-at to ɔda pipul dɛn ɛn kɔrej dɛn? Wan we aw wi go du dat na we wi tray fɔ gɛt kwaliti dɛn we go ɛp wi fɔ sɔri fɔ pipul dɛn ɛn kɔrej dɛn. Wetin na sɔm pan dɛn kwaliti dɛn ya?

11. Akɔdin to Koloshians 3:12 ɛn 1 Pita 3:​8, us ɔda kwaliti dɛn go ɛp wi fɔ lɛk ɔda pipul dɛn ɛn kɔrej dɛn?

¹¹ Wetin go ɛp wi fɔ gɛt di lɔv we wi nid fɔ kɔntinyu fɔ “kɔrej [wi] kɔmpin dɛn” ɛvride? Wi nid fɔ gɛt fayn kwaliti dɛn lɛk, fɔ fil fɔ wi kɔmpin dɛn, fɔ rili lɛk wisɛf lɛk aw brɔda dɛn kin lɛk dɛnsɛf, ɛn fɔ du gud. (Rid Koloshians 3:12; 1 Pita 3:8.) Aw dɛn kwaliti dɛn ya go ɛp wi? We wi de sɔri fɔ wi brɔda ɛn sista dɛn ɛn rili bisin bɔt dɛn, dat go mek wi rili want fɔ kɔrej dɛn we dɛn de sɔfa. Lɛk aw Jizɔs tɔk, “Na wetin ful-ɔp na pɔsin in at na in i de tɔk. Di gud man de tɔk gud tin dɛn, bikɔs i gɛt gud tin dɛn na in at.” (Mat. 12:​34, 35) We wi de kɔrej wi brɔda ɛn sista dɛn we nid kɔrej, dat rili impɔtant bikɔs i de sho se wi lɛk dɛn.

AW WI GO KƆNTINYU FƆ RILI LƐK WI KƆMPIN DƐN?

12. (a) Wetin mek wi nid fɔ kɔntinyu fɔ tek tɛm? (b) Us kwɛstyɔn dɛn wi de kam tɔk bɔt?

¹² Wi ɔl want fɔ “kɔntinyu fɔ lɛk wi kɔmpin dɛn.” (1 Jɔn 4:7) Bɔt i impɔtant fɔ mɛmba se Jizɔs bin wɔn wi se “plɛnti pipul dɛn lɔv go ridyus.” (Mat. 24:12) Jizɔs nɔ bin de se bɔku pan in disaypul dɛn go lɛf fɔ sho lɔv. Bɔt bɔku pipul dɛn na di wɔl nɔ de sho lɔv, so wi nid fɔ tray fɔ mek di we aw dɛn de biev nɔ afɛkt wi. As wi de tink bɔt dis, lɛ wi tɔk bɔt dis impɔtant kwɛstyɔn: Wetin go ɛp wi fɔ no if wi rili lɛk wi brɔda ɛn sista dɛn?

13. Wetin go ɛp wi fɔ no if wi rili lɛk wi brɔda ɛn sista dɛn?

¹³ Wan we fɔ no if wi rili lɛk wi brɔda ɛn sista dɛn na we wi tink bɔt wetin wi kin du we sɔm tin dɛn apin. (2 Kɔr. 8:8) Apɔsul Pita bin tɔk bɔt wan pan dɛn tin dɛn de. I se: “Di tin we pas ɔl na dat, una fɔ rili lɛk una kɔmpin dɛn, bikɔs lɔv de kɔba bɔku bɔku sin dɛn.” (1 Pit. 4:8) So di tin dɛn we wi kin du we wi brɔda ɛn sista dɛn mek mistek ɔ du sɔntin we mek wi fil bad go ɛp wi fɔ no if wi rili lɛk dɛn.

14. Akɔdin to 1 Pita 4:​8, aw wi lɔv fɔ wi brɔda ɛn sista dɛn fɔ tan lɛk? Gi wan ɛgzampul.

¹⁴ Lɛ wi tek tɛm tink bɔt di wɔd dɛn we Pita rayt. Di fɔs pat na vas 8 tɔk bɔt di kayn lɔv we wi nid fɔ gɛt. I se wi fɔ “rili lɛk” wi kɔmpin dɛn. Di wɔd we Pita yuz fɔ “rili” min “fɔ strɛch.” Di sɛkɔn pat na di vas tɔk bɔt wetin wi go du we wi rili lɛk ɔda pipul dɛn. Da lɔv de go mek wi kɔba wi brɔda ɛn sista dɛn sin. Lɛ wi tɔk bɔt dis ɛgzampul. Imajin se yu gɛt tebul we gɛt bɔku sten ɔ krach krach. I pɔsibul se yu go tek tebul klos ɛn prɛd am na di wan ol tebul, nɔto jɔs di say dɛn we gɛt di krach krach ɔ sten. Semweso, if wi rili lɛk wi brɔda ɛn sista dɛn, wi go kɔba ɔ fɔgiv di “bɔku bɔku sin dɛn” we dɛn de kɔmit, nɔto jɔs wan ɔ tu pan dɛn mistek dɛn.

15. If wi rili lɛk wi brɔda ɛn sista dɛn, wetin wi go ebul fɔ du? (Koloshians 3:13)

¹⁵ Di lɛk we wi lɛk wi brɔda ɛn sista dɛn fɔ so strɔng dat wi fɔ ebul fɔgiv dɛn fɔ di mistek dɛn we dɛn de mek, ilɛk dat nɔ go izi fɔ wi. (Rid Koloshians 3:13.) We wi fɔgiv ɔda pipul dɛn, wi de sho se wi rili lɛk dɛn, ɛn wi want fɔ mek Jiova gladi. Us ɔda tin go ɛp wi fɔ fɔgiv ɔda pipul dɛn mistek dɛn ɛn nɔ vɛks kwik we dɛn du wi sɔntin?

16-17. Us ɔda tin go ɛp wi fɔ fɔgiv wi brɔda ɛn sista dɛn fɔ dɛn smɔl smɔl mistek dɛn? Gi wan ɛgzampul. (Luk bak di pikchɔ.)

¹⁶ Pe atɛnshɔn pan di gud kwaliti dɛn we yu brɔda ɛn sista dɛn gɛt, nɔto di bad tin dɛn we dɛn de du. Tink bɔt dis ɛgzampul. Imajin se yu ɛn sɔm brɔda ɛn sista dɛn de na wan gɛt-to-gɛda, ɛn una de ɛnjɔy unasɛf. We di program dɔn, una ɔl tinap fɔ tek grup pikchɔ. Infakt, yu snap tu mɔ pikchɔ dɛn bikɔs i pɔsibul se di fɔs pikchɔ nɔ go kɔmɔt fayn. So dat mek yu gɛt tri pikchɔ dɛn. Bɔt we yu wach wan pan dɛn, yu notis se wan brɔda twis in fes. Wetin yu go du wit da pikchɔ de? Yu go dilit am bikɔs yu gɛt tu ɔda pikchɔ dɛn usay dis brɔda ɛn ɔl di ɔda pipul dɛn de smayl.

¹⁷ Lɛ wi kɔmpia di pikchɔ dɛn we wi kin sev to di tin dɛn we wi de kip na wi maynd. Bɔku tɛm, wi kin mɛmba di gud tɛm dɛn we wi kin spɛn wit wi brɔda ɛn sista dɛn. Bɔt sɔntɛm wan pan dɛn tɛm dɛn de, wan brɔda ɔ sista tɔk ɔ du sɔntin we nɔ fayn. Wetin wi go du we wi mɛmba da tɛm de? Yu nɔ tink se i go fayn fɔ fɔgɛt bɔt am ɔ fɔ pul am na wi maynd, jɔs lɛk aw wi go dilit wan pan dɛn pikchɔ dɛn de? (Prɔv. 19:11; Ɛfi. 4:32) Wi go ebul fɔ fɔgɛt bɔt di smɔl mistek dɛn we wi brɔda ɛn sista dɛn kin mek bikɔs wi kin mɛmba di fayn tɛm dɛn we wi dɔn spɛn togɛda wit dɛn. Na dɛn kayn tin dɛn de wi want fɔ kip na wi maynd ɛn gladi fɔ.

WETIN MEK WI RILI NID LƆV NAW?

18. Wetin na di men pɔynt dɛn bɔt lɔv we wi dɔn tɔk bɔt insay dis atikul?

¹⁸ Wetin mek wi want fɔ kɔntinyu fɔ rili lɛk wi kɔmpin dɛn? Lɛk aw wi dɔn lan, we wi sho se wi lɛk wi brɔda ɛn sista dɛn, wi de sho se wi lɛk Jiova. Aw wi go sho se wi lɛk wi kɔmpin Kristian dɛn? Wan we aw wi go du dat na we wi de kɔrej dɛn. Wi go ebul fɔ de “kɔrej [wi] kɔmpin dɛn” if wi gɛt sɔri-at fɔ dɛn. Aw wi go kɔntinyu fɔ rili lɛk wi kɔmpin dɛn? Na we wi du wi bɛst fɔ fɔgiv dɛn fɔ di mistek dɛn we dɛn de mek.

19. Wetin mek i rili impɔtant naw fɔ lɛ wi sho se wi lɛk wi kɔmpin dɛn?

¹⁹ Wetin mek i rili impɔtant naw fɔ lɛ wi sho se wi lɛk wi kɔmpin dɛn? Notis wetin Pita tɔk se na di rizin. I se: “Di tɛm we ɔltin fɔ dɔn, dɔn kam nia. . . . So una fɔ rili lɛk una kɔmpin dɛn.” (1 Pit. 4:​7, 8) Wetin wi de ɛkspɛkt se go apin as di tɛm fɔ lɛ di wɔl dɔn de kam nia? We Jizɔs bin de tɔk bɔt in disaypul dɛn, i bin se: “Dɛn go et una na ɔl di neshɔn dɛn bikɔs ɔf mi nem.” (Mat. 24:9) Fɔ mek wi go ebul bia we dɛn et wi dis kayn we, wi nid fɔ kɔntinyu fɔ gɛt wanwɔd. As wi de du dat, Setan nɔ go ebul fɔ pwɛl di wanwɔd we wi gɛt, bikɔs lɔv na di tin we de “mek pipul dɛn rili gɛt wanwɔd.”​—Kol. 3:14; Fil. 2:​1, 2.