• Prea Go Mek Yu Gɛt Tayt Padi Biznɛs wit Gɔd
    Ɛnjɔy Layf Sote Go!—Yu Go Bɛnifit we Yu Stɔdi di Baybul

    • Prea Go Mek Yu Gɛt Tayt Padi Biznɛs wit Gɔd

      Yu dɔn ɛva tink se yu nid pɔsin fɔ gayd yu na layf? Yu want ansa to sɔm impɔtant kwɛstyɔn dɛn we yu gɛt? Yu nid ɛnkɔrejmɛnt? Yu go lɛk fɔ kam nia Jiova mɔ? Prea go ɛp yu wit ɔl dɛn tin dɛn de. Bɔt wetin na di rayt we fɔ pre? Na ɔlman in prea Gɔd de lisin? Wetin yu go du fɔ mek Gɔd ansa yu prea? Lɛ wi si.

      1. Na to udat wi fɔ pre ɛn wetin wi fɔ pre bɔt?

      Jizɔs bin tich se na to wi Papa we de na ɛvin nɔmɔ wi fɔ pre to. Jizɔs insɛf bin pre to Jiova. I bin se: “Na so una fɔ pre: ‘Wi Papa we de na ɛvin . . . ’” (Matyu 6:​9) We wi de pre to Jiova, wi padi biznɛs wit am de tayt mɔ ɛn mɔ.

      Wi kin pre bɔt ɛnitin. So fɔ mek Gɔd ansa wi prea wi fɔ aks am fɔ sɔntin we gri wit wetin i want. Di Baybul se, “ilɛk wetin wi aks [Gɔd] fɔ, wans na dat i want, i de yɛri wi.” (1 Jɔn 5:​14) Jizɔs bin gi bɔku ɛgzampul dɛn bɔt tin dɛn we rili fayn fɔ pre fɔ. (Rid Matyu 6:​9-​13.) Na tru se wi kin pre to Gɔd bɔt tin dɛn we de mɔna wi, bɔt wi nɔ fɔ fɔgɛt fɔ tɛl am tɛnki fɔ di tin dɛn we i dɔn du fɔ wi ɛn aks am fɔ ɛp ɔda pipul dɛn.

      2. Aw wi fɔ pre?

      Di Baybul se wi fɔ “tɛl Gɔd ɔl wetin de na wi at.” (Sam 62:​8, NWT) So wi prea fɔ kɔmɔt na wi at. Wi kin tinap, sidɔm, nil dɔŋ ɔ mek ɛni we aw wi want wans wi sho rɛspɛkt fɔ Jiova. Wi kin pre ɛnitɛm ɛn ɛnisay we wi de.

      3. Aw Gɔd kin ansa wi prea dɛn?

      I kin du so difrɛn we dɛn. Jiova dɔn gi wi in Wɔd, di Baybul, usay wi kin fɛn ansa to wi kwɛstyɔn dɛn. Fɔ rid Gɔd in Wɔd “de mek pɔsin we nɔ gɛt bɛtɛ sɛns gɛt sɛns.” (Sam 19:​7, NWT; rid Jems 1:​5.) I go mek wi gɛt kolat we wi gɛt prɔblɛm dɛn. Ɛn i go mek di wan dɛn we de wɔship am ɛp wi ɛnitɛm we wi nid ɛp.

      LAN MƆ

      Lan mɔ bɔt aw yu go pre frɔm yu at fɔ mek Gɔd yɛri yu, ɛn aw prea go bɛnifit yu.

      4. Gɔd gɛt tin dɛn we i de luk fɔ insay wi prea

      Wetin ɛn wetin go mek Gɔd yɛri wi prea? Ple di VIDIO.

      VIDIO: Na Ɔlman in Prea Gɔd De Lisin?​—Shɔt Pat (2:​42)

      Jiova want wi fɔ pre to am. Rid Sam 65:​2, NWT, dɔn una tɔk bɔt dɛn kwɛsytɔn dɛn ya:

      • Yu tink se di “Wan we de yɛri prea” want yu fɔ pre to am? Wetin mek yu tink so, ɔ wetin mek yu nɔ tink so?

      Wi fɔ tray fɔ liv wi layf di we aw Gɔd want if wi want mek i yɛri wi prea. Rid Mayka 3:​4 ɛn 1 Pita 3:​12, dɔn una tɔk bɔt dis kwɛstyɔn:

      • Wetin wi fɔ du fɔ mek Jiova yɛri wi prea?

      Di tɛm we wɔ de, ɔl tu di ɛnimi dɛn kin pre fɔ win. Yu tink se Gɔd go ansa dɛn kayn prea dɛn de?

      5. Wi prea dɛn fɔ kɔmɔt frɔm wi at

      Sɔm pipul dɛn dɔn lan se dɛn fɔ de ripit sɔm patikyula prea dɛn wɔd fɔ wɔd. Bɔt yu tink se na so Gɔd want wi fɔ pre to am? Rid Matyu 6:​7, dɔn una tɔk bɔt dis kwɛstyɔn:

      • Wetin yu go du fɔ mek yu “nɔ se di sem tin igen ɛn igen” we yu de pre?

      Ɛvride, yu fɔ tink bɔt wan patikyula tin we Jiova dɔn du na yu layf ɛn tɛl am tɛnki fɔ dat. Du dis ɛvride fɔ wan wik, ɛn bay di tɛm di wik de dɔn yu go dɔn pre fɔ lɛk sɛvin difrɛn tin dɛn, ɛn yu nɔ ripit yusɛf.

      Wan bɔbɔ de tɔk to in mama ɛn papa.

      Ɛni gud papa go want mek in pikin tɛl am wetin de na in at. Semweso, Jiova want wi fɔ tɛl am wetin de na wi at

      6. Prea na gift frɔm Gɔd

      Aw prea go ɛp wi di tɛm we tin fayn fɔ wi ɛn di tɛm we wi gɛt prɔblɛm? Ple di VIDIO.

      VIDIO: Prea De Ɛp Wi fɔ Bia (1:​32)

      Di Baybul prɔmis wi se prea go ɛp wi fɔ gɛt tru tru kolat. Rid Filipians 4:​6, 7, dɔn una tɔk bɔt dɛn kwɛstyɔn dɛn ya:

      • Aw prea de ɛp wi pan ɔl we di prɔblɛm dɛn kin stil de?

      • Wetin na sɔm tin dɛn we yu go lɛk fɔ pre bɔt?

      Yu bin no?

      Di wɔd “emɛn” min “lɛ i bi,” ɔ “fɔ tru.” Frɔm trade trade we dɛn bin de rayt di Baybul, dɛn bin de se “emɛn” we pɔsin dɔn fɔ pre.​—Fɔs Kronikul 16:​36.

      7. Mek tɛm fɔ pre

      Sɔntɛnde, wi kin fɔgɛt fɔ pre bikɔs wi kin bizi pasmak. Aw Jizɔs bin sho se prea impɔtant to am? Rid Matyu 14:​23 ɛn Mak 1:​35, dɔn una tɔk bɔt dɛn kwɛstyɔn dɛn ya:

      • Wetin Jizɔs bin du fɔ mek tɛm fɔ pre?

      • Ustɛm yu go mek tɛm fɔ pre?

      Pikchɔ Dɛn: Wan uman de pre difrɛn tɛm dɛn insay di de. 1. Na mɔnin. 2. Wit in pikin dɛn. 3. Na wokples. 4. Bifo i it.

      SƆM PIPUL DƐN KIN SE: “Na man ɔf Gɔd fɔ pre fɔ dɛn.”

      • Wetin yu go se?

      WETIN YU DƆN LAN?

      We wi pre frɔm wi at, dat de mek wi kam nia Gɔd mɔ, i de gi wi kolat, ɛn i de gi wi di trɛnk we wi nid fɔ du wetin i want.

      Rivyu

      • Na to udat wi fɔ pre?

      • Aw wi fɔ pre?

      • Us bɛnifit dɛn wi kin gɛt we wi pre?

      Gol

      DU MƆ RISACH

      Fɛn ansa dɛn to kwɛstyɔn dɛn we pipul dɛn kin aks bɔt prea.

      “Sɛvin Tin dɛn we Yu Nid fɔ No bɔt Prea” (Di Wachtawa, Ɔktoba 1, 2010)

      Lan mɔ bɔt wetin mek i impɔtant fɔ pre ɛn aw yu go pre fayn wan.

      “Wetin Mek A Fɔ Pre?” (Atikul na di wɛbsayt)

      Lan wetin di Baybul se bɔt udat wi fɔ pre to.

      “A Fɔ Pre to Sent Dɛn?” (Atikul na di wɛbsayt)

      Wach dis myuzik vidio fɔ si if usay ɛn ustɛm wi de pre impɔtant.

      Pre Ɛnitɛm (1:22)