“Mek Mi At Gri wit Wetin Yu Want so dat A Go Fred Yu Nem”

1. Wetin i min fɔ fred Gɔd? Wetin mek di wan dɛn we lɛk Jiova fɔ fred am?

KRISTIAN dɛn lɛk Gɔd ɛn dɛn de fred am. To sɔm pipul dɛn, i nɔ mek sɛns. Bɔt wi nɔ de tɔk bɔt di kayn fred we de mek pɔsin panik. Wi go tɔk bɔt wan patikyula kayn fred. Pipul dɛn we de fred Gɔd dis kayn we gɛt dip rɛspɛkt fɔ am. Dɛn nɔ want fɔ du ɛnitin we go mek dɛn Papa we de na ɛvin vɛks, bikɔs dɛn nɔ want fɔ pwɛl dɛn padi biznɛs wit am.—Sam 111:​10; Prɔv. 8:​13.

2. Akɔdin to wetin Kiŋ Devid tɔk na Sams 86:​11 (NWT), us tu tin dɛn wi go tɔk bɔt?

² Rid Sams 86:​11, (NWT). Dɛn wɔd dɛn de mek wi no klia wan se Kiŋ Devid we fetful no se i impɔtant fɔ gɛt dip rɛspɛkt fɔ Jiova. Lɛ wi kam tɔk bɔt aw wi go du wetin Devid bin tɔk na in prea. Fɔs, wi go tɔk bɔt sɔm rizin dɛn we mek wi fɔ gɛt dip rɛspɛkt fɔ Gɔd in nem. Sɛkɔn, wi go tɔk bɔt aw wi go sho ɛvride se wi gɛt dip rɛspɛkt fɔ Gɔd in nem.

WETIN MEK WI FƆ GƐT DIP RƐSPƐKT FƆ JIOVA IN NEM?

3. Wetin go dɔn apin to Mozis we bin ɛp am fɔ kɔntinyu fɔ gɛt dip rɛspɛkt fɔ Gɔd in nem?

³ Tink bɔt aw Mozis bin fil we i bin de insay wan ol na wan rɔk we i bin si vishɔn usay Jiova de pas. Dis go dɔn bi wan wɔndaful tin fɔ ɛni mɔtalman. Mozis bin yɛri dɛn wɔd dɛn ya we wan enjɛl bin tɔk fɔ se: “Mi, . . . PAPA GƆD [“Jiova,” NWT] we gud ɛn de sho masi, we nɔ gɛt shɔtat, we in lɔv nɔ de fel, ɛn . . . we pɔsin kin put in op ɛn trɔs pan. [I] de sho lɔv to tawzin pan tawzin pipul dɛn ɛn de fɔgiv udat du bad, udat brok lɔ, ɛn udat kɔmit sin.” (Ɛks. 33:​17-23; 34:​5-7) Mozis go mɔs dɔn de tink bɔt da tɛm de ɛnitɛm we i yuz di nem Jiova. Na dat mek leta Mozis bin wɔn pipul dɛn fɔ “rɛspɛkt ɛn tɔk gud tin bɔt PAPA GƆD in big big nem.”—Dit. 28:​58.

4. Wetin go ɛp wi fɔ rɛspɛkt Jiova mɔ ɛn mɔ?

⁴ We wi tink bɔt di nem Jiova, wi fɔ tink bak bɔt di wan we gɛt di nem. Wi fɔ tink bɔt in kwaliti dɛn lɛk in pawa, in sɛns, in lɔv, ɛn we i de du tin tret. We wi tink bɔt dɛn kwaliti dɛn de ɛn ɔda wan dɛn, dat go mek wi gɛt mɔ rɛspɛkt fɔ am.—Sam 77:​11-15.

5-6. (a) Wetin Gɔd in nem min? (b) Akɔdin to Ɛksodɔs 3:​13, 14 (NWT) ɛn Ayzaya 64:​8, us we dɛn Jiova de mek wetin i want apin?

⁵ Wetin wi no bɔt di minin fɔ Gɔd in nem? Bɔku masta sabi bukman dɛn gri se di nem Jiova min, “I De Mek Wetin I Want Bi.” Da minin de de mɛmba wi se natin nɔ ebul fɔ stɔp Jiova fɔ du wetin i want, ɛn i kin mek tin dɛn apin. Wetin mek wi se so?

⁶ Jiova de mek tin dɛn apin bay we i kin bi ɛnitin we i nid fɔ bi fɔ mek wetin i bin dɔn tɔk apin di we aw i want am. (Rid Ɛksodɔs 3:​13, 14, NWT.) Bɔku tɛm, wi buk ɛn magazin dɛn dɔn de ɛnkɔrej wi fɔ tink bɔt dis pat pan Gɔd in wɔndaful kwaliti dɛn. Jiova de mek in savant dɛn we nɔ pafɛkt bi ɛnitin we dɛn nid fɔ bi fɔ mek dɛn go sav am ɛn mek wetin i want bi. (Rid Ayzaya 64:​8.) Na dɛn we dɛn ya de mek Jiova du wetin i want fɔ du. Natin nɔ de we ebul fɔ stɔp am fɔ mek wetin i want nɔ bi.—Ayz. 46:​10, 11.

7. Aw wi go sho se wi rili gladi fɔ wi Papa we de na ɛvin?

⁷ Wi go gladi fɔ wi Papa we de na ɛvin bay we wi de tink gud wan bɔt wetin i dɔn du ɛn wetin i de ɛp wi fɔ du. Fɔ ɛgzampul, we wi tink gud wan bɔt di tin dɛn we Jiova mek, i de mek wi rili kɔle ɔl di tin dɛn we i dɔn du. (Sam 8:​3, 4) Ɛn we wi tink bɔt aw Jiova dɔn ɛp wi fɔ du wetin i want, dat de mek wi gɛt dip rɛspɛkt fɔ am. Di nem Jiova rili wɔndaful! Di nem gɛt fɔ du wit udat wi Papa bi, ɔl di tin dɛn we i dɔn du, ɛn ɔl di tin dɛn we i gɛt fɔ du.—Sam 89:​7, 8.

“A GO PREZ PAPA GƆD [“JIOVA,” NWT] IN NEM”

8. Wetin Ditarɔnɔmi 32:​2, 3 tɔk bɔt aw Jiova de si in nem?

⁸ Jɔs bifo di Izrɛlayt dɛn go na di Prɔmis Land, Jiova bin tich Mozis wan siŋ. (Dit. 31:​19) Mozis insɛf bin fɔ tich di pipul dɛn di siŋ. (Rid Ditarɔnɔmi 32:​2, 3.) As wi de tink gud wan bɔt vas 2 ɛn 3, wi kam fɔ no klia wan se Jiova nɔ want fɔ mek dɛn ayd in nem ɛn mek i tan lɛk se i tu oli fɔ kɔl. I want mek ɔlman sabi in nem! Na bin big big ɔnɔ fɔ mek di pipul dɛn yɛri we Mozis de tich dɛn bɔt Jiova ɛn In wɔndaful nem! Wetin Mozis bin tich dɛn bin ɛnkɔrej dɛn ɛn mek dɛn fil fayn lɛk we dyu de fɔdɔm pan plant. Aw wi kin mek shɔ se wi tich da we de?

9. Aw wi go ɛp fɔ mek Jiova in nem oli?

⁹ We wi de prich frɔm os-to-os ɔ we wi de du pɔblik prichin, wi kin yuz wi Baybul fɔ sho pipul dɛn Gɔd in nem, we na Jiova. Wi kin gi dɛn wi fayn trakt ɔ magazin, wi kin sho dɛn fayn fim, ɛn sɔntin we de na wi wɛbsayt we de ɔnɔ Jiova. We wi de na wokples, na skul, ɔ we wi de travul, wi kin luk fɔ we dɛn fɔ tɔk bɔt wi Gɔd we wi lɛk ɛn aw i tan lɛk. We wi tɔk to pipul dɛn we wi mit bɔt wetin Jiova want fɔ mɔtalman ɛn di wɔl, wi de ɛp dɛn fɔ di fɔstɛm fɔ no se Jiova rili lɛk dɛn. As wi de tɛl ɔda pipul dɛn di tru bɔt wi Papa we lɛk wi, wi de ɛp fɔ mek Gɔd in nem oli. Wi de ɛp pipul dɛn fɔ ɔndastand se dɛn dɔn tich dɛn bɔku lay lay tin dɛn bɔt Jiova. Wetin wi de tich frɔm di Baybul na sɔntin we fayn ɛn we dɛn kin lan.—Ayz. 65:​13, 14.

10. We wi de kɔndɔkt Baybul stɔdi dɛn, wetin mek wi nɔ fɔ jɔs tich ɔda pipul dɛn bɔt Gɔd in lɔ dɛn?

¹⁰ We wi de kɔndɔkt Baybul stɔdi dɛn, wi want fɔ ɛp wi studɛnt dɛn fɔ sabi Jiova in nem ɛn yuz am. Pantap dat, wi want fɔ ɛp dɛn fɔ no wetin Jiova in nem min. Yu tink se wi go ebul fɔ du dat if wi jɔs tich dɛn bɔt Gɔd in lɔ dɛn, tin dɛn we dɛn nid fɔ du, ɛn aw dɛn fɔ liv? Pɔsin we na gud studɛnt kin lan bɔt Gɔd in lɔ dɛn ɛn i kin ivin kɔle dɛn. Bɔt yu tink se di studɛnt go obe Jiova bikɔs i lɛk am? Mɛmba se Iv bin sabi Gɔd in lɔ, bɔt in ɛn Adam nɔ bin rili lɛk di Wan we bin gi dɛn di lɔ. (Jɛn. 3:​1-6) So wi nɔ fɔ jɔs tich ɔda pipul dɛn bɔt Gɔd in lɔ dɛn.

11. We wi de tich bɔt Gɔd in lɔ dɛn, aw wi go ɛp wi studɛnt dɛn fɔ kam fɔ lɛk di Wan we gi di lɔ?

¹¹ Jiova in lɔ dɛn gud fɔ wi ɔltɛm. (Sam 119:​97, 111, 112) Bɔt sɔntɛm wi studɛnt dɛn nɔ go si Jiova in lɔ dɛn da we de if dɛn nɔ ɔndastand se Jiova gi wi dɛn lɔ dɛn de bikɔs i lɛk wi. So i go fayn fɔ aks wi studɛnt dɛn, dɛn kwɛstyɔn dɛn ya: “Wetin mek yu tink se Gɔd tɛl in savant dɛn fɔ du dis ɔ nɔ fɔ du am? Wetin dat de tɛl wi bɔt udat I bi?” If wi ɛp wi studɛnt dɛn fɔ tink bɔt Jiova ɛn dɛn rili lɛk in oli nem, wi go ebul fɔ tɔch dɛn at. Wi studɛnt dɛn nɔ go jɔs kam fɔ lɛk Gɔd in lɔ dɛn, bɔt dɛn go lɛk bak di Wan we gi di lɔ. (Sam 119:​68) Dɛn go kam fɔ gɛt mɔ fet ɛn dat go ɛp dɛn fɔ bia prɔblɛm dɛn we go mit dɛn.—1 Kɔr. 3:​12-15.

“PAPA GƆD [“JIOVA,” NWT] IN YON PIPUL GO WƆSHIP ƐN OBE AM”

12. Wan tɛm, wetin Devid bin du we sho se in at nɔ gri wit wetin Gɔd want? Wetin bin apin?

¹² Kiŋ Devid bin rayt impɔtant wɔd dɛn na Sams 86:​11 (NWT) fɔ se, “mek mi at gri wit wetin yu want.” We Devid bin de alayf, i bin kam fɔ si se i kin izi fɔ mek pɔsin du wetin bad pan ɔl we i go want fɔ du wetin go mek Jiova gladi. Wan tɛm, i bin de ɔp na in os ɛn i bin si wan ɔda man in wɛf de was. Da tɛm de, wi go se Devid in at bin gri wit wetin Jiova want ɔ i nɔ bin gri? I bin no Jiova in lɔ fɔ se: “Una nɔ fɔ milɛ una kɔmpin in wɛf.” (Ɛks. 20:​17) Bɔt stil i kɔntinyu fɔ luk. In at bin de pan di uman we na Batshiba, ɛn i bin want fɔ du wetin Jiova want bak. Pan ɔl we fɔ lɔng tɛm Devid bin dɔn lɛk Jiova ɛn i bin de fred am, Devid bin du bad tin. I bring shem pan Jiova in nem. Devid bin mek bak bad bad tin dɛn apin to inosɛnt pipul dɛn, ivin in yon famili.—2 Sam. 11:​1-5, 14-17; 12:​7-12.

13. Aw wi no se Devid in at bin gri bak wit wetin Jiova want?

¹³ Jiova bin pɔnish Devid ɛn i bin gɛt tayt padi biznɛs wit Jiova bak. (2 Sam. 12:​13; Sam 51:​2-4, 17) Devid bin mɛmba di prɔblɛm dɛn we bin apin we i nɔ bin alaw in at fɔ gri wit wetin Jiova want. Fɔ se Jiova bin ɛp Devid fɔ mek i gɛt at we gri wit wetin i want? Yɛs. Leta, Jiova in Wɔd tɔk bɔt Devid as man we “in at . . . bin de to in Gɔd we na PAPA GƆD [“Jiova,” NWT].”—1 Kiŋ 11:​4; 15:​3.

14. Us kwɛstyɔn wi nid fɔ aks wisɛf? Wetin mek?

¹⁴ Devid in ɛgzampul de ɛnkɔrej wi, ɛn na wɔnin bak fɔ wi. Di siriɔs sin we i kɔmit na wɔnin fɔ Gɔd in savant dɛn tide. Ilɛksɛf i nɔ tu te yet we wi dɔn de sav Jiova ɔ i dɔn te we wi de sav am, wi nid fɔ aks wisɛf dis kwɛstyɔn, ‘A de fɛt agens Setan we i de tɛmt mi fɔ mek mi at nɔ gri wit wetin Jiova want?’

15. Aw di fred we wi de fred Gɔd go protɛkt wi if wi si pikchɔ dɛn we de mek wi tink bɔt mami ɛn dadi biznɛs di we aw Gɔd nɔ want?

¹⁵ Fɔ ɛgzampul, wetin yu go du if yu si wan pikchɔ na Tɛlivishɔn ɔ Intanɛt we go mek yu tink bɔt mami ɛn dadi biznɛs di we aw Gɔd nɔ want? Sɔntɛm, yu go bigin de tink to yusɛf se nɔto rud rud pikchɔ ɔ fim. Bɔt yu nɔ tink se i go bi sɔntin we Setan de yuz fɔ mek yu at nɔ gri wit wetin Jiova want? (2 Kɔr. 2:​11) Da pikchɔ de kin tan lɛk di shap pat pan aks we pɔsin kin yuz fɔ plit wud. Fɔs, di pɔsin de yuz di shap say pan di aks fɔ wap di wud. As i de kɔntinyu fɔ du dat, di wud kin plit. Yu nɔ tink se pikchɔ dɛn we de mek yu tink bɔt mami ɛn dadi biznɛs di we aw Gɔd nɔ want, kin tan lɛk di shap pat pan aks? Sɔntɛm sɔntin we pɔsin de tink se smɔl ɛn nɔ bad, go mek kwik kwik wan i kɔmit sin dɛn we go mek in at nɔ gri wit wetin Gɔd want ɛn pwɛl in padi biznɛs wit am. So nɔ alaw ɛnitin we nɔ fayn fɔ go insay yu at! Kɔntinyu fɔ mek yu at gri wit wetin Jiova want ɛn fred in nem!

16. We sɔntin tɛmt wi, us kwɛstyɔn dɛn wi fɔ aks wisɛf?

¹⁶ Apat frɔm pikchɔ dɛn we de mek pɔsin want fɔ du mami ɛn dadi biznɛs di we aw Gɔd nɔ want, Setan de yuz ɔda tin dɛn fɔ tɛmt wi. Wetin wi fɔ du? I izi fɔ tink se dɛn tin dɛn de nɔ tu bad. Fɔ ɛgzampul, wi kin tink se: ‘Wɛl, dɛn nɔ go disfɛloship mi if a du dis, so i nɔ dat siriɔs.’ Dis na rɔŋ we fɔ tink. I go fayn fɔ mek wi aks wisɛf dɛn kwɛstyɔn dɛn ya: ‘Fɔ se Setan de tray fɔ yuz dis tɛmteshɔn fɔ mek mi at nɔ gri wit wetin Jiova want? If a gri fɔ du sɔntin we bad, a go bring shem pan Jiova in nem? If a du dis, i go mek a go nia Gɔd ɔ go fa frɔm am?’ Tink gud wan bɔt dɛn kwɛstyɔn dɛn de. Pre fɔ sɛns fɔ mek yu ansa dɛn kwɛstyɔn dɛn de tru tru wan frɔm yu at. (Jems 1:​5) We yu du dat, i go protɛkt yu. I go ɛp yu fɔ tinap tranga wan we sɔntin tɛmt yu lɛk aw Jizɔs bin tɔk fɔ se: “Kɔmɔt biɛn mi, Setan!”—Mat. 4:​10.

17. Wetin mek i nɔ fayn fɔ mek wi at nɔ gri wit wetin Jiova want? Gi wan ɛgzampul.

¹⁷ I nɔ go fayn fɔ mek wi at nɔ gri wit wetin Jiova want. Imajin se wan spɔt tim gɛt mɛmba dɛn we nɔ gɛt wanwɔd. Sɔm dɛn want prez fɔ dɛnsɛf, ɔda wan dɛn nɔ want fɔ obe di lɔ dɛn, ɛn sɔm nɔ de rɛspɛkt di koch. I nɔ go izi fɔ mek da kayn tim de win gem. Bɔt if di tim gɛt wanwɔd, i go izi fɔ mek dɛn win. Yu at go tan lɛk di tim we de win, if di we aw yu de tink, wetin yu want, ɛn aw yu de fil, gri wit wetin Jiova want. Mɛmba se, Setan want fɔ mek yu at nɔ gri wit wetin Jiova want. I want fɔ mek di we aw yu de tink, wetin yu want, ɛn aw yu de fil, nɔ gri wit wetin Jiova want. Bɔt ɔl yu at nid fɔ de to Jiova fɔ mek yu go ebul fɔ sav am. (Mat. 22:​36-38) Nɔ ɛva alaw Setan fɔ mek yu at nɔ gri wit wetin Jiova want!

18. Akɔdin to Mayka 4:​5, wetin yu dɔn mekɔp yu maynd fɔ du?

¹⁸ Lɛk Devid, na fɔ pre to Jiova se: “Mek mi at gri wit wetin yu want so dat a go fred yu nem.” Du ɔl wetin yu ebul fɔ mek yu liv akɔdin to yu prea. Ɛnide, mekɔp yu maynd se di tin dɛn we yu de disayd fɔ du ilɛk na smɔl wan ɔ big wan, fɔ sho se yu gɛt dip rɛspɛkt fɔ Jiova in oli nem. As wan pan Jiova in Witnɛs dɛn, we yu du dat i de sho se yu de liv akɔdin to Jiova in nem. (Prɔv. 27:​11) Ɛn wi ɔl go ebul fɔ tɔk wetin di prɔfɛt Mayka bin tɔk fɔ se: “PAPA GƆD [“Jiova,” NWT] in yon pipul go wɔship ɛn obe am sote go.”—Mayk 4:​5.