LIV YU LAYF LƐK KRISTIAN

Wan Nyu Pat na Wi Mitin we Wi De Gɛt Insay di Wik

Frɔm Janwari 2018, di mitin we wi kin gɛt insay di wik go gɛt stɔdi not ɛn midia frɔm di New World Translation of the Holy Scriptures (nwtsty) stɔdi Baybul we de na di Intanɛt. Wi go gɛt dis stɔdi Baybul ilɛksɛf i nɔ de insay wi langwej. Bɔt di tin dɛn we wi go lan go ɛp wi fɔ pripia fayn fɔ mitin. Bɔt di tin we impɔtant mɔ na dat i go mek yu go nia Jiova we na wi Papa we lɛk wi!

STƆDI NOT DƐN

Di stɔdi not dɛn go ɛp wi fɔ no mɔ bɔt di kɔlchɔ, di langwej, ɛn di say dɛn we dɛn yuz pan bɔku Baybul vas dɛn.

Matyu 12:20, NW

Wik we dɔn lɛf smɔl fɔ ɔt: Trade, na smɔl kle pɔt we dɛn ful-ɔp wit ɔliv ɔyl na in bɔku pipul dɛn bin de yuz as lamp. Na di wik we de insay di lamp na in de drɔ di ɔyl fɔ mek di faya nɔ ɔt. Di we aw dɛn kɔl “wik we dɔn lɛf smɔl fɔ ɔt” insay Grik, kin min wik we de pul smok bikɔs i gɛt smɔl faya we want fɔ ɔt. Di tin we Ayzaya bin tɔk insay Ayzaya 42:3, bin sho aw Jizɔs go fil fɔ pipul dɛn; i nɔ go ɛva mek di wan dɛn we put dɛnsɛf dɔŋ ɛn di wan dɛn we dɛn at pwɛl, abop pan am fɔ natin.

Matyu 26:13

Fɔ tru: Insay Grik na a·menʹ, we dɛn transilitret am insay Ibru na ʼa·menʹ, we min, “mek i apin,” Jizɔs bin de yuz dɛn wɔd dɛn ya bɔku tɛm we i want fɔ tɔk sɔntin, we i want fɔ mek prɔmis, ɔ we i bin de tɔk bɔt sɔntin we gɛt fɔ apin. I bin de du dat fɔ mek pipul dɛn biliv se wetin i de tɔk na tru ɛn dɛn fɔ abop pan am. Di we aw Jizɔs bin de yuz di wɔd “fɔ tru,” ɔ amen, bin rili fayn insay di Baybul. We dɛn tɔk di wɔd tu tɛm, (a·menʹ a·menʹ), lɛk aw i de na di Baybul buk we nem Jɔn, dɛn translet di tin we Jizɔs tɔk as “fɔ tru.”—Jɔn 1:51.

MIDIA

Pichɔ dɛn, drɔin dɛn, fim dɛn we dɛn nɔ de tɔk natin, ɛn katun fim dɛn, de sho di tin dɛn we dɛn tɔk bɔt na di Baybul.

Bɛtfej, Mawnt Ɔliv, ɛn Jerusɛlɛm

Dis shɔt fim de sho di rod fɔ go na Jerusɛlɛm frɔm di ist. Dat na frɔm di vilej we dɛn kɔl et-Tur insay wi yon tɛm. Pipul dɛn tink se na dis sem say Bɛtfej bin de na wan pan di ay say dɛn na Mawnt Ɔliv. Bɛtani de na di ist pat na Bɛtfej bay di istɛn pat na Mawnt Ɔliv. We Jizɔs bin de na Jerusɛlɛm, bɔku tɛm in ɛn in disaypul dɛn bin de slip na Bɛtani. Insay wi yon tɛm, na di tɔŋ we nem el-ʽAzariyeh (El ʽEizariya). Dis na Arabik nem we min, “Lazarɔs in Os.” I go mɔs bi se Jizɔs bin de slip na Meri, Mata, ɛn Lazarɔs dɛn os. (Mat 21:17; Mak 11:11; Lyu 21:37; Jɔn 11:1) We Jizɔs bin de travul frɔm dɛn os fɔ go na Jerusɛlɛm, i go mɔs bi se na dis sem rod we dɛn sho na di fim, na in i bin yuz. Insay Naysan 9, di ia 33, we Jizɔs bin de rayd da smɔl pikin dɔnki frɔm Mawnt Ɔliv fɔ go na Jerusɛlɛm, i go mɔs bi se i kɔmɔt frɔm Bɛtfej ɛn yuz di rod fɔ go na Jerusɛlɛm.

Di rod frɔm Bɛtani fɔ go na Bɛtfej
Bɛtfej
Mawnt Ɔliv
Vali we de na Kidrɔn
Di Tɛmpul

Nel we de biɛn di fut

Dis bon na di pikchɔ fiba di rial bon we de biɛn mɔtalman in fut we dɛn chuk wit nel we bin lɔŋ lɛk 11.5cm (4.5 in.). Dɛn bin fɛn am insay di ia 1968, di tɛm we dɛn bin de dig dig na di nɔt pat na Jerusɛlɛm. Di bon bin dɔn de frɔm di Roman pipul dɛn tɛm. I de ɛp wi fɔ no se dɛn bin de yuz nel dɛn trade fɔ kil pipul dɛn ɛn fɔ nel dɛn na tik. Sɔntɛm dis nel fiba di nel we di Roman sojaman dɛn bin yuz fɔ nel Jizɔs na di tik. Dɛn bin fɛn dis bon na wan ston bɔks we dɛn bin de kɔl ossuary ɛn na de dɛn bin de put dɛn dayman dɛn bon we dɛn bɔdi dɔn rɔtin. Dis sho se dɛn bin de bɛr pipul dɛn we dɛn bin de kil na tik.—Mat 27:35.