LƐSIN 13
Lay Lay Rilijɔn dɛn De Mek Pipul dɛn Biliv Tin dɛn we Nɔto Tru bɔt Gɔd
If Gɔd na lɔv, wetin mek rilijɔn dɛn we se dɛn de tɔk ɛn du tin dɛn fɔ Gɔd, de du bɔku bad bad tin dɛn? Di simpul ansa na dat dɛn rilijɔn dɛn de na lay lay rilijɔn dɛn. Dɛn nɔ de tich di tru bɔt Gɔd. Us lay lay tin dɛn, dɛn dɔn tich bɔt Gɔd? Aw Gɔd de fil bɔt dat? Ɛn wetin i go du bɔt dat?
1. Aw lay lay rilijɔn dɛn dɔn mek pipul dɛn biliv tin dɛn we nɔto tru bɔt Gɔd bay wetin dɛn de tich?
Lay lay rilijɔn dɛn dɔn mek pipul dɛn dɔn “biliv lay ɛn nɔ biliv di tru bɔt Gɔd.” (Romans 1:25) Fɔ ɛgzampul, bɔku rilijɔn dɛn nɔ de tich dɛn mɛmba dɛn Gɔd in nem. Bɔt di Baybul se wi fɔ yuz Gɔd in nem. (Romans 10:13, 14) Sɔm bigman dɛn pan Gɔd biznɛs kin tɔk se bad tin dɛn de apin bikɔs na so Gɔd mak. Bɔt dat na lay. Nɔto Gɔd de mek bad tin dɛn de apin. (Rid Jems 1:13.) I sɔri fɔ no se di lay lay tin dɛn we rilijɔn dɛn de tich dɔn mek bɔku pipul dɛn nɔ ebul fɔ kam nia Gɔd.
2. Aw lay lay rilijɔn dɛn dɔn mek pipul dɛn biliv tin dɛn we nɔto tru bɔt Gɔd bay di tin dɛn we dɛn de du?
Lay lay rilijɔn nɔ de trit pipul dɛn di we aw Jiova de trit dɛn. Di Baybul se lay lay rilijɔn dɛn “sin dɛn dɔn bɔku te dɛn rich ɔp na ɛvin.” (Rɛvɛleshɔn 18:5) Fɔ lɔng tɛm naw, rilijɔn dɛn dɔn put an pan pɔlitiks, de sɔpɔt wɔ dɛn, ɛn mek dɛn kil bɔku bɔku pipul dɛn. Sɔm bigman dɛn pan Gɔd biznɛs want fɔ jɛntri, na dat mek dɛn de aks dɛn mɛmba dɛn fɔ mɔni. Dɛn tin dɛn de we dɛn de du de sho se dɛn nɔ ivin no Gɔd, so dɛn nɔ fit fɔ tɔk ɔ du tin fɔ Gɔd.—Rid 1 Jɔn 4:8.
3. Aw Gɔd de fil bɔt lay lay rilijɔn?
If di tin dɛn we lay lay rilijɔn de du de mek yu vɛks, aw yu tink se Jiova de fil? I lɛk pipul dɛn, bɔt i vɛks pan di bigman dɛn pan Gɔd biznɛs we de tich lay lay tin dɛn bɔt am ɛn we de trit dɛn mɛmba dɛn bad. I prɔmis se dɛn go dɔnawe wit lay lay rilijɔn ɛn “dɛn nɔ go ɛva si am igen.” (Rɛvɛleshɔn 18:21) I nɔ go te igen, Gɔd go dɔnawe wit ɔl lay lay rilijɔn dɛn.—Rɛvɛleshɔn 18:8.
LAN MƆ
Lan mɔ bɔt aw Gɔd de fil bɔt lay lay rilijɔn. Wetin rilijɔn dɔn du ɛn wetin mek yu nɔ fɔ stɔp fɔ lan bɔt Jiova.
4. Nɔto ɔl rilijɔn Gɔd gri wit
Bɔku pipul dɛn biliv se rilijɔn tan lɛk difrɛn rod dɛn we pipul dɛn de yuz fɔ go to Gɔd. Bɔt yu tink se dat na tru? Rid Matyu 7:13, 14, dɔn una tɔk bɔt dis kwɛstyɔn:
Wetin di Baybul se bɔt di rod we de mek pɔsin ɛnd-ɔp fɔ gɛt layf?
Ple di VIDIO, dɔn una tɔk bɔt di kwɛstyɔn we de dɔŋ.
Fɔ se di Baybul se bɔku rilijɔn dɛn de we de mek Gɔd gladi?
5. Lay lay rilijɔn nɔ de sho di lɔv we Gɔd gɛt
Bɔku we dɛn de we rilijɔn dɔn mek pipul dɛn biliv tin dɛn we nɔto tru bɔt Gɔd. Wan we we dɛn de du dis we rili bad na we dɛn de put an pan wɔ. Fɔ si wan ɛgzampul, ple di VIDIO. Dɔn una tɔk bɔt di kwɛstyɔn dɛn we de dɔŋ.
Wetin bɔku chɔch dɛn bin du insay Wɔl Wɔ Tu?
Aw yu fil bɔt di tin dɛn we dɛn bin du?
Rid Jɔn 13:34, 35 ɛn 17:16. Dɔn una tɔk bɔt dɛn kwɛstyɔn dɛn ya:
Aw yu tink se Jiova de fil we rilijɔn dɛn de put an pan wɔ?
Bɔku bad bad tin dɛn de we lay lay rilijɔn dɛn dɔn du. Wetin-ɛn-wetin yu dɔn si rilijɔn dɛn de du we dɔn sho se dɛn nɔ de falamakata Gɔd fɔ sho lɔv?
Lay lay rilijɔn nɔ de falamakata Gɔd fɔ sho lɔv
6. Gɔd want fɔ fri pipul dɛn frɔm lay lay rilijɔn
Rid Rɛvɛleshɔn 18:4,a dɔn una tɔk bɔt dis kwɛstyɔn:
Aw yu fil we yu lan se Gɔd want fɔ ɛp pipul dɛn we lay lay rilijɔn dɔn ful wit di tin dɛn we dɛn de tich?
7. Kɔntinyu fɔ lan bɔt di tru Gɔd
Yu tink se di lay lay tin dɛn we rilijɔn dɛn de se ɛn du fɔ afɛkt aw yu de si Gɔd? Imajin se wan bɔbɔ nɔ gri fɔ fala di fayn advays we in papa gi am. Di bɔbɔ disayd fɔ lɛf os ɛn go liv bad layf. Di papa nɔ gladi fɔ wetin in pikin disayd fɔ du. Wetin mek i nɔ go fayn fɔ blem di papa fɔ di we aw di pikin we nɔ de obe de liv in layf?
Yu tink se i go fayn fɔ blem Jiova ɛn stɔp fɔ lan bɔt am bikɔs ɔf di bad tin dɛn we lay lay rilijɔn de se ɛn du?
SƆM PIPUL DƐN KIN SE: “A nɔ want fɔ lan bɔt Gɔd bikɔs na rilijɔn dɛn de mek bɔku bad bad tin dɛn de apin.”
Yu de fil da we de?
Wetin mek di tin dɛn we lay lay rilijɔn de se ɛn du nɔ fɔ afɛkt di we aw wi de si Jiova?
WETIN YU DƆN LAN?
Lay lay rilijɔn dɔn mek pipul dɛn biliv tin dɛn we nɔto tru bɔt Gɔd bay wetin dɛn de tich ɛn di bad tin dɛn we dɛn de du. Gɔd go dɔnawe wit lay lay rilijɔn.
Rivyu
Aw yu fil bɔt di tin dɛn we lay lay rilijɔn dɔn tich ɛn di tin dɛn we i dɔn du?
Aw Jiova de fil bɔt lay lay rilijɔn?
Wetin Gɔd go du to lay lay rilijɔn?
DU MƆ RISACH
Lan bɔt tu we dɛn we bɔku rilijɔn dɛn de mek Gɔd nɔ gladi.
“Yu Tink se Ɔl Rilijɔn Na di Sem? Dɛn Ɔl De Lid Wi to Gɔd?” (Atikul na di wɛbsayt)
Wetin mek Jiova want wi fɔ wɔship am wit ɔda pipul dɛn?
“Yu Tink se I Impɔtant fɔ De na Rilijɔn we Ɔganayz?” (Atikul na di wɛbsayt)
Wan prist in at pwɛl bikɔs ɔf in rilijɔn. Bɔt dat nɔ bin stɔp am fɔ mek i nɔ lan di tru bɔt Gɔd.
Fɔ lɔng tɛm, rilijɔn dɛn dɔn de tich lay lay tin dɛn bɔt Gɔd we mek pipul dɛn biliv se Gɔd wikɛd ɛn i nɔ bisin bɔt wi. Lan di tru bɔt tri pan dɛn lay dɛn de.
“Lay Lay Tin dɛn We Mek I Tan Lɛk se Gɔd Nɔ Lɛk Wi” (Di Wachtawa, Novɛmba 1, 2013)