Sɔpɔt Jizɔs We Na Wi Lida

1. Wetin Jiova want fɔ apin tide?

GƆD want fɔ mek dɛn prich di gud nyuz bɔt di Kiŋdɔm ɔlsay na di wɔl tide. (Mak 13:​10; 1 Tim. 2:​3, 4) Dis na Jiova in wok, ɛn bikɔs dis wok rili impɔtant, na dat mek i pik in Pikin we i lɛk fɔ lid dis wok. Wi shɔ se bikɔs wi gɛt Jizɔs as di wan we de lid wi, wi go ebul fɔ du di prichin wok jɔs lɛk aw Jiova want bifo di ɛnd kam.—Mat. 24:​14.

2. Wetin wi go tɔk bɔt insay dis atikul?

² Insay dis atikul, wi go si aw Jizɔs de yuz in “slev we fetful ɛn gɛt sɛns” fɔ gi spirichwal it ɛn fɔ ɔganayz in disaypul dɛn fɔ du di prichin wok pas di we aw dɛn dɔn ɛva du am na di wɔl. (Mat. 24:​45) Wi go si bak wetin ɛniwan pan wi go du fɔ sɔpɔt Jizɔs ɛn di slev we fetful.

JIZƆS DE LID DI PRICHIN WOK

3. Wetin Jiova dɔn put Jizɔs oba?

³ Na Jizɔs de lid di prichin wok. Wetin mek wi shɔ bɔt dat? Jɔs bifo Jizɔs bin go bak na ɛvin, i bin mit wit sɔm pan in fetful disaypul dɛn ɔp wan mawntin na Galili. I bin tɛl dɛn se: “Gɔd dɔn put mi oba ɔltin na ɛvin ɛn na dis wɔl.” Notis wetin nɛks i tɛl dɛn. I se: “So, una go ɛn mek pipul dɛn bi mi disaypul na ɔl di neshɔn dɛn.” (Mat. 28:​18, 19) So di prichin wok na wan pan di tin dɛn we Jiova dɔn put Jizɔs oba.

4. Wetin mek wi shɔ se Jizɔs stil de dayrɛkt di prichin wok?

⁴ Jizɔs bin tɔk se dɛn go du di prichin wok ɛn disaypul wok na “ɔl di neshɔn dɛn,” ɛn i go de wit in disaypul dɛn “ɔltɛm te di tɛm want fɔ dɔn.” (Mat. 28:​20) Dɛn wɔd dɛn de sho klia wan se di prichin wok go kɔntinyu fɔ de ɔnda Jizɔs in dayrɛkshɔn te to wi yon tɛm.

5. Aw wi de ɛp fɔ mek di prɔfɛsi we de na Sam 110:​3 (NWT) kam tru?

⁵ Jizɔs nɔ bin wɔri se bɔku wokman dɛn nɔ go de di tɛm we dis wɔl want fɔ dɔn. I bin no se wan pan di prɔfɛsi dɛn we de na di sam buk go kam tru, we se: “Yu pipul dɛn go rɛdi dɛnsɛf di de we yu want fɔ go fɛt.” (Sam 110:​3, NWT) If yu de prich di gud nyuz, dat min se yu de sɔpɔt Jizɔs ɛn di slev we fetful, ɛn yu de ɛp fɔ mek da prɔfɛsi de kam tru. Di wok de go bifo, bɔt tin dɛn de bak we kin mek i nɔ izi.

6. Wetin na wan pan di tin dɛn we mek di Kiŋdɔm wok nɔ izi fɔ du?

⁶ Wan pan di tin dɛn we kin mek i nɔ izi fɔ di wan dɛn we de prich di Kiŋdɔm mɛsej na bikɔs pipul dɛn de agens dɛn. Apɔstet dɛn, di wan dɛn we de bifo pan Gɔd biznɛs, ɛn pɔlitishian dɛn dɔn lay to bɔku pipul dɛn bɔt wi wok. If wi fambul dɛn, pipul dɛn we wi sabi, ɛn wi wokmet dɛn dɔn biliv dɛn lay lay tin dɛn de, sɔntɛm dɛn go prɛzhɔ wi fɔ mek wi stɔp fɔ sav Jiova ɛn fɔ stɔp fɔ du di prichin wok. Na sɔm kɔntri dɛn, wi ɛnimi dɛn de trɛtin, atak, arɛst wi brɔda ɛn sista dɛn, ɛn ivin put dɛn na prizin. Wi nɔ sɔprayz we pipul dɛn de trit wi dis we. Jizɔs bin se: “Dɛn go et una na ɔl di neshɔn dɛn bikɔs ɔf mi nem.” (Mat. 24:​9) Bikɔs pipul dɛn et wi dis kayn we, na pruf fɔ sho se Jiova gladi fɔ wi. (Mat. 5:​11, 12) Na Setan de biɛn ɔl dis. Bɔt Jizɔs gɛt pawa pas Setan fa fawe. Wit Jizɔs in sɔpɔt, pipul dɛn na ɔl di neshɔn dɛn de yɛri di gud nyuz. Lɛ wi tɔk bɔt di pruf dɛn we sho dat.

7. Wetin yu de si we de pruv se di prɔfɛsi we de na Rɛvɛleshɔn 14:​6, 7 de kam tru?

⁷ Wan ɔda tin we mek di prichin wok nɔ izi na dat pipul dɛn de tɔk bɔku difrɛn langwej dɛn. Insay di vishɔn we Jizɔs bin sho apɔsul Jɔn, i bin se insay wi yon tɛm, langwej nɔ go stɔp wi fɔ du di prichin wok. (Rid Rɛvɛleshɔn 14:​6, 7.) Wetin mek? Na bikɔs wi de gi bɔku pipul dɛn di chans fɔ lisin to di Kiŋdɔm mɛsej. Tide, pipul dɛn ɔlsay na di wɔl ebul fɔ rid tin dɛn we gɛt fɔ du wit di Baybul na wi jw.org wɛbsayt bikɔs i gɛt infɔmeshɔn dɛn we de insay pas 1,000 langwej dɛn. Di Gɔvnin Bɔdi dɔn gri fɔ mek dɛn translet di buk we nem Ɛnjɔy Layf Sote Go! we na wi men stɔdi buk fɔ mek disaypul dɛn, insay pas 700 langwej dɛn. Dɔn bak, dɛn de yuz vidio rɛkɔdin fɔ di wan dɛn we dɛf, ɛn pɔblikeshɔn dɛn de insay brel fɔ di wan dɛn we blayn so dat dɛnsɛf go gɛt spirichwal it. Wi de si aw Baybul prɔfɛsi dɛn de kam tru. Pipul dɛn na ‘ɔl di trayb dɛn na di wɔl’ de lan fɔ tɔk di “piɔ langwej,” we na di tru we de insay di Baybul. (Zɛk. 8:​23; Zɛf. 3:​9, NWT) Ɔl dis wok de apin ɔnda Jizɔs Krays in dayrɛkshɔn.

8. Us rizɔlt dɛn wi dɔn gɛt bikɔs ɔf wi prichin wok?

⁸ Tide, i pas 8,000,000 pipul dɛn insay 240 kɔntri dɛn we de na Jiova in ɔganayzeshɔn, ɛn ɛni ia, bɔku pipul dɛn de baptayz. Bɔt di tin we impɔtant mɔ, na di Kristian kwaliti dɛn, we na “di nyu abit dɛn,” we dɛn nyu disaypul dɛn ya so dɔn gɛt. (Kol. 3:​8-10) Bɔku pan dɛn dɔn stɔp fɔ liv fri layf, fɔ fɛt-fɛt, fɔ tek wan pɔsin bɛtɛ pas ɔda pɔsin, ɛn fɔ put dɛn kɔntri bifo. Di prɔfɛsi we de na Ayzaya 2:​4 de rili kam tru; dɛn ‘nɔ de lan fɔ fɛt wɔ igen.’ As wi de wok tranga wan fɔ gɛt di nyu abit dɛn, wi de ɛp pipul dɛn fɔ kam na Gɔd in ɔganayzeshɔn, ɛn wi de pruv se wi de fala wi lida we na Jizɔs Krays. (Jɔn 13:​35; 1 Pit. 2:​12) Wetin mek ɔl dɛn tin dɛn ya de apin? Na bikɔs Jizɔs de gi wi di ɛp we wi nid.

JIZƆS PIK WAN SLEV

9. Akɔdin to Matyu 24:​45-47, wetin Jizɔs bin se go apin insay di tɛm we di wɔl want fɔ dɔn?

⁹ Rid Matyu 24:​45-47. Jizɔs bin dɔn tɔk se insay di tɛm we di wɔl want fɔ dɔn, i go pik wan “slev we fetful ɛn gɛt sɛns” fɔ gi spirichwal it. So wi de ɛkspɛkt da slev de fɔ wok tranga wan insay wi tɛm. Ɛn na dat i de du. Jizɔs de yuz wan smɔl grup we na anɔyntɛd man dɛn fɔ gi Gɔd in pipul dɛn ɛn di wan dɛn we want fɔ no mɔ, spirichwal “it di rayt tɛm.” Dɛn man dɛn ya nɔ de si dɛnsɛf as masta fɔ ɔda pipul dɛn fet. (2 Kɔr. 1:​24) Bifo dat, dɛn de si Jizɔs Krays as di “lida ɛn kɔmanda” fɔ in pipul dɛn.—Ayz. 55:​4.

10. Uswan pan di buk dɛn we de na di pikchɔ we ɛp yu fɔ waka na di rod we go mek yu gɛt layf we go de sote go?

¹⁰ Frɔm 1919, di slev we fetful dɔn mek difrɛn kayn buk dɛn we dɔn gi nyu wan dɛn di chans fɔ lan di trut frɔm di Baybul fɔ di fɔs tɛm. Insay 1921, di slev bin mek di buk we nem The Harp of God fɔ ɛp di wan dɛn we want fɔ no mɔ fɔ lan di men tin dɛn we di Baybul de tich. As tɛm de go, dɛn mek ɔda buk dɛn bak. Us buk bin ɛp yu fɔ no ɛn lɛk wi Papa we de na ɛvin? Na bin di buk we nem “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Wetin Rili di Baybul De Tich?, Wetin Wi Go Lan Frɔm di Baybul?, ɔ Ɛnjɔy Layf Sote Go! we na wi nyu buk? Dɛn mek ɔl dɛn buk dɛn ya fɔ ɛp wi fɔ mek disaypul dɛn. Ɛn dɛn print dɛn di tɛm we wi nid dɛn.

11. Wetin mek i impɔtant fɔ lɛ wi ɔl gɛt spirichwal it?

¹¹ Nɔto jɔs di nyu wan dɛn we want fɔ lan bɔt di Baybul nid fɔ gɛt spirichwal it we ɛvi. Wi ɔl nid am. Apɔsul Pɔl bin rayt se: “Ɛvi fud na fɔ di wan dɛn we machɔ.” Pɔl bin rayt bak se we wi de du wetin wi de lan frɔm di Baybul, i de ɛp wi fɔ “ebul no wetin rayt ɛn wetin rɔng.” (Ibru. 5:​14) I nɔ kin rili izi fɔ obe Jiova in lɔ dɛn bikɔs wi de insay tɛm we tin nɔ izi, ɛn pipul dɛn de rili liv fri layf. Bɔt Jizɔs de mek shɔ se wi lan di tin dɛn we wi nid fɔ lan so dat wi go kɔntinyu fɔ gɛt strɔng fet. Di tin dɛn we wi de lan kɔmɔt frɔm Gɔd in Wɔd, di Baybul. Ɛn Jizɔs de dayrɛkt di slev we fetful as dɛn de ɛp wi fɔ gɛt dɛn tin dɛn ya we wi de lan.

12. Aw wi de fala Jizɔs fɔ ɔnɔ Gɔd in nem?

¹² Lɛk Jizɔs, wi de gi Gɔd in nem di ɔnɔ we i fit fɔ gɛt. (Jɔn 17:​6, 26) Fɔ ɛgzampul, insay 1931, wi bin stat fɔ yuz di nem we wi pul na di Baybul, we na Jiova Witnɛs dɛn. We wi du dat, wi sho se Gɔd in nem rili impɔtant to wi, ɛn wi want fɔ mek pipul dɛn sabi wi bay da nem de. (Ayz. 43:​10-12) Ɛn frɔm Ɔktoba insay da ia de, wi dɔn de put Gɔd in nem na di frɔnt pej na dis magazin. Dɔn bak, di New World Translation of the Holy Scriptures dɔn put Gɔd in nem ɔl di say dɛn we i fɔ de na in Wɔd. Dis rili difrɛn frɔm wetin di chɔch dɛn de du, bikɔs dɛn dɔn pul Jiova in nem insay bɔku Baybul dɛn we dɛn dɔn translet.

JIZƆS DE ƆGANAYZ IN DISAYPUL DƐN

13. Wetin mek yu biliv tranga wan se Jizɔs de yuz “di slev we fetful ɛn gɛt sɛns” tide? (Jɔn 6:​68)

¹³ Jizɔs dɔn yuz “di slev we fetful ɛn gɛt sɛns” fɔ mek wan wɔndaful ɔganayzeshɔn na dis wɔl we de ɛp pipul dɛn fɔ wɔship Jiova di rayt we. Aw yu de fil bɔt da ɔganayzeshɔn de? Sɔntɛm yu de fil di sem we aw apɔsul Pita bin fil we i tɛl Jizɔs se: “Udat wi go go to? Di tin dɛn we yu de tɔk go mek pɔsin gɛt layf we go de sote go.” (Jɔn 6:​68) Usay ɛniwan pan wi bin fɔ de tide if wi nɔ bin de na Jiova in ɔganayzeshɔn? Krays de yuz dis ɔganayzeshɔn fɔ mek shɔ se wi gɛt ɔl wetin wi nid fɔ lɛ wi kɔntinyu fɔ fetful to Gɔd. I de tren wi bak fɔ du di prichin wok fayn fayn wan. Dɔn bak, i de ɛp wi fɔ gɛt “di nyu abit dɛn,” so dat wi go mek Jiova gladi.—Ɛfi. 4:​24.

14. Us bɛnifit yu dɔn gɛt we yu de na Jiova in ɔganayzeshɔn insay di tɛm we di COVID-19 pandɛmik de?

¹⁴ We prɔblɛm kin de, Jizɔs de gi wi dayrɛkshɔn we rili mek sɛns. Wi bin si di bɛnifit we wi de gɛt frɔm da dayrɛkshɔn de di tɛm we di COVID-19 pandɛmik bin stat. Bɔku pipul dɛn na di wɔl nɔ bin no wetin fɔ du, bɔt Jizɔs bin mek shɔ se wi gɛt klia dayrɛkshɔn bɔt wetin wi fɔ du fɔ lɛ wi kɔntinyu fɔ sef. Dɛn bin ɛnkɔrej wi fɔ wɛr maks we wi de na pɔblik ɛn lɛ wi nɔ de go nia pipul dɛn. Dɛn bin mɛmba di ɛlda dɛn fɔ de kɔl ɔlman na di kɔngrigeshɔn ɔltɛm ɛn fɔ mek shɔ se dɛn gɛt wetin dɛn nid fɔ lɛ dɛn sef, lɛ dɛn gɛt wɛlbɔdi, ɛn lɛ dɛn kɔntinyu fɔ de nia Jiova. (Ayz. 32:​1, 2) Dɔn bak, dɛn bin yuz di Gɔvnin Bɔdi ɔpdet dɛn fɔ tɛl wi ɔda tin dɛn we wi fɔ du ɛn fɔ ɛnkɔrej wi.

15. Us dayrɛkshɔn wi bin gɛt bɔt aw fɔ ol mitin ɛn du wi prichin wok insay di tɛm fɔ di pandɛmik? Wetin dɔn bi di rizɔlt?

¹⁵ Insay di tɛm we di pandɛmik de, wi bin gɛt klia dayrɛkshɔn bak bɔt aw fɔ ol wi mitin dɛn ɛn du di prichin wok. Insay shɔt tɛm, wi bigin atɛnd wi mitin dɛn, asɛmbli, ɛn kɔnvɛnshɔn dɛn na di Intanɛt. Dɔn bak, di men tin dɛn we wi bigin yuz fɔ prich na lɛta ɛn tɛlifon. Jiova de blɛs di tray we wi de tray. Bɔku branch dɛn dɔn ripɔt se dɛn dɔn gɛt bɔku pɔblisha dɛn. Infakt, bɔku brɔda ɛn sista dɛn dɔn gɛt fayn ɛkspiriɛns dɛn insay dis tɛm.—Rid di bɔks we gɛt di taytul, “Jiova De Blɛs Wi Prichin Wok.”

16. Wetin wi biliv tranga wan?

¹⁶ Sɔntɛm sɔm pipul dɛn go dɔn tink se di ɔganayzeshɔn bin de tek tɛm tumɔs we i kam to di pandɛmik. Bɔt bɔku tɛm, wi si klia wan se di dayrɛkshɔn dɛn we wi bin gɛt bin mek sɛns. (Mat. 11:​19) Ɛn we wi de tink gud wan bɔt di fayn we aw Jizɔs de lid in pipul dɛn, wi biliv tranga wan se ilɛk wetin go apin tumara bambay, Jiova ɛn in Pikin we i lɛk go de wit wi.—Rid Ibruz 13:​5, 6.

17. Aw yu fil fɔ gɛt Jizɔs as yu lida?

¹⁷ Wi rili gladi fɔ gɛt Jizɔs as wi lida. Wi de na ɔganayzeshɔn we gɛt wanwɔd pan ɔl we wi ɔl gɛt difrɛn kɔlchɔ, wi kɔmɔt difrɛn kɔntri, ɛn wi de tɔk difrɛn langwej dɛn. Wi de lan bɔku tin dɛn frɔm Gɔd in Wɔd, ɛn wi de gɛt ɔl di trenin we wi nid fɔ du di prichin wok. Wi ɔl de lan aw fɔ gɛt di nyu abit dɛn ɛn fɔ lɛk wi kɔmpin dɛn. Wi gɛt bɔku rizin fɔ bost bikɔs Jizɔs na wi lida.