“Una Go Ɔlɔbɔt na di Wɔl ɛn Mek di Pipul dɛn Bi Mi Lanin Bɔy Dɛn”

1, 2. We wi tink bɔt wetin Jizɔs tɔk na Matyu 24:​14, us kwɛstyɔn dɛn we dis kin mek wi aks?

JIZƆS bin tɔk se insay di las dez, pipul dɛn go prich di gud nyus bɔt Gɔd in Kiŋdɔm ɔlsay na di wɔl. (Matyu 24:​14) Pipul dɛn sabi Jiova Witnɛs dɛn ɔlsay na di wɔl fɔ di prichin wok we dɛn de du. Sɔm pipul dɛn lɛk di mɛsej we wi de prich, bɔt ɔda wan dɛn de we nɔ lɛk am. Bɔt ivin sɔm pipul dɛn we nɔ lɛk wi mɛsej de rɛspɛkt wi fɔ di wok we wi de du. Wi kin tɔk se na wi de du di wok we Jizɔs bin tɔk bɔt. Yu tink se wi gɛt rayt fɔ se so? Wetin mek wi shɔ se di prichin wok we wi de du na in Jizɔs bin tɔk bɔt?

² Bɔku rilijɔn dɛn de tɔk se na dɛn de prich di mɛsej we Jizɔs bin de prich. Bɔt na chɔch, tɛlivishɔn, ɔ di Intanɛt nɔmɔ dɛn kin prich, ɔ dɛn kin jɔs tɛl ɔda pipul dɛn aw dɛn bin lan bɔt Jizɔs. Ɔda wan dɛn fil se if dɛn ɛp pipul dɛn we nid pɔsin fɔ ɛp dɛn ɔ dɛn bi dɔktɔ, nɔs, ɔ ticha, na dɛn yon we dat fɔ prich. Bɔt yu tink se na dɛn tin ya Jizɔs bin se pɔsin we de prich fɔ du?

3. Frɔm wetin de na Matyu 28:​19, 20, wetin na di 4 tin dɛn we di wan dɛn we de fala Jizɔs fɔ du?

³ Yu tink se Jizɔs bin want mek in disaypul dɛn wet fɔ mek pipul dɛn kam mit dɛn? Nɔ-o! Afta we Jizɔs bin gɛt layf bak, i bin tɛl bɔku pipul dɛn we de fala am se: “Una go ɔlɔbɔt na di wɔl ɛn mek di pipul dɛn bi mi lanin bɔy dɛn; una baptayz dɛn . . .  Una lan dɛn fɔ du ɔl wetin a dɔn tɛl una.” (Matyu 28:​19, 20) So jɔs lɛk Jizɔs in disaypul dɛn, wisɛf nid fɔ du 4 tin dɛn. Wi fɔ mek pipul dɛn bi Jizɔs in lanin bɔy dɛn, baptayz dɛn, ɛn tich dɛn. Bɔt fɔs, wi fɔ go mit di pipul dɛn. Wan masta sabi bukman we stɔdi di Baybul ɛksplen se: “Fɔ ‘go’ prich na tin we ɔl Kristian fɔ du, ilɛksɛf na oba di strit ɔ oba di si,” dis min se ɔlman we na Kristian fɔ go prich to pipul dɛn we de nia am ɔ pipul dɛn we de fa.—Matyu 10:​7; Lyuk 10:​3.

4. Wetin Jizɔs bin min we i se: “A go sho una aw fɔ briŋ pipul kam to mi lɛkɛ aw una de kech fish”?

⁴ Wetin Jizɔs bin want in disaypul dɛn fɔ du? Yu tink se i bin want mek dɛn wangren prich ɔ i bin want dɛn fɔ kam togɛda ɛn ɔganayz dɛnsɛf fɔ du di prichin wok? Bikɔs i nɔ go pɔsibul fɔ mek wangren pɔsin prich “ɔlɔbɔt na di wɔl,” in disaypul dɛn nid fɔ kam togɛda ɛn ɔganayz dɛnsɛf fɔ du di prichin wok. Na dat Jizɔs bin min we i bin kɔl in disaypul dɛn ɛn tɛl dɛn se: “A go sho una aw fɔ briŋ pipul kam to mi lɛkɛ aw una de kech fish.” (Rid Matyu 4:​18-22.) Jizɔs nɔ bin de tɔk bɔt we pɔsin de fishin wit rop ɛn bet, de wet fɔ lɛ fish kam it di bet. Bɔt di fishin we Jizɔs bin de tɔk bɔt gɛt fɔ du wit we pɔsin de yuz fishin nɛt. Da kayn we de fɔ fishin, nɔto izi wok, i min se di pipul dɛn fɔ ɔganayz, ɛn bɔku pipul dɛn fɔ kam togɛda fɔ du di wok.—Lyuk 5:​1-11.

5. Us 4 kwɛstyɔn dɛn wi gɛt fɔ kam tɔk bɔt? Wetin mek wi go tɔk bɔt dɛn?

⁵ Fɔ no udat dɛn de prich di gud nyus tide, wi nid fɔ ansa dɛn 4 kwɛstyɔn dɛn ya:

• Us mɛsej Jizɔs in disaypul dɛn fɔ prich bɔt?

• Wetin na di rizin we mek dɛn de prich?

• Usay-ɛn-usay dɛn de prich?

• Aw fa di wok fɔ go ɛn aw lɔng i fɔ kɔntinyu?

Di ansa to dɛn kwɛstyɔn dɛn ya go ɛp wi fɔ no udat dɛn de du dis wok we de sev pipul dɛn, ɛn i go gi wi mɔ zil fɔ kɔntinyu fɔ prich.—Fɔs Lɛta To Timoti 4:​16.

WETIN FƆ BI DI MƐSEJ?

6. Wetin mek yu shɔ se na Jiova Witnɛs dɛn de prich di rayt mɛsej?

⁶ Rid Lyuk 4:​43. Jizɔs bin prich “di Gud Nyuz bɔt Gɔd in rul,” ɔ Gɔd in Kiŋdɔm ɛn i bin want mek in disaypul dɛn du di sem tin. Udat dɛn de prich dis sem mɛsej ya to ɔlman? Na Jiova Witnɛs dɛn nɔmɔ de du dat! Ivin sɔm pipul dɛn we nɔ lɛk wi gri se na wi de du dat. Fɔ ɛgzampul, wantɛm wan prist we na mishɔnari we bin dɔn de na bɔku kɔntri dɛn bin tɔk to wan Jiova Witnɛs. Ɛni kɔntri we di prist go, i kin aks Jiova Witnɛs dɛn us mɛsej we dɛn de prich. Di prist se: “Dɛn ɔl so bigful dat dɛn gi di sem ansa se: ‘Na di gud nyus bɔt Gɔd in Kiŋdɔm.’” Wetin di prist tɔk sho se wi nɔ bigful, bɔt i de sho se wi gɛt wanwɔd as tru Kristian dɛn. (Fɔs Lɛta Fɔ Kɔrint 1:​10) Gɔd in Kiŋdɔm na di men mɛsej we de na Di Wachtawa [we] De Tɔk bɔt Jiova in Kiŋdɔm. Dis magazin de insay 254 langwej dɛn ɛn na lɛk 59,000,000 kɔpi dɛn, dɛn kin mek, so dis dɔn mek dis magazin ya de bɔku bɔku say dɛn na di wɔl pas ɛni ɔda magazin!

7. Aw wi no se di bigman dɛn na chɔch nɔ de prich di rayt mɛsej we Jizɔs bin de prich?

⁷ Di bigman dɛn na chɔch nɔ de prich bɔt Gɔd in Kiŋdɔm. If dɛn want fɔ tɔk bɔt Gɔd in Kiŋdɔm, plɛnti pan dɛn kin se na filin we de insay pɔsin in at. Dɛn nɔ de tich di pipul dɛn se di Kiŋdɔm na gɔvmɛnt we Jizɔs de rul na ɛvin. Bifo dat, na Krismas ɔ Ista tɛm mɔ dɛn kin tɔk bɔt Jizɔs. Dɛn nɔ kin tɔk se di Kiŋdɔm na in go sɔlv ɔl di prɔblɛm dɛn we de mit mɔtalman ɛn dat i nɔ go te igen, i go pul ɔl di bad bad tin dɛn na di wɔl. (Rɛvɛleshɔn 19:​11-21) Dis dɔn sho wi klia wan se di bigman dɛn na chɔch nɔ no wetin Jizɔs, we na Kiŋ na Gɔd in Kiŋdɔm, go du. Ɛn bikɔs dɛn nɔ ɔndastand di mɛsej we Jizɔs bin de prich, so dɛn nɔ ivin ɔndastand wetin mek dɛnsɛf fɔ prich.

WETIN FƆ BI DI RIZIN WE MEK WI DE DU DIS WOK?

8. Wetin wi nɔ fɔ prich fɔ?

⁸ Jizɔs in disaypul dɛn nɔ de prich fɔ mek mɔni ɔ fɔ bil big big os dɛn. Na dat mek Jizɔs bin se: “Una nɔ pe fɔ wetin una gɛt, so una nɔ fɔ mek pipul pe una fɔ wetin una de gi dɛn.” (Matyu 10:​8) So di prichin wok nɔto biznɛs. (Sɛkɛn Lɛta Fɔ Kɔrint 2:​17) Jizɔs in disaypul dɛn nɔ fɔ aks pipul dɛn fɔ pe dɛn bikɔs dɛn de du di prichin wok. (Rid Di Apɔsul Dɛn Wok [Akt] 20:​33-35.) Pan ɔl we di tin we Jizɔs bin tɔk bɔt rili klia, plɛnti chɔch dɛn jɔs bisin fɔ mek mɔni so dat dɛn chɔch go kɔntinyu fɔ de ɛn dɛn go de pe di bigman dɛn na di chɔch ɛn ɔda pipul dɛn we de wok na di chɔch. Dis dɔn mek bɔku bigman dɛn na chɔch dɔn gɛt plɛnti mɔni.—Rɛvɛleshɔn 17:​4, 5.

9. Aw Jiova Witnɛs dɛn dɔn sho se dɛn de du di prichin wok fɔ di rayt rizin?

⁹ Yu tink se Jiova Witnɛs dɛn kin tek kɔlɛkshɔn na dɛn Kiŋdɔm Ɔl ɔ na kɔnvɛnshɔn? Nɔ-o! Dɛn nɔ de aks pipul dɛn fɔ pe dɛn fɔ di wok we dɛn de du; ɛnibɔdi kin gi wetin i want. (Sɛkɛn Lɛta Fɔ Kɔrint 9:​7) Bɔt pan ɔl dat, las ia, Jiova Witnɛs dɛn bin spɛn lɛk tu bilyɔn awa fɔ prich di gud nyus ɛn ɛni mɔnt, i bin pas nayn milyɔn Baybul stɔdi dɛn we dɛn bin de kɔndɔkt. Dɛn nɔ de pe dɛn fɔ di prich we dɛn de prich, bɔt dɛn gladi fɔ yuz dɛn yon mɔni fɔ du dis wok. We wan masta sabi bukman bin de tɔk bɔt di wok we Jiova Witnɛs dɛn de du, i bin se: “Di men tin we dɛn want fɔ du na fɔ prich ɛn tich.” I bin tɔk bak se Jiova Witnɛs dɛn nɔ gɛt no bigman fɔ pe. So if wi nɔ de prich fɔ mɔni, wetin wi de prich fɔ? Wi de prich bikɔs wi lɛk Jiova ɛn wi lɛk pipul dɛn ɛn wi gladi fɔ du dis wok. Dis de mek wetin dɛn bin dɔn rayt na Sam 110:​3 kam tru. (Rid.)

USAY-ƐN-USAY WI FƆ PRICH?

10. Usay-ɛn-usay Jizɔs ɛn in disaypul dɛn bin de prich?

¹⁰ Usay-ɛn-usay Jizɔs ɛn in disaypul dɛn bin de prich? Dɛn bin de go ɛnisay we dɛn go ebul fɔ mit pipul dɛn. Fɔ ɛgzampul, dɛn bin de prich na strit ɛn makit. Dɛn bin de luk fɔ pipul dɛn bak na dɛn os dɛn. (Matyu 10:​11; Lyuk 8:​1; Di Apɔsul Dɛn Wok [Akt] 5:​42; 20:​20) We dɛn bin de prich frɔm os to os, dɛn bin de ebul fɔ mit ɔlkayn pipul dɛn ɛn di prichin wok bin ɔganayz.

11, 12. Wetin yu go se we yu kɔmpia di we aw di chɔch dɛn de prich wit di we aw Jiova in pipul dɛn de prich di gud nyus?

¹¹ Yu tink se di chɔch dɛn de prich di gud nyus lɛk aw Jizɔs bin de du? Bɔku tɛm, na di bigman dɛn we dɛn kin pe na dɛn kin prich to dɛn mɛmba dɛn. Dɛn bigman dɛn ya nɔ de go prich to ɔda pipul dɛn fɔ mek dɛn bi Jizɔs in disaypul dɛn, na to dɛn chɔch mɛmba dɛn nɔmɔ dɛn de prich to. Sɔntɛnde, dɛn kin tray fɔ ɛnkɔrej dɛn mɛmba dɛn fɔ prich. Fɔ ɛgzampul, insay di ia 2001, Pop Jɔn Pɔl di Sɛkɔn bin rayt na wan lɛta se chɔch mɛmba dɛn fɔ de prich di gud nyus ɛn dɛn fɔ gɛt zil lɛk di apɔsul Pɔl, we bin se: ‘I go bad fɔ mi if a nɔ prich di gud nyus.’ Di pop bin kɔntinyu fɔ se nɔto jɔs smɔl pipul dɛn nɔmɔ we tren fɔ du di prichin wok bɔt na ɔlman na di chɔch fɔ du dis wok. Bɔt o-ya, na smɔl pipul dɛn nɔmɔ dɔn du dis.

¹² Wetin yu go se bɔt Jiova Witnɛs dɛn? Na dɛn nɔmɔ de prich se Jizɔs dɔn bi Kiŋ ɛn i dɔn stat fɔ rul frɔm 1914. Dɛn de obe Jizɔs ɛn put di prichin wok fɔs na dɛn layf. (Mak 13:​10) Wan buk we nem Pillars of Faith—American Congregations and Their Partners bin tɔk se di prichin wok na sɔntin we rili impɔtant to Jiova Witnɛs dɛn. I bin tɔk bak se we dɛn mit pipul dɛn we angri, pipul dɛn we de fil lɛk se na dɛn wangren de, ɛn pipul dɛn we sik, dɛn kin tray fɔ ɛp dɛn, bɔt dɛn nɔ de ɛva fɔgɛt se di men tin we dɛn want fɔ du na fɔ prich bɔt di tɛm we di wɔl go dɔn ɛn tich pipul dɛn bɔt wetin dɛn fɔ du fɔ mek dɛn go sev. Jiova Witnɛs dɛn de kɔntinyu fɔ prich dis mɛsej ɛn falamakata Jizɔs ɛn in disaypul dɛn we bin de prich ɛnisay we dɛn bin de mit pipul dɛn.

AW FA DI WOK FƆ GO ƐN AW LƆNG I FƆ KƆNTINYU?

13. Aw fa di prichin wok fɔ go?

¹³ Jizɔs bin se in disaypul dɛn go prich ɛn tich di gud nyus to “ɔlman na [di] wɔl.” I bin tɛl dɛn fɔ mek pipul dɛn bi in disaypul “ɔlɔbɔt na di wɔl.” (Matyu 24:​14; 28:​19, 20) Dis min se dɛn go nid fɔ prich di gud nyus ɔlsay na di wɔl.

14, 15. Wetin sho se na Jiova Witnɛs dɛn de du wetin Jizɔs bin se we yu tink bɔt aw fa dɛn prichin wok dɔn go? (Luk di pikchɔ nia dis atikul in taytul.)

¹⁴ Na Jiova Witnɛs dɛn nɔmɔ de du wetin Jizɔs bin se fɔ prich di gud nyus ɔlsay na di wɔl. Wetin mek wi se so? Insay Amɛrika, na lɛk 600,000 pipul dɛn de bifo pan Gɔd biznɛs na dɛn difrɛn chɔch dɛn, bɔt we yu luk, na lɛk 1,200,000 Jiova Witnɛs dɛn de prich di gud nyus na da sem kɔntri de. Na lɛk 400,000 Katolik prist dɛn de ɔlsay na di wɔl, bɔt i pas 8 milyɔn Jiova Witnɛs dɛn we de prich di gud nyus na 240 kɔntri dɛn. So dis dɔn sho klia wan se na Jiova Witnɛs dɛn de prich di gud nyus ɔlsay na di wɔl, ɛn dis dɔn briŋ ɔnɔ ɛn prez to Jiova!—Sam 34:​1; 51:​15.

¹⁵ Di men tin we Jiova Witnɛs dɛn want fɔ du na fɔ prich di gud nyus to bɔku bɔku pipul dɛn bifo di wɔl dɔn. Fɔ du dis wok, wi dɔn translet ɛn mek bɔku bɔku buk, magazin, trakt, ɛn kɔnvɛnshɔn ɛn Mɛmorial inviteshɔn dɛn we de insay pas 700 langwej dɛn. Wi de gi pipul dɛn, dɛn tin ya ɛn wi nɔ de chaj dɛn. Las ia, wi bin mek lɛk 4.5 bilyɔn buk dɛn we de tɔk bɔt di Baybul. Dɔn wi dɔn mek pas 200 milyɔn New World Translation of the Holy Scriptures ɛn i de insay pas 130 langwej dɛn. Ɛn wi ɔfishal Wɛbsayt dɔn de insay pas 750 langwej dɛn. So na Jiova Witnɛs dɛn nɔmɔ de du dis kayn wɔndaful wok.

16. Aw wi no se na Jiova Witnɛs dɛn gɛt Gɔd in spirit?

¹⁶ Aw lɔng di prichin wok go kɔntinyu? Jizɔs bin se dɛn go prich di gud nyus sote di wɔl dɔn. Jiova Witnɛs dɛn de kɔntinyu fɔ du di prichin wok insay dis las dez bikɔs dɛn gɛt Jiova in spirit. (Di Apɔsul Dɛn Wok [Akt] 1:​8; Pita In Fɔs Lɛta 4:​14) Sɔm pipul dɛn na ɔda rilijɔn go se: “Wi gɛt di oli spirit.” Bɔt wetin yu tink, dɛn ebul fɔ du di wok we Jiova Witnɛs dɛn de du insay dis las dez? Sɔm pan dɛn dɔn tray fɔ prich di we aw wi de prich, bɔt dɛn nɔ ebul. Ɔda wan dɛn want fɔ prich, bɔt na fɔ smɔl tɛm nɔmɔ. Dɔn ɔda wan dɛn kin go prich frɔm os to os, bɔt dɛn nɔ de prich di gud nyus bɔt Gɔd in Kiŋdɔm. So wi nɔ go se dɛn de du di wok we Jizɔs bin bigin.

UDAT DƐN RILI DE PRICH DI GUD NYUS TIDE?

17, 18. (a) Wetin mek wi shɔ se na Jiova Witnɛs dɛn nɔmɔ de prich di gud nyus bɔt di Kiŋdɔm tide? (b) Udat de ɛp wi fɔ kɔntinyu fɔ du dis wok?

¹⁷ So udat dɛn de prich di gud nyus bɔt Gɔd in Kiŋdɔm tide? Na Jiova Witnɛs dɛn nɔmɔ de du dat! Aw wi no dat? Na bikɔs wi de prich di rayt mɛsej, we na di gud nyus bɔt Gɔd in Kiŋdɔm. Wi de luk fɔ pipul dɛn ɛn prich to dɛn, so wi de prich di rayt we. Wi de prich fɔ di rayt rizin, bikɔs wi lɛk Jiova ɛn wi lɛk pipul dɛn. Wi prichin wok dɔn go fa, bikɔs wi de prich to pipul dɛn we kɔmɔt na ɔl di neshɔn dɛn ɛn insay bɔku bɔku langwej dɛn. Ɛn wi go kɔntinyu fɔ prich di gud nyus bɔt Gɔd in Kiŋdɔm sote di wɔl dɔn!

¹⁸ I rili wɔndaful fɔ si di fayn wok we Jiova in pipul dɛn de du fɔ prich di gud nyus insay dis las dez. Bɔt wetin mek wi ebul fɔ du ɔl dis wok? Di apɔsul Pɔl bin ɛksplen se: “Gɔd de wok insay una at so dat una go want du wetin in want una fɔ du ɛn fɔ mek una go ebul du am.” (Lɛta Fɔ Filipay 2:​13) Mek Jiova kɔntinyu fɔ ɛp wi so dat wi go du wi bɛst fɔ de prich di gud nyus.—Sɛkɛn Lɛta To Timoti 4:​5.