Wetin Na Gɔd In Kiŋdɔm?

1. Us prea wi de kam tɔk bɔt?

BƆKU pipul dɛn na di wɔl sabi di Awa Fada prea. Na da prea de Jizɔs bin sho in disaypul dɛn we i bin de tich dɛn aw fɔ pre. Wetin i bin pre fɔ? Ɛn wetin mek dis prea impɔtant fɔ wi tide?

2. Us tri impɔtant tin dɛn we Jizɔs bin tich wi fɔ pre fɔ?

² Jizɔs bin se: “Una fɔ pre dis we: ‘Wi Papa we de na ɛvin, mek ɔlman ɔnɔ yu nem. Lɛ yu Kiŋdɔm kam. Lɛ wetin yu want, bi na di wɔl lɛk aw i de bi na ɛvin.’” (Rid Matyu 6:​9-13, NW.) Wetin mek Jizɔs tich wi fɔ pre fɔ dɛn tri tin ya?—Luk Ɛndnot 20 na pej 216.

3. Wetin wi nid fɔ no bɔt Gɔd in Kiŋdɔm?

³ Wi dɔn lan se Gɔd in nem na Jiova. Ɛn wi bin dɔn tɔk bɔt wetin Gɔd want fɔ mɔtalman ɛn fɔ di wɔl. Bɔt wetin Jizɔs bin min we i tɛl wi fɔ pre se: “Lɛ yu Kiŋdɔm kam”? Wi go lan bɔt wetin na Gɔd in Kiŋdɔm, wetin i gɛt fɔ du, ɛn aw i go mek Gɔd in nem oli.

WETIN NA GƆD IN KIŊDƆM?

4. Wetin na Gɔd in Kiŋdɔm? Udat na di Kiŋ?

⁴ Jiova mek wan gɔvmɛnt na ɛvin ɛn i pik Jizɔs fɔ bi di Kiŋ na da gɔvmɛnt de. Di Baybul kɔl da gɔvmɛnt de Gɔd in Kiŋdɔm. Jizɔs na “di Kiŋ fɔ ɔl dɛn kiŋ, di Masta fɔ ɔl dɛn masta.” (Fɔs Lɛta To Timoti 6:​15) Jizɔs ebul du gud tin dɛn pas ɛni mɔtalman we de rul, ɛn i gɛt pawa pas ɔl mɔtalman rula dɛn ilɛksɛf dɛn kam togɛda fɔ rul.

5. Na usay Gɔd in Kiŋdɔm go de we i de rul? Udat dɛn i go rul?

⁵ Jizɔs go bak na ɛvin 40 dez afta i bin gɛt layf bak. Afta sɔm tɛm, Gɔd bin pik am fɔ bi Kiŋ na di Kiŋdɔm. (Di Apɔsul Dɛn Wok [Akt] 2:​33) Gɔd in gɔvmɛnt go de na ɛvin ɛn rul oba di wan ol wɔl. (Rɛvɛleshɔn 11:​15) Na dat mek di Baybul se Gɔd in Kiŋdɔm de “na ɛvin.”—Sɛkɛn Lɛta To Timoti 4:​18.

6, 7. Wetin mek Jizɔs bɛtɛ pas ɛni mɔtalman kiŋ?

⁶ Di Baybul se Jizɔs gɛt pawa pas ɛni mɔtalman kiŋ bikɔs “nain wangren nɔ de day.” (Fɔs Lɛta To Timoti 6:​16) As tɛm de go, ɔl mɔtalman rula dɛn de day bɔt Jizɔs nɔ go ɛva day. Ɔl di gud tin dɛn we Jizɔs go du fɔ wi go de sote go.

⁷ Di Baybul bin dɔn tɔk se Jizɔs go bi Kiŋ we de du tin tret ɛn we gɛt sɔri at. Di Baybul se: “PAPA GƆD [“Jiova,” NW] in Spirit go sidɔm pan am, di spirit fɔ sɛns ɛn fɔ ɔndastand, di spirit fɔ gi advays ɛn fɔ pawa, di spirit fɔ sabi tin ɛn fɔ fred PAPA GƆD [“Jiova,” NW]. Ɛn di tin we i go lɛk pas ɔl, na fɔ fred PAPA GƆD [“Jiova,” NW]. I nɔ go jɔj bay wetin in yay de si, ɔ disayd bay wetin in yes de yeri; bɔt na bay wetin rayt na PAPA GƆD in yay, i go jɔj di po man, ɛn [i] go disayd di sem we fɔ kwayɛt pipul na [di] wɔl.” (Ayzaya 11:​2-4) Yu nɔ go want da kayn kiŋ de fɔ rul yu?

8. Aw wi no se nɔto Jizɔs in wan gɛt fɔ rul?

⁸ Gɔd pik sɔm pipul dɛn fɔ go rul wit Jizɔs na di gɔvmɛnt we de na ɛvin. Fɔ ɛgzampul, di apɔsul Pɔl bin tɛl Timoti se: “If wi nɔ lɛf fɔ bia, wi go rul wit am.” (Sɛkɛn Lɛta To Timoti 2:​12) Ɔmɔs pipul dɛn go rul wit Jizɔs?

9. Ɔmɔs pipul dɛn go rul wit Jizɔs? Ustɛm Gɔd bigin fɔ pik dɛn?

⁹ Wi bin dɔn lan na Chapta 7 se di apɔsul Jɔn bin si vishɔn. Insay da vishɔn de, i bin si Jizɔs as Kiŋ na ɛvin wit 144,000 pipul dɛn we dɛnsɛf na kiŋ. Udat na di 144,000 pipul dɛn? Jɔn bin tɔk se “[Jizɔs] in nem ɛn in Papa in nem bin rayt pan dɛn fɔɛd.” Ɛn i tɔk bak se: “Dɛn na di wan dɛn we de fala di Ship [dat na, Jizɔs] ɛnisay we i go. Dɛn na di fɔs wan dɛn we Gɔd bay frɔm mɔtalman.” (Rid Rɛvɛleshɔn 14:​1, 4, NW.) Di 144,000 pipul dɛn, na fetful Kristian dɛn we Gɔd bin dɔn pik fɔ ‘rul di wɔl’ wit Jizɔs. We dɛn day, dɛn go gɛt layf bak fɔ go na ɛvin. (Rɛvɛleshɔn 5:​10) Frɔm di tɛm we di apɔsul dɛn bin de, Jiova bin dɔn de pik fetful Kristian dɛn fɔ de pan di 144,000 pipul dɛn we fɔ rul as kiŋ na ɛvin.

10. Wetin mek i fayn we Jiova pik Jizɔs ɛn di 144,000 pipul dɛn fɔ rul mɔtalman?

¹⁰ Jiova rili bisin bɔt wi, na dat mek i arenj fɔ mek mɔtalman rul wit Jizɔs. Jizɔs go bi gud rula bikɔs i ɔndastand wi. I no wetin i min fɔ bi mɔtalman ɛn fɔ sɔfa. Pɔl bin se Jizɔs no aw wi de fil, i de “ɔndastand ɔltin we traŋa fɔ wi,” ɛn “ɔl wetin de mit wi fɔ tray wi bin dɔn mit am.” (Di Ibru Pipul Dɛn 4:​15; 5:​8) Di 144,000 pipul dɛn bak no wetin i min fɔ bi mɔtalman. Dɛnsɛf bin de sin lɛk wi, ɛn dɛn bin gɛt difrɛn difrɛn kayn sik dɛn we bin de mɔna dɛn. So wi shɔ se Jizɔs ɛn di 144,000 pipul dɛn go ɔndastand aw wi de fil ɛn di prɔblɛm dɛn we de mit wi.

WETIN GƆD IN KIŊDƆM GO DU?

11. Wetin mek Jizɔs tich in disaypul dɛn fɔ pre mek wetin Gɔd want, bi na ɛvin?

¹¹ Jizɔs bin tich in disaypul dɛn fɔ pre fɔ mek wetin Gɔd want bi na ɛvin. Wetin mek? Insay Chapta 3, wi lan se Setan bin tɔn in bak pan Jiova. Afta Setan tɔn in bak pan Jiova, Jiova bin alaw Setan ɛn di enjɛl dɛn we nɔ bin fetful, ɔ dɛbul dɛn fɔ de na ɛvin fɔ sɔm tɛm. So nɔto ɔlman na ɛvin bin de du wetin Gɔd want. Wi go lan mɔ bɔt Setan ɛn in dɛbul dɛn insay Chapta 10.

12. Us tu impɔtant tin dɛn we Rɛvɛleshɔn 12:​10 tɔk bɔt?

¹² Di Baybul tɔk se jɔs afta Gɔd dɔn mek Jizɔs Kiŋ na in Kiŋdɔm, Jizɔs go gɛt fɔ fɛt Setan. (Rid Rɛvɛleshɔn 12:​7-10.) Vas 10 tɔk bɔt tu impɔtant tin dɛn. Gɔd in Kiŋdɔm bigin fɔ rul ɛn Jizɔs Krays na in na di Kiŋ. Dɔn, dɛn trowe Setan kɔmɔt na ɛvin kam dɔŋ na dis wɔl. As wi go lan, dɛn tin dɛn ya dɔn apin.

13. Wetin apin afta dɛn pul Setan kɔmɔt na ɛvin?

¹³ Di Baybul tɔk bɔt di we aw di enjɛl dɛn we fetful bin gladi afta dɛn bin pul Setan ɛn in dɛbul dɛn kɔmɔt na ɛvin. Di Baybul se: “So mek gladi de na ɛvin, mek ɔl dɛn wan we lib [ɔ, de] de gladi!” Naw pis ɛn wanwɔd de na ɛvin bikɔs ɔlman we de de, de du wetin Gɔd want.

14. Wetin dɔn apin na di wɔl we dɛn drɛb Setan kɔmɔt na ɛvin?

¹⁴ Bɔt gladi at nɔ de na di wɔl. Bad bad tin dɛn de apin to pipul dɛn “bikɔs di Dɛbul dɔn kam dɔŋ” ɛn i “vɛks bad bikɔs i no se na smɔl tɛm nɔmɔ lɛf fɔ am.” (Rɛvɛleshɔn 12:​12) Setan vɛks bad bad wan. Dɛn dɔn drɛb am kɔmɔt na ɛvin, ɛn i no se dɛn go dɔnawe wit am jisnɔ. I de du ɔl wetin i ebul fɔ mek trɔbul, sɔfa, ɛn pen de ɔlsay na di wɔl.

15. Aw Gɔd bin want di wɔl fɔ de?

¹⁵ Bɔt di tin we Gɔd want fɔ apin na di wɔl nɔ chenj. I stil want mɔtalman dɛn we pafɛkt fɔ de sote go na Paradays na dis wɔl. (Sam 37:​29) So aw Gɔd in Kiŋdɔm go mek dat apin?

16, 17. Wetin Daniɛl 2:​44 tɔk bɔt Gɔd in Kiŋdɔm?

¹⁶ Di Baybul tɔk na Daniɛl 2:​44 se: “We di kiŋ dɛn go de rul, PAPA GƆD na ɛvin go briŋ in yɔn kindɔm we nɔ go ɛva fɔdɔm, ɛn in pawa nɔ go go na ɔda pipul an; ɛn i go brok ɔl dɛn kindɔm we bin dɔn de bifo am pyɛt pyɛt [ɔ, smɔl smɔl], ɛn dɔn dɛn kpatakpata wan; in go tinap sote go.” Wetin dis tin we di Baybul tɔk bɔt tich wi bɔt Gɔd in Kiŋdɔm?

¹⁷ Fɔs, i tɛl wi se Gɔd in Kiŋdɔm go bigin fɔ rul “we di kiŋ dɛn go de rul.” Dis min se ɔda gɔvmɛnt dɛn go de na di wɔl we Gɔd in Kiŋdɔm bigin fɔ rul. Sɛkɔn, i tɛl wi se Gɔd in Kiŋdɔm go de sote go ɛn no ɔda gɔvmɛnt nɔ go ɛva tek in ples. Ɛn tɔd, Gɔd in Kiŋdɔm go fɛt di gɔvmɛnt dɛn we de na dis wɔl. Na Gɔd in Kiŋdɔm go win ɛn na in nɔmɔ go rul di wan ol wɔl. Dɔn, mɔtalman go gɛt di bɛst gɔvmɛnt we dɛn nɔ wande gɛt.

18. Aw di Baybul kɔl di las wɔ we go de bitwin Gɔd in Kiŋdɔm ɛn mɔtalman gɔvmɛnt dɛn?

¹⁸ Aw Gɔd in Kiŋdɔm go rul oba di wan ol wɔl? Bifo di las wɔ we di Baybul kɔl Amagɛdɔn kam, di dɛbul dɛn go ful “dɛn wan we de rul na di wɔl, ɛn kɔl dɛn fɔ kam gɛda ɛn rɛdi fɔ di wa we go bi da big de we Gɔd, we gɛt pawa pas ɔl, go sho in pawa.” Fɔ tru, mɔtalman govmɛnt dɛn go fɛt Gɔd in Kiŋdɔm.—Rɛvɛleshɔn 16:​14, 16; luk Ɛndnot 10 na pej 210.

19, 20. Wetin mek wi nid Gɔd in Kiŋdɔm fɔ rul di wɔl?

¹⁹ Wetin mek wi nid Gɔd in Kiŋdɔm? Na tri rizin mek wi nid am. Fɔs, wi de sin, so dat de mek wi de sik ɛn day. Bɔt di Baybul tɛl wi se ɔnda Gɔd in Kiŋdɔm wi go de sote go. Infakt, Jɔn 3:​16 se: “Gɔd so lɛk mɔtalman dat i gi in wan gren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.”

²⁰ Di sɛkɔn rizin we mek wi nid Gɔd in Kiŋdɔm na bikɔs wi de wit wikɛd pipul dɛn na di wɔl. Bɔku pan dɛn de lay, dɛn de tif, ɛn dɛn de du mami ɛn dadi biznɛs di we aw Gɔd nɔ want. Wi nɔ ebul du natin fɔ pul dɛn kɔmɔt, bɔt Gɔd go du dat. Gɔd go dɔnawe wit di pipul dɛn we kɔntinyu fɔ du bad bad tin dɛn insay Amagɛdɔn. (Rid Sam 37:​10.) Di tɔd rizin we mek wi nid Gɔd in Kiŋdɔm, na dat mɔtalman gɔvmɛnt nɔ gɛt pawa fɔ sɔlv ɔl di prɔblɛm dɛn na di wɔl, dɛn de trit di pipul dɛn bad, ɛn dɛn nɔ de du di rayt tin. Dɛn nɔ de du natin fɔ mek pipul dɛn du wetin Gɔd want. Na dat mek di Baybul tɛl wi klia wan se: “Pipul we gɛt pawa de sɔprɛs di wan we i gɛt pawa pas te dɛn ambɔg dɛnsɛf.”—Ɛkliziastis 8:​9.

21. Aw di Kiŋdɔm go mek shɔ se wetin Gɔd want, bi na di wɔl?

²¹ Afta Amagɛdɔn, Gɔd in Kiŋdɔm go mek shɔ se wetin Gɔd want bi na di wɔl. Fɔ ɛgzampul, i go pul Setan ɛn in dɛbul dɛn kɔmɔt na di wɔl. (Rɛvɛleshɔn 20:​1-3) As tɛm de go, nɔbɔdi nɔ go sik ɔ day. Bikɔs Jizɔs kam day, ɔl mɔtalman dɛn we fetful go de sote go na Paradays. (Rɛvɛleshɔn 22:​1-3) Di Kiŋdɔm go pul di badnem we pipul dɛn de put pan Gɔd in nem. Wetin dis min? I min se we Gɔd in gɔvmɛnt de rul di wɔl, ɔlman go prez Jiova in nem.—Luk Ɛndnot 21 na pej 216.

USTƐM JIZƆS BI KIŊ?

22. Aw wi no se Jizɔs nɔ bin bi Kiŋ we i bin de na di wɔl ɔ jɔs afta we i gɛt layf bak?

²² Jizɔs bin tich in disaypul dɛn fɔ pre se: “Lɛ yu Kiŋdɔm kam.” So i bin klia se Gɔd in gɔvmɛnt go kam tumara bambay. Fɔs, Jiova go mek in gɔvmɛnt, dɔn i go mek Jizɔs bi di Kiŋ. Yu tink se na jɔs afta we Jizɔs go na ɛvin i bi Kiŋ? Nɔ, i bin gɛt fɔ wet fɔs. Afta Jizɔs bin dɔn gɛt layf bak, Pita ɛn Pɔl bin sho se dis na tru, we dɛn ɛksplen se di tin we bin rayt na Sam 110:​1 de tɔk bɔt Jizɔs. Insay dis vas, Jiova se: “Kam sidɔm na mi raytan say, usay pɔsin we gɛt ɔna fɔ de, te a put yu ɛnimi dɛn ɔnda yu fut.” (Di Apɔsul Dɛn Wok [Akt] 2:​32-35; Di Ibru Pipul Dɛn 10:​12, 13) Aw lɔng Jizɔs go nid fɔ wet bifo Jiova mek am Kiŋ?

23. (a) Ustɛm Jizɔs bigin fɔ rul as Kiŋ na Gɔd in gɔvmɛnt? (b) Wetin wi go lan na di nɛks chapta?

²³ Fɔ lɔng tɛm bifo 1914, wan grup bin de we na tru tru Kristian dɛn. Dɛn bin ɔndastand se da ia de na impɔtant ia we di Baybul bin dɔn tɔk bɔt. Di tin dɛn we bin de apin na di wɔl frɔm 1914 dɔn sho se wetin dɛn bin tɔk kɔrɛkt. Jizɔs bin bigin fɔ rul insay da ia de. (Sam 110:​2) Jɔs afta dat, dɛn bin trowe Setan kam dɔŋ na di wɔl, ɛn na “smɔl tɛm nɔmɔ lɛf” fɔ Setan. (Rɛvɛleshɔn 12:​12) Insay di nɛks chapta, wi go lan bɔt mɔ tin dɛn we de sho se wi de insay da tɛm de. Wi go lan bak se i nɔ go te igen Gɔd in Kiŋdɔm go mek shɔ se wetin Gɔd want bi na di wɔl.—Luk Ɛndnot 22 na pej 217.